Read Lautu Chin Luka 20 Bible Online

Luka 20 - Lautu Chin bible

Luka 20

¹Ningkha ca Zingsuv kha Biena-ing chunglie cawsaa kha pacuv yite thuophaabie a ri nguoluo pata, tluobyilepa tie, phungbiesaya tie hne uvthyi tie kha a vaw yite,

²“Malie chang tie, Hingpa hmang zaw hing khaapa nawhnyina tama na tue? Ahungma naw caa pi?” ama ta.

³Zingsuv ta, “Bie suokha ca hiehriy ra'a yi ang te na chang tie ung,

⁴Johan tiynawna hing vuoruo taata ma aa zuv, cawsaa'a taata ma a hmung?” a ta yi.

⁵Iema hne iema kha a ruepakhaw yite, “Tuokhaatama ma ri'a ung? ‘Vuoruo taata ne ta'a pate, ‘Cacuokie, khaapanakawma nama zang va?’ malie a ta aa.

⁶Cawsaapa'a taata ne ta'a pate hingpa lie a awpa cawsaazaapuv hingta alung ta malie ama vaa aa, tahematapakieca Johan ca profet tapata ama zang diypa a cuo hyi,” amaa ta.

⁷Cacuonakawta, “Khaapa taata ma a hmung tapa pachang va puv,” ama ta.

⁸Zingsuv ta iema kha, “Kama zaw ahung'a taata ma hingpa hmang tue khuna naw i hmung tapa hing ca chang ra'a vayi ang,” a ta yi.

⁹Zingsuv ta cawsaazaapuv kha hing pakhingpuonabie hing a chang yi: “Luokha ca cawsaa pakha ta mingsuv diedung tue te, rehrietuv tie'a luo kha pahlie yite cuo syipuv chung khy a tlaw.

¹⁰Mingsuv thyi lu cuo aa de tiyta, diedung a hluotuv tie'a luo kha a cuvu va la riypata a sii pakha a pathlie. Cuorasala rehrietuv tie ta a siipaapa ca tuv yite a kuv cahri pata ama pakaa sa.

¹¹Cakhutaata a sii hrangpa pakha kha a pathlie; cuorasala rehrietuv tie ta tuv ngiethie yite nangzaahmiechi ta ama tue khu taata a kuv cahri pata ama pakaa sa.

¹²Cakhutaata a sii pathungnapapaa kha a pathlie ngiethie; rehrietuv tie cata hmaa a phyana te ta tuv yite khungthing luo ama thaw.

¹³Catiyta mingsuv diedung a hnyituvpapaa cata, ‘Tuokhaatama i tue aa? I duepa i saacapaa hingna i pathlie aa, ama hing ca ama hmiezaa ngiethie aa!’ a ta.

¹⁴Cuorasala rehrietuv tie ta ama kha ama hmung pahne, pakha hne pakha kha, ‘Ama hingna a rucutuv ta a cuo. Thie'a ungpuv, cakiedyina a ru bangkhuo hing kiema huopa ta a cuo aa,’ amaa ta.

¹⁵Cacuonakawta ama kha diedung khungthing luo kha thaw yite ama thie. Cacuonakawta mingsuv diedung a hnyituvpapaa ta rehrietuv tie kha tuokhaatana a tue thlu'a mang yi nama ta ma?

¹⁶Ama ca a vaw'a te capa tie ca thie'a yite diedung kha rehrietuv hrangpa tie a pahlie'a yi,” a ta. Capaca ama thyi tiyta, “Cuo hrue thi kha se!” ama ta.

¹⁷Cuorasala Zingsuv ta iema kha mang yite, A cuo kie, Caapathepa chunglie ta, ‘Ing a satuvpa tie ta ama thawpa alung ca, ingkiy lung tana aa li,’ a tapa hing a siyluo khaapatama a cuo?

¹⁸Ahunghmuo cuose hingpa alung cunglie a tlapa ca kyipatlaa yite capa alung ta a tlasuepa tie ca ama zapatlaa diy aa.

¹⁹Phungbie saya tie hne tluobyilepa tie ta kiema na malie a tapasue tapa kha ama pachang tiyta, Zingsuv kha patuv paluopa ama khing, cuorasala cawsaazaapuv kha ama ciy.

²⁰Cacuonakaw ama kha dya mangpathliy yite a bie mamaapa ta kalaa khu riypa hne naw a hnyituv muokiy byi kuv chung luo kha bie ripa riypata phakhyi khuna riypata cawsaa chekha kha cawsaa phasapa haata dya a pa-aw sa pata, Zingsuv mangpathliy riypa khata ama pathlie.

