Read Lautu Chin Marka 5 Bible Online

Marka 5 - Lautu Chin bible

Marka 5

¹Zingsuv hne ziytuv tie ca Galilee riyliy huesuo Gerasaa pe luo kha ama va pha.

²Sawkawpalaw chung taata Zingsuv a cung pahne ta thluokung lie a awpa a pyalyipa thlaapa ta aa hryipa cawsaa pakha ta aa vya taw.

³Thluokung lie khy a sapa ta cuote ahungtahmuo hre khu vayi.

⁴A kuv hne a phyi kha thaabuoliriy ta yi hluvpuv ama cakhiy, cadyiseca thaabuoliriy kha chipachung diy te ama cakhiynapa kha a ca ang patlaa diy. Ahungtahmuo hri khu vayi.

⁵Chung hne zuo hne thluokung lie hne thluo cunglie kha khi-ule te alung kha aa pa-uo sale.

⁶Luohlaa taata Zingsuv a vya hmung pahne ta a vya ruo te a phyi thabaw lie kha a vya bu te,

⁷“Cungnungce Khazing Saacapaa Zingsuv! Tuokhaatama ina tue khing ciy? Duo na te thi kha tapata Khazing ming ta paa ica kie”, tapata khuosa ta a khi.

⁸Hinghaahingta a khinapa ca, Zingsuv ta, “A pyalyipa thlaapa, hingpapaa chung taahingta pya!” a ta nakaw a cuo.

⁹Cacuonakaw Zingsuv ta, “Na ming ahung ma?” a ta. Cawsaapapaa ta, “I ming ca ‘Hluvpuv’ tana i cuo, tahematapakieca a hluvpuv ma ta,” a ta.

¹⁰Capa ruochung taacata a papya li riypa yita Zingsuv kha khuopuv ta paa a kie.

¹¹Capa kiecahriy, tluocung lie kha va a hluvpuv ama tle nguoluo.

¹²A pyalyipa thlaapa tie ta Zingsuv kha, “Va chung luo malie pangie sa thi tie,” ama ta.

¹³Zingsuv ta a ngiena naw a pi yi. A pyalyipa thlaapa tie ca cawsaapapaa chung taacata pya yite va chung luo ca ama vaa ngie. Va thawhning hraw ca lungkuo daw taakhata a zu yite riyliy luo ama tlasa diy.

¹⁴Va a khietuv tie ca a ruo yite capa thuohlaa ca khypuv hne khyta bangkhuo ta ama pathyi sa. Cawsaa kha pya yite khaapama a cuo tapa kha ama va mang.

¹⁵Zingsuv'a luo kha ama va pha tiyta khuevuo ta a zaa hryi tawpapaa kha zaa tu te, caw a tue te lungsingpyata tah a aw pakha ama hmung ca ama thlaa a zangsa.

¹⁶A hmungpa tie ta khuevuo ta a hryipa cawsaapapaa hne va cunglie khaapama a tlung tapa kha cawsaa zaw'a luo kha ama va ri.

¹⁷Cacuonakaw ama ruo taata pya riypata Zingsuv kha paa ama kie.

¹⁸Sawkawpalaw luo Zingsuv a kie pahne, khuevuo ta a zaa hryipapaa khata, nama'a liena i vya si ra aa, a ta.

¹⁹Zingsuv ta bu te, “Ing luo kha kaa hriy la na viesaa tie'a lie kha Abyipa ta khatluv tama nang aca due tapa hne na cunglie a tuepa kaw kha va chang tie yi,” a ta.

²⁰Capa cawsaapa ca cakuo te Dekhapolis ruochung kha tlaw te Zingsuv ta a cunglie a tuepa kaw kha a phu. Cawsaa mekaa ca ama kharue a haa hringhruo.

²¹Zingsuv ca riyliy huesuo luo kha vaa pakhaa te riyliy kielie kha cawsaa hluvsa ta amaa hmya puo.

