Read Lautu Chin Luka 12 Bible Online

Luka 12 - Lautu Chin bible

Luka 12

¹Cawsaa ca a thawthaw ta a vya hmya yite amaa tlawpuole ciemuo ning kha Zingsuv ta a suokhana ta ziytuv tie kha, “Farasi tie thiynung kha a raaring tie ung—a phahruo amaa cuo pakhina kha.

²Buvkhungpa bangkhuo kha pahawpa cuo diy'a te, nupa bangkhuo hing phu pata a cuo aa.

³Cacuonakaw a zingna lie nama ripa ca ningchung a vuona lie pathyi sa diy pata cuo'a te, ingchiy a khaakhungna chunglie a paruv ta nama ripa kha thlungkhuv daw taata u pata a cuo aa.

⁴Viesaa zaw, ica chang yi, pangpasaa dyi thie khu te a hnang taata capa laata a chie viepa a tue khu lipa kha ciy kha ung.

⁵Ahungma ciy riypa tapa kha ica chang'a yi: Pangpa a thie khu taata hell[30] luo pathla khunapa cahrana a hnyipa Khazing kha ciy tie ung. A cuo, ica chang yi, ama kha ciy tie ung.

⁶“Mingbaw sapangaa ca piehning tana ama zaa cuo vama? Cuorasala mingbaw sakhata kha hmuo Khazing ta maw vyi.

⁷Nama luv cung lie nama suo hmuota a ri diy. Nama thlaa zang kha se; mingbaw hluvpuv laata nama sungnaa vie.

⁸Ica chang yi: ahunghmuo cuose cawsaa hmielie naa daakhyipa ca Cawsaa Saacapaa zaw ta Khazing avuoming hmielie i daakhyi ra aa.

⁹Cuorasala cawsaa hmielie naa thawpa ca Cawsaa Saacapaa ta Khazing avuoming hmiekunglie i thaw ra aa.

¹⁰Ahunghmuo cuose Cawsaa Saacapaa thuo a pachipa ca a ngiethepa ama cuo aa, cuorasala Thlaapa Pathe thuo a pachipa ca a ngiethepa cuo'a vayi.

¹¹Apungna-ing lie cuose, ruo-uv byi a cuo li kie nawhnyituv tie hmie luo aca chiykhyi tiy yi ta tuokhaa ta a pahrang'a ang tema tuokhaa ta i ri aa tapa kha nama palung rie thyi kha se.

¹²Tahematapakieca capa cuo lie ta nama ri riypa ca Thlaapa Pathe na caa chang'a yi,” a ta yi.

¹³Cawsaazaapuv hraw taata pakha ta, “Saya, i paa ru kha ina che riypata i uvta kha na changpa tie,” a ta.

¹⁴Zingsuv ta, “Liechung, ahungma niema pahning a lala lie bie chipa riypata naw naa pi?” a ta.

¹⁵Cakhutaata iema bangkhuo kha, “Karuo-awna phangting taakhata a cadang tie ung, tahematapakieca cawsaa pakha hringna ca a hnyirungna lie kha aw vyi,” a ta yi.

¹⁶Cakhutaata pakhingpuonabie suokha a chang yi: “A hnyirungsapa pakha ca a lu taata kung a vyi laalaw.

¹⁷Catiyta a palung chunglie kha; ‘I sa bangkhuo hing i china tlaw va tli. Tuokhaata i tue kie ma a pha aa?’ a ta.

¹⁸Cakhutaata, ‘Hinghaahingtana i tue aa: I sa-ing hing phi'a ang tena a le vie ta i sa aa. Capa lieca i sa hne i hmang bangkhuo kha i chi aa,’ a ta.

¹⁹Cakhutaa i thlaapa kha, Vya i thlaapa! Kung syipuv acaa de riypa hmang ca na hnyi mangtli. A pahy hyalya la, ning la, dang la a nuosa pata hring tie, i ta aa,’ a ta.

²⁰Cuorasala, Khazing ta, ‘A ngaapa! Ata zuo hrahring hingta na hringna ca a chuo aa; cacuonakaw na cuota naa pacungpa hmang bangkhuo hing ahung huo tama a cuo aa? a ta,’ a ta.

