Read Lautu Chin Luka 15 Bible Online

Luka 15 - Lautu Chin bible

Luka 15

¹Luokha ca, ngukhyituv tie hne a suepa tie kha Zingsuv bie naathlie riypata a maa vaw.

²Farasi tie hne Phungbie saya tie kha a cie yite, “Hingpapaa hing a suepa tie kha a khe yite iema hne sa zaw a ning!” ama ta.

³Cacuonakaw Zingsuv ta hingpa pakhingpuonabie hing a chang yi:

⁴“Niema hrawlie pakha ta tuv zakha hnyi sala sakha a vie pata a cuo kieca tuv sawcaky hne sacaky kha ruochung lie patle siy'a te a viepa sakha kha a hmung hluo li a huv aa, cuo vama?.

⁵A va hmung tiyta, a letung cunglie vya khangle te a palung a tluo hringhruo.

⁶Ing luo a vya chiy tiyta a viesaa hne a ingpaa zaw kha ku yite, ‘A viepa i tuv kha hmung ang te naa lawkhyi tie ung,’ a ta yi.

⁷Ica chang yi: cahaa cata, sue a ngiepachiy a hu lipa aa dangpa saw caky pacaky laata a suena a ngiepachiypa a suepa pakha kawlieta vuoruo lie palungtluona a le vie a aw aa,” a ta.

⁸“A cuo li kie, canung pakha ta ngu tuokaa[32] phiehraa hnyi sela phiekha a pavie kieca myi-ing kha a vuo'a te, a ing kha phiy'a te, a hmung hluo li a cakiy a capie te ta a phasa pata a huv aa cuo vama?.

⁹A hmung tiyta, a viesaa hne a ingpaa zaw kha ku'a yite, ‘I paviepa i tuokaa kha hmung pakhaa ang te naa lawkhyi tie ung,’ a ta yi.

¹⁰Ica chang yi: cahaa cata, a suena a ngiepachiypa a suepa pakha kawlieta Khazing vuocung ming ama palung a tluo,’ a ta.

¹¹Zingsuv ta a ri kaliepa ca, “Luokha ca saacapaa pahning a hnyipapaa a za aw.

¹²A syi viepapaa ta a paa kha, ‘I paa, i hmung riypata a cuopa ru ca na pi tie,’ a ta. Cacuonakaw a paa ta ru ca a che yi.

¹³Cakhutaa ning a ru hluo ta saacapaa a syi viepa ca a hnyipa bangkhuo kha la te khy luohlaa luo kha a tlaw. A duv a khing ta hring te a hnyipa bangkhuo ca a pahli diy.

¹⁴A hnyipa bangkhuo a hmuo diy khu taata capa ruo lieca khuopuv ta cakuo tlung te a kuv cahri pata a aw.

¹⁵Cacuonakawta capa khy ming pakha'a luo kha re hrie riypata vaa te, ama paa cata va mangchiy riypata a lu luo kha a paphya.

¹⁶Va ta a ningpa khukhuhaw kha a riybina te ta a ning khingsa raalaa pata ahungtahmuo pi vayi.

¹⁷A palung kya sing te, ‘I paa rehrietuv tie kha ning tie li tamuo ama hnyi ta, kama tlaku ca hinglie hing i maasa'a nang!

¹⁸Thu'a ang te na i paa luo kha si'a ang te, ‘I Paa, Khazing cunglie hne nama cunglie ta i sue tli.

¹⁹Na saacapaa cuo riypata a tla va tli ang; na rehrietuv pakha haata na chi ra thi tie, i ta aa,’ a ta.

²⁰Cacuonakaw thu te a paa luo kha a si. Luohlaapuv lie a aw kalie pata a paa ta a va hmung ca, a palung tluo hringhruo te, vaa ruo te, cakuv te a pahnuo.

²¹A saacapaapa ta, ‘I Paa, Khazing cunglie hne nama cunglie ta i sue tli. Na saacapaa cuo riypata a tla va tli ang,’[33] a ta.

²²Cuorasala a paa ta a sii zaw kha u yite, ‘A catli pata a vaw ung! Pang phacepa kha vya cyi ungla pabuv ung. A kuvdaw lie hing kuvpahryi vya pahryi ungla, a phyi lie hing phyipakaw vya pakaw tie ung.

²³Cakhutaata, cuetaata a thucepa kha patuv ungla thie tie ung, ning ung sala a nuo ung siy;

²⁴tahematapakieca, i saacapaa hing za thiy te a hring pakhaa; za vie te i hmung pakhaa,’ a ta. Cahaa cata pyi tue ca ama patha.

²⁵A saacapaa uvthyipa kha lu taata vya si te ing a thaa luo a vya chiy tiyta, hlaa sa pu hne luo pu kha a thyi.

²⁶Cacuonakawta a siipaapa pakha kha u te, ‘Khaapa ma a cuo nguoluo?’ ta te a hiehriy.

²⁷Ama ta, ‘Na nuta kha ing luo vya kaa tena, hnaatluosapa hne a bangta tah a vya chiy nakawta, na paa ta cuetaata a thucepa kha a thiepa,’ a ta.

²⁸Saacapaa uvthyipa ca a hi haa te ingchung luo a ngie khing li pata a aw. A paa ta kya pya te a ripasa.

²⁹Cuorasala a paa kha, ‘Mang tie, hing zaw kungnung na re kha sii haata hrie ang te, na ri caa ngie li pata aw buo va ang. Cuorasala i viesaa zaw hne a nuona pyi tue riypata mie taata sakha hmuo na pi buo vaciy!

³⁰Cuorasala siyhrawnung tie'a lieta na hnyipa bangkhuo a pachuo diypa, hingpa na saacapaapa ing luo a vya kaa tiyta cuetaata a thucepa na thiepa!’ tapata a palie.

³¹A paa ta, ‘I saacapaa, nama ca kama'a lie aw pari cate i hnyipa bangkhuo hing nama huopa tana a cuo.

³²Cuorasala na nuta ca za thiy te ata hing a hring pakhaa; za vie te ata hing hmung pakhaa pata a cuo; cacuonakawta pyi tue pata palungtluona hne maa nuo riypa hrahring na a cuo, a ta,’ a ta.