Read Lautu Chin Luka 8 Bible Online

Luka 8 - Lautu Chin bible

Luka 8

¹Cakhutaa a ru hluo ta Zingsuv ca khypuv hne khyta hne khata tlawle te Khazing Pena kaw thuophaabie kha a ri. Ziytuv hlyihning tie khata ziy yite,

²ama pasana hne thlaapa chiepa ta a tuena taayita a patluo sapa canung tie: a chung taata thlaapa chiepa pasariy a papyapa nung Mary (Magdalin tapata zaw ama ku nung),

³Herod cuota mangchiykingkaatuv ta a cuopa Khuza napuvnung Joanna, Susanna, hne iema kha ama hnyi ama chie ta a byapa canung a hluvpuv ta ama cuo.

⁴Khy kha hnang khy kha taata Zingsuv'a luo kha a vaw yite cawsaa hluvpuv amaa vya pung tiyta hing pakhingpuonabie hing a chang yi:

⁵“Saciy a vaatuv pakha ta saciy vaa riypata aa thu. Saciy kha a vaa tiyta chekha ca luo lieta a tla nakawta cawsaa ta tlaw yite pavaa ta amaa haa.

⁶Chekha ca lungdaapa lieta tla te a kya daa paluo raalaa pata a lyi a pahna li nakawta a caa,

⁷saciy chekha ca a ahling hrawlie a tla nakawta kya le hne te a ahling ta a kalaa.

⁸Saciy chekha ca lyiphaa lie tla te kya le te le zakha ta a vyi. Thyina naa a hnyipa ta thyi mangsue” a ta.

⁹Cakhutaata a ziytuv tie ta, hing pakhingpuonabie ta a ri khingpa hing khaapatama a cuo, tapata ama hiehriy.

¹⁰Zingsuv ta, “Khazing Pena bieparuv pachang khu napa ca pi pata nama cuo, cuorasala a hrangpa tie ca pakhingpuonabie ta changpa ama cuo aa. Cacuonakawta ama mang raalaa pata hmungpasie'a vayi, naa ama thlie raalaa pata pachang the'a vayi,” a ta.

¹¹Hing pakhingpuonabie siyluo ca hinghaahingtana a cuo: Saciy ca Khazing bie ta a cuo.

¹²Luopuv lie a tlapa saciy ca Khazing bie kha ama thyi raalaa pata, Setaa kha a vaw te ama zang li riypa hne khuopa ta ama cuo li riypata ama palung chung taata Khazing bie kha a lapa pa tie ta ama cuo.

¹³Lungdaa lie a tlapa saciy ca, Khazing bie kha thyi yite palung tluosa pata a cuhluopa tie khata ama cuo. Cuorasala ama palung chung luo a thuvpuv ta a ngie li nakawta cuokha chung dyi zang yite dyapasyana cuo a vya chiy tiyta a lie pakhaa paluopa tie ta ama cuo.

¹⁴Ahling hrawlie a tlapa saciy ca, Khazing bie kha thyi yite, cuorasala palung riethyina, hnyirungna hne a nuona zaw ta ama hringna kha kalaa yite khatiy tahmuo ama thyi a hming buo lipa tie khata ama cuo.

¹⁵Cuorasala lyiphaa lie a tlapa saciy ca, Khazing bie kha thyi yite, a patuv yite a dangna hne pathiypalung phya phana hneta thyi a pathyina te ta a hringkhyipa tie ta ama cuo.

¹⁶Ahunghmuota myi-ing kha ama vuo tiyta beke pakhuvsue buo lipa yi ta iehmang rawlie zaw chi buo vayi. Ing chung luo cawsaa amaa ngie tiyta khe naa se yi tapata myi-ing vuonatung cunglie khana ama patu taw.

¹⁷“Tahematapakieca suokha hmuo nupa cuo li'a pata suokha hmuo buvkhungpa cuo'a vyi. A paruvta tuepa hmang bangkhuo ca khena luo papya pata pachangpa hne hmungpa ama cuo aa.

¹⁸“Cacuonakawta bienaa nama thlie zya kha a raaring ung; tahematapakieca a hnyipa kha pichiypa cuo'a yite, a hnyi lipa tie kha i hnyi tapata ama ruepa khahmuo lapa pata ama cuo aa,” a ta.

