Read Lautu Chin Johan 16 Bible Online

Johan 16 - Lautu Chin bible

Johan 16

¹“Namaa lie pathlyi li riypata hing bie hing ica chang yi.

²Apungna-ing taata aca papya'a yi. Niema caa thiepa tie ta ama tuepa hing Khazing re na i hrie tapata ama ruena cuo a vya pha aa.

³I Paa cuose kama cuose malie ama pachang li nakawta hinghaahingta nama cunglie ama tue aa.

⁴Capa cuo ca a vya pha thueta niema ta khapa kaw kha malie a za chang pacie tli tapata namaa thyi pakhaa riypata hing bie hing ica chang yi. Niema'a lie i za aw thluo nakaw khata hing bie hing a hruothu taata ca za chang vayi ang.

⁵Cuorasala ata hing ca naa pathlietuvpa'a luo kha i si'a tli; cuorasala ahungtahmuo, “Khaapa luo ma na si aa?” tapata na hiehriy va ungciy.

⁶Cuorasala ica chang tiy yi ta nama ngie a chi hringhruo.

⁷Cuohmuocuosala biehmisi tana ica chang yi: i sipa hing niema cuota a pha vie, i si li kieca daakhyituv[31] hing niema'a luo a vaw the'a vyi; cuorasala i si kieca, kama ta niema'a luo kha i za pathlie aa.

⁸Ama kha aa vaw tiyta, chuelyi ming'a lie kha suena kaw lie, adangna kaw lie hne bieripana kaw lieta ama ruena zya ama paa nakaw kha a siesa pata aa pachang sa'a yi.

⁹Suena kaw lie ama paa, tahematapakieca kama ina zang li nakaw yi ta a cuo.

¹⁰Adangna kaw lie ama paa, tahematapakieca Paa'a luo si'a ang te ina hmung li tli'a nakaw yi ta a cuo.

¹¹Bieripana kaw lie ama paa, tahematapakieca chuelyi uvtuv byi hing bie ripa tlipa ta a cuo nakawta a cuo.

¹²“Niema ica chang riypa yi a hluvsa i hnyi kalie, cuorasala ata hing taca a cake khu the'a va ungciy.

¹³Biehmisipa Thlaapa Pathe aa vaw thueta niema kha biehmisipa luo a caa chiy'a yi; ama ri ta khaahmuo ri'a vyi, cuorasala a thyipa bangkhuo kha ri'a te a vaw riypa hmang kaw zaw kha a pathyi sa aa.

¹⁴Kama i ripa bie kha la'a te aca pathyi sa'a nakaw yi ta kama kha rungnaana ina pi aa.

¹⁵Paa hnyipa bangkhuo ca kama huopa tana ama cuo diy. Canakaw catana kama i ripa bie kha la'a te na niema kha aca pathyi sa'a yi, i tapata a cuo.

¹⁶Zingsuv ta “Kha cuo a ta hluo ta kama kha na hmung'a va tli ungciy, cuo pachangta khu taata ina hmung pakhaa'a ungciy,” a ta.

¹⁷Cakhutaata ama a ziytuv tie chekha ta pakha hne pakha kha, “Kha cuo a ta hluo ta kama kha na hmung'a va tli ungciy, cuo pachangta khu taata ina hmung pakhaa ungciy, tahematapakieca Paa'a luo na i si aa,” a tapa hing khaapama a ri khingpa a cuo aa amaa ta.

¹⁸“Acawta a awpa ta,” a tapa hing khaama a ri khingpa a cuo aa? Khaapa kaw ma a ri tapa kha pachang va puv,’ amaa ta.

¹⁹Ama hiehriy khingsa pakha Zingsuv ta pachang te, “Acawta a awpa ta kama kha na hmung'a va tli ungciy, a cawta a aw khu taata ina hmung pakhaa ungciy,” i ta tiyta khaapama i ri khing tapa khana namaa rue cuo vama?

²⁰Biehmisi tana ica chang yi: niema ca caa'a ung cate namaa ngiy aa, cuorasala chuelyi ca aa law aa; niema ca nama ngie chi'a te, cuorasala nama ngiechina ca palungtluona ta aa li aa.

²¹Canung ca nu a hnyi tyalya tiyta pasana a ang, cuorasala nu a za aw tiyta ca chuelyi luo nuta thaapa pakha a za puv nakawta a law te a te-angna bangkhuo ca a maw pakhaa diy.

²²Cacuonakawta ata hing ca nama ngie a chi, cuorasala ca hmung pakhaa'a yi ang te nama palung a tluo hringhruo aa, capa nama palungtluona ca ahungtahmuo ca chuv khu'a vayi.

²³Capa ning thueta ca kama kha khaahmuo na hiehriy'a va ungciy. Biehmisi tana ica chang yi: Kama ming ta nama hiepa bangkhuo ca Paa ta aca pi'a yi.

²⁴Ata tepa hingta ca i ming ta khaapahmuo hie va ungciy. Hie ungla nama hmung aa; cahaa cata nama palungtluona kha aa ky aa.

²⁵“Hingpa bangkhuo hing pahmung-sana bie hmuo ang te ica chang yi. Cuorasala i Paa kaw kha pahmungsana bie hmuo li pata siepaalaa khata ica changna cuo yi a vaw aa.

²⁶Capa ning a vya pha tiyta niema ta i ming ta nama hie aa. Niema cuopa tana kama ta Paa'a luo kha ica hiepa'a yi ica tapa yi ta cuo vyi.

²⁷Kama kha na due ung cate Khazing'a taata[32] i vawpa kha nama zang nakawta Paa hrahring ta niema kha aca due yi.

²⁸Kama ca Paa'a taata chuelyi luo hing i vaw; chuelyi taahingta i Paa'a luo i kaa pakhaa aa,” a ta.

²⁹A ziytuv tie ta, “A cuo, ata hingca pahmungsana hmuo li pata a siesa pata malie na chang.

³⁰Nama ca hmangting bangkhuo a pachangpa na cuopa kha pachang pate, ahungtahmuo khaapahmuo hiehriy a hu va tli ciy; capa cata Khazing'a taata a vawpa na cuopa kha malie a pazang sa,” ama ta.

³¹Zingsuv ta, “Ata ca i na zang ung cama?

³²Nama palang ta ca chepatlaa diy'a yite nama ing cyicuo ta a diy'a ung cate kama dyi ta ina thusena ung cuo kha a vaw nguoluo te ata hing a vya chiy tli. Cuorasala i Paa kha kama'a lie a aw nakawta kama dyi hmisi taca cuo va ang.

³³Kama chunglie diena nama hmung the riypata hingpa bie hing ica chang yi. Chuelyi lie hing ca hrisaathieruena nama ang aa. Cuorasala nama riepha se; Chuelyi ca i te tli,” a ta.