Read Lautu Chin Luka 6 Bible Online

Luka 6 - Lautu Chin bible

Luka 6

¹Zingsuv ca Sabbath ning ta lu kha cahraw paale te a si. Ziytuv tie ta sa-uv kha pahriy paale yite ama kuvpazaa lie ama cariy khu taata a chuo kha ama baale.

²Farasi ming chekha ta, “Khaapanakawma phungbie ta a thlupa kha Sabbath ning ta nama tue?” ama ta.

³Zingsuv ta, “David ta ama hne a cawsaa zaw ama nang a diy ning kha khaapama a za tue tapa kha ri buo va ung cama?

⁴Khazing ingchung luo kha a ngie te muo tluobyi tie ri li pata ahungtahmuo ning hrue li riypa, Khazing ama pipa viechuo kha la te a ning ta, cakhutaata a viesaa zaw kha a pi yi cuo vama,” a ta.

⁵Cakhutaata, “Cawsaa Saacapaa ca sabbath byi tana a cuo,” a ta yi.

⁶Sabbath a ning hrangpa ningta kha Zingsuv ca apungna-ing luo kha a ngie te a pacuv yi. Capa lieca a cacuo luo kuv a pakyapa pakha a aw.

⁷Phungbie saya tie hne Farasi ming chekha ta Zingsuv kha a suena ama huv khing nakawta Sabbath ning hing vya patluo sa ma tapa kha ci li pata ama mangkhuo.

⁸Ama ruenapa kha a pachang thluo raalaa pata a kuv a pakyapa cawsaapapaa kha, “A vaw la hingpa lie hing a vya daa,” a ta. Cawsaapapaa ca pya te capa lie ca a vaa daa.

⁹Zingsuv ta iema kha, “Ica hiehriy yi: Sabbath ning hing hmangpha tue riypa ma, ruvnaana pi riypa? Hringna khuo riypa ma para riypa? a ta yi.

¹⁰Iema kha mang paky yite; cawsaapapaa kha, “Na kuv kha pazuo tie,” a ta. Pazuo te a kuv ca a tluo.

¹¹Ama hi haa hringhruo te Zingsuv hing tuokhaatama ma tue aa tapa kha pakha hne pakha amaa rue.

¹²Capa cuo ning ca Zingsuv ca thlaa chuo riypata tluocung luo kie te Khazing'a luo kha zuokhydyi thlaa a chuo.

¹³Khy a dyi taata ziytuv tie kha ku yite hlyihning kha a tlaw yite lucuotuv a ta yi.

¹⁴Ama ming ca: Simon (Piter ama tapapaa) hne a nuta Andru; Jeim hne Johan, Filip hne Bartholomew.

¹⁵Matthai hne Thomas, Alfeas saacapaa Jeim hne Simon (Phang a cuokhyituv tapata ama upa),

¹⁶Jeim saacapaa Judas, hne Judas Iskariot ta ama cuo.

¹⁷Zingsuv ca lucuotuv tie hne tluocung taakhata za cung yite, a ziytuv hluvpuv hneta a se lie amaa daa. Judea ruo bangkhuo, Jerusalem khy hne riyliy kie khypuv ta a cuopa Tair hne Sidon khy taata cawsaa hluvpuv zaw ca capa lie ca ama aw.

¹⁸Thuophaabie naathlie riypa hne ama pasana taata patluo sa riypata a vawpa cuo yite, thlaapa pyalyipa ta a tuepa tie zaw kha ama tluo.

¹⁹Cawsaa bangkhuo ta ama kha hrie khu amaa zue; tahematapakieca a chung taata cahrana pya te a patluo sa diy nakaw yi ta a cuo.

²⁰Zingsuv ta ziytuv tie kha mang yite, A siypasapa tie ca thluechiypa tana nama cuo. Khazing pena ca niema huotana a cuo.

²¹Ata lie a nang a diypa tie ca thluechiypa tana nama cuo. Nama riy pabipa tana nama cuo aa. Ata lie a caapa tie ca thluechiypa tana nama cuo. Palung tluo pata nama pahnyi aa.

²²Cawsaa Saacapaa kawlieta, cawsaa ta aca hue yi, aca thaw yi, biechie ta ca ta yite nama thuo aca pachi kie yi ca thluechiypa tana nama cuo.

²³Capa ningcuo a vya chiy tiyta nama palung tluo pata a cathlu tie ung, tahematapakieca nama cuota vuoruo lie lawmuo lepuv chipa tlipa tana nama cuo. Khapa haa khatana ama mingchingmingvuo tie ta profet tie kha ama za tue.

²⁴Cuorasala a hnyirungpa tie ca ngiechi aa chiypa tana nama cuo. Hring a nuona ca nama hmung tli.

²⁵Ata lie a riy a bipa tie ca ngiechi aa chiypa tana nama cuo. Nangdiy patana nama aw aa. Ata lie a pahnyipa tie ca ngiechi aa chiy hringhruo patana nama cuo. A ngiy a phie'a ung cate nama caa aa.

²⁶Cawsaa bangkhuo ta aca ri-thuophaa ning yi hing ngiechi aa chiypa tana nama cuo, tahema-tapakieca ama mingchingmingvuo tie khata profetpakhipa tie kha cahaa bala cata ama za rithuophaa taw.

