Read Lautu Chin Marka 3 Bible Online

Marka 3 - Lautu Chin bible

Marka 3

¹Zingsuv ca apungna-ing luo kha a ngie pakhaa te capalie ca a kuv a pakyapapaa kha a za aw.

²Zingsuv kha ama pachie khing nakawta Sabbath ning ta hing a vya patluo sa ma vya patluo sa vama tapa kha ama mangkhuo.

³Zingsuv ta cawsaapapaa kha, “Hmie luo hing vya pya,” a ta.

⁴Cakhutaata cawsaazaapuv kha, “Ma phungbie ta Sabbath ning hing hmangphapa tue riypa ma malie a pa-aw ruvnaana pi riypa ma? Hringna khuo riypa ma thie riypa? a ta yi.

⁵Cuorasala khaahmuo palie vayi. A hihaasa pata mang yite, ama palung lena zya kha a hmung tiy yi ta a ngie a chi. Cawsaapapaa kyihuo khata, “Na kuv kha vya pazuo,” a ta. Vya pazuo te a kuv ca a tluo.

⁶Cacuonakawta Farasi tie ca apungna-ing taakhata pya yite Herod cawsaa zaw hne khata Zingsuv para riypa kha khue ama khuo.

⁷Zingsuv hne ziytuv tie ca riyliy luo kha vaa yite cawsaa hluvpuv ta ama ziy.

⁸A hmang tuepa thuohlaa kha ama thyi nakawta Judea ruo, Jerusalem khy, Idumea pe, Jordan huesuo ruo, Tair hne Sidon khypuv cahriy, taata cawsaa hluvpuv ama'a luo kha amaa vaw.

⁹Cawsaa ama hluv hringhruo nakawta naa vya nuosue khu'a kie yi tapata Zingsuv ta ziytuv tie kha sawkawpalaw suokha na pachiepa pacie tie ung, a ta yi.

¹⁰Cawsaa hluvpuv patluo sa yite a pasapa bangkhuo ta ama kha taw riypata a nuo ta amaa nuosue.

¹¹A pyalyipa thlaapa aa hryipa tie ta ama kha ama hmung pahne ta a hmie lie kha a bu yite, “Nama ca Khazing Saacapaa tana na cuo,” ta yite khuopuv ta ama khi.

¹²Zingsuv ta ahungma a cuo tapa kha ahunghmuo pachang sa li riypata a cusa pata bie a taa yi.

¹³Cakhutaata Zingsuv ca tluocung luo kha kie te a ku khingpa tie kha ama'a luo a ku yi.

¹⁴Ama ta lucuotuv tapata ming a dipa hlyihning tie kha ama'a lie aw riypa, phung ri riypa hne

¹⁵khachie papya khuna naw zaw hnyi riypata a tlaw yite re a pi yi.

¹⁶Aa tlawpa hlyihning tie ca: Simon (Zingsuv ta Piter tapata ming a dipa);

¹⁷Zebedi saacapaapa tie Jeim hne a nuta Johan (Zingsuv ta Boanerges tapata ming di yite, a siyluo ca Paci saa zaw tana pata a cuo);

¹⁸Andru, Filip, Bartholomew, Matthai, Thomas, Alfeas saacapaapa Jeim, Thaddaius, phang a cuotuv Simon hne

¹⁹Zingsuv a lyituv Judas Iskariot ta ama cuo.

²⁰Cakhutaata Zingsuv ca ing luo kha aa diy. Cawsaa ta amaa vya hmyasue pakhaa nakawta Zingsuv hne ziytuv tie ca sa hmuo ning the vayi.

²¹Cawsaa ta, “A ngaa tli ne,” ama tapa zaw kha a chungkhue tie ta thyi yite ama kha thlu riypata ama vaa.

²²Jerusalem taata a zuvpa phungbie saya tie ta, “Beelzebul na a hryi, capa khachie byipa ming catana khuevuo tie a papya yi,” ama ta.

²³Cacuonakaw Zingsuv ta iema ca ku yite pakhingpuona ta a chang yi. “Tuokhaatama Setaa ta Setaa ca a papya khu aa?

²⁴Ruo ruokha ca a phuvphuv ta a che te iema'a na iema kha amaa du kieca capa ruo ca a daa khu'a vyi.

²⁵Ingchungkhue khuekha zaw a phuvphuv ta a che te iema'a na iema kha amaa du kieca a daa khu'a vyi.

²⁶Cacuonakawta Setaa pena ca a phuvphuv ta aa che kieca a hmang khu'a vyi, ra'a te a vie aa.

²⁷Cuorasala cawsaa thaaruvpapaa kha a kuv a phyi ciy taa li pata ahunghmuo a ingchung luo a ngie pata a chechiy kha la nguo'a vayi, ama ciy taa kiedyi na ama chuv nguo aa,” a ta.

²⁸“Biehmisi tana ica chang yi: Cawsaa hing ama suena hne Khazing a duna bie pha lipa ama ripa bangkhuo kha a ngiethe khu ama cuo aa.

²⁹Cuorasala Thlaapa Pathe a du pata bie pha lipa a ripa ca a ngiethe khupa cuo'a vayi; tahematapakieca chuozaa a hmangpa suena na ama tue,” a ta.

³⁰“Thlaapa chiepa na a hryi,” ama ta nakawta Zingsuv ta hinghaahingta a tapa yi ta a cuo.

³¹Cakhutaacata a nung hne a nuta zaw kha a vaw yite, ingle lie ta a daa yite cawsaa kha ama paku sa.

³²Zingsuv ca cawsaazaapuv khata cadung yite, “Na nung hne na nuta hne na sieta[8] zaw ta caa taw khing yite ale liena aca huo yi,” ama ta.

³³Zingsuv ta, “I nung hne i nuta zaw ca ahungkhama a cuo yi?” a ta.

³⁴A thaalie a tucadungpa tie kha mang yite, “I nung hne i nuta zaw ca lie hing ama aw hing!

³⁵Khazing khingna a tuepa tie ca i nuta, i sieta, hne i nung tana ama cuo,” a ta yi.