Read Lautu Chin Marka 15 Bible Online

Marka 15 - Lautu Chin bible

Marka 15

¹Mawdiychie ta tluobyilepa tie ca uvthyi tie, phungbie saya tie hne uvtuv byi tie palang kha a catlisa pata a taw yite khue ama khuo. Zingsuv ca cakhiy yite a dale yite Pilat kuv luo kha ama pi.

²Pilat ta, “Judah ming siepahruo ta na cuo ma?” a ta. Zingsuv ta, “Na ripa haata i cuo,” a ta.

³Tluobyilepa tie ta Zingsuv kha sue a hluvsa ama phaw.

⁴Pilat ta, “Palie riypa hnyi va cama? Khatluv tama sue aca phaw yi tapa hing mang tie,” a ta pakhaa.

⁵Zingsuv ta khaahmuo ri ngiethie va laa te Pilat ca a nang ta a uo.

⁶Lawsena pyi kyry ta Pilat ta thaw a tlapa tie chung taata zaapuv ta ama hiepa pakha kha a pathliepa taw yi.

⁷Capa cuo ning ca Barabbas ama tapa, rie thu ningta cawsaa zaa thiepapaa ca rie a thu rapa a hrangpa tie hne khata thaw ama tla.

⁸Cacuonakawta cawsaazaapuv ca a vya hmya yite Pilat kha iema cuota a tue tawpa haata tue riypata amaa hie.

⁹Pilat ta, “Judah siepahruopa hing ca pathliepa yi ang sala nama khing'a ma? a ta yi.

¹⁰Tluobyilepa tie ta a kuv chung luo Zingsuv ama vya pipa hing i-aw ama hnyi nakawtana a cuo tapa kha Pilat ta a phasa pata a pachang.

¹¹Cuorasala tluobyilepa tie khata cawsaazaapuv kha Barabbas papya hriy riypata Pilat luo hie riypa kha ama pasu.

¹²Pilat ta cawsaazaapuv kha, “Cacuokie Judah siepahruopa nama tapapaa hing tuokhaata tue se tapa ma ina khing ungciy? a ta.

¹³Iema ta, “Vieluo lie thie tie!” tapata khuopuv ta ama khi.

¹⁴Pilat ta, “Khaapanakawma? Khaapa suena ma a tue? a ta yi. Cuorasala, “Vieluo lie thie tie!” ta yite khuo vie ta ama khi.

¹⁵Pilat ta cawsaazaapuv palung kha a patling khing nakawta Barabbas kha a pathliepa yi. Zingsuv ca sungpe ta a chi khu taata vieluo lie thie riypata a pi yi.

¹⁶Rieka tie ta Zingsuv ca muokiy byipa ahmie luo kha a ngiekhyi yite ama rieka phuv viesaa bangkhuo kha ama u ra.

¹⁷Zingsuv ca pangsepa kha pabuv yite ahling ta lakhuv kha phie yite a luv lie ama pakhuv.

¹⁸Saluo pi yite, “Judah siepahruopa na chuo syi mangsue!” ama ta.

¹⁹Asung ta a luv lie kha chi yite, ama paciy ta ama pacha, a hmiekunglie ama pakhuv pane yite amaa bie.

²⁰Ama tue hyalya khu taata a pang sepa kha hlepa yite ama a caw kha ama pahryi pakhaa. Cakhutaata vieluo lie thie riypata ama sikhyi.

²¹Khyta taata khypuv luo a vaw te amaa thaa lie a vya cakuolepa, Sairin khy ming, Alekzandar hne Rufas paa, Simon kha hruohra pata hripuo yite Zingsuv vieluo ca ama papuv sa.

²²Zingsuv ca Golgotha ama tapa hmang luo kha ama phakhyi (Golgotha a siyluo ca luvruv hmang tanapa tana a cuo).

²³Capa hmang lieca mura hne ama pyapa mingsuv tiy kha pi yite dang khing vyi.

²⁴Cakhutaata ama ca vieluo lie kha thie yite, a caw kha vyisung a da yite amaa re.

²⁵Vieluo lie ama thiena cuo ca maw siymaluo pacaky cuo lieta a cuo.

