Read Lautu Chin Luka 18 Bible Online

Luka 18 - Lautu Chin bible

Luka 18

¹Cakhutaata, Zingsuv ta ziytuv tie kha palung chuo li pata thlaa chuo pari riypa kha pakhingpuonabie a chang yi.

²Ama ta, “Khy khykha lieta Khazing ciy li pata cawsaa hmie zaw a mang lipa bieripatuv byi pakha a aw.

³Capa khy lie ca nunghlyinung pakha aw te, capa nunghlyinung cata, “Tazaa maa cyipa lie hing naa bya thi la,” a vya ta byalya.

⁴Cuokha chung ca a pakaa, cuorasala a hnangcaw taca, “Khazing ciy li pata cawsaa hmie zaw i mang li raalaa pata

⁵hing nunghlyinung hing hnaa ina pahnaw pari, a vaw byalya pata riethyi ina pi li riypata a bie ca i ripa aa,” a ta.

⁶Abyipa cata, “A pha lipa bieripatuv byi ta a ripa hing naathlie tie ung.

⁷Cacuokieca Khazing ta aa tlawpa, ama'a luo chung zuo ta a upa tie ca ama bie ripa li pata a aw'a yi ma? Iema a bya riypata a pahaa a pasaa'a ma?

⁸Ica chang yi: Ama bie kha a catli pata a ripa'a yi. Cuorasala Cawsaa Saacapaa aa vaw tiyta alyi lie hing zangna a hmung'a ma?” a ta.

⁹Zingsuv ta hingpa pakhingpuonabie hing, iema'a na iema kha a zangpa, iema kha maa dang tapata a rue yite malie a nutaapa tie kha a chang yi.

¹⁰“Cawsaa pahning kha thlaa chuo riypata Biena-ing luo ama cakuo, pakha ca Farasipa cuote a hrangpa pakha ca ngukhyituv ta a cuo.

¹¹Farasipapaa ca ama se ta a daa te hinghaahingta thlaa a chuo, “Vya Khazing, kama ca a ruvhangpa, cawsaa a dung a viepa, aparuvsuena a tuepa hne, hingpa ngukhyituv zaw haahingta i cuo li nakawta icaa law.

¹²Zaakha chunglie ning hning sa uv ang te, i hmungpa tuokaa bangkhuo taata chehraachekha ica pi,” a ta.

¹³Cuorasala ngukhyituv ca luohlaapuv luo khata a daa te vuoruo luo hmuo mang nguo li pata a cacunghnaa kha a cung te, ‘Khazing, a suepa kama hing ngie na chi thi tie,’ a ta.

¹⁴Ica chang yi: “A hrangpapaa kha cuo li pata hingpapaa hingna duopacu cie pata a ing luo a cakuo; Iema hne iema a cyicalangpa bangkhuo ca pachungpa cuo'a yite, iema hne iema a panepa bangkhuo ca cyicalang pata ama cuo aa,” a ta.

¹⁵Cawsaa ta ama saata zaw kha a kuv ta hrie naa se yi tapata Zingsuv'a luo amaa vawkhyi. Ziytuv tie ta ama hmung tiyta cahaa cata tue li riypata khuosa ta ama thlu.

¹⁶Cuorasala Zingsuv ta ku yite, “Haatiy zaw ca kama'a luo kha a vaw yi se, thlu kha ung, tahematapakieca Khazing Pena ca hinghaapaapa cawsaa zaw cuo hing tana a cuo.

¹⁷Biehmisi tana ica chang yi: Ahunghmuo cuose, Khazing Pena kha haatiyta haahingta a cuhluo lipa ca, capa Pena chung luo ca a ngie khu buohluo'a vayi,” a ta.

¹⁸Uvtuv uvthyi pakha ta Zingsuv kha, “A phapa Saya, chuozaa hringna hmung riypata khaapama i tue aa?” a ta.

¹⁹Zingsuv ta, “Khaapanakawma cawsaa phapa ina ta ciy? Khazing ri li pata ahunghmuota pha vayi.

²⁰Phungbie kha na pachang: nungvaathingsuena tue kha, lienaw kha, paruv kha, a hmuo lipa daakhyituv cuo kha, na nung hne na paa kha pa-uvsathyi yi,’ tapata a cuo pakha!” a ta.

