Read Lautu Chin Marka 12 Bible Online

Marka 12 - Lautu Chin bible

Marka 12

¹Cakhutaa Zingsuv ta pakhing-puonabie ta iema'a lie kha a ri, “Cawsaa pakha ta mingsuv diedung a mang te, piehu padung te, mingsuv nawna khue kha a cu, rie vena tluophie zaw kha a due. Cakhutaaca a mingsuv diedung ca rehrietuv tie kha pahlie yite khy a tlaw se.

²Mingsuv lu tiy aa de tiyta a siipaapa kha pathlie te a vyipa chung taata ama a hmung riypa kha a va pala sa.

³Cuorasala ama kha patuv yite ama tuv khu taata khaapahmuo pi li pata ama pathlie.

⁴A siipaapa a hrangpa pakha a pathlie pakhaa, rehrietuv tie ta a luv lie kha tuv yite nangzaahmiechi pata ama tue.

⁵Cakhutaata a hrangpa pakha a pathlie ca capapaa ca ama thie. A hrangpa tie zaw kha cahaa cata tue diy yite, chekha ama tuv, chekha ama thie.

⁶Pathlie riypa pakha a hnyi kaliepa ca a due hringhruopa a saacapaapa ta a cuo. A hnangcawce ce taca a saacapaapa kha pathlie te, ‘I saacapaapa hing ca ama hmiezaa ngiethie aa,’ a ta.

⁷Cuorasala diedung rehrietuv tie ca pakha hne pakha kha, ‘Ama hing na a rucutuv ta a cuo. A vaw tie ung, thie'a ungpuv, cacuokiena a ru bangkhuo hing kiema huopa ta a cuo aa,’ amaa ta.

⁸Cacuonakaw patuv yite ama thie khu taata a riy kha diedung khungthing luo ama thaw.

⁹Cakhutaacata, diedung a hnyituvpapaa ta khaapana a tue thlu'a mang nama ta ma? a ta yi. A vaw'a te a thie diy khu taayita a diedung kha a hrangpa tie'a luo a pahlie'a yi.

¹⁰Caapathepa chunglie ta: Ing a satuv tie ta ama thawpa alung ca ingkiy lung tana aa li.

¹¹Capa ca Abyipa ta ma ming hmungna lie a tuepa hmang cuote, nang uo na a chiy hringhruo, tapata aa cape pakha ri buo va ung cama? a ta yi.

¹²Hing pakhingpuonabie hing kiema muo malie a tapasue ta tapa kha ama pachang tiyta, ama patuv khing raalaa ca cawsaazaapuv kha ama ciy. Cacuonakawta ama kha thuse yite ama cakuo.

¹³A ripa bie ta pa-uo the riypata Farasi ming chekha hne Herod cawsaa chekha kha Zingsuv'a luo ama pathlie.

¹⁴Ama'a luo kha a vaw yite, “Saya, nama ca aa hmuopa kha a ripa na cuo, cawsaa aa ne aa suo thleduo vaciy, a kuo ta a daa vaciy, Khazing luopuv kha aa hmuopa haata na pacuv. Rom siepahruopa ngukhyi pipa hing ma phungbie ta a pa-aw ma? pa-aw vama? Ngukhyi ma pi'a ma, pi'a va pama,” ama ta.

¹⁵Zingsuv ta a phahruo amaa cuo pakhipa kha pachang te, “Khaapanakawma ina dyapasya ungciy? Denarii phiekha kha vya cyi ungla mang'a ang,” a ta yi.

¹⁶Suokha kha vya cyi yite, “Ama hing ahung hmiechang hne ahung ming ma a cuo?” a ta yi. “Siepahruopa hmiechang hne ming,” ama ta.

¹⁷Zingsuv ta, “Siepahruo huopa kha siepahruo ca pi ungla, Khazing huopa kha Khazing pi tie ung,” a ta yi. Zingsuv cunglie kha ama nang dyi a uo thluo.

¹⁸Thiyna taata thupakhaanapa a zang lipa tie, Sadusi ming chekha Zingsuv'a luo a vaw yite,

¹⁹“Saya, Moses ta malie a capepa siypa ca: ‘cawsaa pakha ta saata hnyi li pata a napuvnung kha a thiyse biephung kieca, a thiypa uvnupa khata a thiypa a uvnupa cuota saata sa riypata nunghlyinung kha aa hlaw aa,’ ta tah a cuo.

²⁰Uvcanu pasariy aw yite, a pakhanapapaa ca napuv chiy te saata hnyi li pata a thiy.

²¹Cakhutaata a pahningnapapaa ta canungnung ca a hlaw te saata hnyi li pata a thiy ra. A pathungnapapaa zaw kha cahaa cata cuote,

²²ama pasariy chunglie pakha tahmuo saata hnyi li pata ama thiy diy. A hnangcawce ta canungnung zaw kha a thiy ra.

