Read Lautu Chin Johan 1 Bible Online

Johan 1 - Lautu Chin bible

Johan 1

¹A hruothu ta Bie a za aw; capa Bie ca Khazing hneta aw te, capa Bie ca Khazing ta a cuo.

²A hruothu baataata Bie ca Khazing hneta a za aw.

³Hmangting bangkhuo kha capa Bie thue cata sapa cuote sapa hmang suokhata hinghmuo ama li pata sapa aw vyi.

⁴Ama chunglie capa hringna aw te ca hringna ca cawsaa bangkhuo cuota khena a cuo.

⁵Khena ca zingna lie kha khe te zingna ta te vyi.

⁶Khazing ta a za pathliepa pakha aw te, a ming ca Johan ta a cuo.

⁷Ama thueta cawsaa bangkhuo ama zang diy riypata khena kaw kha tehte khuo riypata a vawpa pachangkhyituv ta a cuo. A ripa bangkhuo ama zang riypatana a vaw.

⁸Ama pangphie ca khena cuo vyi; khena kaw ri riypata a vawpa tana a cuo.

⁹Cawsaa bangkhuo kha a pakhe sapa khena hmisipa ca chuelyi luo kha a vaw nguoluo tli.

¹⁰Ama ca chuelyi lie hing aw te ama thueta chuelyi hing sapa a cuo, cuorasala chuelyi ta ama kha za pachang vyi.

¹¹Ama ca a khy a ruo ciepa luo kha aa vaw raalaa pata a cawsaa zaw ta cuhluo vayi.

¹²Cuorasala ama cuhluo te a ming a zangpa ca Khazing saata cuo khuna kha a pi yi.

¹³Iema ca chuelyi phung, cawsaa thiy hne saa ta sapa cuo vayi; Khazing ta a sapa tana ama cuo.

¹⁴Bie ca cawsaa ta vya cuote kiema hrawlie khy a vya sa; vihnyina hne biehmisipa ta a bipa rungnaana ca hmung pate, a Paa ta pakhata kyalya a hnyipa a Saacapaa a pipa rungnaana tana a cuo. (

¹⁵Johan ta ama kaw kha khuopuv ta u te tehte a khuopa ca, “‘Ama ca kama hnang taata a vaw te, cuorasala kama laata a le vie, tahematapakieca ama ca kama hluo ta a za aw tli,’ tapata ica changpa yi kha ama hing tana a cuo,”) a ta.

¹⁶Ama tlingna chung taata kiema bangkhuo ca vihnyina suokha hnang suokha ta ima hmung.

¹⁷Phungbie ca Moses taata malie pi te; cuorasala vihnyina hne biehmisipa ca Zingsuv Khrih taata na aa vaw.

¹⁸Ahungtahmuo Khazing kha hmung buo vayi. Saacapaa pakha dyipa, Paa pathiypalung hne a ngieta tah a awpa khata a paluo sa tli.

¹⁹Judah uvthyi tie ta tluobyi tie hne Levi tie kha Jerusalem taata Johan'a luo pathlie yite, “Ahung tama na cuo?” tapata ama pa hiehriy sa.

²⁰Johan ta bie nu li pata, a luohuo hne a siesa pata, “Kama ca Messiah[1] ta cuo va ang,” a ta.

²¹“Cacuokie ahung tama na cuo? Elijah ta na cuo ma?” ta yite ama hiehriy. Johan ta, “Cuo va ang,” a ta. “Profet ta na cuo ma?” ta yite ama hiehriy. “Cuo va ang,” tapata a palie yi.

²²“Cacuokie ahung tama na cuo tapa kha malie chang tie. Malie a pathliepa tie'a luo kha na bie paliena hing ma chiykhyi pakhaa na a hu. Cacuonakaw ahung tana i cuo naa ta ma?” ama ta.

²³Johan ta, profet Isaiah a ripa haakhata: “Kama ca, ‘Abyipa ziy riypa luopuv kha, aa dangsa pata sa tie ung: tapata ruochung lie a khipa ue khatana i cuo!’” a ta.

²⁴Farasi tie ta ama pathliepa tie cata,

²⁵“Nama ca Messiah a cuo li kie Elijah a cuo li kie Profet zaw na cuo tlung li kieca khaapanakawma tiy na naw yi?” tapata ama hiehriy.

²⁶Johan ta, “Kama ca tiy ta tiy i naw yi, cuorasala nama hrawlie nama pachang lipa pakha a aw.

²⁷Ama ca kama hnang luo ta aa vaw nguoluo tli; cuorasala kama ca a phyipakaw riy pathluo riypa tahmuo a tla va ang,” tapata a palie yi.

²⁸Hingpa hmang a cuonapa ca Johan ta tiy a naw napa Jordan cavaa huesuo luo kuo lie a awpa Bethani khy lie tana a cuo.

²⁹A mawluopa ta Johan ta Zingsuv ama'a luo a vawle nguoluopa kha hmung te, “Mang tie ung, chuelyi suena a sikhyituv Khazing Tuvtaata khiy!

