Read Lautu Chin Luka 2 Bible Online

Luka 2 - Lautu Chin bible

Luka 2

¹Capa cuo ning ca Siepahruo Awkastas ta Rom uvna ruo chung bangkhuo lie cawsaa mingluv ri riypata naw a papya.

²Capa mingluv rina ca a yikhanapa mingluv rina cuote Kuirinias kha Siria ruo uvtuv a cuo ningta a cuo.

³Cawsaa bangkhuo ca mingluv rina lie ming khung riypata ama khy cyicuo luo kha ama si.

⁴Josef zaw Galilee pe Nazareth khy taata Siepahruo David khypuv, Judea pe Bethlehem khy luo kha a si. Tahematapakieca ama ca David ciypathla ta a cuo nakawta a cuo.

⁵A pahaa ciepa hne nu hnyi riypata a mangkhuo nguoluopa Mary hne khata mingluv rina lie ming khung riypata ama si.

⁶Bethlehem lie ama aw ning khata nu aw tiy a ta.

⁷Sahrangta, saacapaata ca sa te pang ta a pahlaw khu taata cue hraky chunglie kha a pazie, tahematapakieca khyche banglaa lie kha iema cuota hmang aw va tli.

⁸Capa hrawlie, ruo chunglie kha zuo ta ama tuv mangchiy yite ruo lie a ripa tuvkhietuv tie ama aw.

⁹Abyipa avuoming pakha iema'a lie kha a luo te, Abyipa rungnaana ca ama cunglie a za khe nakawta ama ciy hringhruo.

¹⁰Cuorasala avuoming ta iema kha, “Ciy kha ung, Cawsaa bangkhuo cuota palungtluona lepuv a cuopa thuophaapa na ica za phya yi.

¹¹Ata ning hing David khy chunglie niema caa khuotuv Abyipa Messiah[2] ca a puv tli!

¹²Hingpa hing niema cuota pamangsana ca a cuo aa: haaseta pakha ca pang ta pahlaw'a yite cue hraky chunglie ama paziepa kha nama hmung aa,” a ta.

¹³Sungkhabala ta vuoruo rieka phuv lepuv ca avuoming hneta zaa luo yite Khazing kha hlaa ta ama pathuosa.

¹⁴“A suocepa vuoruo lie khiy Khazing ca pathuo sa pata cuo mangsue; A duepa zaw awnapa alyi lie hing diena aw mangsue!” ama ta.

¹⁵Avuoming ta thuse yite vuoruo luo ama kaa khu pahne ta tuvkhietuv tie ca pakha hne pakha kha, “Bethlehem luo kha vaa ung sala, hing a cuo nguoluopa hmang, Abyipa ta malie a changpa hing va mang'a ungpuv,” amaa ta.

¹⁶Cacuonakawta si pahraa yite Mary hne Josef hne cue hraky lie ama pathlingpa haaseta kha ama va hmung.

¹⁷Ama hmung tiyta haaseta kaw avuoming ta a ripa kha iema ca ama chang.

¹⁸Tuvkhietuv tie ta ama ripa a thyipa bangkhuo ca ama kharue a haasa.

¹⁹Cuorasala Mary ca capa bie bangkhuo kha a palung chunglie khung te a rue syalya pari.

²⁰Tuvkhietuv tie ca kaa yite avuoming ta ama changpa dala haata ama hmungpa hne ama thyipa kawlie kha Khazing ca ama pathuosa.

²¹Ning cari khu taata, haaseta vangdaw te tiy a ta ning kha a nung ta a phya hluo taata avuoming ta ama za ri ciepa ming, Zingsuv tapa kha ama paphya.

²²Moses phungbie haata a pathesana cuo kha a vya tling tiyta haatiypa ca Abyipa hmie luo chiykhyi riypata Jerusalem luo kha ama sikhyi.

²³(Abyipa phungbie caa-uv chunglie, “Nama sahrang, capaasaata bangkhuo kha Abyipa'a luo na nama pi aa”), tapata aa cape.

²⁴Abyipa phungbie lie a tapa haata, thuvruv sahning a cuo li kie valale sahning ta hriykhung a rina tue riypata ama sipa ta a cuo.

²⁵Khapa cuo ning kha cawsaa pakha, a ming Simeon ama tapa kha Jerusalem khy lie a za aw. Ama ca cawsaa a dangpa, Khazing a ciyzaapa, Israel ming khuona hmung riypa cuo kha a huo nguoluopa cuote Thlaapa Pathe ta a awpuopa a cuo.

