Read Lautu Chin Luka 11 Bible Online

Luka 11 - Lautu Chin bible

Luka 11

¹Luokha ca Zingsuv kha suvkha lie thlaa a chuo. A pachuo pahne a ziytuv pakha ta, “Abyipa, Johan ta a ziytuv tie thlaa chuo a changpa haayita thlaa chuo malie chang ra tie,” a ta.

²Zingsuv ta, “Hinghaahingtana thlaa nama chuo riypata a cuo aa: Ima Paa,[27] Na ming pathepa ca pa-uvsathyi pata cuo mangsue; na penapa tlung paa tie se.

³Ningting maa hupa sa ca malie pi tie.

⁴Ma cunglie a suepa tie maa ngiethe pahaayita, ma suena kha malie a ngiethe ra tie. A ruvpa pasupaliyna luo malie papha sa kha,’ nama ta aa,” a ta.

⁵Cakhutaa iema kha, “Abiephungpa ta niema hrawlie pakhakha ca zuocang ta a viesaa ing luo kha vaa te, ‘I viesaapa, viechuo tluo thung na picaw thi tie.

⁶I viesaa pakha ata balata hing vya chiy te i pi riy hnyi va ang,’ a ta.

⁷Ama ta ingchung taata, ‘Hnaa na pahnaw kha, ingchiy khaa tli pate i saata zaw hne maa zie tli. Kya thu pata ca pi khu va tli ang,’ a ta.

⁸Ica chang yi: kya thu li pata hne viechuo kha pi paluo li pata aw ra mang sala a viesaa a cuo nakaw hne nangzaa li pata a hie byalya nakawta kya thu'a te a khingpa bangkhuo kha a pi aa.

⁹Cacuonakawta ica chang yi: hie ungla pi pata nama cuo aa; huv ungla nama hmung aa, cakhaw ungla nama cuota ingchiy ca pahaw pata a cuo aa.

¹⁰Tahematapakieca a hiepa bangkhuo ca pi pata cuo'a yite, a huvpa bangkhuo ta ama hmung aa, a cakhawpa bangkhuo ca ingchiy kha pahawpa pata ama cuo aa.

¹¹Niema chung taahingta na saata tah ngaa caa hie sala pariy a pipa nama aw'a ma?[28]

¹²Aatiy acaa hie pata tluociekuopa a pipa nama aw'a ma?

¹³Hing tluv ta nama pha li thluo pata nama saata zaw kha hmangphapa pi riypa nama pachang kieca, vuoruo lie a awpa nama Paa taca a hiepa tie kha Thlaapa Pathe ca pi li pata aw changchiy'a vayi,” a ta.

¹⁴Zingsuv ta bie a ri the lipa khuevuo kha papya te; khuevuo a pya khu taata bie a ri the lipa cawsaapapaa cata bie a ri ca cawsaazaapuv ca ama nang ta a uo,

¹⁵Cuorasala cawsaa chekha ta, “Khuevuo tie byicepa Beelzebul ming tana khuevuo hing a papya,” ama ta.

¹⁶A hrangpa tie ta ama dyapasya khing nakawta, vuoruo taata a cuopa kharuehaa hmang suokha tue riypata ama hie.

¹⁷Cuorasala Zingsuv ta ama ruenapa kha a pachang nakawta iema kha, “Tuokhaapa pena hmuo cuose iema hne iema a che yite amaa du kieca ama ra aa; iema'a na iema a dupa chungkhue ca amaa chepatlaa.

¹⁸Setaa zaw a phuv a phuv ta amaa du kieca, tuokhaatama a pena ca a daa khu aa? Niema ta Beelzebul ming tana khuevuo a papya ina ta ungciy.

¹⁹Cahaa cata i papya kiehaw, nama khuevuo papyatuv tie[29] kha ahung ming tama ama papya? Cacuonakawta iema khana nama bie a chituv ta a cuo'a yi.

