Read Lautu Chin Johan 20 Bible Online

Johan 20 - Lautu Chin bible

Johan 20

¹Zaakha chunglie a ningkha-napa ning mawdiy a zing kalie pata Mary Magdalin ca thluo luo kha vaa te thluokhaakhuv aa hnyipa kha a hmung.

²Cacuonakawta Piter hne, Zingsuv ta a duepa ziytuv hrangpa'a luo kha a ruo te, “Abyipa kha thluo chung taata la yite khaaliema ama chi tapa kha pachang va puv,” a ta.

³Piter hne a ziytuv hrangpapaa ca a pachie yite thluo luo kha ama vaa.

⁴Ama pahning ta a ruole yite a ziytuv hrangpa ta Piter kha a law nakawta thluo luo kha a chiy taa.

⁵A bung te a mang ca riy catawnapa pawruo ca a hmung, cuorasala thluo luo kha a ngie vyi.

⁶Simon Piter ca a hnang ta thluo luo ca vya chiy te aa ngie ca, a riy catawnapa pawruo hne

⁷Zingsuv luv ama pahlawnapa pawruo a nanangta tah a za awpa kha a hmung.

⁸Cakhutaata a vya chiy taapa ziytuv hrangpa zaw kha thluo luo ca a ngie te hmung te a zang.

⁹Thiyna taata a thupakhaa aa tapata Caapathepa ta a ripa kha a ri khingnapa pachang khu valie yi.

¹⁰Cakhutaata ziytuv tie ca ing luo kha ama kaa.

¹¹Mary ca thluo le lie kha a daa te a caa. A caapuo pata thluo chung luo kha a bung te a za mang ca

¹²caw ruopa a tuepa avuoming pahning kha Zingsuv riy ama chinapa a luv luo kuo ta pakha, a phyichaa luo kuo ta pakha amaa tupa kha a hmung.

¹³Iema cata, “Canung nung, “Khaapanakawma na caa?” ama ta. Ama ta, “I byipaapa kha la yite khaapaliema ama chi tapa pachang va ang,” a ta.

¹⁴Capa bie a ri diy pahne a hnang luo aa pali ca Zingsuv a daapa kha a hmung, cuorasala Zingsuv a cuopa kha pachang vyi.

¹⁵Zingsuv ta, “Canung nung, khaapanakawma na caa? Ahungma na huv?” a ta. Diedung a huopapaa ta ri te, “Abyipa, nama ta na la pata a cuo kieca na chinapa kha na chang la, vaa'a ang te i va la aa,” a ta.

¹⁶Zingsuv ta, “Mary!” a ta ca a pali hnue te Hebru ryi ta “Rabboni,” a ta. (A siyluo ca saya tana ta a cuo).

¹⁷Zingsuv ta, “Na patuv kha, tahematapakieca Paa luo kha kie valie ang. Cuorasala i uvnu zaw'a luo kha vaa la, “I Paa hne nama Paa, i Khazing hne nama Khazing a cuopa'a luo khana i kie aa,’ a ta tapa kha va chang tie yi,” a ta.

¹⁸Mary Magdalin ca cakuo te, Abyipa a hmungna kaw hne a changpa bie bangkhuo kha ziytuv tie ca a chang yi.

¹⁹Zaakha chunglie a ningkhanapa zuoluo ta ziytuv tie ca Judah ming ama ciy nakawta ingchiy khaa yite amaa pungnapa lie kha Zingsuv ca a vaw te a lie chunglie kha a daa te, “Nama cunglie diena aw mangsue,” a ta yi.

²⁰Cahaa cata a ri khu taata a kuv hne a vuo kha a pahmung yi. Ziytuv tie ca Abyipa kha ama hmung nakawta ama palung a tluosa.

²¹Zingsuv ta iema kha, “Nama cunglie diena aw mangsue. Paa ta ina pathliepa haata kama zaw ta ica pathlie ra yi,” a ta yi.

²²Cahaa cata a ri khu taata, a huv ta hmung yite, “Thlaapa Pathe kha hmung tie ung

²³Cawsaa suena kha namaa ngiethe kieca a ngiethe pata cuo'a yite, namaa ngiethe li kieca a ngiethe li pata ama cuo aa,” a ta yi.

²⁴Ziytuv tie hlyihning hrawlie pakha a cuopa Thomas (Mingphie[33] ama tapa) ca Zingsuv aa luo ning kha aw ra vyi

²⁵Cacuonakawta ziytuv hrang tie ta, “Abyipa na ma hmung,” ta yite ama chang. Cuorasala ama ta, “A kuv lie thaakhe ta ama khepuonapa a hmaa i hmung lipa'a nata i kuvdaw ta capa a hmaa hne a vuo kha i hriepuo hluo li ca zang'a va ang,” a ta yi.

²⁶Zaakha khu taata ziytuv tie ca ing chunglie kha aw pakhaa yite, Thomas zaw a aw ra. Ingchiy kha ama khaa diy raalaa pata, Zingsuv ca zaa ngie te, iema hrawlie kha a daa te, “Nama cunglie diena aw mangsue,” a ta yi.

²⁷Cakhutaata Thomas kyihuo khata, “I kuv hing vya mang la na kuvdaw ta vya hrie tie. Na kuv kha pazuo la i vuo hing hrie tie. Zang li pata aw kha tie, zang tie,” a ta.

²⁸Thomas ta, “I byipaapa hne i Khazing!” a ta.

²⁹Zingsuv ta, “Ina hmung nakaw ca tama ina zang ciy? Kama kha hmung li pata naa zangpa tie ca thluechiypa tana ama cuo,” a ta.

³⁰Hingpa caa-uv chunglie cape lipa Zingsuv ta a tuepa kharuehaa hmang a hluvsa a aw kalie.

³¹Cuorasala hing zaa hing capepa cuote cape hnuochuopa ca, Zingsuv ca Messiah,[34] Khazing Saacapaa a cuopa kha zang ung cate capa zangna thue cata hringna nama hmungna riypatana a cuo.