Read Lautu Chin Marka 14 Bible Online

Marka 14 - Lautu Chin bible

Marka 14

¹Hingpa hing Lawsena pyi hne Thiynung phuv lipa Viechuo pyi hluo ta ninghningna lie khata a cuo. Tluobyi lepa tie hne phungbie saya tie ta Zingsuv kha a paruvta tah patuv riypa hne thie riypata khue ama khuo.

²“Pyi chung hingta ca tue'a va ungpuv, cawsaa zaw na hnaa a pahnaw sue'a yi,” ama ta.

³Zingsuv ca Bethani khypa Simon, caahminghmaa[28] ta a pasapapaa ing lie a aw ning kha canungnung pakha a vaw te alabaster ungthyi zungkha ta a muo ruv ciemuopa ziyhmyi kha vya cyi te capa ungthyi ca a tuvchi khu taata ziyhmyi kha Zingsuv luv lie a bya.

⁴Capa lie a awpa cawsaa chekha ta hihaasa pata pakha hne pakha kha, “Capa ziyhmyi puohrie ryarya ca!

⁵Denarii[29] zathung laata a hluv vie ta zaa khu riypa puv! Zaa sala a siypasapa tie kha bya yi sala pha vie vama?” ta yite cawsaanung kha khuopuv ta ama mawchie.

⁶Cuorasala Zingsuv ta, “Amata tah aw se! Khaapanakawma nama pataw nama pahrie? Kama cuota a phasapa hne a puvthesapa re na a hrie.

⁷Siypasa tie ca nama aw hne pari aa, namaa bya khing ning namaa bya khu pari aa, cuorasala kama ca cipari ta na aw hne'a va ungciy.

⁸Hingpa nung hingta a tue khupa kha a tue mangtli; paby na cuo a pha hluo ta i pangpa kha ziyhmyi bya te a tingtuo mangtli.

⁹Zingsuv ta, “Biehmisi tana ica chang yi: chuelyi khy ting Thuophaabie ama changnapa bangkhuo lie hingpa nung a tuepa hmang hing ama maw lina pata ama rile pari aa,” a ta.

¹⁰Ziytuv hlyihning lie pakha a cuopa Judas Iskariot ca Zingsuv lyi riypata tluobyilepa tie'a luo kha a vaa.

¹¹A ripa kha ama thyi pahne ta ama palung tluosa te tuokaa pi riypata bie ama kuo. Cacuonakawta Zingsuv lyi riypata aa raw cepa cuo kha a bya.

¹²Thiynung phuv lipa Viechuo pyi a ning kha ning, Lawsena pyi saduona cuota tuvtaata ama thie ning kha, ziytuv tie ta Zingsuv kha, “Lawsena pyi saduonapa cuota khaapa lie va tingtuo yi se tapa ma malie na khing? ama ta.

¹³Cacuonakawta Zingsuv ta ziytuv tie pahning kha pathlie yite hinghaahingta bie a cuung yi: “Khypuv chung luo kha vaa ungla bi ta tiy a vya phyalepapaa kha namaa taw aa.

¹⁴Capapaa ca paziyle ungla a vaa ngienapa ing a hnyituvpapaa kha, “Saya na, khaapa khuo hingma naa ziytuv tie hneta Lawsena pyi sa ma ningna riypata a cuo? a ta, va ta tie ung,” a ta yi.

¹⁵Ama ta a cung duo ingkhuo kusapa, chechiy tlingsa pata ama pachie ciepa khuo kha aca pahmung'a yi. Capa lieca zuosa dungpakhawnapa ca va pachie tie ung,” a ta yi.

¹⁶Cacuonakawta ziytuv tie ca khypuv chung luo kha vaa yite, Zingsuv ta a changpa dadang haakhata va hmung yite, capa lieca Lawsena pyi zuosa kha ama pachie.

¹⁷Zuoluo ca ziytuv tie hne khata Zingsuv ca amaa vaw.

¹⁸Cabya lie a tu yite sa ama ning nguoluo ning kha, Zingsuv ta, “Biehmisi tana ica chang yi, niema hrawlie pakha, kama hne sa a ning hnepa ta ina lyi'a ungciy,” a ta yi.

¹⁹Ziytuv tie ca ama ngie chi te pakha hnang pakha ta ama kha, “Kama taca cuo va ang nuo?” ta yite ama hie hriy.

²⁰Zingsuv ta, “Niema hlyihning hrawlie ta pakha, kama hne lapakhue khuekha a caphaw hnepa tana a cuo.

²¹Cawsaa Saacapaa ca Caapathepa lie a ripa haata a thiy aa; cuorasala Cawsaa Saacapaa a lyituvpapaa ca khatluv ta aping a suvpa ma a cuo aa! Puv li pata aw hriy sala a cuota a pha vie aa! a ta.

