Read Lautu Chin Marka 8 Bible Online

Marka 8 - Lautu Chin bible

Marka 8

¹Capa hrawning ngiethie cata cawsaazaapuv kha a vya hmya yite ning riypa khaapahmuo ama hnyi li nakawta Zingsuv ta ziytuv tie kha ku yite,

²“Cawsaazaapuv hing i ngie na ina chi yi, tahematapakieca kama'a lie ningthung aw tli yite ata hing ning riy hnyi vayi.

³Ama nangdiy pata ing luo i pakaa kie yi ca luo lieta ama hyle aa _ chekha ca luohlaasa taata a vawpa tana ama cuo,” a ta.

⁴Ziytuv tie ta, “Hingpa ruocaa lie hing hing zaa cawsaa hing ahungma viechuo a duo khu'a yi?” ama ta.

⁵Zingsuv ta, “Viechuo tluo khazaa ma nama hnyi?” a ta yi. “Tluo sariy,” ama ta.

⁶Zaapuv kha alyi lie patu sa yite viechuo tluo sariy kha la te, Khazing'a luo kha palungtluona bie a hluo khu taata chechi te zaapuv re riypata ziytuv tie kha pi yite ama re.

⁷Ngaa a cawta zaw kha hnyi yite, thluechiy a pi khu taata ziytuv tie kha a pare sa ra yi.

⁸Ama bangkhuo ta ning yite ama riy a bi, azungpepa kha ama pakhaw ca beke ta zung sariy a bi.

⁹Cawsaa ca thaw paliy hraw ama ta. Cakhutaacata a pathlie yi.

¹⁰Ziytuv tie hneta sawkawpalaw luo kha a catlisa pata kie yite Dalmanutha[13] pe luo kha ama si.

¹¹Farasi tie chekha a vaw yite Zingsuv hneta bie amaa i. Ama kha ama dyapasya khing nakawta, vuoruo taata kharuehaa hmang suokha ama hie.

¹²Zingsuv ca a huv kha pa-y te, “Khaapanakawma ata chuo saa zaw ta kharuehaa hmang tue riypa ina hie yi? Biehmisi tana ica chang yi: Tuokhaapa kharuehaa hmang hmuota ata chuo cawsaa zaw hmielie hing tue pata cuo'a vyi,” a ta.

¹³Iema kha thuse yite, sawkawpalaw chung luo kha a ngie pakhaa te, riyliy huesuo luo kha a vaa.

¹⁴Ziytuv tie ta viechuo vya phyale ama maw nakawta sawkawpalaw chunglie kha tluokha dyi ama hnyi.

¹⁵Zingsuv ta, “Farasi tie thiynung hne Herod thiynung kha a raaring ung,” a ta yi.

¹⁶Pakha hne pakha kha, “Viechuo ma hnyi li nakawna a cuo,” amaa ta.

¹⁷Zingsuv ta amaa ruepa kha a pachang nakawta, “Khaapanakawma viechuo nama hnyi lipa kaw ca namaa rue? Ata tepa hingta pachangpasie khu the va ung cama? Nama palung ma aca paping yi?

¹⁸Ming nama hnyi thluo raalaa pata, hmung va ung cama? Naa nama hnyi thluo raalaa pata, thyi va ung cama? A thyi the va tli ung cama?

¹⁹Cawsaa thawpangaa cuota viechuo tluo pangaa i chechi ning kha azungpepa beke zung khazaa ma namaa haa?” a ta yi. “Zung hraa hlyihning,” ama ta.

²⁰Cawsaa thaw paliy cuota tluo sariy i chechi ning khahaw azungpepa beke zung khazaa ma namaa haa? a ta yi. “Zung sariy,” ama ta.

²¹“Cakhutaa, ata te pata pachangpasie khu va ung cama?” a ta yi.

²²Bethsaida luo kha ama chiy. Cawsaa chekha ta mingcuepa pakha kha Zingsuv'a luo vya chiykhyi yite a hrie riypata paa ama kie.

²³Zingsuv ta mingcuepapaa kha a kuv ta ca-ya te khyle luo kha a pyakhyi. A ming lie kha a paciy a be khu taata, a kuv kha a cunglie khang te, “Suokha chuo na hmung ma? a ta.

²⁴Cawsaapapaa ca vuopaa kya ang te, “Cawsaa kha i hmung khu yi, cuorasala thingkungpa na a cakuole tapa haatana i hmung yi,” a ta.

²⁵Zingsuv ta cawsaapapaa ming kha a kuv ta a taw pakhaa. Cawsaapapaa ca khuosa ta mang te a ming a vya vuo nakawta zezaw bangkhuo kha a siesa pata a hmung.

²⁶Cakhutaata Zingsuv ta ing luo kha padiy sa te, “Khychung luo vaa ngie khya,” a ta.

²⁷Zingsuv ca ziytuv tie hneta Sisaria Filipi pe khyta luo kha ama tlaw. Luopuv lie kha ziytuv tie kyihuo ta, “Kama hing cawsaa ta ahung ina ta yi ma? a ta yi.

²⁸Iema ta, “Tiynawtuv Johan tana na cuo,” ta yite, a hrangpa tie ta, “Elijah tana na cuo,” ama ta. A hrangpa tie ta, “Profet pakhakha tana na cuo,” ama ta.

²⁹Ama ta, “Niema haw, ahung ina ta ung cama?” a ta yi. Piter ta, “Messiah[14] tana na cuo,” a ta.

³⁰Cakhutaa, Zingsuv ta, a kaw kha ahunghmuo chang li riypata a thlu yi.

³¹Cakhutaacata Zingsuv ta ziytuv tie kha pacuv yite, “Cawsaa Saacapaa ca te-angna khuopuv ta a taw'a te, uvthyi tie, tluobyilepa tie, hne phungbie saya tie ta ama thaw aa, thie'a yite, ningthung khu taata a thupakhaa aa,” a ta yi.

³²Hingpa hing a siesa pata a chang yi. Cacuonakaw Piter ta a cawta cakuo khyi te a chuo.

³³Cadyiseca Zingsuv ta ziytuv tie'a luo kha a pali te Piter kha a chuo hriy. “Setaa, i hnang luo kha a hnyi,” a ta. “Na ruenapa hing Khazing hmang cunglie chi vaciy, cawsaa hmang cungliena na chi,” a ta.

³⁴Cawsaazaapuv hne ziytuv tie kha ku yite, “Naa ziytuv a cuo khingpa ca ama hne ama kha a thaw sala, a vieluo kha a puv pata na ziy se.

³⁵A hringna kha a khuo khingpa ca a hringna kha aa sung aa, cadyiseca kama cuo hne thuophaabie cuota a hringna a pipa ca a hringna kha a khuo aa.

³⁶Cawsaa pakha ta chuelyi hing a yalya ta cu sala, a hringna aa sung tlung kieca khaapama a thlahne aa? Thlahne'a vyi!

³⁷A hringna kha khaapa hmang tama aa thla khu aa?

³⁸Hingpa a siyhrawpa hne a suepa chuo lie hing kama hne i bie a zaakhyipa ca, Cawsaa Saacapaa ta a Paa rungnaana hne a pathepa avuoming zaw hne aa zuv thueta ama kha a zaakhyi ra aa,” a ta.