²¹Cacuonakawta ama cuota chechiy aa pacung raalaa pata Khazing hmielie a hnyirung tlung lipa ca ama haa hing tana ama cuo,” a ta.

²²Zingsuv ta ziytuv tie kha, “Cacuonakaw ica chang yi: nama ning riypa sa kawlie cuose, namaa tue riypa caw kawlie cuose, nama hringna kawlie palung rie thyi pata aw kha ung.

²³Hringna ca sa laata biepuv vie te pangpa ca caw laata a biepuv vie.

²⁴Ra-aa khiy rue tie ung: saciy vaa vayi, sa zaw hrie vayi; sa chinapa be hne sa-ing zaw hnyi vayi; cuorasala Khazing ta a caw yi! Niema ca pavaa laata nama sungnaa vie karaa!

²⁵Nama palung rie a thyi nakawta nama hringna siymaluo pakha chuo a pasyi sa the viepa pakha chuo nama aw ma?

²⁶Cahaapaapa chechiy cawta hmuo nama tue khu li kieca khaapanakawma a hrangpa kawlie ca nama palung rie a thyi?

²⁷Ruo paapaapa khiy tuokhaatama ama le tapa kha mang tie ung: re hrie vayi, palaa zaw pahie ra vayi. Cuorasala ica chang yi: Solomon Siepahruopa rungnaana bangkhuo tahmuo hingpa paapaapa suokha puvthena hing a tluv vyi.

²⁸Cuorasala ata ning hring te mawluo myi ta rue riypa aphuvpa hing Khazing ta hing tluv ta a tuepangi kieca, niema changchiy ca khatluv tama aca tuepangi vie'a yi? Nama zangna hing a caw hringhruo de!

²⁹Cacuonakawta ning riypa hne dang riypa kaw kyalya rue pata nama palung rie thyi kha se.

³⁰Tahematapakieca chuelyiming dyi ca muo hingpa hmang ca a ruepari yi ta. Nama Paa ta hingpa hmang zaw hing namaa hu tapa kha a pachang.

³¹Cacuonakawta ama pena[31] kha huv taa ungla, capa hmang zaw ca pichiy pata nama cuo aa,” a ta.

³²Tuvrung cawta zaw, nama thlaa zang kha se, tahematapakieca niema'a luo Pena pi riypa kha nama Paa palungtluona tana a cuo.

³³Nama hnyipa kha zaa ungla siypasapa tie kha pi tie ung. A caw the lipa tuokaa baw kha a tue ungla a ruvhangpa ta a paruv khu li na lie hne, alungpa ta a para khu lina vuoruo lie kha a chuo the li riypa sue kha a pacung tie ung.

³⁴Tahematapakieca nama sue awna lie kha nama pathiypalung zaw a aw ra aa.

³⁵“A ting pacie pata aw ungla, nama myi-ing kha vuo pacie tie ung.

³⁶Napuv chiyna pyi taata a vya diy te ingchiy a cakhaw pahne pahaw khu paluo riypata ama byipaapa a huopa tie haakhata a raaring pata aw tie ung.

³⁷Ama byipaapa a vya kaa tiyta a hra te a raaringna a hnyipa sii ca khatluv ta thluechiypa ma a cuo! Biehmisi tana ica chang yi, a tesaw kha a saw'a te, ning riypata patu'a yite, iema kha a ysy'a yi.

³⁸Zuocang ta a vya diy kie cuose, khydyi caw ta a vya diy kie cuose, a ting pacie pata ama aw pata a hmungpa sii tie ca thluechiypa tana ama cuo.

³⁹Cuorasala hingpa hing pachang tie ung: ing a hnyituvpapaa ta a paruvpa a vawna cuo kha a pachang kieca a ing kha paruv sa'a vyi.

⁴⁰Niema zaw a raaring ung, tahematapakieca nama mangkhuo linapa cuo lie khana Cawsaa Saacapaa ca a vaw aa,” a ta.

