Read Lautu Chin Luka 7 Bible Online

Luka 7 - Lautu Chin bible

Luka 7

¹Zingsuv ta hing bie bangkhuo hing zaapuv thyipa ta a ri khu taata Kapernaum khy luo kha a ngie.

²Capa lie a awpa Rom riebyipa ta changtaapa pakha hnyi te a due laalaw; capapaa ca pasa te vuotaa a thiy'a nang.

³Riebyipa ca Zingsuv kaw kha a thyi tiyta Judah uvthyi tie kha pathlie yite, a vaw pata a sii kha a patluo sa riypata paa apa kie sa yi.

⁴Iema ta Zingsuv'a luo kha a vaw yite khuosa ta amaa nue, “Hingpapaa hing bya a tla hrahringpa tana a cuo.

⁵Ma mingphang malie due te apungna-ing zaw malie a sapa pata a cuo,” ama ta.

⁶Cacuonakawta Zingsuv ca iema kha a paziy yi. Ing ama va pha'a nang tlipa khata riebyipa ta a viesaa zaw kha pathlie yite, “Abyipa, na rie a pathyi khing kha. Kama ca i ing chung luo naa ngie riypata a tla va ang.

⁷Cacuonakaw nama'a luo a vaw riypa kha a nguo va ang. Cuorasala na ryi kaakha na pathlie kieca i changtaapapaa ca a tluo aa.

⁸Kama zaw hing i rieka tie hneta byi le viepa kuv rawlie a awpa i cuo. Pakha kha, ‘Cakuo!’ i ta kie cakuo te; A hrangpa pakha kha, ‘A vaw,’ i ta kie aa vaw; i sii a cuopa kha, ‘Hingpa hing tue,’ i ta kie a tue,” a ta.

⁹Capa bie a thyi tiyta Zingsuv ca a kharue a haa; a hnang luo a pali te a ziypa cawsaazaapuv kha, “Ica chang yi: Hing haapa zangna hing Israel ming chunglie hmuota hmung buo va ang,” a ta.

¹⁰A pathliepa tie ca riebyipa ing luo kha ama kaa tiyta a siipaapa a za tluopa kha ama hmung.

¹¹Cakhupahne[16] Zingsuv ca Nain ama tapa khy luo kha si te a ziytuv tie hne cawsaazaapuv khata ama ziy.

¹²Khy hukaa a vya phapa khiy ta a thiypa a vya puvlepa tie kha ama vya pya. A thiypa ca nunghlyinung saacapaa, pakha ta dyi a hnyi tlakuopa cuote khychung ming a hluvsa ta a nung ca ama vya paziy.

¹³Abyipa ta capa nung ca a hmung tiyta ngiechi hringhruo te, “Caa kha,” a ta.

¹⁴Cakhutaa va cakuo te riy thingkaw kha hrie te a vya puvlepa tie ca amaa daa. Zingsuv ta, “Satliepa, thu la ica ta!” a ta.

¹⁵A thiypa ca kya thu te bie ri te Zingsuv ta a nung'a luo kha a pi.

¹⁶Iema bangkhuo ca ciysa yite Khazing kha ama pathuosa. “Kiema'a liena profet lepa aa luo; Khazing na a cawsaa zaw kha minghmiepha a pi tli yi,” ama ta.

¹⁷Zingsuv thuohlaa ca Judea hne a kiecahriy ruo ting khata a pathuo.

¹⁸Capa thuohlaa bangkhuo ca Johan kha ama a ziytuv tie ta ama chang. Cacuonakawta Johan ta iema hraw taata pahning kha ku yite,

¹⁹“A vaw riypa aca tapa yi ca nama ta na cuo ma, a cuo li kie a hrangpa ma huo kalie'a ma?” tapata Abyipa kha va hiehriy riypata a pathlie yi.

²⁰Zingsuv'a luo ama vya chiy tiyta, “Nama hing a vaw riypa paa cata na cuo ma, a cuo li kie a hrangpa ma mangkhuo kalie'a ma tapata hiehriy riypatana tiynawtuv Johan ta malie a vya pathlie,” ama ta.

²¹Zingsuv ta cawsaa a hluvpuv kha ama pasanapa a phangphang hne thlaapa chiepa ta a tuena taayita patluo sa yite a ming cuepa zaw a pahmung sa khu patahne yi ta a cuo.

²²Johan taata biephyatuv tie kha, “Kaa ungla Johan kha nama hmungpa hne nama thyipa hing va chang tie ung, a ming cuepa hmung khu te a cabiepa ama cakuo, caahminghmaa[17] a phyapa tie kha pathe sapa cuo yite a naa ruepa zaw ama thyi khu, a thiypa ca hringna luo pathu pata cuo yite Thuophaabie ca siypasapa tie'a luo chang pata ama cuo tli.

²³Kama naa du lipa tie ca thluechiypa tana ama cuo,” tapata a palie yi.

²⁴Biephyatuv tie ama cakuo khu pahne, Zingsuv ta Johan kaw kha cawsaazaapuv ca a chang yi: “Khaapa hmung riypata ma ruochung luo ca nama cakuo? Thliy a hruo nakawta a canyi hyalyapa phiepahlaa kung ma?

