Read Lautu Chin Luka 5 Bible Online

Luka 5 - Lautu Chin bible

Luka 5

¹Ning kha ca, Genesaret Tiyliy kielie Zingsuv aa daa ning kha, Khazing bie naathlie riypata cawsaa kha a nuo ta a nuopuo yite amaa luo ama vaa ngie.

²Zingsuv ta ngiekuo lie sawkawpalaw sahning a awpa kha a hmung. Ngaa a vaapa tie ca sawkawpalaw taakhata pya yite ama'a sue kha ama pasiy nguoluo.

³Capa sawkawpalaw hrawlie khata Simon huopa luo kha kie te ngiekuo taakhata a cawta va nuo vie riypata a chang. Zingsuv ca sawkawpalaw chunglie ca a tu te cawsaazaapuv kha a pacuv yi.

⁴Bieri a patlung taata Simon kha, “Na sawkawpalaw hing tiy a thuv viena luo hnyi la naa sue kha vaa tie,” a ta.

⁵Simon ta, “Abyipa zuokhydyi ma vaa law pata sakha hmuo pa-uo va puv. Cuorasala vaa ungla malie na ta kieca i vaa'a tle,” tapata a palie.

⁶Ama vaa ca ngaa a hluv hringhruo ama pa-uo nakawta amaa sue ca a tlaa puo diy'a nang.

⁷Cacuonakaw palaw hrangpa cunglie ama viesaa tie kha ama kuv ta a kyi yite a byana ama hie. A vaw yite sawkawpalaw sahning lie kha ngaa ca a bikaluv pata chi yite tiy luo a tla khyi'a nang.

⁸Simon ta khapa hmang kha a hmung tiyta, Zingsuv phyi thabaw lie kha a pakhuv pane te, “Abyipa, na cakuo se tie! A suepa tana i cuo!” a ta.

⁹Ama hne a viesaa tie ca ama pa-uopa ngaa kha a hluvtuv nakawta ama nang ta a uosa.

¹⁰Simon viesaa tie, Zebedi saacapaa tie Jeim hne Johan zaw kha ama nang a uosa ra. Zingsuv ta Simon kha, “Na thlaa zang kha se; ata taahingta ca cawsaa na na patuv'a tli,” a ta.

¹¹Ama sawkawpalaw ca ngiekuo lie kha chi yite, ama chechiy bangkhuo kha thuse yite Zingsuv ca ama ziy.

¹²Luokha ca Zingsuv kha khypuv suokha lie a awpa ta capa khy lieca caahminghmaa[12] a phyapapaa kha a za aw. Capapaa ta Zingsuv kha a hmung tiyta, a hmiekunglie kha a bu te, “Abyipa, na khingpa ta a cuo kieca ina patluo sa khu ciy,” tapata a nue.

¹³Zingsuv ta a kuv ta va paza te a hrie. “Ica patluo sa khing, Pathe tie! a ta. Sungkhabala ta a tluo.

¹⁴Zingsuv ta, “Ahunghmuo chang kha yi, cuorasala tluobyi'a luo kha tathlyalya ta vaa la vaa pamang sa tie; na tluo tli tapa kha aca pachang riypa yita, Moses phungbie lie a awpa haakhata hriykhung a rina va tue tie,” a ta.

¹⁵Cuorasala Zingsuv thuohlaa ca a pathuo hryly, cawsaazaapuv ta a bie naathlie riypa hne ama pasana taata patluo sapa cuo riypata ama vya pangie.

¹⁶Cuorasala Zingsuv ca dya zuvpathla te ruoduona luo kha cakuo te thlaa a chuo.

¹⁷Ningkha ca Zingsuv ta a pacuv nguoluo ning yi kha Galilee ruo khy ting taata hne, Judea taa hne Jerusalem taata a vya chiypa Farasi tie hne Phungbie saya tie chekha zaw capa lieca a maa tu ra. A pasapa patluo sa thenapa cahrana ca Zingsuv cunglie kha a aw.

¹⁸Cawsaa chekha ta a pakyapapaa kha a pangphaa hne a vya puvle yite, ingchung luo zaa ngiekhyi pata Zingsuv hmielie vya chi riypa kha ama zue.

¹⁹Cuorasala cawsaa ama hluv tuv nakawta a chung luo kha a ngiekhyi khu vayi. Cacuonakawta thlungkhuv cung luo kha kie khyi yite thlungkhuv kha za pahaw yite cawsaa hraw Zingsuv hmiekunglie kha a pangphaa hneta ama za pachung.

