Read Lautu Chin Luka 4 Bible Online

Luka 4 - Lautu Chin bible

Luka 4

¹Zingsuv ca Thlaapa Pathe hne a bi pata Jordan cavaa taakhata vya kaa te Thlaapa ta ruochung luo kha a sikhyi.

²Capa lieca Setaa ta ning sawliy chung a pasupaliy. Capa chung bangkhuo ca khaahmuo ning li pata a aw nakawta capa cuo a chuo pahne ca a nang khuopuv ta a diy.

³Setaa ta, “Khazing saacapaa ta na cuo kieca hingpa alung hing viechuo ta aa li riypata naw pi tie,” a ta.

⁴Cuorasala Zingsuv ta, “Caapathepa lie, ‘Cawsaa hing sa dyi ta hring vyi,’ tapata a capepa kha,” a ta.

⁵Cakhutaa Setaa ta a suona luo kiekhyi te sungkhata lieta chuelyi ruo bangkhuo kha a pahmung sa.

⁶Setaa ta, “Hing nawhnyina bangkhuo hne rungnaana bangkhuo hing ica pi aa. A bangkhuo hingta kama'a luo pipa cuo tli te, i khingpa ahunghmuo i pi khu yi.

⁷Ina bie cakieca na huopa tana a cuo diy aa,” a ta.

⁸Zingsuv ta, “Caapathepa lie, ‘Abyipa na Khazing kha bie la, ama re dyi kha hrie tie,’ tapata a capepa kha,” a ta.

⁹Cakhutaa Setaa ta Jerusalem luo kha sikhyi te Biena-ing dawthlue lie kha a patu khu taata, “Khazing Saacapaa ta na cuo kieca hingpa taahingta a zupathla tie.

¹⁰Caapathepa lie, ‘Ama ta nama khuo riypata aa vuoming kha chang tli yite,

¹¹na phyi hmuota alung lie naa phaw li riypata ama kuv ta aca cawchue'a yi,’ tapata a cape kha,” a ta.

¹²Zingsuv ta, “Caapathepa ta, ‘Abyipa, na Khazing kha va dyapasya kha,’ a ta,” tapata a palie.

¹³Setaa ca pasupaliyna phangphang a pachuo khu taata cuophaa a hmung pakhaa nate cuokha chung Zingsuv kha a thuse.

¹⁴Cakhutaata Zingsuv ca Thlaapa Pathe cahrana hne a bi pata Galilee luo kha a kaa. A thuohlaa ca capa ruo bangkhuo lieca a pathuo diy.

¹⁵Apungna-ing lie kha pacuv yite cawsaa bangkhuo ta ama pathuosa.

¹⁶Zingsuv ca a za lethawnapa Nazareth khy luo kha vaa te a tue tawpa haata Sabbath ning kha apungna-ing luo a vaa. Caapathepa ri riypata a daa te,

¹⁷profet Isaiah caataw kha ama pi. Caataw ca pathluo te:

¹⁸Abyipa Thlaapa ca i cung lie a aw. Tahematapakieca kama kha a siypasapa tie'a luo Thuophaabie phya riypata sathu na pathuv te inaa tlaw. Sii ta a ziypa tie'a lie lawna bie pathyi riypa hne, Mingcuepa tie ta ama hmung pakhaa khu riypata ina pathlie. Hrisaapa tie hya pazang riypa hne

¹⁹Abyipa palungtluona kung thuophaa pathyi sa riypata ina pathlie,” tapata a capenapa kha a ri.

²⁰Zingsuv ca caataw kha kalang pakhaa te a mangchiytuv kha pi te aa tu. Apungna-ing luo a vya pungpa bangkhuo ta Zingsuv ca ming vy li pata ama mang.

²¹Zingsuv ta, “Ata ning hing Caapathepa hing nama thyina lieta a tling mangtli,” a ta yi.

²²Ama bangkhuo ta ama kha ri thuophaa yite, a pakaa taata a pyapa thluechiyna bie kha ama kharue ta a haa. Iema ta, “Hingpapaa hing Josef saacapaapa kha cuo vama?” amaa ta.

²³Zingsuv ta, “‘Siybyipa, nama hne nama a patluo sa tie law,’ tapa phungthluv kha ina risue'a ungciy, tapa kha a phasa pata i pachang. Cakhutaata Kapernaum khy liena a tue tapata ma thyipa zaw kha na puvnapa khy lie hing tue ra tie ina ta'a ungciy.