²⁶Ama sue ama phawnapa caa ca, “Judah Siepahruo,” ta tah a cuo.

²⁷Damie tie pahning kha Zingsuv cacuo luota pakha, a cavyi luota pakha vieluo lie ama taa ra.

²⁸[33] (Cahaa cata Caapathepa ta, “A suepa zaw hrawlie ripuopa ta a cuo,” a tapa ca a tling.)

²⁹Luo lie a vya cakuolepa tie ta ama pahnyisue, ama luv chysue yite, “Biena-ing kha pacing diy pata ningthung ta palang a tingpapaa,

³⁰nama hne nama kha a khuo la vieluo cung taa kha za cung tienie!” ama ta.

³¹Cahaa cata tluobyilepa tie hne phungbie saya tie zaw ta Zingsuv kha pahnyisue yite, “Malie dyi khuo yite, ama hne ama ca a khuo khu vyi.

³²Israel ming siepahruo Messiah[34] ca ata hing ta vieluo cung taata za cung sala muo, hmung'a pate ma zang'a ta, amaa ta. Vieluo lie ama taa rapa pahning tie zaw khata ama pahnyisue ra.

³³Ningchungkhingkhuo taata zuoluo siymaluo pathung te alyicung kaakaapa ta zingna a tlung.

³⁴Zuoluo siymaluo pathung lie kha Zingsuv ca, “Eloi, Eloi, lema sabakthani? ta te khuopuv ta a khi, a siyluo ca, “I Khazing, I Khazing, khaapanakawma ina thaw ciy,” tanata a cuo.

³⁵A thaa lie a daapa chekha ta thyi yite, “Naathlie tie ung, Elijah na a u,” ama ta.

³⁶Cawsaa pakhapapaa ca a ruothaw te pangcaw kha mingsuv tiy thuepa lie a naw khutaa, aarasung daw lie kha ciypuo te Zingsuv hmya lie kha a kya tuv. “Huo pachiy ung, ama kha vieluo cung taata pachung riypata Elijah ca a za cung ma tapa kha mang pachiy'a ungpuv,” a ta.

³⁷Zingsuv ca khuopuv ta khi te a huv a ci.

³⁸Biena-ing chunglie ama pangzu ca a luv taata a lie te chehning ta aa che.

³⁹A hmiepachaw pata a daapa riebyipapaa ta Zingsuv a thiyna zya kha a hmung tiyta, “Ama paa hing Khazing Saacapaa hmisi tana a cuo,” a ta.

⁴⁰Capa lieca luohlaa taata a suopa canung chekha zaw ama aw. Iema hrawlie ca Mary Magdalin, Jeim a syi viepa hne Joses ama nung Mary hne Salome zaw ama aw ra.

⁴¹Zingsuv Galilee lie a aw ning kha za ziy yite zaa mangsang tawpa ama cuo. Jerusalem taata a khawpa a hrangpa canung a hluvpuv zaw capa lieca ama aw ra.

⁴²Sabbath hluo ta ningkhanapa, a tingdawna ning zuoluo a vya chiy tiyta,

⁴³bierituv uvthyi zaw hrawlie ta ama pa-uvsathyipa pakha, Khazing penapa a za tlung riypa a huo nguoluo papaa, Arimathea khypa Josef ca riephasa pata Pilat kha a ngie chiy te Zingsuv riy kha a hie.

⁴⁴Pilat ca Zingsuv a thiy tli tapa kha a thyi tiyta khuopuv ta a kharue haa te, riebyipa kha u te a thiyna taata a syi tli ma tapata a hiehriy.

⁴⁵Riebyipa'a taata a thiy tli tapa bie a thyi khu taata Josef ca a riy kha a pi.

⁴⁶Josef ta pawruo pang zungkha calyi te a riy kha pachung te a pahlaw khu taata alung ama ryipa thluo chunglie kha a paby. Cakhutaata lungkhaakhuv ta thluokhuepakaa ca a khaa siy pakhaa.

⁴⁷Mary Magdalin hne Joses nung Mary ta khaapalie ma ama paby tapa kha ama hmung.