Read Lautu Chin Luka 1 Bible Online

Luka 1 - Lautu Chin bible

Luka 1

¹Cawsaa hluvpuv ta kiema hraw lieta a zaa cuopa hmang kaw kha a phace pata cape a maa zaa zue.

²A hruothu ningta ming ta zaa hmungpa tie malie ama changpa hne hing bie zaa phutuv tie ta kiema malie ama changsiypa haata ama cape.

³Kama zaw hing hmang bangkhuo hing a hruothu taata a phasa pata i khieluo diy khu taata,

⁴aca chang ciepa yi hne a patuv pata hmang dangpa bangkhuo kha a tlingsapa hne a hmuosapa ta na pachang riypata, hingpa caa hing na cuota suokha hnang suokha, aa paziy pata cape ra riypata bie i chi.

⁵Herod kha Judea ruo lie siepahruo a cuo ningta, Abijah tluobyi phang a cuo rapa tluobyi Zekhariah a za aw. A napuvnung ca Aaron ciypathla ta cuote a ming ca Elizabeth ta a cuo.

⁶Ama pahning ta Khazing minghmung lie aa dangpa cuo yite Abyipa phungbie hne nawpipa bangkhuo chunglie risie riypa aw li pata ama hring.

⁷Cuorasala saata hnyi khu vayi, tahematapakieca Elizabeth kha cing te, ama pahning ta ama nungpuv ama macuo mangtli.

⁸Luo kha ca ama re hrie cuo tling te Zekhariah ca a phuv zaw hne khata Khazing hmielie kha tluobyi re a hrie.

⁹Tluobyi tie ama ziypa phung haata Abyipa hmangpathepa chung luo a ngie pata, bienatluophie cunglie rangpa-uepa rue riypata vyisung a da yite amaa tlaw.

¹⁰Rangpa-uepa rue cuo ning ca cawsaa bangkhuo ca ale lie a daa yite thlaa ama chuo nguoluo.

¹¹Cakhutaata, ama'a luo kha Abyipa avuoming pakha zaa luo te rangpa-uepa ruenapa cacuo luo kuo khata a daa.

¹²Zekhariah ta a hmung ca a ciy hringhruo.

¹³Cuorasala avuoming khata, “Ciy kha, Zekhariah! Khazing ta na thlaachuona ca thyi te na napuvnung Elizabeth ta saacapaa aca sapa aa. A ming ca Johan nama ta aa.

¹⁴Ama puvna kawlie nama palung a tluo hringhruo aa, cawsaa hrangpa hluvpuv zaw ta ama palung a ca tluo khyi'a yi.

¹⁵Ama ca Abyipa hmungna lie cawsaa lepa a cuo aa. Mingsuv tiy cuose, sahmaa hne zuvre cuose, khaahmuo dang'a vyi. A za puv hluo taata Thlaapa Pathe hneta bi'a te,

¹⁶Israel ming hluvpuv kha ama Byipaapa ama Khazing'a luo a vya kaa khyi'a yi.

¹⁷Ama ca Profet Elijah haata a cahrapa hne hmang a tue khupa ta a cuo aa. Nungpaa zaw pathiypalung kha saata zaw'a luo maa'a yite, ri a ngie lipa tie kha cawsaa phapa tie ruena pahnyi sa pakhaa riypa hne, Abyipa cawsaa zaw kha a cuota ting pacie pata chi riypata, Abyipa hmie luo kha a silu aa.

¹⁸Zekhariah ta avuoming kha, “Na ripa haata a cuo aa tapa kha tuokhaatama i pachang aa? Kama hing macuo tli ang te i napuvnung zaw a nungpuvsa tli,” a ta.

¹⁹Avuoming ta, “Kama hing Gabriel tana i cuo. Khazing hmiekunglie a daa paripa cuo ang te ama ta hing thuophaa hing chang riypata nama'a luo ina za pathlie.

²⁰Cuorasala a ning hne a cuo a pha thueta a vya tling riypa i bie na zang li nakaw hingta, capa hmang a vya tlingna te, na ueryi chiy li pata, bie ri khu'a vaciy,” a ta.

²¹Capa chung bangkhuo ca zaapuv ca Zekhariah kha huo yite, hmangpathepa chunglie cacuo nanaa a rupa kha ama kharue a haa.

²²A kya pya tiyta a chaw the li tli nakaw yi ta hmangpathepa chungliena muocuo suokhakha a hmung tapa kha ama pachang. A kuv a phyi dyi ta paluo sa te bie ri khu vyi.