²⁴Ica chang yi: “Ahung profet hmuota a puvna khy lie cuhluopa cuo buo vyi,” a ta yi.

²⁵Naa na thlie tie ung: Elijah chuo ning kha kung thung angkha a che khy kuo te ruo bangkhuo ta cakuo a tlung ning kha Israel ruo lie nunghlyi ama za hluvsa.

²⁶Cuorasala Elijah ca Sidon pe Zarephath khy lie a awpa nunghlyinung'a luo ri li pata a ahung'a luo hmuo pathliepa cuo vyi.

²⁷Cakhutaata Elisha chuo ning zaw kha Israel ruo chunglie caahminghmaa[9] ta a pasapa a hluvpuv ama za aw, cuorasala Siria ming Naaman ta li pata pakha hmuo patluo sapa cuo vayi.

²⁸Apungna-ing lie a awpa bangkhuo ca capa bie ama thyi pahne ta ama hi a haasa.

²⁹Thu yite, Zingsuv kha khyle luo a dale yite ama khydaw tluo lungkuo taa kha nuopathla amaa nang.

³⁰Cuorasala Zingsuv ca iema hraw taakhata dya zuvpathla te a cakuo.

³¹Zingsuv ca Galilee pe Kapernaum khy luo kha si te Sabbath ning ta kha a pacuv yi.

³²A pacuvna zya kha ama nang ta a uosa, tahematapakieca nawhnyina hne ta bie a ri nakawta a cuo.

³³Capa apungna-ing lieca a pyalyipa khuevuo ta a hryipapaa pakha aw te,

³⁴“Nazareth khypa Zingsuv tuokhaatama malie na tue khing? Kiema para repa tama naa vaw? Nama ca a ahungtama na cuo tapa kha ica pachang. Khazing Cawsaa Pathepa tana na cuo!” tapata khuopuv ta a khi.

³⁵Cuorasala, Zingsuv ta, “A dieta tah aw! Hingpapaa chung taahingta pya,” ta te a chuo. Khuevuo ta cawsaapapaa ca ama hmiekunglie kha vaapatyi te ruvnaana khaahmuo pi li pata a chung taata a pya.

³⁶Cawsaa bangkhuo kha ama nang uosa te pakha hne pakha kha, “Hingpa bie hing tuokhaapa bie tama a cuo? Hingpapaa hingta nawhnyina hne cahrana ta bie pi te thlaapa chiepa tie ca ama pya,” a maa ta.

³⁷Zingsuv kaw ca capa ruo chung hmangting ta a pathuo.

³⁸Zingsuv ca apungna-ing taakhata pya te Simon ing luo kha aa ngie. Simon piynung a nge ling te a pasapa kha ama ca ama chang.

³⁹Vaa te, a thaalie kha a daa te a ngelingna kha a chuo ca a nge kha a cakaa. Sungkhabala ta tluo te, thu te iema kha a mangsang yi.

⁴⁰Ning a tla ca a pasapa a hnyipa bangkhuo khata pasana a phangphang ta a pasapa tie kha Zingsuv'a luo ama vya chiykhyi; ama luv cunglie kha a kuv khang te ama palang ta a patluo sa yi.

⁴¹Khuevuo zaw kha cawsaa hluvpuv chung taata pya yite, “Nama ca Khazing Saacapaa tana na cuo!” tapata khuosa ta ama khi. Cuorasala iema kha chuo yite bie pari sa vayi, tahematapakieca Messiah[10] a cuopa kha ama pachang.

⁴²Khy a kya vuo pahne ta Zingsuv ca khy taakhata pya te ruoduona luo kha a cakuo. Cawsaa ta ama kha huv yite ama hmung ca, a thuse li riypa yita ama thlu.

⁴³Cuorasala ama ta, “Khazing Pena Thuophaabie ca khy hrang luo zaw hing i ri ra hrahring riypata a cuo, tahematapakieca hingpa repa hing tana pathlie hnuochuopa ta i cuo,” a ta.

⁴⁴Cacuonakawta Judea[11] ruo chung apungna-ing zaw lie kha Thuophaabie ca a changle yi.