Read Lautu Chin Marka 9 Bible Online

Marka 9 - Lautu Chin bible

Marka 9

¹Cakhutaata, iema kha “Biehmisi tana ica chang yi: hingpa lie a daapa chung taahingta chekha hing Khazing pena ca lesyina hneta[15] aa zuvpa ama hmung hluo li thiy'a va yi,” ata yi.

²Ning caruv khu taata Zingsuv ta Piter, Jeim hne Johan dyi kha a chiy yite a suopa tluo tluokha cung luo kha a kiekhyi yi. Ama ming hmung na lie kha Zingsuv ca a thle te,

³a caw kha a ruona luo ta a li te aa li, chuelyi lie a awpa ahungtahmuo cahaa cata a ruona te ta pasuv khu'a vayi.

⁴Capa lie ca Elijah hne Moses kha zaa luo yite Zingsuv hne bie amaa rue.

⁵Piter ta Zingsuv kha, “Saya, hingpa lie awpa hing ma cuota a pha hringhruo, thluodaa suo thung sa'a pate, suokha hing nama cuo, suokha hing Moses cuo hne, suokha hing Elijah cuota a cuo aa,” a ta.

⁶Ama thlaa a zang hringhruo nakawta Piter ca khaapama i ri tapa kha pachang vyi.

⁷Amyi a vya zu te a ningdiy ta iema kha buv yite, ca amyi chung taacata ueryi suokha a zuv te, “Ama hing i Duepa i Saacapaa tana a cuo, a bie a ngie mya ung,” a ta.

⁸Ama kiecahriy kha ama mang pahraa ca Zingsuv ri li pata ahunghmuo hmung vayi.

⁹Tluocung taata ama za cungpuo pata, Zingsuv ta, Cawsaa Saacapaa thiyna taata a thupakhaa hluo li nama hmungpa hing ahunghmuo chang'a va ungciy, a ta yi.

¹⁰A ri ca amaa ngie, cadyiseca iema'a na iema kha, “Thiyna taata thupakhaana,” tapa ca khaapama a ri khingna a cuo aa? amaa ta.

¹¹Cakhutaata Zingsuv kha, “Khaapanakawma phungbie saya tie ta Elijah na a zuv taa aa ama ta? tapata ama hiehriy.

¹²Zingsuv ta, “Zezaw bangkhuo ting pacie riypata Elijah ca aa zuv taa hmisi. Cadyiseca khaapanakawma Caapathepa ta Cawsaa Saacapaa ca khuopuv ta te-ang'a te ese nutaapa ta ama tue aa ta te a cape?

¹³Cuorasala ica chang yi, Caapathepa a ripa haata, Elijah ca a zuv tli te cawsaa ta ama khing thiy ta ama tue mangtli,” a ta yi.

¹⁴Ziytuv hrangpa tie'a luo ama va chiy ca, zaapuv ta za cadung yite phungbie saya chekha hne bie amaa zaa i nguoluo.

¹⁵Cawsaa ta Zingsuv kha ama va hmung pahne ta, ama kharue haasa te a ruo yite bie ama vaa chang.

¹⁶Zingsuv ta, ziytuv tie kha, “Khaapa kaw ma namaa i? a ta yi.

¹⁷Cawsaazaapuv chung taa pakhapapaa ta, “Saya, I saacapaapa ca khuevuo ta a hryi te bie pari sa khu vyi,

¹⁸khuevuo a chunglie a vya pya kyry ta, alyi lie kha vaapatyi te, a pakaa taata abuvcaphawpa pya te a haa dyi rie te a siypakya. Caa ziytuv tie kha khuevuo papya riypata i nue yi, cuorasala papya khu vayi,” a ta.

¹⁹Zingsuv ta, “Zangna hnyi hringhruo va ung ca ing? Kha cuo te khiyma niema'a lie hing i aw kalie a hu aa? Kha cuo te khiyma nama nang cawpa ta a chiyle namaa hu kalie aa? a ta yi. Haatiypa kha a vawkhyi tie ung ta yite,

²⁰amaa vaw khyi. Khachie ta Zingsuv kha a hmung pahne ta haatiypapaa kha vaapatyi te alyi lie a lie te aa pahlangle, a pakaa taata abuv dyi a pya.

²¹Zingsuv ta a paa kha, “Hinghaahingta a ta napa hing kha cuo ma a ta tli? a ta. “A cawta baataatana a cuo,” tapata a palie.

²²“Cuo hluvpuv ca a thie khing nakawta myi chung luo zaw pazu te tiy chung luo zaw a pathla. Malie naa bya khu kieca malie a bya thi tie,” a ta.

²³Zingsuv ta, “Malie naa bya khu kieca na ta ma? Zangna a hnyipa cuota ca zezaw bangkhuo hing a cuo khu diy,” a ta.

²⁴A paa ca sungkha ta[16] khi pathla te, “I zang; i zang linapa kha naa bya tie,” a ta.