²²Sa ama ning nguoluo ning kha Zingsuv ta viechuo tluokha kha la te thlaa chuo te alawna bie a hluo khu taata, chechi te a ziytuv tie kha a pi yi. “Ning tie ung,” “I pangpa tana a cuo” a ta yi.

²³Cakhutaata panuo zaw kha la te, Khazing'a luo kha alawna bie a hluo khu taata iema kha pi yite ama palang ta ama dang.

²⁴Ama ta, “Hingpa hing biekuona[30] thiyse, cawsaa zaapuv cuota i lyipa i thiy tana a cuo.

²⁵Biehmisi tana ica chang yi: Khazing Pena chunglie mingsuv thaapa i dang hluo li hing mingsuv hing dang pakhaa'a va tli ang,” a ta.

²⁶Hlaa ama sapuo pata Oliv tluocung luo kha ama kie.

²⁷Capa lieca Zingsuv ta, “Nama bangkhuo hingta inaa ruose diy'a ungciy, tahematapakieca Caapathepa chunglie, ‘Tuvkhietuv kha tuvsa'a ang te tuv zaw ca chepatlaa pata ama cuo aa,’ a ta.

²⁸Cuorasala pathu pakhaapa i cuo khu taata nama hmie luo khata Galilee luo i si aa,’ a ta.

²⁹Piter ta, “Iema bangkhuo acaa ruose zaw yi ta kama ca caa ruose buo hluo'a va ang,” a ta.

³⁰Zingsuv ta Piter kha, “Biehmisi tana ica chang: Ata ning, ata zuo hrahring, aa yi hning a khang hluo ta, yi thung te, ina thaw'a ciy,” a ta.

³¹Cuorasala Piter ta a cusa pata a ripa ca, “Nama hne thiy riypa hmuo cuose angla ca thaw'a va ang a ta. Ama bangkhuo ta cahaa cata ama ta ra.

³²Gethsemane ama tapa hmang luo kha a vaw yite Zingsuv ta, “Thlaa i chuo chung hinglie hing zaa tu tie ung,” a ta yi.

³³Piter, Jeim hne Johan kha a chiyle yi. Nangping vuosuona hneta bi te,

³⁴iema kha, “I palung riethyi tuv napa ta i thiy tyalya, lie hing za aw ungla zaa hmung khya ung, a ta yi.

³⁵A cawta va cakuo vie te alyi lie kha a bu te, a cuo khu kieca ruvnaanapa cuo chung taata a law khuna riypata thlaa a chuo.

³⁶“Abba[31], I paa! Na cuota ca khaapa bangkhuo a cuo khu diy. Hing panuo hing kama'a taata la tie; cuorasala kama khingna haata cuo li pata nama khingna haata cuo thluo se,” a ta.

³⁷Vya kaa te amaa zaa hmungpa kha a hmung yi ca; Piter kyihuo khata, “Simon naa hmung ma? Siymaluo pakha chuo a hra khu va cama?

³⁸“A hra ungla, pasupaliyna chung luo nama tla li riypata thlaa chuo tie ung. Pathiypalung ta a khing raalaa zaw ta saapa na a thaa a dyasa,” a ta.

³⁹Zingsuv ca vaa pakhaa te a chuo ciepa haakhata thlaa a chuo pakhaa.

⁴⁰Cakhutaata a vya kaa ca ziytuv tie amaa hmung pakha a hmung pakhaa yi; ama ming hehmuo haw khu lipa yi ta tuokhaatama ma chaw aa tapa zaw pachang vayi.

⁴¹A yi thungnapa a vya kaa taata iema kha, “A hmung ung cate ma namaa pahy nguoluo kalie? Ade buo se! A cuo na a tling tli! Mang tie ung, Cawsaa Saacapaa ca a suepa tie kuv chung luo pipa tana a cuo tli.

⁴²Thu tie ung! cakuo'a ungpuv. Mang tie ung hing, kama naa lyipapaa ca a vya chiy tli hing,” a ta.

⁴³Zingsuv ta bie a ri nguoluo ningta kha ziytuv hlyihning chunglie pakha ta a cuopa Judas kha tlangkhy a vya chiy. Ama hneta tluobyilepa tie, phungbie saya tie hne uvthyi tie'a taata pathliepa, zueziy hne tungbung a cyipa cawsaazaapuv kha ama vya chiy ra.

⁴⁴A lyituvpapaa ta zaapuv kha pamangsana pi yite: “I pahnuopapaa hingna nama patuv khingpapaa ta a cuo aa. Patuv ungla a phata tah kingkaa ungla sikhyi tie ung,” a ta yi.

⁴⁵Cacuonakawta Judas ca a vya chiy tiyta, Zingsuv'a luo kha vaa paluo te, “Saya!” ta te a pahnuo.

⁴⁶Zingsuv ca patuv yite ama cakhiy.