²⁶Thlaapa Pathe ta Abyipa Messiah na hmung hluo li thiy'a vaciy a ta.

²⁷Thlaapa ta a chiy te Simeon ca Biena-ing chung luo kha a ngie. Phungbie haata tuepa riypata a nung hne a paa ta Zingsuv kha Biena-ing luo amaa ngiekhyi ca,

²⁸Simeon ta haatiypa ca a paw te Khazing kha a pathuosa:

²⁹Abyipa, ata ning hing na changtaapa[3] ca na biekuona haata, hnaanguota tah i hringna na pakhung sa tli,

³⁰tahematapakieca i ming ta na khuona kha i hmung tli.

³¹Mingphang bangkhuo hmiekunglie na tingtuopa khuona ca,

³²Jentail ming bangkhuo cuota na khingna a paluosatuv khena hne Na cawsaa Israel ming rungnaana a phyatuv tana a cuo,” a ta.

³³A nung hne a paa ca haatiypa kaw a ripa kha ama thyi tiyta ama kharue a haa hringhruo.

³⁴Cakhutaata Simeon ta thluechiy pi yite a nung Mary kyihuo khata, “Hingpa haatiypa hing Israel ming a hluvpuv a maa liena riypa hne ama thuna riypata Khazing ta lieriyuopuopa na a cuo. Ama ca Khazing'a taata a zuvpa pahmungsana hne

³⁵cawsaa hluvpuv ta ama palung chunglie ama ruepa aa luona riypata amaa du riypa a cuo aa. Cakhutaata na palung hrahring kha zueziy ta aca daw aa,” a ta.

³⁶Capa ning ca Asher phang Fanuel sacanung, profet nung Anna zaw kha a za aw ra. Ama ca nungpuvsa tli te, kung sariy chung dyi a navaapa hne khy ama za sahne khu taata,

³⁷kung sawcari hne kung paliy te a nunghlyipa ta a cuo. Biena-ing kha thuse buo li pata chung hne zuo ta Khazing kha abie te sa uv te thlaa a chuo.

³⁸Capa cuota ning caci cata vya chiy te Khazing kha pathuosa te Khazing ta Jerusalem hya a pazang sa pakhaa riypa a huopa tie bangkhuo'a lie kha haatiypa kaw ca a ri.

³⁹Josef hne Mary ca Abyipa phungbie ta tue riypa a tapa bangkhuo kha ama patlung khu taata Galilee pe, ama khy Nazareth luo kha ama kaa.

⁴⁰Haatiy ca kya le te a kya cahra; singna hne bi te Khazing'a taata hmiephaa a hmung.

⁴¹A nung hne a paa ca kung tating ta Lawsena Pyi ning kha Jerusalem luo ama tlaw taw.

⁴²Zingsuv kung hraa hlyihning a ta ning kha ama tue tawpa haata pyi luo ca ama tlaw pakhaa.

⁴³Pyi a chuo taata ing luo kha ama kaa, cuorasala haatiy Zingsuv ca Jerusalem lie a ngaa siy te a nung hne a paa ta pachang vayi.

⁴⁴Zaapuv hrawliena a kya si rale tapata ama rue nakawta ning kha chung ama kya si. Cakhutaakyalyata ama tieriy hne ama viesaa hrawlie kha ama huv.

⁴⁵Ama hmung li taata ama huv riypata Jerusalem luo kha ama kaa.

⁴⁶Ningthung khu taata Biena-ing chunglie ama hmung. Pacuvtuv tie hne khata a tupakhaw yite ama bie kha naathlie te bie zaw a za hiehriy nguoluo yi.

⁴⁷A bie a thyipa bangkhuo ca a sing zya hne bie a paliena zya yi kha ama nang ta a uosa.

⁴⁸A nung hne a paa ca ama hmung tiyta ama nang ta uo te, a nung ta, “I sapaa, khaapanakawma hinghaahingta malie na tue? Mang tie, na paa hne kama ca ma thlaa zangsa pata ma ca huv hing,” a ta.

⁴⁹Ama ta, “Khaapanakawma ina huv ungciy? I Paa ing lieca i aw riypata a cuopa kha pachang va ung cama?” a ta yi.

⁵⁰Cuorasala khaapama a ri tapa kha pachang vayi.

⁵¹Cakhutaata Zingsuv ca iema hne khata Nazareth luo za kaa te ama ri a ngiesa pata a aw. A nung ca hing hmang bangkhuo hing a palung chunglie a pari diy.

⁵²Zingsuv ca singna hne kya lethawle te Khazing hne cawsaa hmielie kha hmiephaa a hmung.