Read Lautu Chin Johan 12 Bible Online

Johan 12 - Lautu Chin bible

Johan 12

¹Lawsena Pyi hluo, ning caruv lie kha Zingsuv ca thiyna taata a pathu pakhaapapaa Lazaruh a awnapa, Bethani khy luo kha a vaa.

²Zuosa duonapa tuepa yite Martha ca sa pi aa bya yi; Lazaruh ca Zingsuv hneta cabya lie a tu pakhawpa tie hrawlie kha a aw ra.

³Mary ta paw kha aa riypa, a phang phasapa hne a muo ruvsapa ziyhmyi thyikha kha la te Zingsuv phyi kha bya te a suo ta a hruv. Ziyhmyi rang pa-ue ca ingchung bangkhuo kha aa ze diy.

⁴Zingsuv ziytuv chung taata pakha a cuopa, ama a lyituv riypapaa, Judas Iskariot khata,

⁵“Khaapanakawma hingpa ziyhmyi hing denarii[24] zathung ta zaa yi sala siypasa tie kha ama pi va? a ta.

⁶(Hinghaahingta bie a ripa hing siypasa tie kaw a pacuo nakaw cuo li pata a paruvpa a cuo nakawtana a cuo. Tuokaa baw a cake tuvpa ta cuote tuokaa kha a hmuo paruv taw.)

⁷Zingsuv ta, “Ama hing sue phaw kha ung! A hnyipa ca i riy paby ning thue huota a chi se.

⁸Siypasa tie ca niema hrawlie ama aw pari aa, cuorasala kama ca niema'a lie aw pari'a va ang,” a ta.

⁹Judah ming hluvpuv ta Bethani liena Zingsuv a aw tapa kha ama thyi nakawta capa khy luo ca ama vaa. Zingsuv vuota dyi cuo li pata Zingsuv ta thiyna taata a pathu sa pakhaapa Lazaruh ama hmung khing nakawta a cuo.

¹⁰Cacuonakawta Tluobyilepa tie ta Lazaruh zaw kha thiepuo riypata khue ama khuo;

¹¹tahematapakieca capa kawlie cata Judah ming hluvpuv ta iema kha thuse yite Zingsuv kha ama zang.

¹²A mawluopa taca Lawsena Pyi luo a vawpa cawsaazaapuv ta Jerusalem luona Zingsuv a vaw tapa kha ama thyi.

¹³Cacuonakawta ama daw riypata canungbachuv hnaa a cyi yite ama pya, “Hosanna! “Abyipa ming ta a vawpa ca Khazing ta thluechiy pi mangsue. Israel Siepahruo ca!” tapata ama khi.

¹⁴Zingsuv ca laa taata kha hmung te aa khang; Caapathepa lie a capepa haata:

¹⁵Zion sacanung, na thlaa zang kha se. Na siepahruo ca aa vawle nguoluo, Laataata a khang te aa vawle nguoluo!

¹⁶Ama a ziytuv tie ta capa cuo ning ca hingpa hmang siyluo hing za pachang khu vayi, cuorasala Zingsuv ca rungnaana hne pathu pakhaapa a cuo tiyta Caapathepa ta a ripa hing ama kaw cuote, ama tuepa hmang zaw kha ama huotana a cuo tapa kha ama palung a vuo pakhaa.

¹⁷Zingsuv ta Lazaruh kha thluo chung taata ku pathla te a pathu pakhaapa a hmungpa cawsaa tie khata hmang a cuopa kha ama ri pachaale.

¹⁸Cahaapaapa kharuehaa hmang na a tue tapa kha cawsaazaapuv ta ama thyi nakawta ama kha amaa vya taw.

¹⁹Farasi tie ta pakha hne pakha kha, “Hmung ung ca ma, khaahmuo tue khu va ungciy! Mang tie ung, chuelyi ming ta ama ama paziy diy tli hing haw! amaa ta.

²⁰Pyi chunglie Khazing abie riypata Jerusalem luo a kiepa tie hrawlie kha Grik ming chekha amaa te.

²¹Galilee pe Bethsaida khy ming Filip'a luo kha a vaw yite, “Abyipa, Zingsuv na ma hmung khing,” ama ta.

²²Filip ta Andru kha va chang te, ama pahning ta Zingsuv'a luo kha ama vaa.

²³Zingsuv ta, “Cawsaapa Saacapaa ta rungnaana a hmungna cuo ca a vya chiy tli.

²⁴Biehmisi tana ica chang yi: saciy hmung kha ca alyi lie tuv pata a thiy taa li kieca suokha dyi tana a cuo pari aa. A thiy taa khutaa dyina saciy a hluvsa a papung sa.

²⁵A hringna a duepa ca a hringna kha pavie'a te, hing chuelyi lie a hringna a huepa ca chuozaa cuota a hringna kha a hnyi mangtli.

