Read Lautu Chin Johan 19 Bible Online

Johan 19 - Lautu Chin bible

Johan 19

¹Cakhutaata Pilat ca Zingsuv kha la te a patuv sa yi.

²Rieka tie ta ahling lakhuv kha pakhuv yite, pangsepa kha ama pabuv.

³Vaahnue yite, “Judah siepahruo hing a hringkhue pasiy se,” ta yite a hmie lie kha ama cabe.

⁴Pilat ca pya pakhaa te, “Mang tie ung, ama ca a suena suokha hmuo hmung va ang tapa kha ica pachang sa khing nakaw yi ta i kya pyakhyi hing,” a ta.

⁵Zingsuv ca ahling lakhuv a khuv te a pangsepa hne cata a kya pya. Pilat ta, “Mang tie ung, cawsaapapaa hing!” a ta yi.

⁶Tluobyilepa tie hne paliy tie cata ama ama hmung pahne ta, “Vieluo cunglie thie tie! Vieluo cunglie thie tie!” tapata ama khi. Pilat ta, “A chiy ungla vieluo cunglie ca va thie tie ung; Kama ca a suena hmung va ang,” a ta yi.

⁷Judah ming ta, “Ama ca Khazing Saacapaa na i cuo a ta nakawta ima hnyipa phungbie haata thiy aa phuvpa tana a cuo,” ama ta.

⁸Capa bie ca a thyi pahne ta Pilat ca a ciy vie hryly.

⁹A ing chung luo kha a ngie pakhaa te Zingsuv kha, “Khaapa taata ma na cuo?” tapata a hiehriy. Cuorasala Zingsuv ta kaakha hmuo palie vyi.

¹⁰Cacuonakaw Pilat ta, “Na chaw khing va cama? Nama pathlie khuna, a cuo li kie vieluo cunglie thie khuna naw i hnyipa hing pachang va cama? a ta.

¹¹Zingsuv ta, “Cungluo taata pi li pata ca i cunglie khaahmuo naw hnyi khu vaciy; cacuonakawta na kuv cungluo naa vya pachiy satuv hingna a sue vie a ta.

¹²Capa khutaa ca Pilat ca Zingsuv pathlie khuna riypa luo kha a huv. Cuorasala Judah ming ca khi yite, “Hingpapaa hing na pathlie kieca Sizar viesaa ta cuo'a vaciy. Ahunghmuo cuose siepahruo na i cuo a tapa ca Rom siepahruo cariepa tana a cuo,” ama ta.

¹³Pilat ta hingpa bie a thyi tiyta, Zingsuv kha ale luo kya pyakhyi te Hebru ryi ta Gabbatha ama tapa, bierinapa thude, Lungphie Phaa lie kha a kya tu.

¹⁴Capa cuo ca Lawsena Pyi cuo ta a ting ning, ningchung hraw ta a cuo. Judah ming kyihuo khata, “Nama siepahruo hing mang tie ung!” a ta yi.

¹⁵Khi yite, “Thie tie! Thie tie! Vieluo cunglie khepuo tie,” ama ta. Pilat ta, “Nama siepahruo hingma vieluo cunglie i thie aa?” a ta yi. Tluobyilepa tie ta, “Sizar ri li pata siepahruo hnyi va puv,” ama ta.

¹⁶Cakhutaata Pilat ta Zingsuv kha vieluo cunglie thie riypata iema kuv luo a pi yi. Cacuonakawta Zingsuv ca ama sikhyi.

¹⁷A vieluo kha amata tah a puv te Hebru ryi ta Galgotha ama tapa, Luvruv Hmang tapa luo kha a pha.

¹⁸Capa lieca vieluo cunglie ama khepuo, a hrangpa pahning zaw kha khepuo ra yite Zingsuv ca amaa lala lieta a aw.

¹⁹Pilat ta caa suokha cape te vieluo cunglie ca a taa. A capepa ca, “Nazareth khypa Zingsuv, Judah Siepahruo,” tapata a cuo.

²⁰Zingsuv vieluo lie ama taana hmang ca khypuv hne a hla li nakaw hne a caa ca Hebru ryi, Latin ryi, hne Grik ryi ta ama cape nakawta Judah ming hluvpuv ta ama ri.

²¹Cacuonakawta Judah ming tluobyilepa tie ta Pilat kha, “Judah ming siepahruo,’ tapata cape kha, cuorasala ‘Hingpapaa hingna Judah ming siepahruo tana i cuo a ta,’ tapata cape tie,” ama ta.

