Read Lautu Chin Johan 18 Bible Online

Johan 18 - Lautu Chin bible

Johan 18

¹Hinghaahingta thlaa a chuo khu taata Zingsuv ca a ziytuv tie hneta Kidron cavaata huesuo ruo luo kha vaa yite capa lie a awpa diedung chung luo kha a ziytuv tie hneta amaa ngie.

²Capa hmang lieca Zingsuv hne ziytuv tie kha amaa taw lawmaw nakawta ama a lyituv Judas ca khapa hmang kha a pachang.

³Cacuonakawta Judas ca tluobyilepa tie hne Farasi tie ta ama pathliepa rieka phuv cawta hne paliy tie hne khata cehre hne myi-ing hne myisaa kha a vya cyi yite amaa vaw.

⁴Zingsuv ca a cunglie a tlung riypa kha a pachang nakawta hmie luo kha pya te, “Ahungma nama huv,” tapata a hiehriy yi.

⁵Iema ta, “Nazareth khypa Zingsuv,” ama ta. Zingsuv ta, “Kama hingna a cuo ang,” tapata a palie yi. Ama a lyituv Judas ca iema hne khata amaa daa pakhaw.

⁶Zingsuv ta, “Kama hingna a cuo ang,” a ta pahne yi ta ama hnang luo a saw yite alyi lie kha amaa yapatyi diy.

⁷“Ahungma nama huv?” a ta pakhaa yi. “Nazareth khypa Zingsuv,’ ama ta.

⁸Zingsuv ta, “Kama hingna ama ta a cuo ang, ica ta yi. Cacuonakawta kama ina huv ung cakieca cawsaa hrangpa tie hing ca cakuo yi se,” a ta yi.

⁹“Ina pipa tie yi cahing pakha hmuo pavie vayi ang,” a tapa a bie kha a tlingna riypata hinghaahingta a ripa a cuo.

¹⁰Simon Piter ta a zueziy kha a phie te tluobyilecepa sii a cacuo luo naacakue kha a sa pathla. Capa sii a ming ca Malkhas ta a cuo.

¹¹Zingsuv ta Piter kha, “Na zueziy kha a bya chung luo pasuo tie. Paa ta ina pipa panuo hing dang li pata ma i aw aa?” a ta.

¹²Cacuonakawta rieka tie, abyi tie hne Judah paliy tie ta Zingsuv ca patuv yite Annas'a luo kha ama vaakhyi taa.

¹³Annas ca capa kung ningta tluobyilecepa a hriepa Kaiafas a napuvnung a paa ta a cuo.

¹⁴Kaiafas ca cawsaazaapuv cuota cawsaa pakha thiypa a pha vie tapata Judah ming ruena a pituvpa khata a cuo.

¹⁵Simon Piter hne a hrangpa ziytuv pakha ta Zingsuv kha ama ziy. Capa ziytuv hrangpapaa ca tluobyilecepa hne khata amaa pachang nakawta Zingsuv hne khata tluobyilecepa ahmie luo ca aa ngie ra.

¹⁶Cuorasala Piter ca thlake a thaa lie, ale lie kha a daa. Cacuonakawta tluobyilecepa hne a pachangpa ziytuv hrangpa cata pya te thlake a huo nung kha chang te a chung luo a pangie.

¹⁷Canung nung cata, “Nama zaw hing khiypapaa a ziytuv pakha ta cuo va ca maw?” a ta. Ama ta, “Cuo va ang,” a ta.

¹⁸A kangsa nakawta sii tie hne paliy tie ca myihyi ta myi kha patiy yite amaa daa luota amaa e. Piter zaw a daa luota a e ra.

¹⁹Cakhutaata tluobyilecepa ta Zingsuv ca a ziytuv tie kaw hne a pacuvna kaw kha a hiehriy.

²⁰Zingsuv ta, “Kama ca a luohuo ta muo cawsaazaapuv kha bie i chang yi ta; Judah ming bangkhuo ta amaa vaw napa apungna-ing lie hne biena-ing lie muo i pacuv pari yi ta. A paruv ta suokha hmuo pacuv buo vade ang.

