Read Lautu Chin Marka 6 Bible Online

Marka 6 - Lautu Chin bible

Marka 6

¹Zingsuv ca capa hmang taa cata pya te a puvnapa khy luo kha ziytuv tie hneta ama va pha.

²Sabbath ning takha apungna-ing lie pacuv yite a pacuvna a thyipa a hluvpuv ca ama kharue a haasa. Hingpa bangkhuo hing khaapa taata ma a hmung? Hingpa singna hing tuokhaapa singna tama a cuo? Tuokhaapa cahrana hmang tue khuna ma a kuv ta a tuepa hing! ama ta.

³Ama ca Mary saacapaapa, Jeim hne Josef hne Judas hne Simon tie uvta, lettamaapa kha cuo vama? A sieta zaw hmuota lie hingna kiema'a lie ama aw cuo vama? ta yite siysaa ri li pata ama aw.

⁴Cakhutaata Zingsuv ta iema kha, “Profet ca ama puvna khy, ama tieriy'a nata ama chungkhue lie ta li pata ca pa-uvsathyi li pata aw vayi” a ta yi.

⁵A pasapa chekha cunglie a kuv khang te a patluo sapa yi ri li pata kharuehaa hmang khaahmuo tue khu vyi.

⁶Zangna ama hnyi linapa kha Zingsuv ca a kharue a haa hringhruo. Cakhutaata Zingsuv ca ama cahriy lie a awpa khy luo kha tlaw te a pacuv yi.

⁷Ziytuv hlyihning tie kha ku yite pahning pahning ta a pathlie yi. A pyalyipa thlaapa te khuna naw kha pi yite,

⁸“Khuecahryi ri li pata nama khy tlawna luo kha khaapahmuo a phya kha ung; viechuo cuose, sahrie cuose, tuokaa cuose a phya kha ung.

⁹Cuorasala phanaah kha a pakaw ung, cadyiseca buohryi zunghning ta a hriy kha ung,” tapata bie a taa yi.

¹⁰Ata kaliepa yi ca, “Namaa ngienapa ing lie kha nama pya hluo li ta aw tie ung.

¹¹ Ingtlung caa dapa hne nama bie naa a thlie khing lipa tie kha nama pya se tiyta na ma phyipazaa lie a bepa buvcing kha iema kuo kha luo taata tehte cuo riypata a cakhawsue siy tie ung. Caca ama cuota a raaring pina a cuo aa.

¹²Cacuonakawta pya yite cawsaa kha ama suena taata amaa ngiepachiy riypata phung ama chang.

¹³Khuevuo hluvpuv kha papya yite a pasapa kha chiytiy thuv yite ama patluo sa.

¹⁴Zingsuv thuohlaa ca khy ting ta a pathuo nakawta Siepahruo Herod zaw ta a thyi ra. Cawsaa chekha ta,[9] “Tiynawtuv Johan na thiyna taata a thupakhaa; canakaw catana hinghaapa kharuehaa hmang hing a tue khu, ama ta.

¹⁵Cuorasala a hrangpa tie ta, “Elijah tana a cuo,” ama ta. A hrangpa tie ta, hluoning profet tie haapa profet pakha tana a cuo,” ama ta.

¹⁶Herod ta a thyi tiyta, “Kama ta a luv i za pate sapa yi Johan khana thiyna taata a thupakhaa,” a ta.

¹⁷Herod pangpa ta cawsaa pathlie yite Johan kha a za patuv sa yi, pahre sa yite thaw a pathla. A nuta Filip napuv a cuo thluo pata napuv ta aa tuepa Herodias nakawta a tuepa a cuo.

¹⁸Tahematapakieca Johan ta, “Na nuta napuv ca a hlaw riypa cuo vyi,” tapata a za chang pari.

¹⁹Cacuonakaw Herodias ta a palung ruv ta Johan kha hue te a thie khing. Cuorasala thie khu vyi;

²⁰tahematapakieca Herod ta Johan kha aa dangpa hne a pathepa a cuo pakha pachang te a ciy nakawta a daakhuo. Ama ta Zingsuv bie kha a thyi tiyta a palung a kalaasa raalaa pata a bie kha naa a thlie khingsa.

²¹Cuorasala Herodias ta cuophaa a hmung. Capaca Herod ta a puv ning alawna pyi kha tue te siepahruo chungkhue tie, cuzaa byilepa tie, hne Galilee ruo hruetuv tie sa a duo ning yi ta a cuo.

²²Herodias sacanungnung kha zaa ngie te a luo ca Herod hne a khyche tie kha ama palung a patluo yi. Cacuonakaw siepahruopa ta lesaanung ca, “Na khingpa palang naa hie la ica pi aa,” a ta.

²³Chie aa sa te a tapa ca, “Ina hiepa bangkhuo ica pi aa, i ruo khingkhuo te hmuota ica pi aa,” a ta.

²⁴Lesaanung ca pya te a nung kha a va hiehriy. “Khaapama i hie aa?” a ta. A nung ta, “Tiynawtuv Johan luv,” tapata a palie.

²⁵Lesaanung ca siepahruopa'a luo kha kaa mala te, “Ata hingta tiynawtuv Johan luv kha daa pakhue lieta na pi la tapa na i khing,” a ta.

²⁶Siepahruopa ca a ngie a chi hringhruo, cadyiseca a khyche zaw hmiemang hne bie a kuo ciepa a cuo nakawta i khing vyi.

