Read Lautu Chin Luka 24 Bible Online

Luka 24 - Lautu Chin bible

Luka 24

¹Cuorasala Zaapuv ning mawdiy ta canung zaw ca ziyhmyi ama pachiepa kha a cyi yite thluo luo ama vaa.

²Thluo khaakhuvlung a zaa hnyipa kha ama hmung;

³cacuonakaw amaa ngie; cuorasala Zingsuv riy kha hmung vayi.

⁴Ama nang dyi a uo pata sungkha ta pang ruopa a buvpa cawsaa pahning amaa thaa lie amaa vya daa.

⁵Canung tie ca ama ciysa nakawta alyi luo kha amaa bung; cuorasala pahning tie cata, “Khaapanakawma a hringpa kha a thiypa zaw hrawlie nama huv?

⁶Ama ca hinglie hing aw vyi, a thupakhaa tli. Galilee lie a aw ningta aca changpa yi kha a thyi va ung cama?

⁷‘Cawsaa Saacapaa ca a suepa tie kuv luo kha pipa cuo'a te, vieluo cunglie ama thie aa, ningthungna lie a thupakhaa aa,’ a tapa kha!” a ta yi.

⁸Ca tiyta canung zaw ca a bie kha a kya thyi pakhaa yite,

⁹thluo taacata vya kaa yite, a cuopa hmang bangkhuo ca ziytuv hlyikha hne a hrangpa tie kha ama chang.

¹⁰Capa kaw kha ziytuv tie a changpa tie ca Mary Magdalin, Joanna, Jeim nung Mary hne iema hne a aw rapa canung hrangpa tie khata ama cuo.

¹¹Cuorasala capa bie ca ziytuv tie ta bie laliy lipa ta rue yite zang li pata ama aw.

¹²Cuorasala Piter ca a daa te thluo luo kha aa ruo; a bung te thluo chung luo kha a mang ca a riy catawnapa pawruo dyi a hmung; hmang a cuopa cunglie kha nang uosa cangta ing luo a kaa.[51]

¹³Capa ning ngiethie cata ziytuv pahning ca Jerusalem taata me sariy[52] hraw a hlapa Emmaus ama tapa khy luo kha si yite

¹⁴hmang a cuopa kaw kha amaa ruele.

¹⁵Cahaa cata bie amaa ruele nguoluo ning kha Zingsuv ta a vya ngie yite iema hne a si rale.

¹⁶Ama hmung raalaa pata pachang vayi.

¹⁷Zingsuv ta iema kha, “Khaapa kaw ma nama cakuo puo pata namaa ruele?” a ta yi. Iema ca ngiechina hmiephya hneta a maa daa.

¹⁸Cakhutaa iema chung taata pakha, Kleopas ama ta papaa khata, “Jerusalem khy luo a vya tlawpa bangkhuo hrawlie nama dyi hingna ata zaw chunglie hmang a cuopa a pachang lipa a cuo ciy?” a ta.

¹⁹Ama ta, “Khaapa hmang ma?” tapata a hiehriy. “Nazareth Zingsuv cunglie a tlungpa hmang,” ama ta. “Ama ca Khazing hmielie hne cawsaa bangkhuo hmielie a ripa hne a tuepa hmang bangkhuo lie cahrana a hnyi ama tapa profet ta a cuo.

²⁰Ma tluobyilepa tie hne uvthyi tie ta thie riypata pi yite vieluo cunglie ama thie.

²¹Cuorasala kiema taca Israel ming malie a thlatuv riypatana a cuo aa tapata maa ruechuopa tana a cuo. Capa hmang a cuo khu taata ata ning hing a ningthungnapa ta a cuo.

²²Cadyi cuo vyi, kiema phuv chung taata canung chekha ta kiema kha a ca-ang ta malie ama ca-ang sa; ata maw mawdiy ta thluo luo vaa yite;

²³a riy kha ama hmung li tiyta vya kaa yite malie ama changpa ca, ‘Avuoming kha muocuo ta hmung yi pate na, iema cata, ama ca a hring ne, malie ama ta e,’ ama ta.

²⁴Kiema phuv taata chekha ca thluo luo kha vaa yite canung tie ama ripa dala haakhata ama va hmung, cuorasala ama ca hmung vayi,” ama ta.

²⁵Cakhutaa Zingsuv ta, “Nama ngaa hringhruo ing, profet tie ta ama ri ciepa zang hing namaa paruvsa hringhruo de!