³⁰‘I hnang taata cawsaa pakha a vaw nguoluo te, cuorasala ama ca kama laata a le vie, tahematapakieca ama ca kama i puv hluo ta a za aw tli,’ tapata a kaw i za ripapaa khatana a cuo.

³¹Ahung tama a cuo tapa kha kama hrahring za pachang va ang, cuorasala tiy ta tiynawna i pi hnuochuopa hing Israel ming hrawlie ama kha paluosapa a cuona riypatana a cuo,” a ta.

³²Johan ta, “Thlaapa ca vuoruo taakhiyta thuvruv haata za cung te a cunglie a zaa cangpa kha i hmung.

³³Kama hrahring ta ama kha za pachang va ang, cuorasala tiy ta tiynawna pi riypata naa pathlietuv Khazing ta, ‘Thlaapa a zuv'a te cawsaa pakha cunglie a cangpa kha na hmung tiyta, capapaa ca Thlaapa ta tiynawna a pituv riypapaa tana a cuo tapa kha na pachang aa,’ ina ta.

³⁴Capapaa ca kama pangphie ta hmung tli ang te, ‘Khazing Saacapaa tana a cuo’” tapata tehte a khuo yi.

³⁵A mawluopa ta Johan ca ziytuv tie pahning hneta amaa daahne nguoluo pata

³⁶Zingsuv a vya cakuolepa kha a hmung ca, “Khazing Tuvtaata khiy mang tie ung,” tapata a u.

³⁷Capa bie a ripa ca ziytuv tie pahning ta thyi yite Zingsuv kha ama ziy.

³⁸Zingsuv ta a hnang luo a pali te ama ziypa kha a hmung yi ca, “Khaapama nama huv?” a ta yi. Iema ta, “Rabbi, khaapa liema na aw?” tapata ama palie. (Rabbi tapa ca pacuvtuv saya tana ta a cuo).

³⁹“A vaw ungla vya mang tie ung,” a ta yi. Cacuonakawta vaa yite a awnapa kha ama va hmung, capa ning, a tuo kaliepa cuo kha ama hne ama hmuo pakhaw. Capa cuo ca zuoluo siymaluo papaliy hraw ta a cuo.

⁴⁰Capa cawsaa pahning lieta Johan bie ripa kha thyi te a ziypa ca Simon Piter a nuta Andru khata a cuo.

⁴¹A uvta Simon kha hmung taa te, “Messiah ca ma hmung tli,” a ta. (Messiah tapa ca Sathu pathuvpa[2] tana ta a cuo).

⁴²Cakhutaa Simon ca Zingsuv'a luo kha a vaa khyi. Zingsuv ta ama ca mang te, “Nama ca Johan saacapaa Simon ta na cuo, Sefas tapata kupa na cuo'a tli,” a ta. (Sefas tapa ca Piter tapa hne khata a lu te a siyluo ca ‘lungtung,’ tana ta a cuo).

⁴³A mawluopa ta Zingsuv ca Galilee luo si a ting. Filip kha hmung te, “Na ziy tie,” a ta.

⁴⁴Filip ca Andru hne Piter ama awnapa Bethsaida khypa ta a cuo.

⁴⁵Filip ta Nathanael kha hmung te, “Moses ta Phungbie caa-uv chunglie a kaw a capepa hne profet tie zaw ta a kaw ama za capepapaa kha ma hmung tli. Ama ca Josef saacapaa Zingsuv, Nazareth khypa tana a cuo,” a ta.

⁴⁶Nathanael ta, “Nazareth khy taata hmangphapa suokha chuo a pya the'a maw?” a ta. Filip ta, “A vaw la vya mang tie,” a ta.

⁴⁷Zingsuv ta ama'a luo Nathanael a vawlepa kha a hmung tiyta, ama hne a patuv pata, “Israel ming hmisipa hing mang tie ung! A chunglie hanghiena khaahmuo aw vyi,” a ta.

⁴⁸Nathanael ta, “Tuokhaatama ina pachang ciy?” tapata a hiehriy. Zingsuv ta, “Filip ta aca ku hluo ta thyikuv kung rawlie naa tu ningta kha ica hmung tli,” a ta.

⁴⁹Nathanael ta, “Rabbi, Nama ca Khazing Saacapaa, Israel ming Siepahruo tana na cuo,” tapata a palie.

⁵⁰Zingsuv ta, “Thyikuv kung rawlie na aw ningta ica hmung tli, ica ta nakaw kha tama ina zang ciy? Ama laa khata a le viepa hmang na hmung viele kalie aa,” a ta.

⁵¹Cakhutaata ama kha, “Biehmisipa na ica chang yi: Vuoruo kha a pahaw'a te, Khazing avuoming tie kha Cawsaa Saacapaa cunglie ama za cungpa hne ama kiepa kha nama hmung aa,” a ta yi.