²¹Cawsaapapaa ta, “Hingpa phungbie bangkhuo hing ca i cawta baataata i ziy ciepa na a cuo,” a ta.

²²Zingsuv ta capa bie ca a thyi tiyta, “Naa bu kaliepa na suokha a aw. Na hnyipa bangkhuo kha zaa la na tuokaa[39] kha siypasapa tie re tie yi, cacuokieca vuoruo lie a hnyirungpa na cuo aa; cakhutaa a vaw la kama kha na ziy tie,” a ta.

²³Cuorasala cawsaapapaa ta capa bie ca a thyi tiyta a ngie a chi, tahematapakieca ama ca a hnyirungsa pata a cuo.

²⁴Zingsuv ta ama kha mang te, “A hnyirungpa tie cuota ca Khazing pena chung luo a ngie riypa hing khatluv tama a ruv!

²⁵A hnyirungpa Khazing pena luo a ngie riypa laa taca kala-uv sakha ciphang naakhue chung luo a ngiepa na a na vie,” a ta.

²⁶A bie a thyipa tie ta, “Ahungma khuona ca a hmung khu aa?” ama ta.

²⁷Zingsuv ta, “Cawsaapa cuota a cuo khu lipa hing Khazing cuota ca a cuo khu,” a ta.

²⁸Cakhutaa Piter ta, “Mang tie, Kiema ca ma ing ma lu kha thuse pate nama maca ziy tli,” a ta.

²⁹Zingsuv ta iema kha, “Biehmisi tana ica chang yi: ahunghmuo cuose Khazing Pena kawlieta, ing cuose, a napuv cuose, a uvnu cuose, a nungpaa cuose, a saata zaw cuose a thusepa ca

³⁰ata chuo lie hing ale hluvpuv ta hmung riypa hnyi'a te, a vaw riypa chuo lie chuozaa hringna a hmung aa,” a ta.

³¹Zingsuv ta ziytuv hlyihning tie kha ku yite, “Naa thlie tie ung! Jerusalem luo vaa'a ung pate capa lieca profet tie ta Cawsaa Saacapaa kaw ama capepa bangkhuo kha a tling aa.

³²Ama ca Jentail ming kuv luo pi pata cuo'a te, iema ta ama tue hyalya aa, ama ese aa, ama paciy ta ama pacha aa.

³³Tuv'a yite ama thie aa, cuorasala ningthungna lieta a thupakhaa aa,” a ta.

³⁴Cuorasala ziytuv tie ta hingpa kaw hing khaahmuo pachang vayi; a ri khingpa a siyluo kha iema'a taata nu pata a cuo nakawta khaapama a ri tapa kha pachang khu vayi.

³⁵Zingsuv ca Jeriko khy luo a vya chiy'a nang caw ta mingcuepa pakha ca luokie lie kha zaa tu te a za hie nguoluo yi.

³⁶A thaalie cawsaazaapuv ama vya cakuolepa pu kha a thyi tiyta, “Khaapama a cuo?” tapata a hiehriy yi.

³⁷Iema ta, “Nazareth khypa Zingsuv na a vawle,” ama ta.

³⁸Ama ta, “Zingsuv, David Saacapaa! Ngie na chi thi tie,” tapata a u.

³⁹Hmie luo lie a awpa cawsaa tie khata duo riypata ama thlu. Cuorasala, David Saacapaa! Ngie na chi thi tie! ta te khuo vie ta a u hryly.

⁴⁰Zingsuv ca a daa te mingcuepapaa kha ama'a luo a vawkhyi riypata a chang yi. A thaa luo a vya chiy pahne Zingsuv ta,

⁴¹“Khapa na tuepa se tapa ma ina khing ciy?” a ta. Ama ta, “Saya na pahmung sa pakhaa tie,” a ta.

⁴²Zingsuv ta, “Hmung tie, na zangnapa na caa patluo sa,” a ta.

⁴³A ming ca sungkha ta vuo pakhaa te, ama kha ziy te Khazing kha a pathuosa. Cawsaazaapuv ta ama hmung tiyta Khazing kha ama pathuosa.