¹⁹Cakhutaata Zingsuv a nung hne a nuta zaw kha ama'a luo amaa vaw, cuorasala cawsaa ama hluv tuv nakawta a taw khu vayi.

²⁰Ama kha, “Na nung hne na nuta zaw ta caa taw khing yite ale liena amaa daa nguoluo,” ama ta.

²¹Cuorasala Zingsuv ta zaapuv kha, “I nung hne i nuta zaw ca Khazing bie kha thyi yite a tuepa tie khana a cuo yi,” a ta.

²²Ningkha ca Zingsuv hne ziytuv tie ca sawkawpalaw chung luo kha a ngie yite iema kha, “Tiyliy huesuo luo hue vaa ungpuv,” a ta yi. Cacuonakawta amaa thu.

²³Sawkawpalaw ta ama sile nguoluo ning kha Zingsuv ca aa hmung. Thliychie a vya hruo te ama sawkawpalaw lie tiy a bi nakawta ama thlaa a zang hringhruo.

²⁴Ziytuv tie ta Zingsuv kha va pathu yite, “Abyipa, Abyipa! Vuotaa ma thiy diy'a nang pa hing!” ama ta. Zingsuv ca kya thu te thliychie hne tiylaw kha a chuo yi. Die yite zezaw bangkhuo kha a die siyliy.

²⁵Ama ta, “Nama zangna ca khaalie ma a aw?” a ta yi. Iema ca ciysa yite ama nang ta a uo; pakha hne pakha kha, “Hingpapaa hing ahung tama a cuo? Thliychie hne tiylaw kha naw pi te a ri amaa ngie!” amaa ta.

²⁶Cakhutaata Zingsuv hne ziytuv tie ca Galilee riyliy huesuo Gerasene[19] pe luo kha ama chiy.

²⁷Zingsuv ca ngiekuo luo a va pya pahne ta capa khy lie a awpa khuevuo ta a hryipapaa ta a vya taw. Capapaa ca cuo syipuv caw a tue li pata aw te ing lie aw li pata thluokung lie khy a sapa a cuo.

²⁸Zingsuv kha a hmung tiyta a phyi thabaw lie kha a vya bu te, a ue a aw zawdya ta khi te, “Zingsuv, Asuocepa Khazing Saacapaa! Tuokhaama ina tue khing ciy? Icaa nue, ruvnaana na pi thi kha!” a ta.

²⁹Khaapanakawma cahaa cata a khi tapa kieca Zingsuv ta thlaapa pyalyipa kha capapaa chung taa ca pya riypata naw a pi nakawta a cuo. (Cuo hluvpuv ca thlaapa pyalyipa cata patuv te, a kuv a phyi kha thaabuoliriy ta ciy yite ama huo raalaa pata, thaariy kha chipachung diy te ruopahriy luo kha a paruo taw.)

³⁰Zingsuv ta, “Na ming ahungma?” tapata a hiehriy. “I ming ca ‘Hluvpuv’ tana i cuo,” a ta. Tahematapakieca khuevuo hluvpuv kha a chunglie amaa ngie nakawtana a cuo.

³¹Khuevuo tie khata Zingsuv kha, dena a hnyi lipa khue a thuvsapa chung luo kha malie pathla thi kha ama ta.

³²Capa hmang, tluope lie kha va a hluvpuv ama patle nguoluo. Cacuonakaw khuevuo tie khata Zingsuv ca va chung luo khiy malie pangie sa thi la ta yite amaa nue. Cacuonakaw naw a pi yi.

³³Cakhutaata khuevuo tie ca cawsaapapaa chung taakhata pya yite va chung luo ca amaa ngie. Va bangkhuo ca lungkuo taa cata a zupathla yite riyliy chung luo ama tlasa diy.

³⁴Va a khietuv tie ta cahaa cata hmang a cuopa kha ama hmung tiyta a ruo yite khypuv chung hne khyta bangkhuo ta capa thuohlaa ca ama pathyi sa.

³⁵Hmang a cuopa kha mang riypata cawsaa ca vaa yite, Zingsuv'a luo ama va pha ca khuevuo ta a pya se papaa kha caw a phata tah a tue te palung singta tah Zingsuv phyi thabaw lie a zaa tupa kha ama hmung ca ama ciy hringhruo.

