Read Lautu Chin Luka 13 Bible Online

Luka 13 - Lautu Chin bible

Luka 13

¹Capa cuo lie caci cata cawsaa chekha Zingsuv'a luo a vaw yite, Pilat ta hriykhung a rina a tue nguoluopa Galilee ming kha thie yite ama thiy kha ama hriykhung a rinapa hne a pyanapa kaw kha ama chang.

²Zingsuv ta, “Cahaa cata thie pata a cuopa Galilee ming ca a hrangpa tie laata ama sue vie tapata nama rue ma?

³Sue vie hlyi vayi. Ica chang yi: nama suena namaa ngiepachiy li kieca iema haa khatana nama thiy ra aa.

⁴Siloam lie ing a suosa pata a vysapa cawsaa hlyicari tie kha Jerusalem lie a awpa cawsaa hrangpa zaw laata ama sue vie tapata nama rue ma?

⁵Cuo vyi! Ica chang yi: nama suena namaa ngiepachiy li kieca, iema haa khatana nama thiy diy ra aa,” a ta yi.

⁶Cakhutaa Zingsuv ta hingpa pakhingpuonabie hing a chang yi: “Cawsaa pakha ta a diedung chunglie thyikuv kung kung kha a cyi. A pathyi a pathyi li a va mang tiyta khaapahmuo hmung vyi.

⁷Cacuonakawta diedung a huotuvpapaa kha, ‘kung thung chung bangkhuo a pathyi a pathyi li kha i ve taw pata a thyi thyikha hmuo hmung buo va ang. Hupatyi tie! Khaapanakawma alyi phapa ca a ning pari aa?’ a ta.

⁸Diedung a huotuvpapaa ta, ‘Abyipa, a ta kung khata hingca pahlung caw tie; a thabaw vya'a ang te aphuvlyi pi taa ang.

⁹Huokung a pathyi kieca a pha ciemuo aa, a pathyi li kieca pahu sa valuo yi ciy,’ a ta,” a ta.

¹⁰Luokha ca Sabbath ning kha Zingsuv ta apungna-ing lie a pacuv yi.

¹¹Capalie ca thlaapa chiepa ta kung hraa hlyicari chung a tuepa nung a aw. A ke a kang te a dangta tah a daa khu vyi.

¹²Zingsuv ta a hmung tiyta, u te, “Canung nung, na pasanapa taata hya na zang tli,” a ta.

¹³A kuv kha a cunglie chi te, sungkhabala ta capa nung ca a dangta tah a daa the te Khazing kha a pathuosa.

¹⁴Apungna-ing a uvtuvpa ca Sabbath ning ta Zingsuv ta cawsaa a patluo sa nakawta a hi haa te, cawsaazaapuv kha, “Rehriena riypata ningcaruv a aw, capa ningcaruv chunglie ca a vaw ungla a vya patluo sa tie nie ung, Sabbath ning hingca cuo li pata!” a ta yi.

¹⁵Cadyiseca Abyipa ta, “Niema phahruocuo tie! Ahunghmuo cuo ungla Sabbath ning ta nama cue hne nama laa kha a khuhriy pathluopa ung cate a ing taata papya ung cate tiy padang sa riypata nama tangle cuo vama?

¹⁶Setaa ta kung hraa hlyicari chung a ciypakipa Abraham samingsahlaanung hing Sabbath ning ta hing ciypakina taahingta hya pazangpa cuo'a vama?” a ta.

¹⁷Cahaa cata a ri tiyta, a carie tie kha ama nang pazaa yite, cawsaazaapuv ca kharuehaa hmang a tuepa cunglie kha amaa law.

¹⁸Cacuonakaw Zingsuv ta, “Khazing Pena hing khaapa hne ma aa lu? Khaapa hne tama i taachung aa?

¹⁹Cawsaa pakha ta la te diedung lie a vaapa uotuo ciy hne tana aa lu. Uotuo ca kya le te thingkungpa ta kya cuote, pavaa zaw ta a ce cunglie buv amaa tue,” a ta.

²⁰Zingsuv ta thukhyi pakhaa te, “Khazing Pena hing khaapa hne tama i taachung aa?

²¹Canung pakha ta la te viedie beke zungthung lie a phuvpa, viedie a pathu sa diypa, thiynung hne tana aa lu,” a ta.

²²Zingsuv ca Jerusalem luo a sipuo pata khypuv khyta kha capiepaa yite a pacuv yi.

²³Chekha ta, “Abyipa, cawsaa cawta dyi ma khuona a hmung'a yi,” ama ta. Zingsuv ta,

²⁴“A baapa ingchiypakaa taakhata a ngie riypata a zue tie ung; tahematapakieca cawsaa hluvpuv ca a ngie kha amaa zue raalaa pata a ngie khu'a vayi.

²⁵Ing a hnyituvpapaa ca thu'a te ingchiy kha a khaa aa; niema ca ale lie kha a daa pata ingchiy kha cakhaw'a ung cate, ‘Abyipa, ingchiy malie pahaw tie,’ nama ta tiyta, ‘Khaapa taata ma namaa vaw tapa kha ca pachang vayi ang,’ tapata aca palie'a yi.

²⁶Cakhutaa niema ta, ‘Nama hne sa ninghne, tiy danghne puv ma za tapa kha; luopuv lie zaw malie na za pacuv pakha,’ nama ta aa.

²⁷Cuorasala ama ta, ‘Khaapa taata ma namaa vaw tapa kha ca pachang vayi ang. Niema cawsaa pha lipa zaw kama'a taahingta pya ungla cakuo tie ung,’ aca ta'a yi.

²⁸Abraham, Isak, Jakob hne profet tie bangkhuo ca Khazing Pena chunglie ama awpa kha hmung'a ung cate, niema ca ale luo thawpa nama cuo tiyta caa ung cate nama haa nama rie aa!

²⁹Cawsaa ca ningchiy, ningtla, chaluo hne sungluo taata a vaw'a yite, Khazing Pena saduona pyi lie kha sa ama ning aa.

³⁰Hnang a chuopa ca hmaa sa'a yite, hmaa a sapa ca hnang ama chuo aa,” a ta.

³¹Capa cuo ning cata Zingsuv'a luo kha Farasi tie chekha a vaw yite, “Herod ta aca thie khing nakawta hingpa taahingta pya tie,” ama ta.

³²Zingsuv ta, “Vaa ungla capa cahnie ca: ‘Ata ning hne mawluo ca khuevuo kha papya'a ang te a pasapa kha i patluo sa'a yi, a ningthungnapa ning ta i re kha i patlung aa a ta,’ tapata va chang tie ung.

³³‘Cacuonakaw ata ning, mawluo hne hezuoning ca i cakuo nguoluo kalie thluo aa; tahematapakieca Jerusalem lie ta li pata a hrang lie ta profet pakha thie riypa ca cuo khu vyi.’

³⁴Vya Jerusalem, Jerusalem! Profet tie kha thie yi cate nama'a luo vya pathliepa tie kha alung ta a vaa sapa khy! Aapuvnung ta aatachiyta zaw kha a ma thlaa rawlie a buvkhungpa haayita yikhazaa hingma na cawsaa zaw hing i buo pazuu khuo i ting, cadyiseca khing vaciy.

³⁵Mang tie, na ing ca thusepa a cuo aa. Cakhutaata, biehmisi tana ica chang yi: ‘Abyipa ming ta a vawpa ca Khazing ta thluechiy pi mangsue,’ tapata na rithena cuo a vya pha hluo li na hmung'a va tli ciy,” a ta.