Read Lautu Chin Luka 17 Bible Online

Luka 17 - Lautu Chin bible

Luka 17

¹Zingsuv ta ama a ziytuv tie kha, “Suena chung luo cawsaa a patla sapa hmang ca a aw aa, cuorasala capa hmang a pacuo sapa ca a ping a suvpa tana a cuo.

²Hingpa haatiyta zaw hrawlie ta pakha hing hmuo a pasue sapa ca a rue lie sacuo rienapa alungtung lesapa ciypuo pata riyliy chung luo thaw pata cuo sala a cuota a pha vie aa.

³A raaring tie ung. “Na uvnu kha a sue kieca pasiypa-ya tie, a ngiepachiy kieca a ngiethe tie.

⁴Ningkha ta na cunglie yi sariy sue sala a yi kyry ta nama'a luo kha a vaw te, ‘I ngiepachiy ne,’ aca ta kieca a ngiethe tie,” a ta.

⁵Ziytuv tie ta Abyipa kha, “Ma zangna hing pale sa vie tie,” ama ta.

⁶Zingsuv ta, “Uotuo hmung tie zangna nama hnyi kieca, hing puvlung kung hing, ‘Na thariy hne yalya ta a kya phie la riyliy lie hue vaa caby tie,’ ta ungla nama ri acaa ngie'a yi.

⁷“Niema hrawlie hing ahungma le thawna taata, a cuo li kie tuvkhiena taata ata bala a vya chiypa nama sii kha, ‘Luo hing a vaw la cabya lie a vya tu tie,’ a ta'a ungciy?

⁸‘Zuosa kha vya pachie la, buohryi syipa kha a hryi la, sa i ning chung hne i dang chung kha na mangchiy la, cakhutaa cata ning la dang tie,’ ta'a va ung cama?

⁹Sii ca na changpa kha a tue nakawta alawna bie na hluo ma?

¹⁰Niema zaw cahaacatana nama cuo ra: tue riypata aca changpa yi nama tue diy tiyta, ‘Kiema ca muo a hnyi lipa sii tana ma cuo; ma tue riypata a cuopa ta dyi khana ma tue,’ ta tie ung,’ a ta.

¹¹Zingsuv ca Jerusalem luo a sile pata, Samaria hne Galilee ruo kha a capiepaale.

¹²Khy khykha luo kha a ngie ca caahminghmaa[37] ta a pasapa cawsaa pahraa ta amaa vya taw.

¹³Luohlaa puo lie kha a daa yite, “Zingsuv, Abyipa, malie ngiechi thi tie,” ta yite ama khi.

¹⁴Zingsuv ta iema kha a hmung tiy yi ta, “Cakuo ungla tluobyi tie kha vaa pamang sa tie ung,” a ta yi. Ama vaale pata ama pathe.

¹⁵Iema hrawlie pakha ta a tluopa kha aa hmung tiyta, kaa te Khazing kha khuopuv ta a pathuosa.

¹⁶Zingsuv phyi thabaw lie kha a bu te Zingsuv kha alawna bie a hluo. Ama ca Samaria ming ta a cuo.

¹⁷Zingsuv ta, “Pahraa patluo sapa cuo vayi ma? A hrangpa pacaky tie haw khaaliema ama aw?

¹⁸Hing ruohrangpapaa hing ri li pata pakha hmuo vya kaa pata Khazing pathuosa vade yi?

¹⁹Cakhutaa Zingsuv ta, “Thu la cakuo tie; na zangnapa na caa patluo sa,” a ta.

²⁰Luokha ca Farasi tie ta Zingsuv kha khatiy thuema Khazing Pena ca a tlung aa tapata ama hiehriy. “Ama ta, “Khazing Pena ca ming ta hmung khupa phang ta za tlung'a vyi.

²¹Ahungtahmuo, ‘Mang tie, lie hing na a aw! a cuo li kie, ‘lie hue na a aw! ta'a vayi; tahematapakieca, Khazing Pena ca nama chunglie na a aw,” a ta yi.

²²Cakhutaata a ziytuv tie kha, “Niema ta cawsaa saacapaapa ningcuo kha ning kha chuona ma hmung khing hringhruo nama ta cuo kha a vya chiy aa; cuorasala hmung'a va ungciy.

²³Niema kha, “Mang tie ung, lie hue a aw hue! a cuo li kie, lie hing a aw hing,’ a ca ta'a yi. Vaa khya ung, va pya khya ung.

²⁴Thinghlaa ca avuo kiy kha taata kiy kha te a cakang te a khe diypa haakhata Cawsaa Saacapaa ca capa ningkhue thueta ca a cuo ra aa.

²⁵Cuorasala a suokhana ta khuosa ta te-ang taa'a te ata chuo cawsaa tie hingta ama thaw taa aa.

²⁶Noah chuo ning haakhata Cawsaa Saacapaa chuo ning zaw kha a cuo ra aa.

²⁷Noah kha tiypalaw chung luo a ngie te, tiypa-aa ta cawsaa bangkhuo a para diy nate yi ta, ning yi dang yite, amaa chiy amaa hie nguoluo thluo.

²⁸Cahaa cata, Lot chuo ning zaw a cuo ra. Cawsaa bangkhuo kha ning yi dang yite, zaa yite amaa calyi, ciy cyi yite ing ama sa.

²⁹Cuorasala Lot ta Sodom a pya se ning kha vuoruo taata myi hne ke kha khy saa ta za saa te ama palang ta a thie diy yi.

³⁰Cawsaa Saacapaa a zaa luo thueta ca cahaacatana a cuo ra aa.

³¹“Capa ning thueta ca ing thlungkhuv lie a awpa ca ing chunglie a awpa chechiy la riypata cung kha se. Cahaa cata lu lie a awpa ta ing luo kaa hrahring kha se.

³²Lot napuvnung kha a thyi tie ung!

³³A hringnapa kha pabang a khingpa ca a hringnapa kha pahli'a te, a hringnapa a pahlipa ca a hringna kha aa bang aa.

³⁴Ica chang yi: capa zuo ningta ca iehmang hmangkha lie a ziehnepa cawsaa pahning lie kha pakha ca la pata cuo'a te, pakha ca thuse pata ama cuo aa.

³⁵Sung a suv hnepa canung pahning lie kha pakha ca lapa cuo'a te pakha ca thuse pata a cuo aa.

³⁶(“Lu lie re a hrie hnepa cawsaa pahning lie kha pakha kha la pata cuo'a te pakha kha thuse pata a cuo aa,”)[38] a ta.

³⁷Cakhutaata, ama kha “Abyipa, Khaapaliema?” tapata ama hiehriy. Zingsuv ta, “Saa thiypa a awna lie bangkhuo luotaa aa hmyale,” a ta.