²²Apungna-ing uvthyi pakha ta a cuopa Jairu ca vya chiy te Zingsuv kha a hmung pahne ta a phyi thabaw lie kha a bu te

²³paa a kie byalya. “I sacanung ca vuotaa a thiy'a nang. Hring'a te a tluo khuna riypata a vaw la a cunglie na kuv vya khang thi tie,” a ta.

²⁴Cacuonakawta Zingsuv ca capapaa hne cata ama cakuo. Cawsaa hluvpuv ta ziy yite ama kha ama hruv ama depaa patlaw.

²⁵Capa lieca thiylang pasana ta kung hraa hlyihning a pasapa canung pakha a aw ra.

²⁶Siybyi a hluvpuv ta za mang yite a hnyipa bangkhuo kha a pachuo diy raalaa pata tluo vie li pata a ruv hryly.

²⁷Zingsuv kaw kha a thyi tiyta cawsaazaapuv hraw taakhata kya pya te Zingsuv pang kha a hrie,

²⁸tahematapakieca ama ta, “A pang chuo kha i hrie kieca i tluo aa,” a ta.

²⁹Sungkha ta a thiy langpa kha a due te a pasana taata a tluo tlipa kha aa pachang.

³⁰Zingsuv ta cahranapa na i chung taata a pya tapa kha aa pachang pahne ta zaapuv'a luo kha a pali te, “Ahungma i pangpe a taw?” a ta.

³¹Ziytuv tie ta ama kha, “Cawsaa hluvpuv ta aca hruvpaa patlaw payi na hmung thluo pata tuokhaatama ahungma naa taw, na ta,” ama ta.

³²Zingsuv ta ahungma a pangpe a taw tapa kha a cahriycake kha mang te a huv.

³³Cuorasala canungnung ta khaapama a cuo tapa kha a pachang nakawta ciysa te a cathangpuo pata a vaw te Zingsuv hmielie ca a pakhuv vya pane te a cuopa bangkhuo kha a chang.

³⁴Zingsuv ta, “I sanung na zangnapa na caa patluo sa. A diesa pata cakuo la na pasana taata va tluo tie,” a ta.

³⁵Zingsuv ta capa bie a ri nguoluo ning kha Jairu ing taata cawsaa chekha a vaw yite, “Na sacanung ca a thiy tli, khaapanakawma sayapa ca riethyi na pi nguoluo ri,” ama ta.

³⁶Zingsuv ta khaapama ama ri tapa kha siysaa ri li pata, Jairu kyihuo kha, “Ciy lieciy, zangna dyi hnyi tie,” a ta.

³⁷Piter, Jeim, hne a nuta Johan ri li pata ahunghmuo a paziy sa li pata Jairu hne khata ama si.

³⁸Jairu ing luo kha ama chiy ca cawsaa kha alyi-avuo za khue patlaw yite khuosa ta ama khipa hne ama caapa kha a hmung.

³⁹Ingchung luo kha a ngie te iema kha, “Khaapanakawma alyi-avuo khue patlaw ung cate nama caa? Haatiynung hing thiy vade, aa hmungpa muo a cuo ta,” a ta yi.

⁴⁰A pahnyi ta ama pahnyi sue. Cacuonakaw Zingsuv ta ingchung taata papya diy yite, haatiynung a nung hne a paa, ziytuv tie pathung hne dyi khata haatiynung awna khuo luo kha amaa ngie.

⁴¹A kuv ta la te, haatiynung kyihuo kha, “Talitha, koum,” a ta. A siyluo ca, “Haatiynung, thu tie,” tanapa ta a cuo.

⁴²Haatiynung ca sungkha ta kya thu te luo a cakuo. (Ama ca kung hraa hlyihning tana a cuo). Capa hmang kawlie cata iema ca ama nang dyi a uo.

⁴³Zingsuv ta hingpa kaw hing ahunghmuo pachang sa'a va ungciy tapata khuopuv ta thlu yite, haatiynung kha ning riypa pi riypata a chang yi.