²²Pilat ta, “I cape tlipa ca i cape tlipa na a cuo,” a ta.

²³Rieka tie ta Zingsuv kha vieluo cunglie ama thie tiyta a caw kha la yite che paliy ta che yite chekha cie ta amaa la. A buohryi zaw kha la yite a caw aw li pata a luv taata a lie te ama taapa ta a cuo.

²⁴Cacuonakawta, pakha hne pakha kha, “Hingpa hing ca thlaa li pata vyisung ta a da ungsiy,” amaa ta. Caapathepa ta, “Iema ca i caw kha a che yite, I buohryi kha vyisung amaa da,” a tapa a tlingna riypata a cuo.

²⁵Cahaa dala cata rieka ta ama tue. Capa ning cata Zingsuv vieluo a thaa lie a daapa ca a nung, Glopas napuvnung a nung nuta Mary hne Mary Magdalin zaw khata ama cuo.

²⁶Zingsuv ta a nung hne a thaa lie a daapa a duepa a ziytuv kha a hmung tiy yi ta, a nung kha, “Canung, Ama kha na saacapaa ta a cuo kha,” a ta.

²⁷A ziytuvpa zaw kha, “Ama kha na nung ta a cuo kha,” a ta. Capa cuo taacata a ziytuvpa ta Zingsuv nung kha a ing lie a pa-aw sa.

²⁸Capa khutaa cata Zingsuv ta zezaw bangkhuo a tlung tli tapa kha pachang te Caapathepa bie a tlingna riypata, “I tiy na a hrie,” a ta.

²⁹Capa lieca mingsuv tiy thuepa bi suokha aw te mingsuv tiy thuepa chung luo kha pangcaw naw yite hissop aarasung daw lie kha ciypuo yite Zingsuv ca a pakaa luo ama kya tuv.

³⁰Zingsuv ca mingsuv tiy thuepa kha vya saw te, “Aa lang tli,” a ta. A luv kha pangie te a huv a ci.

³¹Capa ning ca Atingdawning a cuo nakawta ama thiepa tie riy Sabbath ning ta vieluo cunglie a pathliepa kha Judah ming ta khing vayi. Tahematapakieca capa Sabbath ning ca aa pathecepa ning ta a cuo. Cacuonakawta Pilat'a luo kha a ngie yite vieluo cunglie ama thiepa tie ngieluo kha thli pata ama riy la riypata ama hie.

³²Rieka tie kha vaa yite Zingsuv hne ama thiehnepa pahning tie ngieluo kha ama thli.

³³Cuorasala Zingsuv'a luo ama chiy ca a thiy tlipa kha hmung yite a ngieluo thli vayi.

³⁴Cadyiseca rieka pakha ta a vuo kha asyi ta kya daw te sungkha ta thiy hne tiy kha a kya pya.

³⁵(A ming ta a hmungpapaa hrahring ta tehte a khuopa cuote niema nama zang the na riypata a cuo. A tehte khuopa ca aa hmuopa cuote ama ta biedangpa a ripa kha a pachang.)

³⁶Hing hmang hing Caapathepa lieta, “A ruv suokha hmuo thli'a vayi,” a tapa a tlingna riypata a cuopa a cuo.

³⁷Caapathepa a hrang lie zaw, “Iema ta ama dawpa kha ama mang aa,” a ta.

³⁸Cakhutaacata Judah ming a ciy nakaw yi ta a paruv ta Zingsuv hnang ziytuv a cuopa Arimathea khy ming Josef ta Zingsuv riy la riypata Pilat kha a hie. Pilat ta, ‘na la khu,’ a ta nakawta a riy kha a la.

³⁹Zingsuv a taw riypata zuo ta a vaa buopapaa Nikodemu zaw kha Josef'a luo vaa te mura hne aloes pyapa ziyhmyi paw zakha tluv a riypa kha aa cyi.

⁴⁰A riy kha la yite Judah ming riy a pabyna phung haata ziyhmyi bya yite pawruo ta ama cataw.

⁴¹Zingsuv ama thiena hmang lie kha diedung suokha aw te capa diedung chunglie ca ahunghmuo ama paby buo linapa thluo thaapa suokha a aw.

⁴²Judah ming Atingdawning a cuo nakaw hne a ngie lie thluo a aw nakawta capa lieca Zingsuv kha ama paby.