Read Lautu Chin Luka 19 Bible Online

Luka 19 - Lautu Chin bible

Luka 19

¹Zingsuv ca Jeriko khychung kha cahraw te a sile.

²Capalie ca ngukhyituv a byilepa, a hnyirungsapa Zakie ama tapa kha a aw.

³Zingsuv kha ahungma tapata hmung aa zue, cuorasala ama ca cawsaa dang pachangpa cuote cawsaazaapuv ta ama pakhuo nakawta hmung khu vyi.

⁴Cacuonakawta cawsaazaapuv hmie luo kha a ruo te Zingsuv hmung riypata saikamor kung kha a kie.

⁵Zingsuv ca capa hmang luo a vya chiy tiyta kya angchiy te, “Zakie, a catli pata za cung tie, tahematapakieca ata ning hing na ing liena ica tlung aa,” a ta.

⁶Zakie ca a catli pata za cung te alawna hneta Zingsuv kha a ing lieca a patlung sa.

⁷A hmungpa bangkhuo ca a cie patlaw yite, “Hingpapaa hing a suepa ing lie tlung riypatana a vaa,” ama ta.

⁸Zakie ta a daa te Abyipa kha a chang, “Mang tie, Abyipa, I hnyipa khingkhuo hing a siypasapa tie na i pi'a yi; malie kha i dung kie yi ca, lepaliy ta i pipakhaa'a yi,” a ta.

⁹Cakhutaata Zingsuv ta, “Ata ning hingpapaa ing lie hing khuona a tlung mangtli, tahematapakieca hingpapaa zaw hing Abraham saacapaa tana a cuo ra.

¹⁰Cawsaa Saacapaa ca a viepa huv riypa hne khuo riypatana aa zuv,” a ta.

¹¹Cawsaa ta a ripa naa ama thlie nguoluo ning kha, Zingsuv ta pazue te pakhingpuonabie a chang yi. Ama ca Jerusalem kha vuotaa pha'a nang tli te Khazing Pena ca a ngiesa tli tapata ama rue.

¹²Cacuonakaw ama ta, “Luokha ca abyi pakha aw te ruo luohlaapuv luo kha si pata siepahruo a cuo khu taata ing luo vya kaa riypata aa ting.

¹³A sii pahraa kha ku yite siyytuokaa[40] phiehraa a pi khu taayita, ‘I vya kaa hluo bangkhuo sung za pali tie ung,’ a ta yi.

¹⁴Cuorasala a ruo ming khata ama kha hue yite, ‘Hingpapaa hing ta malie a uv riypa khing va puv,’ tapata biephyatuv kha ama pathlie.

¹⁵Capapaa ca siepahruo ta a cuo khu taata a vya kaa. Tuokaa a pipa a sii tie kha khazaa ma ama hmung tapa a pachang khing nakawta a ku pahraa yi.

¹⁶A pakhanapapaa ca a vaw te, ‘Abyipa ina pipa ciy siyytuokaa phiekha khata amie siyytuokaa phiehraa i hmung,’ a ta.

¹⁷Ama ta, ‘A pha, nama ca sii phapa tana na cuo. Hmang cawta kawlie zangtluo aa tlapa na cuo nakawta khypuv khy hraa kha uv tie,’ a ta.

¹⁸A pahningnapapaa kha a vaw te, ‘Abyipa, na huopa phiekha khata phiepangaa i hmung,’ a ta.

¹⁹Capapaa kyihuo cata, ‘Nama zaw khypuv khy pangaa uv tie,’ a ta.

²⁰Cakhutaata, a hrangpa sii pakhapapaa kha a vaw te, ‘Abyipa, lie hing na na huopa tuokaa phiekha ca a aw; pavya ta cataw ang te na i nu,’ a ta.

²¹Nama ca cawsaa tateta-iepa na cuo nakawta ica ciy. Na huopa a cuo lipa kha a la cate ciy na cyi lina lie sa na hrie,’ a ta.

²²Ama ta, ‘Sii chiepa! Na bie mamaapa tana na bie ica ripa aa. A tateta-iepa i cuopa hne i huopa a cuo lipa kha a la ang te ciy i cyi lina lie sa i hriepa zaw kha ina pachang ciy cuo vama?

²³Cata a cuo kie, khaapanakawma i tuokaa hing tuokaa-ing lie chi li pata na aw? Za chi la ca ivya kaa tiyta amie hneta hmung'a va ang ma?’ a ta.

