Read Lautu Chin Johan 11 Bible Online

Johan 11 - Lautu Chin bible

Johan 11

¹Mary hne a nuta nung Martha ama awnapa Bethani khy lie a awpa Lazaruh ama tapapaa kha a pasa.

²Mary ca Abyipa phyi kha ziyhmyi ta bya te a suo ta a hruv nung kha a cuo; a pasapa Lazaruh ca a caapaapa ta a cuo.

³A sienungnung tie ta Zingsuv'a luo kha biephyatuv pathlie yite, “Abyipa, na duepa na viesaapa na a pasa,” ama ta.

⁴Cuorasala Zingsuv ta capa bie ca a thyi tiyta, “Hing pasana hing thiyna te cuo'a vyi; Khazing rungnaana a luona riypa hne hingpa thue hingta Khazing Saacapaa zaw rungnaana a hmungna riypata a cuo aa,” a ta.

⁵Zingsuv ta Martha hne a nutanung hne Lazaruh kha a due yi.

⁶Lazaruh a pasapa thuo a thyi khu taata a awnapa lie kha ning hning a aw siy kalie.

⁷Cakhutaata ziytuv tie kha, “Judea luo si pakhaa'a ungpuv,” a ta yi.

⁸Ziytuv tie ta, “Rabbi, a ru hluo ta lie Judah ming ta alung ta aca za vaa nangpa yi kha tama capa luo ca vaa pakhaa naa ting?” ama ta.

⁹Zingsuv ta, “Ningkha ta siymaluo hlyihning a aw cuo vama? Ningchung ta a cakuopa ca chuelyi khena kha ama hmung nakawta a pachiy va vyi.

¹⁰Cuorasala zuo ta a cakuopa ca khena a aw li nakawta amaa pachiy,” a ta.

¹¹Capa bie ca a ri khu taata iema kha, “Ma viesaapa Lazaruh ca aa hmung tli, cuorasala pathu riypata capa luo ca i vaa aa,” a ta.

¹²Ziytuv tie ta, “Abyipa, aa hmung kieca a tluo aa,” ama ta.

¹³Zingsuv ta Lazaruh a thiyna kaw kha a ri raalaa pata, iema taca aa hmung sasawpa kaw khana a ri tapata ama rue.

¹⁴Cacuonakawta Zingsuv ta siephele khata, “Lazaruh ca a thiy tli,” a ta yi.

¹⁵Niema nama zang thena riypata capa lie i za aw lipa kha niema cuota i palung a tluo, thu ungla ama'a luo ca vaa ungpuv,” a ta yi.

¹⁶Mingphie[20] ama tapapaa Thomas ta a viesaa ziytuv tie kha, “Ama hne thiyhne riypata vaa ra ungsiy,” a ta yi.

¹⁷Zingsuv a va pha ning kha Lazaruh ca thluo chunglie ningpaliy a za aw tli.

¹⁸Bethani ca Jerusalem taata me hning[21] hraw dyi a hla te,

¹⁹Judah ming hluvpuv ca ama caapaapa ta a thiysepa Martha hne Mary hnaa panguo riypata amaa vaw.

²⁰Martha ca Zingsuv na a vaw tapa a thyi pahne ta pya te a taw, cuorasala Mary ca ing chunglie kha a aw.

²¹Martha ta Zingsuv kha, “Abyipa, nama na hingpa lie hing a aw ciy tapa kieca i caapaapa hing thiy'a vyi.

²²Cuorasala ata hing tahmuo na hiepa bangkhuo ca Khazing ta aca pi aa tapa kha i pachang,” a ta.

²³Zingsuv ta, “Na caapaapa ca a thupakhaa aa,” a ta.

²⁴Martha ta, “Ningchuonapa ning lie khiy a thupakhaa aa tapa ca i pachang,” a ta.

²⁵Zingsuv ta, “Kama ca thupakhaana hne hringna ta i cuo. Kama naa zangpa ca a thiy hmuo thiy yi sala ama hring aa;

²⁶cakhutaata hring te kama naa zangpa ca thiy'a va tli yi. Hingpa hing na zang ma?” a ta.

²⁷Ama ta, “A cuo, Abyipa, nama ca chuelyi luo a zuv riypa, Khazing Saacapaa, Messiah[22] na cuopa kha ica zang,” a ta.

²⁸Hingpa bie a ri khu taata Martha ca vaa te a nutanung Mary kha dya a va u. “Saya kha a vaw te nama na a ca padang,” a ta.

²⁹Mary ta a thyi pahne ta thu te ama a taw riypata a catlisa pata a cakuo.

³⁰Zingsuv ca khychung luo kha vya chiy valie, Martha ta a vaa tawnapa hmang lie khana a aw kalie.

³¹Ama hne ing chunglie aw yite hnaa a panguopa Judah ming ta Mary thu te a catlisa pata a cakuopa kha ama hmung. Thluo luo na a va caa'a nang thlu aa tapata ama rue nakawta ama paziy.

