Read Lautu Chin Marka 4 Bible Online

Marka 4 - Lautu Chin bible

Marka 4

¹Zingsuv ta Galilee riyliy kielie kha a pacuv pakhaa yi. A cahriy lie a cadungpa kha ama hluv tuv nakawta sawkawpalaw chung luo kha a ngie te aa tu; zaapuv ca ngiekuo lie kha amaa tu.

²Pakhingpuonabie hmuo pata hmang hluvpuv kha pacuv yite a ripa ca:

³“Naathlie tie ung! Cawsaa pakha ca saciy vaa repa ta aa thu.

⁴Saciy kha a vaa tiyta, chekha ca luopuv lie kha tla yite pavaa ta amaa haa.

⁵Chekha ca lungdaapa, alyi a paana lieta tla te a kya daa paluo.

⁶Ning kya chiy te sadaa panu taca a e pahne ta a hruo aa thuv li nakawta acaa diy paluo.

⁷Saciy chekha ca ahling hrawlie tla te ahling ta a kalaa nakawta thyipaa hnyi khu vyi.

⁸Cuorasala saciy chekha ca lyiphaa lie a tla nakawta kya daa te, le te thyipaa ama hnyi: chekha le sawthung, chekha le sawcaruv, hne chekha ca le zakha te ama vyi,” a ta.

⁹Zingsuv ta, “Thyina riypa naa a hnyipa ca, thyise,” a ta yi.

¹⁰Zingsuv ama seta a aw ning kha, ziytuv tie hne a thaa lie a awpa a hrangpa tie khata pakhingpuonabie siyluo kha ama hiehriy.

¹¹Zingsuv ta, “Khazing Pena bieparuv ca pi pata nama cuo tli, cuorasala ale lie a awpa tie ca pakhingpuonabie dyi ta pacuv pata ama cuo.

¹²Cacuonakawta, ‘Ie ma ca ama mang raalaa pata hmung'a va yi, naa ama thlie raalaa pata thyipasie the'a vayi. Capaca Khazing'a luo kha amaa vya pali sue li riypa hne ama suena kha a ngiethe ama cuo li riypata a cuo,” a ta.

¹³Zingsuv ta, “Hing pakhingpuonabie hing pachang khu va ung cama? Cacuokie pakhingpuonabie bangkhuo changchiy ca tuokhaatama nama pachang khu aa?

¹⁴Saciy a vaatuv ta a vaapa ca Khazing bie ta a cuo.

¹⁵Cawsaa chekha ca luopuv lieta a tlapa saciy haakhata ama cuo. Bie kha ama thyi tiyta Setaa kha a vaw paluo te ama chunglie saciy kha a lapa yi.

¹⁶Cawsaa chekha ca lungdaapa lie a tlapa saciy haakhata ama cuo. Bie kha ama thyi pahne ta palung tluosa pata ama cuhluo paluo.

¹⁷Cuorasala ama chung luo aa thuvpuv ta hruo a thla li nakawta capa bie kawlieta ruvnaana hne te-angna a aw pahne ta amaa lie paluo.

¹⁸Cawsaa chekha ca ahling hrawlie a tlapa saciy haakhata ama cuo.

¹⁹Bie kha ama thyi, cuorasala chuelyi khysatungbangna kawlie ta palung riethyina, hnyirung khingna, khingna hrang phangphang khata kalaa yite pale sa khu li pata thyipaa hnyi khu vayi.

²⁰Cawsaa chehrakha ca lyiphaa lie a tlapa saciy haata ama cuo. Bie kha ama thyi, cuhluo yite thyipaa kha le sawthung, le sawcaruv, le zakha te ta ama hnyi.

²¹Zingsuv ta, “Myi-ing kha vya cyi te beke rawlie a cuo li kie iehmang rawlie a chipa ama aw buo ma? Myi-ing vuona tung liena ama chi cuo vama?

²²Nupa bangkhuo ca paluohuopa cuo'a te, buvkhungpa bangkhuo ca khena lie pahaw pata ama cuo aa.

²³Naa a hnyipa ca thyi tie ung, a ta.

²⁴A chang kaliepa yi ca, “Nama thyipa kha a phata tah rue tie ung, malie nama patangpa haakhata patangpa pa nama cuo ra aa, a cha hmuo chachiypa nama cuo kalie aa.

²⁵A hnyipa tie kha chachiypa cuo'a yite, khaahmuo a hnyi lipa tie kha ama hnyi ciepa hmuo chuv pata ama cuo aa,” a ta yi.

²⁶Zingsuv ta a ri kaliepa ca, “Khazing pena ca cawsaa pakha ta a lu lie saciy a vaapa hne tana aa lu.

²⁷Zuo ta a zie te a kya thu, saciy ca kya pu te a le, tuokhaatama a le tapa kha pachang vyi.

²⁸Chuelyi ta amata tah sahang kha a papya, hmietaace ta a hnaa panuta kha pakiy te, cakhutaata a paa kya paa te sa-uv a hnyi.

²⁹Sa hrie aa de tiyta, a hrietuvpapaa ta tuokyi kha a la te a uo.

³⁰Zingsuv ta a ri kaliepa ca, “Khazing pena hing khaapa hne tama ma ri pakhing'a ung? A cuo li kie khaapa pakhingpuonabie hmuo'a pate ma ma ri aa?

³¹Vuoruo pena ca uotuo ciy hne tana aa lu. Ama vaa ningta ca alyi lie saciy cawcepa ta a cuo.

³²Ama vaa ca, kya le te uohnaasiyhnaa kung hrawlie a lece pata a cuo. A ce lesapa paka te pavaa zaw kha a ningdiy lieta buv amaa tue khu.

³³Zingsuv ta cahaapa pakhing-puonabie a hluvsa kha hmuo te ama thyi the riypata iema'a lie kha bie a ri.

³⁴Pakhingpuonabie hmuo li pata iema'a lie kha bie ri vyi, cuorasala ziytuv tie hne iema seta ama aw ning kha hmang bangkhuo kha a siesa pata a chang yi.

³⁵Capa ning zuoluo cata Zingsuv ta ziytuv tie kha, “Riyliy huesuo luo hue vaa ungpuv,” a ta yi.

³⁶Ziytuv tie ca cawsaazaapuv kha thuse yite Zingsuv kha a tu pacienapa sawkawpalaw khata ama sikhyi. Sawkawpalaw hrangpa zaw kha a aw ra.

³⁷Thliychie khuopuv ta a hruo te tiylaw ta sawkawpalaw kha chi te vuotaa a tla'a nang.

³⁸Zingsuv ca sawkawpalaw hnang luo kuo ta thude cunglie kha aa zie. Ziytuv tie ta pathu yite, “Saya, vuotaa ma thiy'a nang pahing siysaa malie ri va cama? ama ta.

³⁹Zingsuv ta thu te thliychie kha, “Ahruo kha tie” ta te a chuo, tiylaw zaw kha, “Die!” a ta. Thliy ca die te riyliy ca nesiyliy khata a aw.

⁴⁰Zingsuv ta ziytuv tie kha, “Khaapanakawma nama ciy? Ata te pata zangna hnyi va ung cama? a ta yi.

⁴¹Cuorasala iema ca ama ciypuo ama nang-uopuo pata pakha hne pakha kha, “Hingpapaa hing tuokhaapa cawsaa tama a cuo? Thliychie hne tiylaw hmuona a ri a ngie de yi! amaa ta.