Read Lautu Chin Johan 10 Bible Online

Johan 10 - Lautu Chin bible

Johan 10

¹Zingsuv ta, “Biehmisi tana ica chang yi: Tuv ing chung luo thlake taata a ngie li pata luo hrang taata a ngiepa ca a ruvhangpa hne damie tana a cuo.

²Thlake taata a ngiepa ca tuvkhietuv ta a cuo.

³Thlake a huotuvpa ta thlake kha pahawpa te a tuv ta a ryi ama thyi. A tuv kha ama ming ta ku yite a pyakhyi yi.

⁴A pyakhyi khu taayita hmie luo sapa yite a tuv khata ama ziy, tahematapakieca a ueryi kha ama pachang.

⁵Maliepa ca ziy khing'a vayi; amaa ruose aa, tahematapakieca maliepa tie ueryi ca pachang vayi.

⁶Zingsuv ta hingpa pahmungsana hing a chang yi, cuorasala khaapama a ri khing tapa kha pachang vayi.

⁷Cacuonakawta Zingsuv ta changpakhaa yite, “Biehmisi tana ica chang yi: Kama ca tuv-ing thlake tana i cuo.

⁸Kama hluo ta a vawpa bangkhuo ca a ruvhangpa hne damie tana ama cuo, cacuonakawta tuv ta ama ueryi kha naathlie vayi.

⁹Kama ca thlake tana i cuo. Kama'a taata a ngiepa bangkhuo ca amaa bang aa; a ngie'a yi, pya'a yite aphuv panuta kha ama hmung aa.

¹⁰A ruvhangpa ca paruv repa, thie repa hne para repa dyi tana aa vaw. Kama ca hringna ama hnyi riypa hne lunghruotlungsa pata ama hnyi riypatana i vaw.

¹¹Kama ca tuvkhietuv pha tana i cuo. Tuvkhietuv pha ca a hringna kha a tuv cuota a pi.

¹²A hluo chawpa, tuvkhietuv a cuo lipa hne tuv hnyituv a cuo lipa ca cahnie aa vawpa a hmung tiyta tuv kha thuse te aa ruo. Cahnie cata tuv kha sie te a chepatlaa diy.

¹³A hluo chawpapaa ca tuv cunglie kawpacuona a hnyi li nakawta a tuv kha a ruo se.

¹⁴Kama ca tuvkhietuv pha tana i cuo. I Paa ta na pachang te kama ta i pachang pahaata i tuv kha pachang ang te i tuv zaw ta ina pachang yi. Cakhutaata iema cuota thiy a nguopa tana i cuo.

¹⁶Hingpa tuv-ing chunglie ta a aw lipa tuv hrangpa i hnyi kalie. A vya chiy ra'a yi ang te, i ryi kha naa ama thlie aa. Tuvkhietuv pakha rawlie tuvrung rungkha ta ama cuo aa.

¹⁷I hringna kha la pakhaa the riypata i hringna kha i pi nakawta Paa ta ina due.

¹⁸I hringna ca ahungtahmuo na lapa khu vyi. Kama ta kama ri ta i pipa tana a cuo. Pi khuna naw hnyi ang te la pakhaa khuna naw zaw i hnyi. Capa naw ca i Paa taata i hmungpa tana a cuo.

¹⁹Capa bie kawlie cata Judah ming hrawlie a chena a aw pakhaa.

²⁰Cawsaa hluvpuv ta, “Khuevuo ta a hryi te a palung a hmuo va tli! Khaapanakawma a bie naa nama thlie,” ama ta.

²¹A hrangpa tie ta, “Khuevuo a hnyipa bie ta cuo vyi! Tuokhaatama khuevuo ta mingcuepa ca a patluo sa khu aa?” ama ta.

²²Jerusalem lie kha Biena-ing pihluona pyi ama tue ningta cuo te, capa cuo ca thlasiy ning ta a cuo.

²³Zingsuv ca Biena-ing chung Solomon hmiechue tapa lie a khie nguoluo ning kha

²⁴Judah ming ta a vya hmyasue yite, “Kha cuo ma malie na paluolue pari aa? Messiah[19] ta na cuo kieca a siesa pata malie chang tie?” ama ta.

²⁵Zingsuv ta, “Ica chang tli yi, cuorasala na zang va ungciy. I Paa ri ta i tuepa hmang hing kama kawluo tehte a khuopa ta ama cuo;

²⁶cuorasala i tuv nama cuo li nakawta zang va ungciy.

²⁷I tuv zaw ca i ueryi kha naa ama thlie, kama ta pachang yi ang te iema ta ina ziy yi.

²⁸Chuozaa hringna pi yi ang te, ra buo'a vayi. Ahungtahmuo i kuv chung taata na chuv khu'a vayi.

²⁹Iema kha naa pituv i Paa ca zezaw bangkhuo laata le vie te ama kuv chung taata ahungtahmuo chuv khu'a vayi.

³⁰I Paa hne kama ca pakha tana ma cuo,” a ta.

³¹Judah ming ta ama vaa riypata alung amaa haa pakhaa.

³²Zingsuv ta iema kha, “I Paa'a taata hmangphapa a hluvpuv kha ica pahmung sa yi. Khaapa kawlie hing tama alung ta vaa inaa nang ungciy?” a ta yi.

³³Judah ming ta, “Hmangphapa na tuena kawlie alung ta maca vaa nangpa cuo vyi, cuorasala Khazing thuo pachi pata bie na ri nakawtana a cuo, cawsaa cakhawpa na cuo thluo pata Khazing ta naa tue!” ama ta.

³⁴Zingsuv ta, “Nama phungbie chunglie, Khazing ta, ‘Niema ca khazing tie tana nama cuo,’ tapata a cape cuo vama?

³⁵Khazing ta bie a pipa tie kha, ‘khazing tie’ ta yite, Caapathepa kha ma para khu li kieca

³⁶kama ta, “Kama ca Khazing Saacapaa tana i cuo,” i ta nakawta, Paa ta pathe sa te chuelyi luo a za pathliepa ca Khazing chiesapa tana a cuo ima ta khu'a ma?

³⁷I Paa khingpa hmang i tue li kieca na zang kha ung.

³⁸Cuorasala i tue kieca kama ina zang li zaw ung cata, i tuepa chuo hing zang tie ung, cakiedyina i Paa ca kama chunglie aw te kama ca i Paa chunglie i awpa kha pachang'a ung cate nama thyi the aa,” a ta.

³⁹Catiyta Zingsuv ca patuv amaa nang pakhaa, cuorasala dya a zuvpathla se yi.

⁴⁰Cakhutaata Zingsuv ca Jordan cavaa huesuo, Johan ta tiy a za nawtaanapa hmang luo kha va kaa te capa lieca a aw.

⁴¹Cawsaa hluvpuv a vaw yite, “Johan ta kharuehaa hmang khaahmuo tue vyi. Cuorasala hingpapaa kaw a ripa bangkhuo ca a hmuo diy,” ama ta.

⁴²Cawsaa hluvpuv ta capa hmang lie ca ama zang.