²⁶Ahunghmuo cuose i re a hriepa ca ina ziy a hu te i changtaapa ca i awna lie a aw ra aa. Ahunghmuo cuose i re a hrietuv ca Paa ta pa-uvsathyina a pi aa,” a ta.

²⁷Zingsuv ta, “I palung rie na a thyisa—tuokhaatama i ri aa? ‘I Paa, hing cuo chung taahingta na khuo tie i ta'a ma? Cuovyi, ama kawlie hing camuo hingpa cuo hing i vya pha ta.

²⁸I Paa, na ming ca pa rungnaa sa tie!” a ta. Cakhutaata, vuoruo taata ueryi zaa thyi te, “Rungnaana pi tli ang te, i pi kalie aa,” a ta.

²⁹Capa lie a daapa cawsaazaapuv khata ueryi ca thyi yite, chekha ta, “khalung na a thy,” ta yite chekha ta, “Avuoming na ama kha bie a chang,” ama ta.

³⁰Zingsuv ta, “Hingpa ueryi hing kama cuota a zuv vyi, niema cuota na aa zuv,” a ta.

³¹Hing chuelyi hing a bie ripa riypa cuo a tling tli; hing chuelyi uvtuv byi zaw hing a cadepa ta ama cuo aa.

³²Hing alyi taa hing calangpa i cuo thueta cawsaa[25] bangkhuo hing kama'a luo i zaa da diy'a yi,” a ta.

³³Hinghaahingta a ripa hing tuokhaapa thiyna ma i ang aa tapa khana a paluo sa khing.

³⁴Cawsaazaapuv ta, “Kiema phungbie ta ca Messiah[26] ca chuozaa tana a hring aa, a ta. Tuokhaatama Cawsaa Saacapaa ca calangthawpa tana a cuo aa, na ta the?” ama ta.

³⁵Zingsuv ta, “Khena ca niema'a lie cuo pachangta chung a aw kalie aa. Khena nama hnyi chung hing zingna ta aca vya law li riypa yita cakuo tie ung. Zingna chunglie a cakuopa ca khaapalie ma i cakuo tapa kha pachang vyi.

³⁶Khena nama hnyi chung hingta khena saa zaw nama cuo thena riypata khena ca zang tie ung,” a ta. Capa bie a ri khu taata Zingsuv ca iema'a taata pya te aa nu.

³⁷Ama hmungna lieta cazawbangkhuo kharuehaa hmang a tue thluo pata ama kha zang vayi.

³⁸Capaca profet ta: Abyipa, ma bie ripa ca ahungma a zang, Abyipa cahrana ca ahung'a luo ma aa luo? tapata a za ripa kha a tlingna riypatana a cuo.

³⁹Cuorasala zang khu ngiethie vayi, Isaiah ngiethie ta,

⁴⁰Ama ta ama ming pacue sa yite, ama palung a paping yi. Ama ming ta ama mang li riypa hne, ama palung ta ama pachang li riypa hne, Kama'a luo a vya pali'a yite, i patluo sa pathlyi li riypa yita, Khazing ta a ta,” tapata a za ri.

⁴¹Isaiah ta hinghaahingta a ripa ca Zingsuv rungnaana kha za hmung tli te a kaw zaw a za ri tli nakawta a cuo.

⁴²Cakhutaa zaw cata Judah ming uvthyi a hluvpuv zawte ta Zingsuv ca ama zang. Cuorasala Farasi tie ca apungna-ing taata malie papya'a kie yi tapata a luohuo ta zang nguo vayi;

⁴³iema ca cawsaa rungnaana kha Khazing'a taata hmungpa rungnaana laata ama khing vie.

⁴⁴Zingsuv ta khuopuv ta khi te, “Ahunghmuo cuose kama naa zangpa bangkhuo ca kama dyi ina zangpa cuo li pata kama naa pathlietuv zaw kha a zangpa tana a cuo.

⁴⁵Kama naa hmungpa ca naa pathlietuv zaw kha a hmungpa a cuo.

⁴⁶Kama naa zangpa ahunghmuo zingna chunglie ama aw li riypata hing chuelyi luo hing khena ta i vaw tli.

⁴⁷I bie kha thyi te a ziy lipa kha a bie ripa'a va ang. Kama ca chuelyi bie ripa riypata a vaw va ang, cuorasala khuo riypatana i vaw.

⁴⁸Kama kha na thaw te i bie kha a cuhluo lipa ca bie a ripatuv riypa pakha a hnyi. Kama i ripa bie hingna ningchuonapa ning thueta a bie a ripatuv ta a cuo aa!

⁴⁹Tahematapakieca kama ri ta i ripa cuo vyi, cuorasala naa pathlietuv i Paa ama hrahring ta ri riypata ina changpa bie khana i ripa ta a cuo.

⁵⁰Ama ta ri riypata ina changpa bie ca chuozaa hringna tana a cuo tapa kha i pachang. Cacuonakawta i ripa bie hing Paa ta ina changpa haata i ripa tana a cuo,” a ta yi.