²³A re hrie riypa a chuo taata ing luo kha a cakuo.

²⁴Cakhutaata a napuvnung Elizabeth ca nu kha phya te thla pangaa chung ale luo pya li pata a aw.

²⁵Elizabeth ta, “Abyipa ta tlechuona hne na za mang te i cawsaa zaw hrawlie nangzaana i za angpa kha ina lapa tli,” a ta.

²⁶A thla caruv napa chunglie kha Khazing ta avuoming Gabriel kha Galilee ruo Nazareth khy lie a awpa,

²⁷David ciypathla Josef hneta a chiyhie riypata biekuona a hnyi tlipa lesaapathenung'a luo kha a za pathlie. Capa lesaapathenung ming ca Mary ta a cuo.

²⁸Avuoming ca ama'a luo kha a zuv te, “Abyipa duena a hmung nung! Na cunglie thluechiy aw mangsue, Abyipa ca nama'a liena a aw”[1] a ta.

²⁹Mary ca avuoming bie khata khuopuv ta a palung patawpamuo te hing bie a changna hing tuokhaapa bie a changna tama a cuo tapata a siyluo kha a rue.

³⁰Avuoming ta, “Mary, Ciykha, Khazing na vi caa hnyi.

³¹Nu phya'a cate, saacapaa hnyi'a cate a ming ca Zingsuv tapata na sa aa.

³²Ama ca cawsaa lesyipa cuo'a te, Asuocepa Khazing Saacapaa ama ta aa. Abyipa Khazing ta a mingpa David thude kha a pi aa.

³³Jakob ciypathla zaw cunglie kha chuozaa ta siepahruo cuo'a te, a penapa ca chuo buo'a vyi,” a ta.

³⁴Mary ta avuoming kha, “Kama ca lesaapathenung tana i cuo. Tuokhaatama cahaa cata a cuo the aa?” a ta.

³⁵Avuoming ta, “Thlaapa Pathe ca na cunglie za aw'a te Khazing cahrana ca na cunglie a za tlung aa. Cacuonakawta zaa puvpa saacapaa ca a pathepa cuo'a te, Khazing Saacapaa tapata a cuo aa.

³⁶Ata zaw hing nama tieriy ta a cuopa, a cing nung ama tapa Elizabeth ca a nungpuv tli pata saacapaa kha phya te thla caruv a ta tli.

³⁷Tahematapakieca Khazing ta a tue khu lipa khaapahmuo aw vyi,” a ta.

³⁸Mary ta, “Kama ca Khazing changtaanung tana i cuo, na ripa haata i cunglie tlung thluo se,” a ta. Cakhutaa avuoming ta a thuse.

³⁹Capa chung cata Mary ca a tha te tluocung lie a awpa Judah khy khykha luo kha a pahraasa pata a si.

⁴⁰Zekhariah ing luo kha a ngie te Elizabeth kha bie aa chang.

⁴¹Mary ta Elizabeth bie aa changpa kha Elizabeth ta a thyi pahne ta a riy chunglie a awpa nu ca a cathlu. Elizabeth ca Thlaapa Pathe ta bi te, khuopuv ta u te,

⁴²“Nama ca canung bangkhuo hrawlie thluechiycenung tana na cuo, na hnyi riypa haatiy zaw hing thluechiypa tana a cuo!

⁴³Khaapanakawma hingpa hmang hing i cunglie tlung te, i Byipaapa nung ta ina vya parie?

⁴⁴Nama bie inaa changpa i thyipa hneta i chunglie nu ca palungtluona hne a cathlu.

⁴⁵Abyipa ta ama'a luo a changpa bie hing a cunglie a tling hrahring aa tapata a zang nung ca khatluv ta thluechiypa tama a cuo!” a ta.

⁴⁶Mary ta, I pathiypalung ta Abyipa a pathuosa;

⁴⁷I hringna ca naa Khuotuv Khazing cunglie aa law,

⁴⁸Ri tluo lipa a changtaanung hing, ama ta inaa thyi pari! Ata ning taahingta chuo bangkhuo ta thluechiynung ina ta'a yi,

⁴⁹A cahracepa Khazing ta i cunglie hmanglepuv a tue mangtli. A ming ca a pathe;

⁵⁰Chuokha hnang chuokha ta Ama a ciyzaapa tie cunglie, a nangduena a paluosa.

