Read Lautu Chin Luka 16 Bible Online

Luka 16 - Lautu Chin bible

Luka 16

¹Cakhutaata Zingsuv ta ziytuv tie kha, “A hnyirungpa pakha za aw te tluotlakhuekhuotuv pakha a hnyi. Capa tluotlakhuekhuotuv cana na tuokaa kha a cuo lipa lie a hmuo ta yite ama chang.

²Cacuonakaw ama ca ku te, ‘Na kaw i thyipa hing tuokhaatama a cuo? I chechiy na mangchiynapa cazing kha a tlingsa pata na pi tie, tahematapakieca nama ca i tluotlakhuekhuotuv cuo khu'a va tli ciy,’ a ta.

³Tluotlakhuekhuotuv cata ama hne ama kha, ‘I byipaapa ta i re taata ina papya'a tli. Tuokhaatama i tue aa? Alyi ta i chie khu'a va, malie a hiechaw riypa cata i nang a zaa.

⁴Tluotlakhuekhuotuv taata ina papya tiyta cawsaa ta ama ing lie ina pa-aw sa khing riypa yita khaapama i tue aa tapa kha i pachang.’

⁵“Cacuonakawta a byipaapa'a lie lyibuo a aw khyipa tie kha pakha hnang pakha ta ku yite a pakhanapapaa kha, ‘I byipaapa kha khazaa ma naa uo?’ a ta.

⁶Ama ta, ‘Oliv chiytiy pung zakha,” tapata a palie. Tluotlakhuekhuotuv cata, ‘Na cazing kha va la, a catlisa pata a tu la sawngaa ta pare tie,’ a ta.

⁷Cakhutaa a hrangpa pakha kha, ‘Nama haw khazaa ma naa uo?’ a ta. ‘Suo tuo zakha[34],’ tapata a palie. ‘Tluotlakhuekhuotuv cata, ‘Na cazing kha va la la sawcari ta pare tie,’ a ta.

⁸A dang lipa tluotlakhuekhuotuv ca singvaasa pata hne zyatesa pata hmang a tue nakawta a byipaapa ta a pathuosa. Tahematapakieca ata chuo cawsaa zaw hing ama hmang tuenapa kawlie ca khena chunglie a awpa tie laata ama singvaa ama zyate vie,” a ta.

⁹Cacuonakaw ica chang yi: Chuelyi sue hing hmuo ungla viesaa a tue tie ung, tahematapakieca chuelyi sue a chuo tiyta chuozaa ta aa hmangpa ing[35] liena pa-aw sapa nama cuo aa.

¹⁰Chechiy cawta lie zangtluo aa tlapa ca chechiy lepa lie zaw zangtluo aa tla ra; chechiy cawta kawlie zangtluo a tla li kieca chechiy lepa kawlie zaw zangtluo a tla'a vyi.

¹¹Chuelyi sue patungpatiena kawlieta zangtluo namaa tla li kieca tuokhaatama hnyirungna tange ca pipa nama cuo khu aa?

¹²Malie chechiy cunglie hmuo zangtluo namaa tla li kieca tuokhaatama niema huo a cuopa chechiy ca niema kha aca pi khing'a yi.

¹³“Sii pakha ca a byi pahning re hrie khu'a vyi; pakha kha hue'a te pakha kha a due aa, pakha'a lie kha a ringchuo a chiysa pata aw'a te pakha kha siysaa ri li pata a aw aa. Khazing re hne chuelyi hnyirungna re hrie pakhe khu'a va ungciy,” a ta yi.

¹⁴Capa bangkhuo ca tuokaa a khingsapa Farasi tie ta ama thyi tiyta, Zingsuv kha ama pahnyisue.

¹⁵Cacuonakawta Zingsuv ta, “Niema hing malie minghmung lieca a dang hruo namaa cuo, cuorasala Khazing ta nama pathiypalung kha aca pachang yi. Tahematapakieca cawsaa ta muosung ciemuo pata ama ruepa ca Khazing hmiekunglieta duvsamakhie aa chiypa a cuo.

¹⁶Moses Phungbie hne profet tie capepa caa zaw ca tiynawtuv Johan chuo te cuo khatana a cuo; capa cuo ning taacata Khazing Pena Thuophaabie ca phu pata cuote, cawsaa ting ta pena chung luo kha amaa ngie chuv patlaw.

¹⁷Cuorasala Phungbie chunglie a cawcepa caasuo suokhata hmuo a viepa laata vuoruo hne alyi rapa na a na vie aa,” a ta.

¹⁸Ahunghmuo a napuv ma te canung hrangpa hne a hlawpa ca nungvaathingsuena a tuepa tana a cuo; cahaa cata a navaapa hne a chepa canung a hlawpa zaw nungvaathingsuena a tuepa tana a cuo.

¹⁹Luokha ca a hnyirungpa cawsaa pakha aw te, cawsie muoruvpa kha a tue te a ningtating ta tuokaa a hluvsa pachuo pata pyi a tue taw.

²⁰Lazaruh ama tapa a siypasapa, a pangpa bangkhuo hmaa ta a buvpapaa ca

²¹a cabya taata a tlapa sa zungpepa kha a haa'a ang te i riy a bi aa tapa a ruechuona hne a hnyirungpapaa chiypakaa lie kha laa te, uv kha a vaw te a hmaa kha ama vya pali taw.

²²“Siypasapapaa ca thiy te avuoming ta Abraham hne aw riypata ama sikhyi. A hnyirungpapaa zaw kha thiy te ama paby.

²³Hell chunglie riethyina a ang nguoluo pata cungluo kha a kya mang ca luohlaapuv taata Abaraham hne a thaalie[36] ta Lazaruh kha a kya hmung yi.

²⁴Khuosa ta u te, ‘I paa Abraham! ngie na chi thi tie. Lazaruh kha za pathlie thi la a kuv daw kha tiy luo naw sala i palyi lie hing na za pathlasue se, tahematapakieca hingpa myi chunglie hing i rie na a thyituv tli!’ a ta.

²⁵Cuorasala Abraham ta, ‘I saacapaa, na hring chunglie kha a phana hmung tli cate, cahaa cata Lazaruh ta a pha lipa a cu. Cuorasala ata hing ca ama ca hingpa lie hing a nuosa pata aw te, nama ca ruvnaanapa na ang.

²⁶Cahlyitaw taata maa lalalie hing ryihue a thuvsapa aw te, hingpa taata namaa luo a vya chiy khingpa zaw vya chiy khu lipa yi ta, nama'a taata kiema'a luo a vaw khingpa zaw a vaw khu vayi,’ a ta.

²⁷A hnyirungpapaa ta, ‘I paa, Lazaruh kha i paa ing luo pathlie thi tie.

²⁸Tahematapakieca uvnu papangaa hnyi yi ang te iema chuo, hingpa te-angna luo hing ama vya chiy ra li riypata a raaringna va pi thi yi se, a ta.

²⁹“Abraham ta, ‘Na uvnu zaw ca ama bie naa ama thlie riypa Moses hne profet tie ama hnyi,’ a ta.

³⁰A hnyirungpapaa cata, ‘Cuo vyi, I paa Abraham, thiyna taata pakhakha thupakhaa sala iema'a luo kha a vaa kieca ama suena kha amaa ngiepachiy aa,’ a ta.

³¹Abraham ta, ‘Moses hne profet tie bie kha amaa ngie li kieca cawsaa pakhakha thiyna taata a thupakhaa zaw ta zang hlyi'a vayi,” a ta.