²⁰Cuorasala kama ca Khazing cahrana ta khuevuo kha i papya pata a cuo kieca, Khazing Pena ca niema'a luo a vya pha tli.

²¹A thaaruvpapaa ta a cehre bangkhuo hneta a ing kha a huo kieca a hnyipa hmang ca a bang taw.

²²Cuorasala a thaaruv viepapaa ta a du te a te tiyta, ing a hnyituvpapaa ta aa buchuopa cehre bangkhuo ca lapa diy te a paruvpa chechiy kha malie a re patlaa diy yi.

²³Kama naa daakhyi lipa bangkhuo ca naa dutuv tana ama cuo; pahmyapakhaw naa bya lipa ca a cadaapatlaatuv tana a cuo,” a ta.

²⁴Thlaapa pyalyipa pakha ca cawsaa pakha chung taata a pya tiyta a pahyna hmang huv riypata ruocaapa chunglie kha hmangting ta a khie. Suvkha hmuo a hmung khu li tiyta, amaa na ama kha, ‘I pya se ciepa i ing luo khana i kaa pakhaa aa, aa ta.’

²⁵A va kaa ca pathe phiyliy te a chikaky pata a za awpa kha a hmung.

²⁶Cakhutaa va pya te ama laata a chie viepa thlaapa pasariy kha a vya chiy yite capa lieca ama aw. Ca cawsaapapaa a chuona lie a daahmang ca a hruothu lie laata a ruv vie,” a ta.

²⁷Zingsuv ta hingpa bie a ri diy pahne ta cawsaazaapuv chung taata canung pakha kya khi te, “Nama caa phyapa hne ahnungtiy caa pipa nung hing khatluv tama thluechiypa a cuo! a ta.

²⁸Cuorasala Zingsuv ta, “Khazing bie kha thyi yite a ziypa tie na thluechiyviepa ta a cuo yi,” a ta.

²⁹Cawsaa ama vya hluv vie hryly tiyta, Zingsuv ta, “Ata chuo cawsaa hing a pha li hringhruopa tana ama cuo! Pamangsana tuepa riypa a maa hie, cuorasala Jonah pamangsana ta li pata kharuehaa hmang hrangpa khaahmuo pahmung sapa cuo'a vayi.

³⁰Profet Jonah ca Nineveh cawsaa zaw cuota pamangsana a za cuo pahaakhata Cawsaa Saacapaa zaw hing ata chuo cawsaa zaw cuota pamangsana a cuo ra aa.

³¹Bieripana ning thueta sungluo ruo siepahruonung ca a daa'a te ata chuo cawsaa zaw hing sue a phaw aa, tahematapakieca Solomon singna kha naathlie riypata alyi dena luo taata a vya pha; mang tie ung: Solomon laata a le viepa na hingpa lie hing a aw.

³²Bieripana ning thueta Nineveh khy ming zaw kha a daa'a yite ata chuo cawsaa zaw kha sue ama phaw aa, tahematapakieca iema ca Jonah phung ripa kha ama thyi tiyta ama suena amaa ngiepachiy; mang tie ung: Jonah laata a le viepa na hingpa lie hing a aw,” a ta.

³³“Ahungtahmuo myi-ing ama vuo tiyta aa nuna hmang lieta chi buo vayi, beke zaw pakhuvsue buo vayi. Cawsaa amaa zaa ngie tiyta a phata tah ama hmung the riypata myivuona tung cunglie khana ama chi.

³⁴Nama ming ca nama pangpa cuota myi-ing tana a cuo. Nama ming a tluo kieca nama pangpa yalya ta khe'a te, nama ming a tluo li kieca nama pangpa ca a zing diy aa.

³⁵Cacuonakawta nama chunglie khena hing zingna a cuo li pakha pachangpasie tie ung.

³⁶Nama pangpa bangkhuo ca a khaapa kha hmuo zingna chunglie aw li pata a khe diy kieca, myi-ing ta aca khepa haa yi khata a khe diy aa,” a ta.