²⁵Khaapa hmung riypata ma nama pya? Cawsie phasapa a tuepa cawsaa mang riypata ma? Cahaapa caw a tue yite a nuosa pata a awpa tie ca siepahruo ing lie muo ama aw ta!

²⁶Khaapa hmung riypa ca tama nama pya? Profet ma? A cuo, ica chang yi, profet laata a le viepa na nama hmung.

²⁷Caapathepa lie a kaw a capepa ca, ‘Mang tie, Kama ta i biephyatuv kha na hmie luo pathlielu ang te, na cuota luopuv aca sa dawle aa,’ a ta.

²⁸Ica chang yi, “A nung ta a sapa bangkhuo hrawlie Johan laata a le viepa ahunghmuo aw vayi. Cuorasala Khazing Pena chunglie a cawcepa hmuo Johan laata a le vie,” a ta.

²⁹(Ngukhyituv tie a te ra pata, a bie a thyipa cawsaa bangkhuo ta Khazing'a taata a dangna bie ca a paw yite Johan tiynawna kha ama ang.

³⁰Cuorasala Farasi ming hne Phungbie saya tie ca Johan tiynawna kha ang khing lipa yi ta Khazing ta ama cuota a tingpa kha ama thaw.)

³¹“Ata chuo cawsaa zaw hing khaapa hne ma i taachung'a yi? Khaapa hne ma amaa lu?

³²Chadaw tluo lie a tu yite phuvkha hne phuvkha kha: Ramang maca tungpa yi, cuorasala luo va ungciy. Caa hlaa maacaa ngiypa yi, cuorasala caa khing va ungciy,’ a tapa haatiy hneta na amaa lu.

³³Tiynawtuv Johan kha viechuo ning lipa hne mingsuv dang li pata aa vaw ca niema ta, ‘Khuevuo na a hryi,’ nama ta.

³⁴Cawsaa Saacapaa ca ningpuo dangpuo pata aa vaw tiyta, niema ta, ‘Mang tie ung, a ning khu hne, a dang khu hne, ngukhyituv tie hne a suepa tie viesaa tana a cuo!’ nama ta.

³⁵Cuorasala singna a phana kaw ca a saa a nu zaw bangkhuo ta ama paluo sa,” a ta.

³⁶Farasi ming pakha ta Zingsuv kha sa dungpakhaw riypata a ku. Zingsuv ta a ing luo ca vaa te cabya lie kha a tu.

³⁷Capa khy lieca a suenung pakha a za aw. Capa nung ta Farasipapaa ing liena Zingsuv ta sa a ning tapa kha a thyi tiyta alabaster alung ruopa ta ama tuepa ungthyi ta ziyhmyi kha vya cyi te,

³⁸Zingsuv hnang luo, a phyi thabaw lie kha a tu te, caa te a mingthliy ta Zingsuv phyi kha a pacing sa nakawta a suo ta hruv te a phyi ca a pahnuo khu taata ziyhmyi a bya.

³⁹Sa ning a upa Farasipapaa ta a hmung tiyta, “Hingpapaa hing profet ta a cuo hmisi kieca ama a hriepa a suenung hing ahungma tapa hne tuokhaapa cawsaanung ma a cuo tapa kha a pachang aa,” a ta.

⁴⁰Zingsuv ta, “Simon ica chang khingpa na a aw,” a ta. Simon ta, “Saya, ri tie,” a ta.

⁴¹Zingsuv ta, “Tuokaa ducyi a pipapaa lie tuokaa du a cyipa pahning ama aw. Pakha ta denarii[18] zapangaa a uo te a hrangpa pakha ta sawngaa a uo.

⁴²Ama pi khu li tiyta ama pahning khata a ngiethe yi. Cacuokieca ahung kha ma ama ca a due vie aa?” a ta.

⁴³Simon ta, “Tuokaa a hluv vie a ngiethepapaa khana a due vie aa, tapatana i rue,” a ta. Zingsuv ta, “Naa hmuo,” a ta.

⁴⁴Canung nung'a luo kha a pali te Simon kha, “Hingpa nung hing na hmung ma? Na ing chung luo kha i vya ngie, cuorasala i phyi a siyna riypa tiy na pi vaciy, cadyiseca hingpa nung hingta i phyi kha a mingthliy ta pasiy te a suo ta a hruv.

⁴⁵Nama ca na pahnuo vaciy, cuorasala hingpa nung hing ca ivya ngie yalya ta ata te hing ci li ta i phyi kha a pahnuo.

⁴⁶Nama ca i luv kha sathu pathuv vaciy, cuorasala ama ca i phyi kha ziyhmyi ta a bya.

⁴⁷Cacuonakawta ica chang: a suena hluvpuv ca a ngiethe pata a cuo tli nakawta duena lepuv a paluo sa. Cuorasala a suena a cawta dyi a ngiethe pata a cuopa ca duena a cawta dyina a paluo sa ra,” a ta.

⁴⁸Cakhutaa Zingsuv ta canungnung kha, “Na suena ca a ngiethe pata a cuo tli,” a ta.

⁴⁹Cuorasala saningna cabya lie ama hne a tuhnepa tie khata iema chunglie kha, “Suena hmuo a ngiethepapaa hing ahung tama a cuo?” amaa ta.

⁵⁰Zingsuv ta canungnung kha, “Na zangna na caa khuo tli: hnaanguota tah cakuo tie,” a ta.