²⁰Zingsuv ta ama zangnapa kha a hmung tiy yi ta, “Liechung,[13] na suena ca a ngiethe pata na cuo tli,” a ta.

²¹Phungbie saya tie hne Farasi tie ta, “Khazing thuo pachina bie a ripapaa hing ahung ta ma a cuo? Khazing pakha kyalya dyi muo sue a ngiethe khutuv ta a cuo ta,” amaa ta.

²²Zingsuv ta ama ruenapa ca pachang yite, iema kha, “Khaapanakawma hinghaahingta nama rue?

²³‘Na suena ca a ngiethe pata a cuo tli,’ tapa ma a na vie, ‘Thu la cakuo,’ tapa ma a na vie?

²⁴Cuorasala, Cawsaa Saacapaa hing chuelyi lieta sue a ngiethe khuna naw a hnyi tapa nama pachang khuna riypata ta te, a pakyapapaa ca, “Ica chang, thu la na pangphaa kha a la lah ing luo cakuo!” a ta.

²⁵Sungkha ta, cawsaapapaa ca iema zaw hmielie kha thu te, aa zienapa pangphaa kha a la te ing luo cakuo te Khazing kha a pathuosa.

²⁶Ama bangkhuo ta ama nang ta uo te ama ciy hringhruo. Khazing kha pathuosa yite “Ata ning ma hmungpa hmang ca kharuehaapa hmang na a cuo,” ama ta.

²⁷Cakhutaata, Zingsuv ca pya te ngukhyituv Levi ngukhyina hmang lie aa tu nguoluopa kha a hmung. Zingsuv ta, “Na ziy,” a ta.

²⁸Levi ca thu te, chechiy bangkhuo kha thuse te, ama kha a ziy.

²⁹Cakhutaa Zingsuv ca Levi ta a ing lie kha pyi lesapa tuepa te capa lieca ngukhyituv tie hne cawsaa hrangpa a hluvpuv zaw ca iema hne khata cabya lie amaa tu pakhaw.

³⁰Farasi tie hne ama Phungbie saya tie chekha ta Zingsuv ziytuv tie'a lie kha a cie yite, “Khaapanakawma ngukhyituv tie'a nata a suepa tie hneta nama ning nama dang pakhaw? ama ta.

³¹Zingsuv ta, “A tluopa ca siybyi a hu vayi, cuorasala a pasapa tie dyina a hu yi.

³²Aa dangpa tie ku riypata a zuv va ang, a suepa tie ama suenapa pangiesapachiy riypatana i vaw,” tapata a palie yi.

³³Cawsaa chekha ta Zingsuv kha, “Johan ziytuv tie hne Farasi ming ziytuv tie ca ata'a na ata tah sa uv yite thlaa ama chuo; cuorasala nama caa ziytuv tie ca ning yi dang yite ama aw,’ ama ta.

³⁴Zingsuv ta, “Nungchiypyi a vya zawpa tie ca nung a chiytuvpa satlie iema'a lie a aw chung kha sa nama pa-uv sa khu'a ma? Pa-uv sa khu'a va ungciy!

³⁵Nung a chiytuvpa satlie kha iema'a taata ama lana cuo kha vya chiy'a te, capa cuo thue cata sa ca amaa uv aa,” a ta.

³⁶Zingsuv ta hingpa pakhingpuonabie zaw hing a chang kalie yi: “Ahungtahmuo caw parangpa kha cawthaapa thlaa yite a bie thla buo vayi. Cahaa cata a tue kieca cawthaapa dyi kha tlaa lakaa'a te caw parangpa lie abie a thla tiyta a tla hyi'a vyi.

³⁷Cakhutaata, ahungtahmuo mingsuv tiy thaapa kha savang ungthyi parangpa luo raw buo vayi. Cahaa cata ama raw kieca mingsuv tiy thaapa ta savang ungthyi kha tungpahaw'a te, mingsuv tiy ca a lyi diy'a te savang ungthyi kha a ra aa.

³⁸Cuorasala mingsuv tiy thaapa ca savang ungthyi thaapa lie raw riypatana a cuo.

³⁹Cakhutaa ahunghmuota mingsuv tiy hlungpa kha ama dang khu taata mingsuv tiy thaapa kha dang khing vayi. ‘A hlungpa na a pahuo vie,’”[14] ama ta, a ta.