²⁷Sungkha ta rievetuv riekapapaa ca Johan luv kya cyi riypata naw pi te a pathlie. Riekapa ca thaw-ing luo kha vaa te Johan luv kha a te.

²⁸Daa pakhue ta kya cyile te lesaanung kha a pi. Cakhutaacata lesaanung ta a nung kha a pi.

²⁹Capa thuohlaa ca Johan hnangziytuv tie ta ama thyi pahne ta a vaw yite a riy kha la yite ama paby.

³⁰Lucuotuv tie ca Zingsuv kha cadung yite ama tuepa hne ama pacuvna kaw kha ama chang.

³¹Zingsuv ta, “Nama palang hingta ruoduona luo kha a vaw ungla sungkha a pahy tie ung,” a ta yi. Tahematapakieca cawsaa a lie bungthawpa ama hluv tuv nakawta sa ningna cuo hmuo hnyi vayi.

³²Cakhutaata iemata tah ruoduona luo kha sawkawpalaw ta ama si.

³³Cuorasala cawsaa hluvpuv ta hmung yite, ama pachang nakawta khy ting taakhata vya pya yite ama phyi ta ama si ca iema hluo ta a hmang luo kha ama va chiy lu.

³⁴Zingsuv ca ngiekuo luo cung te cawsaa hluvpuv kha a hmung yi ca a ngiechi hringhruo yi, tahematapakieca iema ca khietuv a hnyi lipa tuv hnetana amaa lu. Caacuonakawta iema kha a hluvsa a pacuv yi.

³⁵Ning a vya ngie viele tiyta ziytuv tie ca ama'a luo kha a vaw yite, “Ruocakung lieta a cuo, ning zaw a ngiesa tli;

³⁶cawsaa hing pathlie yi la a cahriy lie a awpa lu hne khy luo hing ning riypa suokhakha vaa calyi yi se,” ama ta.

³⁷Cuorasala Zingsuv ta, “Niema ta ning riypa suokhakha pi tie ung,” a ta yi. Iema ta, vaa pate ma viechuo kha denarii zahning muo calyi'a pate ma duo'a yi,” ama ta.

³⁸Zingsuv ta, “Viechuo tluo khazaa ma nama hnyi? Va mang tie ung,” a ta yi. Va mang yite, “Tluo pangaa hne ngaa sahning,” ama ta.

³⁹Zingsuv ta cawsaa kha a phuvphuv ta che ungla aphuv cunglie kha patu sa tie ung, a ta yi.

⁴⁰Cacuonakawta cawsaa ca zakha phuv, sawngaa phuv tapata amaa tu.

⁴¹Zingsuv ta viechuo tluo pangaa hne ngaa sahning kha la te, vuoruo luo ang te, alawna bie a hluo khu taata viechuo kha chechi te zaapuv kha re riypata ziytuv tie kha a pi yi. Ngaa sahning zaw kha a pare sa diy yi.

⁴²Ama bangkhuo ta ning yite ama riy a bi.

⁴³Cakhutaata viechuo hne ngaa azungpepa kha ama pakiy ca beke zung hraa hlyihning a bi.

⁴⁴Sa a ningpa capaa thawpangaa ama ta.

⁴⁵Cakhupahne Zingsuv ta ziytuv tie kha sawkawpalaw chung luo pakie sa yite riyliy huesuo Bethsaida luo kha pasisalu yite ama ca zaapuv kha a pathlie taa yi.

⁴⁶Zaapuv a pathlie khutaa yite tluocung luo kha thlaa chuo repa ta a kie.

⁴⁷Zuoluo vya chiy te sawkawpalaw tiyliy khingkhuo luo a chiy ning kha Zingsuv ca ama seta tluo lie kha a aw.

⁴⁸Thliy kha a pali ta aa vya hruo nakawta ziytuv tie ta sawkawpalaw maw amaa nang khyipa kha a hmung tiy yi ta, riyliy cunglie kha cakuo te mawdiy ta iema'a luo kha aa vaw. Iema kha law aa nang yi.

⁴⁹Cuorasala riyliy cunglie a cakuopa kha ama hmung tiyta athlaa ta ri yite,

⁵⁰ama thlaa zang hringhruo te khuo ta ama khi. Cuorasala iema kha sungkha ta chaw yite, “Kama tana i cuo, ciykha ung,” a ta yi.

⁵¹Cakhutaata sawkawpalaw chunglie iema'a luo kha kie te thliy ca a die. Ziytuv tie ca ama nang ta a uo hringhruo,

⁵²tahematapakieca ama palung kha zingtuv te viechuo lie a tuepa kharuehaa hmang kha pachangpasie khu vayi.

⁵³Riyliy ama vya te khu taata Gene-saret lie kha cung yite sawkawpalaw kha ama hre siy.

⁵⁴Sawkawpalaw ama thuse pahne khata Zingsuv a cuopa kha cawsaa ta ama pachang paluo.

⁵⁵Cacuonakawta capa ruochung bangkhuo kha a catli pata si yite a pasapa kha ama pangphaa hne Zingsuv a aw tapata ama thyina hmang luo kha ama vya chiykhyi.

⁵⁶Zingsuv a cakuonapa khyta, khypuv, lu luo hne chadawtluo luo kha a pasapa ca vya chiykhyi yite a pangpeta chuo ama hrie riypata paa ama kie. A hriepa tie bangkhuo ca ama tluo.