Read Lautu Chin Marka 2 Bible Online

Marka 2 - Lautu Chin bible

Marka 2

¹Ning a cawta a ru khu taata Zingsuv ca Kapernaum luo kha kaa te, ing lie a awna kaw kha a pathuo.

²Cawsaa a hluvpuv amaa vaw nakawta ing chung luo ri li pata ingle lie hmuo awna hmang a patlaw vayi. Zingsuv ta phung a chang nguoluo ning yi kha

³cawsaa papaliy ta a pakyapapaa kha a vya puvle yite Zingsuv'a luo amaa vawkhyi.

⁴Cawsaa ama chaa tuv nakawta ama'a luo kha vya chiykhyi khu vayi. Cacuonakawta Zingsuv awna a dadaw thlungkhuv kha za pahaw yite cawsaapapaa ca a zienapa pangphaa hne khata ama za pachung.

⁵Zingsuv ta ama zangnapa kha a hmung tiyta a pakyapapaa kha, “I sapaa, na suena ca a ngiethe pata a cuo,” a ta.

⁶Capa lieca phungbie saya chekha tie a tu ra yite ama palung chunglie kha,

⁷“Khaapanakawma hing cawsaapa hing hinghaahingta bie a ri? Khazing na aa du! Khazing pakha dyi camuo suena a ngiethe khutuv a cuo ta, ama ta.

⁸Zingsuv ta khaapama ama rue tapa kha a palung chunglie a pachang paluo nakawta iema kha, “Khaapanakawtama cahaa cata nama rue?

⁹A pakyapapaa kyihuo hingta, ‘Na suena ca a ngiethe patana a cuo’, tapa ma a na vie, ‘Thu la na pangphaa kha a la la cakuo tie’ tapa ma a na vie?

¹⁰Cuorasala Cawsaa Saacapaa ca sue a ngiethe khuna naw a hnyi tapa hing nama pachang riypata, ta te a pakyapapaa kha,

¹¹“Ica chang, thu la, na pangphaa kha a la la ing luo cakuo tie,” a ta.

¹²Cawsaapapaa ca thu te a pangphaa kha a catlisa pata a la te ama hmiekunglie kha a pya. Ama bangkhuo ta ama nang uo hringhruo te Khazing kha ama pathuosa. “Hinghaapa hing za hmung buo va de puv,” ama ta.

¹³Zingsuv ca riyliy kie luo kha a kaa pakhaa. Cawsaa bangkhuo ta a vya hmyasue yite a pacuv yi.

¹⁴A cakuo puole pata Alfeas saacapaapa Levi kha ngukhyi a khyi napa zung lie aa tu nguoluo pata a hmung. Zingsuv ta, “Na ziy tie,” a ta ca thu te a ziyle paluo.

¹⁵Zingsuv ta Levi ing lie zuosa ning riypata aa tu ning kha ngukhyituv tie hne a suepa a hluvpuv ca Zingsuv hne ziytuv tie'a lie kha amaa tu ra.

¹⁶Farasi ming phungbie saya tie khata ngukhyituv tie'a nata a suepa tie zaw hneta Zingsuv sa a ning hne pakha ama hmung tiyta ziytuv tie kha, “Khaapanakawtama ngukhyituv tie'a nata a suepa tie zaw hneta sa a ninghne?”[7] ama ta.

¹⁷Zingsuv ta thyi te iema kha, “A tluopa cawsaa ca siybyi a hu vayi, cadyiseca a pasapa tie taca amaa hu; kama ca aa dangpa tie ku riypata a vaw va ang, a suepa tie ku riypatana i vaw”, a ta yi.

¹⁸Johan ziytuv tie hne Farasi ming ca sa ama uv. Cawsaa kha Zingsuv'a luo a vaw yite, “Khaapanakawma tiynawtuv Johan ziytuv tie hne Farasi ming ca sa uv yite nama caa ziytuv tie hing uv li pata ama aw? tapata ama hiehriy.

¹⁹Zingsuv ta iema kha, “Napuv chiyna pyi luo kupa tie ca nungchiytuv satliepa iema hne a aw chung ta sa ama uv the'a ma? Uv the'a vayi. Nungchiytuv satliepa iema'a lie a aw chung bangkhuo ca sa uv the'a vayi.

²⁰Cadyiseca nungchiytuv satliepa kha iema'a taata ama lana ningcuo vya pha'a te, cathue cata ama uv'a lie.

²¹“Ahungtahmuo cawthaapa ta buohryi cawpa kha a bie thla buo vayi. Ama thla kieca cawthaapa khata buohryi cawpa kha thlaa lue tyly'a te a tlaa hryly aa.

²²Ahungtahmuo mingsuv tiy ahrang kha savangbaw hlungpa lie raw buo vayi, ama raw kieca mingsuv khata savang kha ning chi'a te, mingsuv hne savang hne khata ama ra diy aa. Mingsuv tiy ahrang ca savangbaw thaapa lie khana ama raw,” a ta.

²³Luo kha ca Sabbath ning ta Zingsuv hne ziytuv tie ca lu kha cahrawpaale yite ama si. Ama sipuo luota ziytuv tie khata sa-uv kha ama pahriy puole.

²⁴Cacuonakaw Farasi ming ta Zingsuv kyihuo khata, “Mang tie, khaapanakawma Sabbath phungbie ta a thlupa kha ama tue?” ama ta.

²⁵Ama ta iema kha, “David ta ama hne a hnangziytuv tie ning riy hnyi li pata ama nang a diy ning ta kha khaapama a tue tapa kha ri buo va ung cama?

²⁶ Khazing ingchung luo a ngie te ahunghmuo ning riypata phungbie ta a pa-aw lipa, tluobyi tie dyi ning riypa, Khazing ama pacuopa viechuo kha ning te a viesaa zaw a pipa yi kha. Capaca Abiathar tluobyilepa a cuo ningta a cuo kha,” a ta yi.

²⁷Cakhutaata, “Sabbath ca cawsaa cuota sapa cuote cawsaa hing Sabbath cuota sapa cuo vyi.

²⁸Cacuonakawta Cawsaa Saacapaa ca Sabbath Byi tana a cuo, a ta yi.