⁴¹Piter ta, “Abyipa, hing pakhingpuonabie hing kiema ma malie na ta khing, a cuo li kie cawsaazaapuv cuota ma a cuo?” a ta.

⁴²Abyipa ta, “Ahung kha ma zangtluo aa tlapa hne a singpa tluotlakhuekhuotuv ca a cuo? Zangtluo aa tlapa hne a singpa tluotlakhuekhuotuv ca a byipaapa ta a ingchungkhue mangchiy riypa hne a hrangpa sii tie kha ama'a na a cuota lie ama cuvu sa pi riypata a chipapaa khana a cuo.

⁴³A byipaapa kha ing luo a vya chiy tiyta cahaa cata a za tue nguoluo pata a hmungpa sii ca thluechiypa tana a cuo!

⁴⁴Biehmisi tana ica chang yi: cahaapaapa sii ca a byipaapa ta a chechiy bangkhuo a mangchiytuv tana a chi aa.

⁴⁵Cuorasala capa sii cata, ‘I byipaapa ca a syisa a ru kalie aa,’ ta sala sii a hrangpa canung zaw capaa zaw kha tuv yite, ning dang te a pariy kieca,

⁴⁶vya chiy thlu'a valie a ta ning hne a pachang li cuo ning kha a byipaapa ca a vya chiy aa. A byipaapa ta a cekary diy'a te ri a ngie lipa tie hne khata a chi hne aa.

⁴⁷A byipaapa ta a patue sa khingpa a pachang thluo pata, a tingtuo pata a patue sa khingpa kha a tue lipa sii ca a pasasapa tuvna na a ang aa.

⁴⁸Cuorasala a byipaapa ta a patue sa khingpa a pachang li pata tuv aa tlapa hmang a tuepa ca dyadyata tah tuvpa tana a cuo aa. A hluvsa pipa ca a hluvsa hiepa cuo'a te, a hluv vie pipa ca a hluv vie ta hiepa a cuo aa.

⁴⁹“Alyi hing myi ta pahlaa riypa tamuo i vaw ta, a hlaa hunglung tli sala a pha'a pakha!

⁵⁰Tiy a naw riypa suokha hnyi ang te, capa hmang a tlung hluo li ca khatluv ta ma i palung rie a thyi!

⁵¹Alyi luo diena phya riypatana aa vaw tapata ma ina rue ungciy? Cuo vyi, ica chang yi: a chena tlaku na i za phya.

⁵²Ata taahingta papangaa a tapa chungkhue tie ca a che'a yite, pathung ta pahning kha a du'a yite pahning ta pathung kha amaa du aa.

⁵³Iema ca amaa che aa: Paa ta saacapaa kha a du'a te saacapaa ta paa kha a du aa, nung ta sacanung kha a du'a te sacanung ta nung kha a du aa, piynung ta munung kha a du'a te munung ta piynung kha a du aa,” a ta.

⁵⁴Zingsuv ta cawsaazaapuv kha, “Niema ta ningtla taata amyi a kya thupa kha nama hmung tiyta, sungkha ta, ‘khy na a saa aa,’ ta ung cate a saa sasaw.

⁵⁵Sungluo taata thliy a kya hruo tiyta, ‘a vya paling aa,’ ta ung cate a paling sasaw

⁵⁶Phahruocuo tie! Niema ta alyi hne avuo kha mang ung cate khy saa riypa hne khy huo riypa kha nama pachang khu; cacuokie khaapanakawma ata chuo ningkhue aw zya hing nama pachang va?

⁵⁷Khaapanakawma hmangphapa tue riypata nama pathiypalung lie bie namaa chi khu va?

⁵⁸Cakhutaata tazaa caa cyipa hne bieripatuv byi hmie luo nama cakuo ning kha luopuv lieta ama hne a dawraw riypa kha a zue tie; cahaa cata na tue li kieca, bieripatuv byi hmie luo kha ca chiykhyi'a yite, ama ta paliy byi kuv luo ca hluo'a te thaw aca pathla'a yi.

⁵⁹Ica chang yi: duo aca tepa yi a chuopatlienapa piekha te ta na pi diy hluo li thaw taata pya'a vaciy,” a ta.