²⁴A thaa lie a daapa tie kha, ‘A siyytuokaa phiekha kha la ungla tuokaa phiehraa a hnyipapaa kha pi tie ung,’ a ta yi.

²⁵(Cuorasala iema ta, ‘Abyipa ama ca phiehraa a hnyi tlipa kha,’ ama ta.)

²⁶Ama ta, ‘Ica chang yi: A hnyipa tie kha a hluv vie ta chachiypa cuo'a yite a hnyi lipa tie kha ama hnyi tlakuopa zaw kha lapa pata ama cuo aa.

²⁷Cakhutaa ama siepahruo cuo riypata naa khing lipa i carie tie kha hingpa luo hing a vawkhyi ungla i hmielie hing thie tie ung,” a ta.

²⁸Zingsuv ca hingpa bie a ri khu taata ama hmie luo ta Jerusalem luo kha a si.

²⁹Oliv tluo lie Bethfeih hne Bethani khy kha a pha tyalya tiyta a ziytuv pahning kha hmie luo pathlie yite,

³⁰“Nama hmie khy luo khiy si ungla nama vaa ngie pata amaa khang buo li liepa laataata ama hrepa kha nama hmung aa. Pathluo ungla hingpa luo hing namaa vya chiy aa.

³¹Pakhakha ta, ‘khaapanakawma nama pathluo,’ aca ta kie yi ca, ‘Abyipa na a hu,’ nama ta aa.

³²Cacuonakawta a pathliepa tie ca si yite a ripa haakhata ama va hmung.

³³Laataata ca ama pathluo nguoluo pata, a ziypapaa ta iema kha, “Khaapanakawma nama pathluo?” a ta yi.

³⁴Iema ta, “Abyipa na a hu,” ama ta.

³⁵Cakhutaata Zingsuv'a luo kha a vya chiy yite, ama pang kha a ke lie ama padie khu taata Zingsuv ca ama pakhang sa.

³⁶Laa aa khang lenapa luopuv lie kha cawsaa ta ama pang kha ama phaale.

³⁷Oliv Tluo taata za cungbungnapa luopuv a va pha'a nangcaw khata a ziytuv cawsaa bangkhuo ca ama hmungpa a tuepa kharuehaa hmang kaw khata palungtluona hne khuopuv ta khi yite Khazing kha ama pathuosa:

³⁸“Abyipa ming ta a vawpa siepahruo ca thluechiypa ta cuo mangsue! Vuoruo lie diena aw sala a suocepa vuoruo lie khiy rungnaana aw mangsue,” ama ta.

³⁹Cawsaazaapuv hraw taata Farasi tie chekha ta Zingsuv kha, “Saya, caa ziytuv tie hing padie sa tie yi,” ama ta.

⁴⁰Zingsuv ta, “Ica chang yi: Iema hing ama die kieca alung hingna a kya khi'a yi,” a ta.

⁴¹Khypuv ca vaa ngie hryly te a hmung tiyta caa te,

⁴²“Ata ning diena cuota tuepa hmang hing pachang the la ca! Cuorasala capa hmang ca na ming hmungna taata nupa ama cuo.

⁴³Na carie tie ta rietuvnapa khuetlung ta ca cadung'a yite aca khaakhuona cuo hne a kuo bangkhuo taata aca vya cadena yi cuo ca a vaw aa.

⁴⁴Khazing ta nama parie riypata a vawna cuo kha naa pachang sa li nakawta nama hne na saata zaw kha alyi hne ca carie puo'a yite, naa lung zaw suokha cunglie suokha hmuo aa pathang pata thuse'a vayi,” a ta.

⁴⁵Cakhutaata Zingsuv ca Biena-ing chung luo kha a ngie te chechiy a zaapa tie kha a cade diy yi.

⁴⁶Cakhutaata, “Caapathepa chunglie, Khazing ta, ‘I Biena-ing ca thlaachuona ing tana a cuo aa’; Cuorasala niema ta a paruvpa tie a chuona khue ta nama pali,” a ta yi.

⁴⁷Zingsuv ca ning tating ta Biena-ing lie kha a pacuv yi. Tluobyilepa tie, Phungbie saya tie hne uvthyi tie ta ama thie khu na riypa luo kha ama huv byalya,

⁴⁸cuorasala cawsaa bangkhuo ta a bie suokha hmuo pahlyi khing lipa yi ta naa ama thlie nakawta thie khuna luopuv hmung vayi.