Read Lautu Chin Johan 2 Bible Online

Johan 2 - Lautu Chin bible

Johan 2

¹Ningthungna lie kha Galilee pe Kaanaa khy lie kha a chiyhiena pyi aw te Zingsuv nung kha capa lieca a aw.

²Zingsuv hne ziytuv tie zaw kha a chiyhiena pyi luo ca ama ku ra.

³Ama mingsuv tiy a chuo tiyta a nung ta Zingsuv kha, “Mingsuv tiy hnyi va tli yi,” a ta.

⁴Zingsuv ta, “Canung nung, nama hne kama khaapama maa se, i cuo pha valie,” a ta.

⁵Zingsuv nung ta changtaapa tie kha, “Ama ta aca changpa bangkhuo kha tue mya ung,” a ta yi.

⁶Judah ming ta ama phung haata a pathena riypata capa lieca ruocuo suocaruv chi yite; ruocuo suokha ta tiy gaalaan suokiy taata sawthung te a tlaw.

⁷Zingsuv ta changtaapa tie kha, “Hingpa ruocuo hing tiy pabi diy tie ung,” a ta yi. A lepalana te ta pabi yite,

⁸iema kha, “Tiy kha siy ungla saduona pyi mangchiykingkaatuv kha va pi tie ung,” ta yite, ama va pi.

⁹Mingsuv tiy ta a lipa tiy ca mangchiykingkaatuv cata a pacuo te, hingpa mingsuv tiy hing khaapa taata ma a vaw tapa kha a pachang li nakawta (Tiy a thepa changtaapa tie kha taca ama pachang thluo), napuv a chiytuvpapaa ca ku te,

¹⁰“Malie ca mingsuv tiy pahuocepa kha thu taa yite muo aa de pata ama dang khu taata mingsuv tiy cakhawpa kha ama pi ta. Cuorasala nama ca a pahuocepa kha ata te pata na thu kalie,” a ta.

¹¹Zingsuv ta hingpa kharuehaa hmang suokhana hing Galilee pe Kaanaa khy lieta a tue; capalie ca a rungnaana kha paluo sa te, a ziytuv tie ta ama kha ama zang.

¹²Cakhutaata Zingsuv hne a nung, a nuta zaw, hne ziytuv tie ca Kapernaum khy luo kha zuv yite ning cawta chung ama va aw.

¹³Lawsena Pyi a ngiesa tli nakawta Zingsuv ca Jerusalem luo kha a vaa.

¹⁴Biena-ing chunglie kha cue hne tuv hne valale a zaapa tie hne tuokaa a thlepa tie zaw ama cabya lie amaa tupa kha a hmung yi.

¹⁵Cacuonakawta khuhriy kha china riypata a camaa te tuv hne cue hne, iema zaw bangkhuo kha Biena-ing taata a cade diy yi, tuokaa thletuv tie cabya zaw kha palipathi diy te ama tuokaa diyta zaw kha a hipatlaa diy.

¹⁶Valale a zaapa tie kha, “Hingpa hmang taahingta nama valale kha pyakhyi diy ung! I paa ing ca chadaw zaana ta hmuo kha tie ung!” tapata naw a pi yi.

¹⁷Ziytuv tie ca Caapathepa ta, “Vya Khazing, na ing i uevuopa hing i chunglie na myi haata a ling,” a tapa kha ama nang a kya vuo.

¹⁸Cakhutaata Judah ming ta, “Hingpa hmang na tuena kawlie hingta khaapa pamangsana ma malie na pahmung sa aa?” ama ta.

¹⁹Zingsuv ta, “Hingpa Biena-ing hing para ungla ning thung chunglie i sa pakhaa aa,” a ta.

²⁰Judah ming ta, “Ning thung chung tama na sa pakhaa aa? Hingpa Biena-ing sana lie hing kung sawliy kung caruv tli hing ama za ru!” ama ta.

²¹Cuorasala Zingsuv ta biena-ing a tapa ca ama pangpa khatana a cuo.

²²Cacuonakaw thiyna taata pathu pakhaapa a cuo khu taata, ziytuv tie ca ama hing muo a ripa khata a cuo ta tapa kha ama nang vuo te Caapathepa hne Zingsuv ripa kha ama zang.

²³Zingsuv ca Lawsena Pyi chung Jerusalem lie a aw ning kha cawsaa hluvpuv ta kharuehaa hmang a tuepa zaw kha hmung yite ama zang.

²⁴Cuorasala Zingsuv taca zang diy vayi, tahematapakieca cawsaa bangkhuo kha a pachang diy yi.

²⁵Iema kaw kha cawsaa hrangpa ta changpasie a hu vyi, tahematapakieca ama palung chunglie khaapama a aw tapa kha a pachang diy.