⁴⁷Cuorasala a thaalie a daapa tie chung taa pakha ta a zueziy kha a phie te tluobyi lepa sii kha aa ce ca, a naacakue kha a sa pathla.

⁴⁸Zingsuv ta iema kha, “Zueziy hne tungbung a vya cyi ung cate ma kama ca damie haata patuv riypata namaa vaw?

⁴⁹A ning tating ta biena-ing lie ca pacuv yi ang te niema hne i aw pata na patuv va ungciy. Cuorasala Caapathepa bie ca tling thluo se,” a ta yi.

⁵⁰Ziytuv tie bangkhuo ca Zingsuv kha thuse yite amaa ruo.

⁵¹Satlie pakha, pawruo pangta dyi a buvpapaa khata Zingsuv ca dya a ziyle.

⁵²Ama kha patuv amaa nang nakawta a pang kha thuse te a cahri pata a ruo.

⁵³Zingsuv ca tluobyilecepa ing luo kha a chiy yite capa lie ca tluobyilepa bangkhuo, uvthyi tie hne phungbie saya tie ca amaa zaa hmya.

⁵⁴Piter ca aa hlapuv taakhata dya ziyle yite tluobyilecepa ahmie luo kha a ngie ra. Rieka tie'a lie kha a tu te myi a e ra.

⁵⁵Tluobyilepa tie hne uvtuv byi tie bangkhuo ta Zingsuv kha thie khu riypata a suenapa kha hmung amaa zue, cuorasala suokha hmuo hmung khu vayi.

⁵⁶Tehte hluvpuv ta Zingsuv kawlie kha hangbie ama ri, cuorasala ama bie kha a saw vyi.

⁵⁷Cawsaa chekha a vya daa yite ama a du pata hangbie ama ri.

⁵⁸“Cawsaa kuv ta sapa hing Biena-ing hing pacing diy'a ang te ningthung chung ta cawsaa kuv ta sa lipa biena-ing i sa pakhaa aa, a tapa na ma thyi,” ama ta.

⁵⁹Cuorasala capa lie ca hmuo ama bie a saw ngiethie vyi.

⁶⁰Cakhutaata tluobyilecepa ta iema hmie lie kha a daa te Zingsuv kha bie a hiehriy. “Palie riypa hnyi va cama? Sue aca phawpa yi ca tuokhaata?” a ta.

⁶¹Cuorasala Zingsuv ca a dieta tah aw te palie vyi. Tluobyilecepa cata bie ca hiehriy pakhaa te, “Thluechiypa Khazing Saacapaa Messiah[32] cata na cuo ma? a ta.

⁶²Zingsuv ta, “I cuo, ‘Cawsaa Saacapaa ca Cahrana cacuo luo kuo ta a tupa kha hmung'a ung cate,’ vuoruo amyi hneta aa zuvpa kha nama hmung aa,” a ta yi.

⁶³Tluobyilecepa ta a pang kha thlaa te, “Pachangkhyituv hrangpa a hu va tli puv!

⁶⁴Khazing a duna bie a ripa ca nama thyi. Tuokhaatama nama rue? a ta yi. Iema bangkhuo ta ama ca thiy tluo aa tla tapata sue ama phaw

⁶⁵Iema chunglie chekha ta Zingsuv kha ama paciy ta ama pacha, a ming kha pahruv yite ama tuv. “Ahungma caa tuv, ri pachiy tie,” ama ta. Rievetuv tie zaw ta sikhyi yite ama tuv puole.

⁶⁶Piter ca ahmie lie a aw nguoluopa khata tluobyilecepa changtaapa nung pakha ta a thaa luo kha aa vaw.

⁶⁷Piter myi aa e nguoluo pakha a hmung tiyta, ama kha mangpuo te, “Nama zaw hing Nazarethpa Zingsuv hne a zaa aw pakhawpa tana na cuo,” a ta.

⁶⁸Cuorasala Piter ta a sie te, “Khaapama na ri tapa hing pachang va ang,” ta te a hmiedaw luo kha a pya. Cakhupatahne ta aa a khang.

⁶⁹Changtaapa nung cata capa lie kha hmung te a thaalie a awpa tie kyihuo khata, “Hingpapaa hing iema chung taata pakha tana a cuo!” a ta pakhaa.

⁷⁰Cuorasala Piter ta aa sie pakhaa. A cawta a aw pata a thaa lie a awpa tie ta, “Iema hraw taata pakha tana na cuo hrahring, tahematapakieca Galilee ming tana na cuo,” ama ta.

⁷¹Cuorasala chie a sa te bie aa kuo khu taata, “A kaw nama ri nguoluopapaa hing pachang va ang,” a ta yi.

⁷²Cakhupatahne a yi hningnapa aa a khang. Zingsuv ta, “Aa yi hning a khang hluo ta yi thung ina thaw'a ciy,” a tapa bie kha Piter ca a thyi pakhaa te khuopuv ta a caa.