Read Lautu Chin Luka 10 Bible Online

Luka 10 - Lautu Chin bible

Luka 10

¹Cakhutaa Abyipa ta a hrangpa sawsariy[24] kha a tlaw yite a khytlawna riypa khy ting hne hmangting luo kha a pathlielu yi.

²Iema kha, “Sa hrie riypa a hluvsa raalaa pata a hrietuv ca ama cawsa, cacuonakawta sa hrie riypa a hnyituv'a luo kha sa a hrietuv a za pathliena riypata thlaa chuo tie ung.

³Si tie ung! Tuv taata zaw cahnie hraw luo pathliepa haatana ica pathlie yi.

⁴Tuokaa baw cuose, sahrie cuose, phyipakaw cuose a phya kha ung; ahunghmuo luopuv lie bie a chang kha ung.

⁵Ing ingkhakha chung luo namaa ngie tiyta, ‘Hing ing chunglie diena aw mangsue,’ ta taa tie ung.

⁶Diena a khingpa a za aw kieca, nama bie a changnapa diena ca a cunglie aw sala; cahaa cata a cuo li kieca diena ca niema'a luo vya kaa se.

⁷Capa ing lieca aw ungla, khaapa aca pi zaw yi ta ning ungla dang tie ung; tahematapakieca re a hrietuv ca a hrie muo kha a hmung riypatana a cuo. Ingkha hnang ingkha ta a palaw'a va ungciy.

⁸Khykhakha luo namaa ngie tiyta ing acaa patlung sa kie yi ca, nama hmielie ama kya pachiepa bangkhuo kha ning ungla,

⁹capa khy lie a awpa a pasapa kha patluo sa ungla, ‘Khazing Pena na a ngie tli,’ tapata chang tie ung.

¹⁰Cuorasala khykhakha luo namaa ngie tiyta ingtlung aca da kie yi ca, luopuv luo kha pya ungla,

¹¹‘Nama phalina paluo sa nata ma phyi lie malie a kaapa nama khy lie buvcing hmuota maca cakhawsue siy yi. Cuorasala Khazing Pena na a ngie tli tapa khaca maw khya ung!”

¹²Ica chang yi: Bierinapa ning thueta capa khy ca Sodom khy laata a te-ang vie aa! a ta.

¹³Khorazin khy, thluechiylipa tana na cuo! Bethsaida khy, thluechiylipa tana na cuo! Niema'a lie tuepa kharuehaa hmang hing Tair hne Sidon lie tuepa za cuo sala, pang cawpa a hryi'a yite, ama luv lie buvcuo a phuv'a yite amaa ngiepachiynapa a za syisa'a mangtli!

¹⁴Cuorasala bierina ning thue ca niema laa hingta Tair hne Sidon cuota nangduena a aw vie aa.

¹⁵Cakhutaa, nama Kapernaum, vuoruo te cyicalangpa tama na cuo aa? Cuo'a vyi, Hell luo thawpa tana na cuo aa, a ta.

¹⁶Zingsuv ta ama a ziytuv tie kha, “Ahunghmuo cuose niema bie naa caa thliepa ca kama bie naa naa thliepa ta ama cuo, niema caa thawpa tie ca kama zaw naa thawpa ama cuo, kama naa thawpa bangkhuo ca naa pathlietuv kha a thawpa ama cuo,” a ta.

¹⁷Sawsariy[25] tie ca palungtluo ciemuo pata vya kaa yite, “Abyipa nama ming taca khuevuo tie hmuo ma ri malie amaa ngie,” ama ta.

¹⁸Zingsuv ta, “Setaa kha vuoruo taata thinghlaa haata a za tlapa i hmung.

¹⁹Mang tie ung: Naw hnyina ca pi yi ang te nama carie tie cahrana kha te khuna ica pi nakaw yi ta pariy hne tluociekuo hmuo tlaw ungla ruvnaana ca pi'a vayi.

²⁰Cuorasala khuevuo tie ta nama ri acaa ngie nakaw yi ta nama palung tluo kha se; vuoruo lieta nama ming capepa a cuo nakaw tuv khata nama palung tluo se,” a ta yi.

²¹Khapa cuo ning kha Zingsuv ca Thlaapa Pathe ta palungtluona hne pabi sa te, “I paa, vuoruo Byi hne alyi Byi, a singpa hne a thepa tie'a taata na nupa hmang kha singna hne thena a hnyi lipa tie'a lie na paluo sa nakawta icaa law. A cuo, I paa, hingpa hing nama ta cuose tapa na khing nakaw na a cuo.

