Read Lautu Chin Johan 15 Bible Online

Johan 15 - Lautu Chin bible

Johan 15

¹Kama ca mingsuv zuung hmisi ta cuo ang te i paa ca mingsuv diedung hnyituv ta a cuo.

²A pathyi lipa i ce bangkhuo kha pasepathla diy te a thyi a pathyipa ce bangkhuo kha a pathyi hryly riypata a pathe.

³Niema ca kama ica changpa yi bie khata aca pathe sa diy tli yi.

⁴Kama hne a pazue ungla kama zaw niema kha icaa pazue ra'a yi. Mingsuv ce ca a zuungpuvnung lie aa pazue li kieca amata tah a pathyi khu lipa haata niema zaw kama chunglie nama aw li kieca niemata tah thyi pathyi khu'a va ungciy.

⁵Kama ca mingsuv zuung cuo ang te niema ca ace tana nama cuo. Ahunghmuo cuose kama chunglie aw te kama zaw ama chunglie i aw kieca thyi a hluvsa a pathyi aa, tahematapakieca kama li pata ca nama tue khupa khaahmuo aw vyi.

⁶Kama chunglie a aw lipa ca mingsuv ce caapa haakhata ale luo thaw pata nama cuo aa. Cahaapa a ce zaw ca pahmya yite myi luo kha thaw yite a kuo diy.

⁷Kama chunglie aw ung cate i bie kha nama chunglie a aw kieca nama khingpa bangkhuo kha naa hie ungla tuepa pata nama cuo aa.

⁸Thyi a hluvsa nama pathyina thue hingta i Paa rungnaana kha paluo sa ung cate kama naa ziytuv nama vya cuonapa a cuo.

⁹Paa ta ina due pahaata kama ta ica due ra yi; i duena chunglie hing aw tie ung.

¹⁰I Paa phungbie kha ziy ang te a duena chunglie i awpa haahingta i phungbie nama ziy pata a cuo kieca i duena chunglie hing nama aw aa.

¹¹I palungtluona kha nama chunglie aw te namaa lawna ca a tling riypata hingpa bie hing ica chang yi.

¹²I phungbie ca hingpa hing tana a cuo. Kama ta niema ica duepa yi haahingta pakha hne pakha kha a due ra tie ung.

¹³Ahungtahmuo viesaa cuota a hringna pipa duena laa hingta a le viepa duena hnyi vyi.

¹⁴Ica changpa yi hing nama tue kieca i viesaa ta nama cuo.

¹⁵Niema ca changtaapa[30] ca ta va tli yi ang, tahematapakieca changtaapa taca a byipaapa ta khaama a tue tapa kha pachang vyi. Cuorasala kama ta ca viesaa ica ta yi, tahematapakieca i Paa'a taata i thyipa bangkhuo kha ica pachang sa diy yi.

¹⁶Niema ta naa tlaw va ungciy, cuorasala kama na caa tlaw yi ang. Kama ming ta ama'a luo nama hiepa bangkhuo kha Paa ta aca pi riy'apayita a hmangpa thyi kha va pathyi tie ung tapata ica chang yi.

¹⁷Cacuonakaw ta naw ica pipa yi ca hingpa hing ta a cuo: pakha hne pakha a due tie ung.

¹⁸Chuelyi ta aca hue kie yi ca, niema aca hue hluo yi ta kama na ina hue taa yi tapa kha pachang tie ung.

¹⁹Chuelyi huopa ta cuo ungla ca chuelyi hingta a huopa haata aca duesa'a yi. Cuorasala kama ta chuelyi taahingta caa tlaw yi ang te a huopa nama cuo li tli nakawta chuelyi ta aca hue yi.

²⁰“Changtaapa tie ca ama byipaapa laata le vie buo vayi,” ica tapa yi i bie kha a thyi tie ung. Kama kha ina hrisaathierue kie yi ca niema zaw aca hrisaathierue ra'a yi; kama bie kha ama ziy kieca niema bie zaw kha ama ziy ra aa.

²¹Cuorasala kama cawsaa nama cuo nakawta hingpa hmang bangkhuo hing nama cunglie ta ama tue aa, tahematapakieca kama naa pathlietuv kha pachang vayi.

²²Iema'a luo a zuv li pata hne bie chang li pata aw ang sala ama cunglie suena aw'a vyi, cuorasala ata hing ca sue a ngiethe khupa cuo'a vayi.

²³Kama naa huepa ca i Paa zaw kha ama hue ra.

²⁴Ahungtahmuo ama tue buo lipa i tuepa hing iema'a lie tue li pata za aw ang sala ama suena aw'a vyi. Cuorasala ata hing ca i tuepa kha hmung yite kama hne i Paa hneta malie ama hue.

²⁵“Khaapa bie hmuo aw li patana ina hue yi,” tapata ama phungbie chunglie a capepa bie a tlingna riypatana a cuo.

²⁶I Paa'a taata niema'a luo i za pathlie riypa Byatuv, Thlaapa Pathe a vaw'a te kama kaw kha tehte a khuo aa.

²⁷Niema zaw a hruothu taata kama'a lie a awpa nama cuo nakawta kama kaw kha tehte nama khuo ra aa.