³⁷Bie a ri nguoluo ning kha Zingsuv ca Farasipa pakha ta sa ning a ku; cacuonakawta vaa te sa ning riypata cabya lie kha a tu.

³⁸Zingsuv ca sa a ning hluo ta a kuv aa siy lipa kha Farasipa ta hmung te a kharue a haasa.

³⁹Cacuonakaw Abyipa ta, “Niema Farasi tie ca nama panuo hne nama pakaa kha ale luo dyi pasiy ung cate, cuorasala nama chung luo ca karuo-awna hne phalina ta nama pabi.

⁴⁰A ngaapa tie! Ale luo a tuetuv Khazing ta a chung luo zaw kha a tue cuo vama?

⁴¹Cacuonakawta a chunglie a awpa hmang tie kha a siypasapa tie va pi ungla khaapa bangkhuo kha nama cuota a pathe aa.

⁴²Farasi tie, niema ca thluechiylipa tana nama cuo! Khazing kha putinan, hruohmie, iesing hne uohnaasiyhnaa phangting kha chehraachekha nama pi raalaa pata a dangna hne Khazing duena ca hnang nama chaw. Hingpa zaw hing tue'a ung cate muo a cunglie ma ri taapa zaw hing hnangchaw li pata nama aw'a ta.

⁴³“Farasi tie niema ca thluechiylipa tana nama cuo! Apungna-ing uvthyi thude lie a tu ca khingsa ung cate, chadawtluo lie pa-uvsathyina hneta bie a changpa ca nama tlechuosa.

⁴⁴Thluechiylipa tana nama cuo! Niema ca aa hnangna ama tue lipa thluo, cawsaa zaw ta pachang li pata a cunglie ama cakuo tawpa hne tana namaa lu,” a ta yi.

⁴⁵Phungbie saya tie chung taa pakha ta, “Saya hinghaahingta na ri tiyta kiema thuo zaw malie na pachi puo ra,” a ta.

⁴⁶Zingsuv ta, “Phungbie saya tie, niema zaw thluechiylipa tana nama cuo! Cawsaa zaw ke cunglie hmang a riypa khang ung cate, cuorasala niema ca phyakhyi riypata nama kuvdaw ta hmuo de khing va ungciy,

⁴⁷thluechiylipa tana nama cuo! Nama mingchingmingvuo tie ta ama za thiepa profet tie cuo khata thluo phasapa nama tuepa.

⁴⁸Cacuonakawta niema ca nama mingchingmingvuo tie ta ama za tuepa kha a daakhyituv hne a pacusatuv tana nama cuo, iema ta profet tie kha thie yite niema ta ama thluo nama tue.

⁴⁹Cacuonakaw muo Khazing Singna ta, ‘Kama ta profet tie hne thuophaabiephyatuv tie i pathliepa'a yi, chekha kha thie'a yite a hrangpa kha hrisaa'a yite ama thie aa,’ a ta ta.

⁵⁰Cacuonakaw ata chuo cawsaa zaw hing Abel ama za nawna taata patha pata bienatluophie hne hmangpathepa a lala lieta ama nawpa

⁵¹Zekhariah'a nata chuelyi hruothu baataata profet tie ama za palangpa thiyse bangkhuo muo kha hie pata ama cuo aa. A cuo, ica chang yi: Ata chuo cawsaa zaw'a lie hingna hie pata a cuo aa.

⁵²“Niema Phungbie saya tie, thluechiylipa tana nama cuo! Singnapa ing pahawna taw kha cake ung cate, niema zaw a ngie lipa ung cata a ngie khingpa tie zaw kha nama pakhuo,” a ta yi.

⁵³Ale luo a pya tiyta phungbie saya tie hne Farasi tie ta ama kha hue laalaw yite, hmang a hluvpuv kaw kha bie hluvpuv ama hiehriy,

⁵⁴a ripa bie mamaapa chung taata a suena patuv khu riypata mangkhuo yite ama huo.