²²“I Paa ta hmangting bangkhuo kha ina pi tli. Saacapaa hing ahung tama a cuo tapa kha Paa ri li pata ahunghmuota pachang vayi, Paa hing ahung ta ma a cuo tapa zaw kha Saacapaa hne Saacapaa ta a tlaw yite iema'a lie a phupa tie ri li pata ahungtahmuo pachang vayi.

²³Cakhutaa, Zingsuv ca ziytuv tie'a luo kha a pali te iema dyi thyi pata, “Nama hmungpa hmang a hmungpa ming hing khatluv ta thluechiypa tama ama cuo!

²⁴Ica chang yi: profet hne siepahruo tie zaw ta niema nama hmungpa hing ama za hmung khing raalaa pata za hmung khu vayi, ama za thyi khing raalaa pata za thyi khu vayi,” a ta.

²⁵Phungbie saya pakha ta a vaw te Zingsuv kha a dyapasya khing nakawta, “Saya chuozaa hringna hmung riypata khaama i tue aa,” a ta.

²⁶Zingsuv ta, “Caapathepa lie tuokhaatama aa cape? Tuokhaatama na ri?” a ta.

²⁷Cawsaapapaa ta, “Abyipa na Khazing ca na pathiypalung yalya, na hringna yalya, na cahrana yalya, hne na ruena yalya ta due'a cate; na ingpaa zaw kha nama naa duepa haata na due ra aa, a ta,” a ta.

²⁸Zingsuv ta, “Na ripa ca a hmuo, cahaa cata va tue la na hring aa,” a ta.

²⁹Cuorasala ama hne ama kha duo a pacu khing nakawta, Zingsuv kyihuo khata, “Ahung kha ma i ingpaa ca a cuo,” a ta.

³⁰Zingsuv ta, “Cawsaa pakha kha Jerusalem taata Jeriko luo kha a si. Cahaa cata a si ning kha damie tie ta patuv yite, a caw kha hlepa diy yite ama tuv khu taata a thiy'a nang pata ama thuse.

³¹Capa ning cata tluobyi pakha ca capa luopuv luo ca ziy te cawsaapapaa kha a hmung ca kuo kha luota a cahriy.

³²Cahaa ngiethie cata Levipa pakha zaw capa hmang luo ca vya chiy te a hmung ca kuo kha luota a ca hriy ra.

³³Cuorasala Samaria ming pakha ca khy a tlaw pata capa luo ca vya chiy te cawsaapapaa kha a hmung ca a ngiechi hringhruo.

³⁴Capapaa luo ca vaa te a hmaa kha chiytiy hne mingsuv tiy a thuv khu taata a catawpa; cakhutaa cawsaapapaa ca a sahring cung luo kha khang te khyche a rina ing luo kha vaa khyi te capa lieca a mangchiy.

³⁵A mawluo ta denarii[26] phiehning kha papya te khyche a rina ing a huotuvpapaa kha pi te, ‘Ama hing a phata tah za mangchiy la ama cuota na pachuo viepa bangkhuo ca hingpa luo i vya kaa pakhaa thueta ica thung diy aa, a ta,” a ta.

³⁶Zingsuv ta, “Hingpa cawsaa pathung lie hing ahung hingma damie tie ta ama patuvpapaa ingpaa ta a cuo tapata na rue?” tapata a hiehriy.

³⁷Phungbie sayapaa ta, “Ama a ngiechituvpapaa kha,” tapata a palie. Zingsuv ta, “Cakuo la capa haa cata va tue tie,” a ta.

³⁸Zingsuv hne a ziytuv tie khy ama tlawle ning kha khy khykha luo chiy yite Martha ama ta nung ta a ing lie aa patlung sa yi.

³⁹Ama ta Mary ama ta nung nuta pakha hnyi te, Abyipa phyi thabaw lie kha a tu te a bie kha naa a thlie.

⁴⁰Martha ca a re a hluvsa nakawta a palung rie thyi te Zingsuv kha, “Abyipa, i nutanung ta re bangkhuo kama dyi i naa ringpa hing na ngie aa raw thluo ma? Re vaa bya la ta tie,” a ta.

⁴¹Zingsuv ta, “Martha, Martha! Nama ca hmang hluvpuv kawlie khata na palung rie a thyi,

⁴²aa hu hmisipa suokha dyina a aw. Mary ta aa hmuopa hmang ca a tlaw tli te ahungtahmuo chuv'a vayi,” a ta.