²¹Khaapanakawma kama ca ina hiehriy ungciy? Khaapama i chang yi tapa a thyipa tie kha hiehriy tienie ung; i ripa kha iema ta ama pachang muo,” a ta yi

²²Cahaa cata a ri pahne ta a thaalie a daapa paliy pakha ta Zingsuv kha a hmie lie cabe te, “Tluobyilecepa ma cahaa cata na palie?” a ta.

²³Zingsuv ta, “I ripa a hmuo li kieca a hmuo lina kaw kha pasie sa tie. Cuorasala aa hmuopa kha i ri kieca khaapanakawma ina cabe ciy?” a ta.

²⁴Cahaa cata, ama cakhiy yalya cata, Annas ta tluobyilecepa Kaiafas'a luo kha a paphya.

²⁵Piter ca myi a e nguoluo ning kha, “Nama zaw hing ama a ziytuv pakha cuo va cama? ama ta. Ama ta, “Cuo va ang,” tapata a i yi.

²⁶Piter ta a naacakue a sa pathlapa a tieriy ta a cuopa, tluobyilecepa a sii pakha ta, “Nama hing diedung lie kha Zingsuv hne ica hmung cuo vama?” a ta.

²⁷Piter ta a i pakhaa hyi. Capa tahne cata aa a khang.

²⁸Cakhutaata a mawluopa mawdiy ta Zingsuv kha Kaiafas'a taata Pilat ing luo kha ama vaa khyi. Iema ca muokiy byi ing chung luo kha a ngie vayi, tahematapakieca ama phung haata a pathesa pata Lawsena Pyi sa kha ama ning khing nakawta a cuo.

²⁹Cacuonakawta Pilat kha pya te, “Hingpapaa hing khaapa suena ma a hnyi?” a ta yi.

³⁰Iema ta, “Hingpapaa hing a suepa a cuo li kieca na kuv luo maca pi'a ma?” ama ta.

³¹Pilat ta, “Vaakhyi ungla nama phungbie haata a bie ca va ripa tie ung,” a ta yi. Judah ming ta, “Kiema ca ahunghmuo thie khuna naw hnyi va puv,” ama ta. (

³²Zingsuv ta tuokhaapa thiyna tama i thiy aa tapa a ri paciepa bie a tlingna riypata hinghaahingta a cuopa a cuo.)

³³Cakhutaata Pilat ca ing chung luo kha a ngie pakhaa te, Zingsuv kha ku te, “Judah ming siepahruo ta na cuo ma?” tapata a hiehriy.

³⁴Zingsuv ta, “Hing bie hing namata tama ina hiehriy ciy, a cuo li kie malie ta i kaw hing aca chang nakaw yi tama a cuo?” a ta.

³⁵Pilat ta, “Kama hing Judah ming ta i cuo ma? Na mingphang tie hne tluobyi lepa tie ta i kuv luo aca vya chipa yi hing. Na tuepa hmang ca khaapama a cuo?” a ta.

³⁶Zingsuv ta, “I penapa ca hing chuelyi lie hingta cuo vyi. I pena ca hing chuelyi lie hingta cuo sala ca Judah ming kuv luo i chiy li riypata naa ziytuv tie hingta a maa du aa. Cuorasala i pena ca hing chuelyi lie hing cuo vyi,” a ta.

³⁷Pilat ta, “Cacuokie siepahruo ta na cuo hmisi ma?” a ta. Zingsuv ta, “Nama ta siepahruo na cuo ina ta ciy. Biehmisipa a daakhyi riypa hingna chuelyi luo i za puv hnuochuopa hingta a cuo. Biehmisipa chunglie a awpa bangkhuo taca i ueryi kha naa ama thlie,” a ta.

³⁸Pilat ta, “Biehmisipa ca khaapa kha ma a cuo?” a ta. Pilat ca Judah ming'a luo kha pya pakhaa te, “Hingpapaa hing a suenapa hmung va ang.

³⁹Cuorasala nama phung a awpa haata Lawsena Pyi cuo lie cawsaa pakha ica pathliepa taw yi. Judah siepahruo hing ca pathliepa yi ang sala nama khing ma?” a ta yi.

⁴⁰Khuopuv ta khi yite, “Ama paa hing cuo li pata Barabbas malie pathliepa tie,” ama ta. Barabbas ca damie tana a cuo.