³⁶Khuevuo ta a hryipapaa tuokhaatama a tluo tapa kha zaa hmungpa tie khata cawsaa zaw kha ama chang.

³⁷Gerasaa hne a kiecahriy khyta lie a awpa cawsaa bangkhuo ca ama ciysa nakawta a pya se riypa yita amaa nue. Zingsuv ca sawkawpalaw luo kha kie te a kaa.

³⁸Khuevuo ta a pya se papaa ta Zingsuv ca, “Na ma'a lie si ra thi'a ang,” tapata a nue. Cuorasala Zingsuv ta,

³⁹“Ing luo kha kaa la Khazing ta na cuota a tuepa hmang hing va chang tie yi,” ta te a pathlie. Cawsaapapaa ca cakuo te Zingsuv ta a cuota khatluv tama hmang a tue tapa kha khypuv chung bangkhuo khata a pathyi sale.

⁴⁰Zingsuv ca a vya kaa tiyta cawsaazaapuv ta alawna hneta ama daw, tahematapakieca ama bangkhuo ta ama kha ama za huo.

⁴¹Cakhupahne Jairu ama tapa apungna-ing uvthyipapaa kha a vya chiy. Zingsuv phyi thabaw lie kha a vya bu te a ing luo cakuo riypata a nue,

⁴²tahematapakieca kung hraa hlyihning a tapa, sacanung a hnyi tlakuopa kha a thiy'a nang nguoluo. Zingsuv ca cakuo te cawsaazaapuv khata a pahlaw ta ama pahlawle.

⁴³Capa lieca kung hraa hlyihning chung thiylang pasana ta pasa te a hnyipa bangkhuo siybyi tie'a lie a hmuo diy raalaa pata pakha ta hmuo ama patluo khu li nung a aw.

⁴⁴Zingsuv hnang luo taakhata a vaw te a pangpe kha a hrie ca sungkhabala ta a thiy langpa ca a ping.

⁴⁵Zingsuv ta, “Ahungma naa hrie?” a ta. “Ahungtahmuo ca hrie va puv,” ama ta diy tiyta, Piter ta,[20] “Abyipa, cawsaa ta ca cadung yite a nuo ta acaa nuosue patlawpa yi hing,” a ta.

⁴⁶Cuorasala Zingsuv ta, “Pakhakha na naa hrie, tahematapakieca cahrana i chung taata a pyapa na i pachang,” a ta.

⁴⁷Cawsaanung ta ama kha a hmung ca a nu khu li tli pata a cathangsapuo pata Zingsuv phyi thabaw lie kha a vya bu te cawsaa bangkhuo hmielie ca khaapa nakawta ma Zingsuv kha a hriepa tahne sungkhabala ta a tluonapa kaw kha a ri.

⁴⁸Zingsuv ta, “I sacanung, na zangnapa na caa patluo sa. Hnaanguosa pata cakuo tie,” a ta.

⁴⁹Cahaa cata Zingsuv bie a ri nguoluo ning ca, apungna-ing a uvtuvpa ing taata cawsaa pakha vya chiy te, “Na sacanungnung ca a thiy tli, sayapapaa ca hnaa pahnaw kha tie,” a ta.

⁵⁰Zingsuv ta capa bie a thyi tiyta Jairu kha, “Na thlaa zang kha! zang la na sacanung ca a tluo aa,” a ta.

⁵¹Ing kha a va pha tiyta, Piter, Johan, Jeim hne haatiynung a nung hne a paa ri li pata ahunghmuo ingchung luo pangie sa vayi.

⁵²Ama bangkhuo khata haatiynung kha ama caa; cuorasala Zingsuv ta, “Caa kha ung; haatiynung hing thiy vyi—aa hmung nguoluo patana a cuo,” a ta.

⁵³Haatiynung a thiy tapa kha ama pachang nakawta Zingsuv kha ama pahnyisue.

⁵⁴Cuorasala Zingsuv ta a kuv ta patuv te, “Thu tie, i sanung,” tapata a u.

⁵⁵A thlaapa kha vya kaa te sungkha ta a kya thu. Zingsuv ta ning riypa suokhakha pi riypata a chang yi.

⁵⁶A nung hne a paa ca a ca ang ta ama ca ang, cuorasala Zingsuv ta hmang a cuopa kha ahunghmuo chang li riypata a thlu yi.