Read Lautu Chin Johan 14 Bible Online

Johan 14 - Lautu Chin bible

Johan 14

¹Pathiypalung rie thyi pata aw kha ung. Khazing kha zang ungla kama zaw na zang tie ung.

²I Paa ing lie awna riypa a khuo a hluvsa a aw. Cahaa cata a cuo li kieca niema awna riypa hmang pare daw riypatana i si e ica ta'a yi ma?

³Si'a ang te nama awna riypa hmang i pare khu taata za kaa pakhaa'a ang te kama awna lie nama aw ra riypata niema kha kama'a luo ica la'a yi.

⁴I sina hmang luo a chiypa luopuv ca nama pachang, a ta yi.

⁵Thomas ta, “Abyipa, khaapa luo ma na si tapa kha pachang va puv. Tuokhaatama luopuv ca ma pachang the aa?” a ta.

⁶Zingsuv ta, “Kama ca luopuv, hne biehmisipa, hne hringna ta i cuo. Kama'a taata ta li pata ahunghmuo i Paa luo chiy the'a vayi.

⁷Kama kha ina pachang cakie ung ca i Paa zaw nama pachang aa. Ata taahingta ca ama kha pachang ung cate nama hmung mangtli” a ta yi.

⁸Filip ta, “Abyipa, na Paa ca malie pahmung la ma palung a tlingsa aa,” a ta.

⁹Zingsuv ta, “Niema'a lie cuo syipuv i aw tli, ata tepa ta na pachang va cama, Filip? Kama naa hmungpa ca i Paa kha a hmung mangtli. Tuokhaatama na Paa kha malie pahmung la na ta?

¹⁰Filip, kama ca i Paa chunglie aw ang te i Paa ca kama chunglie a awpa hing pachang va cama? Ica changpa yi bie hing kama palungchiy ta i ripa cuo vyi; i chunglie a awpa i Paa rehriena tana a cuo.

¹¹Kama ca i Paa chunglie aw ang te i Paa ca kama chunglie a awpa kha zang tie ung. I bie nama zang li kie zaw ma i tuepa hmang thue hingta na zang tie ung.

¹²Biehmisi tana ica chang yi: Kama naa zangpa ca i tuepa hmang hing tue khu ra'a yite hingpa laa hingta a le viepa hmang hmuo ama tue aa, tahematapakieca i Paa'a luo kha i si nakawta a cuo.

¹³Paa ta Saacapaa thueta rungnaana a hmung riypata i ming ta nama hiepa bangkhuo kha i tue aa.

¹⁴Khaapahmuo i ming ta ina hie ung cakieca i tue aa,” a ta.

¹⁵Ina due kie ung caca i phungbie kha nama ziy aa.

¹⁶Paa kha hie'a ang te niema'a lie chuozaa ta caa aw khyi riypa yi daakhyituv[29] hrangpa kha aca pi'a yi.

¹⁷Ama ca Khazing biehmisipa a luona Thlaapa ta a cuo; Ama ca chuelyi ta a hmung li nakaw hne a pachang li nakawta cuhluo khu vyi. Capa Thlaapa ca niema'a lie a aw nakawta pachang ung cate nama chunglie kha a hring aa.

¹⁸Niema dyise ta haaraata haata ca thuse'a vayi ang, niema'a luo i vya kaa pakhaa aa.

¹⁹Acawta a awpa ta chuelyi taca na hmung'a va tli, cuorasala niema ca ina hmung'a ungciy; kama i hring nakawta niema zaw nama hring ra aa.

²⁰Capa ning thue cata kama ca i Paa chunglie i awpa kha cuose, kama chunglie niema nama awpa hne niema chunglie kama i awpa kha nama pachang aa.

²¹I phungbie kha cuhluo te a ziypa ca kama naa duepa ta ama cuo. Kama naa duepa ca i Paa ta a due ra'a yi. Kama zaw ta due ra'a yi ang te iema'a lie kha i phu aa,” a ta.

²²Judas Iskariot a cuo lipa Judas ta, “Abyipa, tuokhaatama chuelyi ming cunglie a phu li pata kiema'a lie dyise naa phupa ca a cuo?” a ta.

²³Zingsuv ta, “Kama naa duepa ca i bie kha a ziy aa. I Paa ta iema kha due'a yite iema'a luo kha a vaw'a pate iema hne khy ma sa hne aa.

²⁴Kama naa due lipa ca i bie kha ziy'a vyi. Nama thyipa bie hing kama bie ta cuo vyi, kama naa pathlietuv Paa bie tana a cuo.

²⁵Niema'a lie i aw ningta hingpa bangkhuo hing ica chang yi.

²⁶Cuorasala i Paa ta kama ming ta a za pathliepa Byatuv Thlaapa Pathe ta hmangting kha ca pacuv'a yite ica changpa bangkhuo kha aca pathyi sa pakhaa'a yi.

²⁷Diena na ica chipa siy yi; kama diena na ica pi yi. Chuelyi ming aca pipa haayita ca pi vayi ang. Nama palung rie thyi kha se, nama thlaa zaw zang kha se.

²⁸Ica sise'a yi, cuorasala ivya kaa pakhaa aa ica tapa yi kha nama thyi. Kama kha ina due kie ung caca i Paa luo i sipa kha namaa law aa, tahematapakieca i Paa ca kama laata a le vie.

²⁹A vya cuo hmisi thueta nama zang thena riypata a vya cuo hluo ta ica chang pacie yi.

³⁰Niema hneta bie a syi ri the'a va tli ang, tahematapakieca hing chuelyi a uvtuv na a vaw nguoluo tli. Ama ca i cunglie nawhnyina khaahmuo hnyi vyi,

³¹cuorasala chuelyi ming ta Paa i duepa kha ama pachang na riypata Paa ina changpa haakhata i tue. Thu tie ung, cakuo'a ungpuv,” a ta yi.