²¹Capa cawsaa a mangpathliytuv tie cata Zingsuv kha, “Saya, na ripa hne na pacuvna hing a hmuo tapata ma pachang. Cawsaa pahlyipale lipa cata Khazing khingna biehmisipa kha na pacuv tapa zaw ma pachang.

²²Rom siepahruo'a luo ngukhyi pipa hing ma Phungbie ta a thlu ma a pa-aw ma?” ama ta.

²³Cuorasala Zingsuv ta ama zyatena kha a pachang nakawta,

²⁴“Ngu tuokaa phiekha na pahmung tie ung. Ahung hmiechang hne ming ma a taa?” a ta yi. Iema ta, “Siepahruopa hmiechang hne ming,” ama ta.

²⁵Zingsuv ta, “Cacuokieca Siepahruo huopa ca Siepahruo kha pi ungla Khazing huopa ca Khazing kha pi tie ung,” a ta yi.

²⁶Cahaa cata cawsaazaapuv hmielie kha patuv amaa nang raalaa pata tuokhaa tahmuo patuv khu vayi; bie a paliepa yi kha ama nang ta uo te a dieta tah ama aw.

²⁷Sadusi tie chekha, thupakhaana aw vyi a tapa tie kha Zingsuv'a luo a vaw yite, bie ama hiehriy.

²⁸“Saya, Moses ta malie a capepa siypa ca: Cawsaa pakha ca saata hnyi li pata a napuv a thiyse kieca, capapaa uvnu pakha ta ama ca a hlaw'a te a uvta cuo khata saata ama sapa aa,” a ta.

²⁹Luokha ca uvnu pasariy aw yite; a pakhanapapaa ca nungchiy te saata sa li pata a thiy.

³⁰Cakhutaata a pahningnapapaa hne

³¹a pathungnapapaa ta a hlaw yite, cahaa cata ama pasariy yalya ta saata sa li pata ama thiy.

³²A hnangcawce ta cawsaanung zaw ca a thiy ra.

³³Cacuonakawta thupakhaanapa ning thueta capa canungnung ca ahung napuv tama a cuo aa? Ama pasariy yalya ta amaa zaa hlaw kaluo,” ama ta.

³⁴Zingsuv ta iema kha, “Ata chuo capaa hne canung ca amaa chiy amaa hie,

³⁵cuorasala a vaw riypa chuo lie ta hring riypata aa tla tapa tie hne thiyna taata pathu pakhaapa tie ca a chiy a hie'a vayi.

³⁶Iema ca thiy khu'a va tli yi, tahematapakieca avuoming lu'a yite thupakhaana saata ama cuo nakawta Khazing saata tana ama cuo aa.

³⁷A kuo nguoluopa ruohraw kaw a capepa lieta Abyipa kha ‘Abraham Khazing, Isak Khazing, hne Jakob Khazing ta te Moses ta a ripa ca a thiypa tie ca hringna luo pathu pakhaa patana ama cuo tapa kha a paluo sa patana a cuo, a ta.

³⁸Ama ca a hringpa tie Khazing cuote a thiypa tie Khazing cuo vyi, tahematapakieca cawsaa bangkhuo ca amaa lie a hringpa selaw tana ama cuo,” a ta.

³⁹Phungbie saya tie chekha ta, “Saya, na bieripa ca a pha ciemuo!” ama ta.

⁴⁰Tahematapakieca ama kha bie hiehriy vie nguo va tli yi.

⁴¹Cakhutaata Zingsuv ta iema kha, “Tuokhaatama Messiah[41] ca David saacapaa tana a cuo, ama ta the?

⁴²David hrahring ta Salm caa-uv chunglie, Abyipa ta i Byipaapa kha,

⁴³Na cariepa bangkhuo ca na phyi thabaw lie chaapuo riypata i chi hluo li, I cacuo luo kuo hingta a tu tie,’ a ta.

⁴⁴David ta, ‘Abyipa,’ a ta kieca tuokhaatama Messiah ca ama saacapaa ta a cuo the aa? a ta.

⁴⁵Cawsaa bangkhuo thyi pata ziytuv tie kha,

⁴⁶“Phungbie saya tie kha a raaring tie ung, iema ca buohryipasiypa a hryi pata a khiele khingpa, chadawtluo lie pa-uvsathyina hne bie a changpa a tlechuopa, hne apungna-ing lie hne pyi tuena lieta a tuna phacepa lie a tu khingpa tie tana ama cuo;

⁴⁷Nunghlyi tie kha ama ing te chuv yite mang a ngiena riypata a pasiypuv ta thlaa ama chuo! A ruv viepa duotena na ama ang aa,” a ta.