⁵¹Ama ta a buo kha pazuu te a hruo a tlepa tie kha ama khuekhuona hne a chepatlaa diy yi.

⁵²A cahrasapa siepahruo tie kha amaa byithude taa pacung yite, Nutaapa tie kha a calang yi.

⁵³Ama nang a diypa tie kha hmangphapa ta ama riy pabi yite, a hnyirungpa tie kha kuv cahripa ta a padiy sa yi.

⁵⁴A nangduena a thyi pakhaana ta, a changtaapa Israel kha aa bya tli.

⁵⁵Mingchingmingvuo tie'a lie hne Abraham'a lie hne a ciypathla tie cunglie chuozaa cuota bie aa kuopa haata.

⁵⁶Mary ca Elizabeth'a lie kha thlathung tluv a aw khu taata ing luo a kaa.

⁵⁷Elizabeth ca a ningthlaa vya tling te saacapaa a sa.

⁵⁸Abyipa na nang a due hringhruo tapa kha a ingpaa hne a tieriy zaw ta ama thyi tiyta ama palung a tluokhyi hringhruo.

⁵⁹A ningcarinapa lieta haatiy kha vangdaw te riypata a vawkhyi yite, a paa ming la pata, Zekhariah tapata ming paphya amaa ting.

⁶⁰Cuorasala a nung ta, “Cuo vyi, ama ca Johan tapata na kupa a cuo aa,” a ta.

⁶¹Iema ta, “Niema phang chunglie cahaapaapa ming a phyapa pakha hmuo aw va ungciy,” ama ta.

⁶²Cakhutaata a paa kha ama kuv ta pahmungsana tue yite, haatiy ming tuokhaatama a paphya khing tapa kha ama hiehriy.

⁶³Zekhariah ta caahnaa kha a hie yite, “A ming ca Johan tana a cuo,” tapata a cape. Ama bangkhuo ta ama kharue a haasa.

⁶⁴Cakhupatahne Zekhariah ca bie ri khu pakhaa te Khazing kha a pathuosa.

⁶⁵Ama ingpaa zaw ca ama thlaa zangsa te, capa thuo ca Judea pe tluocung ruo bangkhuo kha a pathuo.

⁶⁶Capa thuo a thyipa bangkhuo ta pacuo syalya yite, “Capa haatiypa ca khaama a vya lu syalya aa?” ama ta. Tahematapakieca Abyipa cahrana ca a cunglie a aw.

⁶⁷Johan paa Zekhariah ca Thlaapa Pathe ta bi te hingpa profet-biephu hing a ri:

⁶⁸Israel Khazing, Abyipa cunglie thluechiy aw mangsue! A cawsaa zaw kha tlechuona hne mang yite a khuo yi.

⁶⁹Ma cuota a cahrapa Khuotuv kha, A changtaapa David ciypathla chung taata malie a pi.

⁷⁰Ma cariepa tie hne malie a huepa tie kuv chung taata kiema khuo riypata, hluoning a pathepa profet tie palyipakaa taata bie a ri.

⁷¹

⁷²Mingchingmingvuo tie'a lie bie kuo ciepa nangduena kha pahmung sa yite, Iema cunglie a tuepa a pathepa a biekuona ca aa thyi.

⁷³Mingpa Abraham kha, ma cariepa tie kuv taata palaw sa riypa hne, ciy li pata a re ma hriena riypa kha chiesana hne bie a kuo. Ma carie kuv chung taata khuo ciepa tie ta;

⁷⁴

⁷⁵ma hring chung bangkhuo, a hmiekunglie a dangna hne pathena ta a re ma hrie khuna riypata a cuo.

⁷⁶I saa, nama ca a suocepa Khazing profet tapata kupa na cuo aa. A luo zaw sa riypata Abyipa hmie luota si'a cate,

⁷⁷a cawsaa zaw kha ama sue a ngiethena taata khuona kaw pachang thena pi riypata a cuo aa.

⁷⁸Ma Khazing nangne ngiechina thueta, cungluo taa mawdiy ningkhena ma cunglie za cung'a te,

⁷⁹Zingna chunglie a tupa tie hne thiyna ningdiy rawlie'apa tie kha, khena pi riypata a cuo aa. Kiema kha diena luopuv luo malie a chiy aa.

⁸⁰Haatiy ca lethaw te thlaapa lie a cahra, Israel ming'a lie zaapuv hmung ta aa luo hluo li ruochung lie kha a aw.