³²Mary ca Zingsuv awna luo kha va pha te a hmung pahne ta a phyi thabaw lie kha a pakhuv pane te, “Abyipa nama na hingpa lie hing a aw ciy tapa kieca i caapaapa hing thiy'a vyi!” a ta.

³³Zingsuv ta Mary a caapa hneta ama hne a vaw rapa Judah ming ama caapa kha a hmung tiyta khuopuv ta a palung pasa te a ngie a chi.

³⁴“Khaapaliema nama paby?” a ta yi. Iema ta, “Abyipa, a vaw la vya mang tie,” ama ta.

³⁵Zingsuv ca a caa.

³⁶Judah ming ta, “Mang tie ung, khatluv tama Lazaruh kha a due,” ama ta.

³⁷Cuorasala chekha ta, “Mingcuepa hmuo a pahmung sa pakhaa khu cuo vama? Lazaruh hing thiy li riypata tue khu vama?” ama ta.

³⁸Zingsuv ca a palung pha hringhruo li pata thluo luo kha a vaa. Capa thluo ca lungkaraw cuote a pakaa ca lungphie suokha ta ama khaa.

³⁹Zingsuv ta, “Lungphie hing hnyi tie ung,” a ta yi. Athiypapaa sienungnung Martha ta, “Abyipa, a pahnuosa'a tli. A thiyna taata ning paliy a ta tli,” a ta.

⁴⁰Zingsuv ta, “na zang kieca Khazing rungnaana kha na hmung aa, tapata ica chang tli cuo vama?” a ta.

⁴¹Lungphie ca ama hnyi. Zingsuv ca vuopaa kha ang te, “I Paa, i bie naa ina thliepa nakawcata icaa law.

⁴²I bie naa ina thlie pari ciy tapa i pachang, cuorasala hingpa lie a daapa cawsaazaapuv hingta nama pathliepa i cuopa kha ama zang the na riypata i ripa tana a cuo,” a ta.

⁴³Hingpa bie a ri diy khu pahne khuopuv ta khi te, “Lazaruh, kya pya!” a ta.

⁴⁴Athiypa ca a kuv hne a phyi kha riy catawnapa pang ta a cataw te a hmie zaw a cataw cangta a kya pya. Zingsuv ta, “Pathluopa ungla cakuo se,” a ta.

⁴⁵Cacuonakawta Mary hneta a vawpa Judah ming a hluvpuv ta Zingsuv hmang tuepa kha hmung yite ama kha ama zang.

⁴⁶Cuorasala chekha ta Farasi tie'a luo kha vaa yite Zingsuv hmang tuepa kha ama va chang.

⁴⁷Cacuonakawta Farasi tie hne tluobyilepa tie ca bierituv phuv meting kha ku yite, “Tuokhaatama ma tue aa? Hingpapaa hingta kharuehaa hmang a hluvsa a tue!

⁴⁸Hinghaahingta ma mangthluo kieca, cawsaa bangkhuo ta ama zang aa, Rom ming kha a vaw'a yite ma hmangpathepa[23] hne ma mingphang hne malie ama para diy aa,” ama ta.

⁴⁹Iema chung taata pakha, Kaiafas ama tapa, capa kung ningta Tluobyilecepa a hriepapaa ta, “Nama pachangpa aw vyi!

⁵⁰Mingphang phangkha yalya ta parapa laata mingphang yalya cuota pakha thiypa hing a pha vie tapa pachang va ung cama?” a ta yi.

⁵¹Hingpa bie hing ama palung chiy ta a ripa cuo vyi, capa kung ca ama kha Tluobyilecepa a cuo pahaata Zingsuv ca mingphang cuota a thiy aa tapa hne;

⁵²mingphang cuo dyi cuo li pata Khazing saata aa chepatlaapa bangkhuo kha pangkha ta pahmya riypa zaw ta a thiy aa tapata a rilu pata a cuo.

⁵³Capa ning taacata Zingsuv thie riypa kha khue ama khuo.

⁵⁴Cacuonakawta Zingsuv ca Judah ming hrawlie kha a luohuo ta cakuocavaa va tli, khapa taakhata pya te ruochung hne a ngiena lie a awpa Efraim ama tapa khy luo kha vaa te capa lieca a ziytuv tie hne khata ama aw.

⁵⁵Judah ming Lawsena Pyi kha a ngie tli te cawsaa hluvpuv ca pyi hluo ta a pathesana tue riypata khyta taakhata Jerusalem luo kha ama kie.

⁵⁶Zingsuv kha huv yite Biena-ing lie amaa daapa khata pakha hne pakha kha, “Tuokhaatama na rue? Pyi luo hing a vaw lipa taca aw'a vyi nuo?” amaa ta.

⁵⁷Tluobyi lepa tie hne Farasi tie ta Zingsuv awnapa a pachangpa nama aw kieca, ma patuv thena riypata malie nama chang aa, tapata bie ama pi.