²³Thupakhaana ning thueta ahung napuv tama a cuo aa, ama pasariy yalya ta ama kha amaa hlaw diy,” ama ta.

²⁴Zingsuv ta, “Caapathepa cuose, Khazing cahrana cuose nama pachang lipa hingna nama paanapa ta a cuo cuo vama?

²⁵Athiypa tie pathu pakhaapa ama cuo thue ca avuoming haata cuo'a yite, a chiy a hie'a va tli yi, vuoruo lieta avuoming khiyna ama lu aa.

²⁶A thiypa tie thupakhaana kawlieta, Moses caa-uv chunglie ruohraw a kuonapa kawlie kha Khazing ta khaapama a ri tapa kha ri buo va ung cama? ‘Kama ca Abraham Khazing, Isak Khazing, Jakob Khazing tana i cuo a tapa kha.

²⁷Ama ca a hringpa tie Khazing cuote a thiypa tie Khazing cuo vyi. Nama paa karuv!” a ta yi.

²⁸Phungbie saya pakha ca a vaw te bie amaa ipa kha a thyi yi. Zingsuv ta ama bie hiehriypa a palie thesapa yi kha a hmung tiyta, “Nawbie palang hrawlie ta khaapa hingma a biepuv ce?” tapata a hiehriy.

²⁹Zingsuv ta, “A suokhanapa ca: ‘Israel ming zaw, Naa thlie tie ung! Abyipa ma Khazing pakha kyalya hingna Abyipa ta a cuo.

³⁰Abyipa na Khazing hing na pathiy na palung yalya, na hringna yalya, na ruena yalya hne na cahrana yalya ta due tie.’

³¹A suohningna ca: ‘Nama hne nama naa duepa haata na ingpaa kha due tie,’ tapata a cuo. Capa nawbie suohning laa cata a le viepa suokha hmuo aw vyi,” a ta.

³²Phungbie sayapa ta Zingsuv kyihuo ta, “Naa hmuo, Saya! Na ripa ca aa hmuo, Ama dyi hingna a cuo, ama hlyitaw taata a hrangpa aw va tli.

³³Khazing hing ma pathiy ma palung yalya hne ma thesingna yalya hne ma cahrana yalya hne ma due riypa'a nata kiema maa due pahaata ma ingpaa ma due ra riypa hing sahring kha myi ta rue pata bienapa hne a hrangpa hriykhung a ri napa palang laata a pha vie” a ta.

³⁴Zingsuv ta hingpapaa biepaliena a pha zya a hmung tiyta, “Vuoruo pena hneta a hlasa vaciy,” a ta. Cakhutaataca Zingsuv bie hiehriy riypa kha ahungtahmuo a nguo va tli yi.

³⁵Zingsuv ta Biena-ing chunglie a pacuv ning yi kha, “Khaapanakawma phungbie saya tie ta Messiah[25] ca David saacapaa tana a cuo, ama ta the?

³⁶Thlaapa Pathe ta David mamaa kha pari sa te, Abyipa ta i Byipaapa kha Na carie zaw i phyipazaa rawlie i chi hluo li yi I cacuo kuo luo hingta a tu tie, a ta.

³⁷David mamaapa ta ama kha, ‘Abyipa,’ a ta kieca tuokhaatama Messiah ca David Saacapaa ca a cuo the aa?” a ta. Cawsaazaapuv ta Zingsuv bie kha palung thusa pata naa ama thlie.

³⁸Zingsuv ta a pacuvna lie yi kha, “Phungbie saya tie kha a raaring tie ung. Chadawtluo lie kha ama buohryipasiypa hne a khie pata cawsaa ta pa-uvsathyina hne bie amaa chang riypa kha a tlechuopa tana ama cuo.

³⁹Apungna-ing thude phacepa lie hne pyi chung pa-uvsathyina hmang lie a tupa kha ama tlechuo.

⁴⁰Nunghlyi tie kha ning baa yite ama ing te kha ama chuv, ale luo taata mang a ngie riypata thlaa kha a syisa ta ama chuo. Malie laata a pasa viepa duotena na ama hmung aa,” a ta.

⁴¹Zingsuv ca Biena-ing sue pathlana kielie kha a tu te, cawsaa zaw tuokaa ama pathlapa kha a mang. A hnyirungpa a hluvpuv ca tuokaa a hluvsa ama pathla.

⁴²A siypasapa nunghlyinung kha a vaw te thiyhringtuokaa piehning a pathla ra.

⁴³Zingsuv ta ziytuv tie kha ku yite a changpa yi ca, “Biehmisi tana ica chang yi: hing siypasanung nunghlyinung hingna malie laata tuokaa a hluv vie sue thingkaw luo a pasuo,” a ta yi.

⁴⁴Malie ca ama hnyi hlyipa khana ama pasuo, cuorasala hingpa nung hingca a siy a pasasa raalaa pata a hnyipa bangkhuo kha a pasuo, a hringna riypa khana a pi diy,” a ta.