²⁷Cuorasala i bie naa a thliepa niema ca ica chang yi: nama carie tie kha due ungla niema caa huepa tie cunglie kha hmangphapa tue tie ung;

²⁸chie caa sapa tie kha thluechiy pi ungla caa tuechiepa tie cuota thlaa chuo tie ung.

²⁹Cawsaa pakhakha ta na be aca tung kieca kuo kha luo zaw kha chawpa tie; pakhakha ta na buohryicungle kha aca chuv kieca na buohryi zaw kha va pi chiy vie tie.

³⁰Ahung a cuo zaw ta na chechiy caa hiepa kha va pi la, cawsaa pakhakha ta na huopa ama la kieca va hie pakhaa kha tie.

³¹Na tuepa yi se tapata na khingpa kha malie cuota va tuepa tie yi.

³²Nama caa duepa dyi kha na due kie yi ca khaapa athungna ma na hmung aa? A suepa tie hmuo iema a duepa tie kha ama due the ra ca muo!

³³Na cunglie phana a tuepa cunglie kyalya kha phana na tue kieca khaapa pathuosana ma na hmung aa?

³⁴I hmung pakhaa aa tapata naa nguopuopa tie kyalya kha du na cyi kie yi ca khaapa athungna ma na hmung aa? A suepa tie hmuo du ama cyipa zaa hmung pakhaa riypata a suepa tie kha du ama cyi ca muo!

³⁵Cuorasala nama cariepa kha due ungla, ama cunglie phana kha tue ungla hmung pakhaa riypa kha a nguopuo li pata du cyi tie ung. Lawmuo a hluvsa hmung'a ung cate Cungnungce Khazing saata tah nama cuo aa. Tahematapakieca ama ca palungtluo a the lipa tie hne cawsaa pha lipa tie cunglie zaw a pha.

³⁶Nama Paa ca malie ngiechi a thepa a cuo pahaata malie kha va ngiechi tie ung.

³⁷“Malie bie kha va chipa kha, cacuokieca nama zaw bie chipa pata cuo'a vaciy; malie kha sue va phaw kha, cacuokieca nama zaw suephawpa cuo'a vaciy; malie kha vaa ngiethe la a ngiethe pata na cuo ra aa.

³⁸Malie kha va pi la pi pata na cuo ra aa. A bikaluv pata, a khepuo pata, a carypuo pata hne a lepathlana te ta, pi pata na cuo aa. Malie cunglie na hmuopa panangna khata na nama zaw panangpa pata na cuo ra aa.

³⁹Ama ta pakhingpuonabie suokha a chang vie yi: “Mingcue pakha ta a hrangpa mingcue pakha kha luo a chiy khu'a ma? Ama pahning ta khue luo tla'a vayi ma?

⁴⁰Pacuvpa ahungtahmuo pacuvtuv laata le vie vyi, cuorasala aa cuv riypa pachuo te a the diypa ca a pacuvtuv tluv a ta aa.

⁴¹“Na ming chunglie a awpa thingtung khahmuo rue li pata tuokhaatama na uvnu ming chunglieta a awpa mingbuo kha na mang?

⁴²Tuokhaatama nama ming chunglie thingtung hmuo hmung the li pata na uvnu kha, “Uvnu, na ming chunglie mingbuo kha ca thuepa'a ang,” nama ta the? Phahruocuo tie! Na ming chunglie thingtung kha la taa la muo na uvnu ming chunglie mingbuo kha a sieta ta hmung'a cate na la the'a ta.

⁴³A hnaatluopa thingkung ca thyichiepa pathyi vyi; thingkung pha lipa zaw ta thyiphapa pathyi ra vyi.

⁴⁴Thingkung bangkhuo ca a thyi ta pachang khupa a cuo. Ahling kung taata thyikuv lu buo'a vaciy, a cuo li kie sahming kung taata mingsuv lu buo'a vaciy.

⁴⁵Cawsaa phapa ta a palung chunglie a awpa hmangphapa tie kha papya te, cawsaa chiepa ta a palung chunglie a awpa hmang chiepa tie kha a papya ra. Tahematapakieca palung chunglie a awpa khana pakaa ta a ri,” a ta.

⁴⁶“Khaapanakawma niema ta, ‘Abyipa, Abyipa na ta ung cate ica changpa yi ca tue tlung li pata nama aw?

⁴⁷Kama'a luo a vaw te, i bie kha naathlie te a ziypa ca khaama a lu tapa kha capa hmung'a yi ang.

⁴⁸Ama ca alung cunglie aa thuvsa ta khue cu te a tung kha thla te ing a sapa hne tana a lu. Cavaa tiy za le te ing kha a za phaw raalaa pata a cusa pata sapa[15] a cuo nakawta cahang khu vyi.

⁴⁹Cuorasala i bie ripa thyi raalaa te a ziy lipa ca a hruo kha a cusa pata thla li pata ing a sapa hne tana a lu. Tiy za le te a za phaw tiyta capa ing ca sungkha ta a lie te a rapatlaa diy,” a ta.