²⁵Zingsuv ta iema'a luo zaapuv a maa vya ruolepa kha hmung te, a pyalyipa thlaapa kha, “Nama khachie, haatiypa bie a pari sa the lipa hne naa a parue sapa hingpapaa chung taahingta pya la khatiy ning hmuo a ngie pakhaa kha tie! tapata naw ica pi,” a ta.

²⁶Khachie ca khuopuv ta khi te haatiypapaa kha a siy patyi khu taata a pya. Haatiypapaa ca a thiypa riy haata ta te, cawsaa hluv vie ta, “a thiy tli,” ama ta.

²⁷Cadyiseca Zingsuv ta a buo ta la te, pathu te a kya daa.

²⁸Zingsuv ca ing chung luo a ngie khu taata, ziytuv tie ta a paruvta tah, “Khaapanakawma khachie hing ma papya khu va? ama ta.

²⁹Zingsuv ta, “Hingpa phang hing ca thlaachuona[17] ta dyina a pya khu,” a ta yi.

³⁰Zingsuv hne ziytuv tie ca khapa hmang taa kha pya yite Galilee cahrawpaa pata ama si. Capa kaw ca Zingsuv ta ahunghmuo pachang sa khing vayi.

³¹Ziytuv tie kha, “Cawsaa Saacapaa hing cawsaa kuv cung luo lyi pata cuo'a te iema ta ama thie aa, ama thie khu taata ningthung a tapata a thupakhaa aa,” tapata a pacuv yi.

³²Cuorasala khaapama a ri khing tapa kha pachang vayi, hiehriy riypa zaw kha a nguo vayi.

³³Kapernaum khy luo kha pha yite ing chunglie a aw ning kha Zingsuv ta ziytuv tie kyihuo kha, “Luopuv lie kha khaapama namaa vya ile khya? a ta yi.

³⁴Cuorasala palie nguo vayi, tahematapakieca, luopuv lie kha, ‘ahungma a lece,’ tapa kha amaa vya ile.

³⁵Zingsuv ca a tu te, ziytuv tie kha ku yite, “Ahunghmuota cuose malie hrawlie a lecepa a cuo khingpa ca a cawcepa hne cawsaa bangkhuo sii ta a cuo taa hrahring na a hu,” a ta yi.

³⁶Haatiy pakha kha ku te iema hrawlie a padaa khu taata, cakuv te,

³⁷“I ming ta hinghaapa haatiy a cuhluopa ca, kama kha ina cuhluo, kama kha naa cuhluopa ca kama dyi cuo li pata kama naa pathlietuv zaw kha a cuhluo ra,” a ta yi.

³⁸Johan ta, “Saya, na ming ta khuevuo a papyapa pakha hmung pate muo, kiema malie a ziy li nakawta ma thlu ta,” a ta.

³⁹Cuorasala Zingsuv ta, “Thlu ri kha ung, tahematapakieca i ming ta kharuehaa hmang a tuepa taca a nata tah i thuo na pachi'a vyi.

⁴⁰Malie a du lipa ca kiema cawsaa tana a cuo.

⁴¹Biehmisi tana ica chang yi, Khrih ming namaa cyi nakawta dang riypa tiy nuokha caa pipa yi ca lawmuo kha hmung li pata aw hrahring'a vayi,” a ta.

⁴²“Ahunghmuo cuo sala, kama naa zangpa hingpa haatiy zaw pakhakha hmie lieta a pachiyna riypa a chipa ca nama rue lie sacuo rienapa lungtung pathlie pata riyliy luo pathlapa na nama cuota a pha vie aa.

⁴³Na kuv ta na zangna taata aca papie sa kieca na kuv kha te tie! A thiy buo lipa hell[18] myi chung luo na kuv hrahning hne tlapa laa taca kuv tling li pata hringna luo naa ngiepa a pha vie aa.

⁴⁴[19]

⁴⁵Na phyi ta na zangna taa aca papie sa kieca, te tie! Phyi hrahning hne hell luo tlapa laa taca phyi tling li pata hringna luo naa ngiepa a pha vie aa.

⁴⁶[20]

⁴⁷Na ming ta na zangna taata aca papie sa kieca cakhyi la thaw tie. Ming hrahning hne hell luo tlapa laa taca ming tling li pata hringna luo naa ngiepa a pha vie aa.

⁴⁸Capa hmang lieca ama mathulung thiy buo li'a pata, myi zaw thiy buo'a vyi.

⁴⁹Cawsaa bangkhuo ca myi ta paciy haakhata pa-ie sapa ama cuo aa.

⁵⁰“Paciy ca a pha; cuorasala a iena kha a vie kieca, tuokhaatama na pa-ie sa pakhaa the aa? “Nama chunglie paciy kha hnyi ungla, pakha hne pakha a re tie ung,” a ta yi.