²⁶Messiah[53] ca hingpa bangkhuo hing a rungnaana luo a ngie hluo ta a ang siy diy a hu cuo vama?” a ta.

²⁷Cakhutaata Moses taata pathu pata profet tie bangkhuo ta Caapathepa chunglie ta ama kaw ama capepa bangkhuo kha a changpasie yi.

²⁸Ama chiyna riypa khy ama pha tyalya caw ta Zingsuv ca a caluole riypa haakhata aa pa-aw sa;

²⁹cuorasala khuosa ta thlu yite, “Kiema'a lie hing a ri ra thluo tie, zuoluo cuo tli te a zing zaw a zing'a nang tli,” ama ta. Cacuonakawta iema'a lie tlung ra riypata a paziy yi.

³⁰Sa dungpakhaw riypata iema'a lie kha a tu te, viechuo kha la te, thlaa a chuo khu taata chechi te a pi yi.

³¹Ama ming kha kya vuo te ama a cuopa kha ama pachang, cuorasala ama ming hmung lieta a vie.

³²Pakha hne pakha kha, “Luopuv lie bie malie aa ruepa hne Caapathepa siyluo malie a chang ning kha ma chunglie myi kuo ta malie kuo tlarya va ma kha?” a maa ta.

³³Sungkha ta thu yite Jerusalem luo kha ama kaa pakhaa ca ziytuv hlyikha hne a hrangpa zaw amaa zaa pungpa kha ama va hmung.

³⁴“Abyipa ca a thupakhaa hmisi, Simon'a liena a luo!” tapata ama za ri nguoluo.

³⁵Iema zaw ta luopuv lie hmang a cuopa kaw hne Abyipa ta viechuo chechi te aa pachangsanapa yi kaw kha ama ri ra.

³⁶Capa kaw ca ama ri nguoluo pata sungkha ta iema hrawlie kha Zingsuv ca a vya daa te, “Niema'a lie diena aw mangsue,” a ta yi.[54]

³⁷Athlaa na ma hmung tapata rue yite ama thlaa zang te amaa pahlusa.

³⁸Cuorasala iema kha, “Khaapanakawma nama ciy? Khaapanakawma nama palung a luolue?

³⁹I kuv hne i phyi hing mang tie ung, kama ta i cuo thluopa hing. Na hrie ungla nama pachang aa, a thlaa ca ruv hne saa a hnyi tlung li, kama ca i hnyipa ina hmungpa ung cahing!” a ta yi.

⁴⁰Cahaa cata ri te a kuv hne a phyi zaw ca a pahmung yi.[55]

⁴¹Ama palung a tluosa thluo pata zang khu tange lipa yi ta ama kharue a haasa ngiethie nakawta; ama ta, “Ning riypa suokha chuo nama hnyi ma?” a ta yi.

⁴²Iema ta ngaa e ciepa pi yite,

⁴³ama hmielie kha la te a ning.

⁴⁴Cakhutaata iema kha, “Niema'a lie i aw ningta i za ripa kha ama hingta tli hing a cuo: Moses Phungbie chung, profet tie capepa chunglie hne Salm chunglieta kama kaw ama za capepa bangkhuo ca a tling diy riypatana a cuo,” a ta.

⁴⁵Ama palung kha pavuo sa yite Caapathepa a ripa kha ama kya pachang the.

⁴⁶Iema'a lie kha, “Ama capepa ca hingpa hing tana a cuo: Messiah ca ruvnaana kha ang'a te ningthungna lie a thupakhaa aa,

⁴⁷cakhutaa ta ama ming ta sue a ngiepachiyna hne sue a ngiethena kaw kha Jerusalem taata pathu pata mingphang bangkhuo kha chang pata ama cuo aa.

⁴⁸Niema ca hingpa hmang bangkhuo a pachangkhyituv tana nama cuo.

⁴⁹Cakhutaata i Paa ta bie a kuo ciepa kha nama cung luo i za pathlie aa. Cacuonakawta cungluo taata cahrana nama cung luo a za tlung hluo li khypuv chunglie hing aw tie ung,” a ta yi.

⁵⁰Cakhutaata Bethani khy te kha sikhyi yite a kuv kha pazuu te thluechiy a pi yi.

⁵¹Thluechiy a pi nguoluopa yite, iema'a taata a che te vuoruo luo a kie.[56]

⁵²Ama kha abie yite palung tluosa pata Jerusalem luo ama kaa.

⁵³Ama cuo bangkhuo ca Biena-ing chunglie kha Khazing pathuosana ta ama hmuo.