Read Lautu Chin Johan 4 Bible Online

Johan 4 - Lautu Chin bible

Johan 4

¹Zingsuv ama pangphie cuo li pata ziytuv tie ta tiynawna ama pi raalaa pata, Zingsuv ca Johan laata ziytuv a hluv vie hnyi te tiynawna a pi yi tapata Farasi tie ta ama thyipa kha Zingsuv ta a pachang tiyta,

³Judea ruo taa khata pya te Galilee ruo luo kha a kaa.

⁴Cuorasala Samaria ruo kha a cahraw paa.

⁵Cacuonakawta Jacob ta a saacapaa Josef a pipa luruo hne a ngieta tah a awpa Samaria pe Saikhar khy luo kha a chiy.

⁶Capa lieca Jacob takhue kha aw te Zingsuv ca a nang a buosa nakawta takhue kie lieca aa tu. Capa cuo ca ningchung hraw ta a cuo.

⁷Samaria cawsaanung pakha ca tiy the riypata a vaw te Zingsuv ta, “Tiy dang riypa na siy tie,” a ta.

⁸(A hnang ziytuv tie ca ning riypa calyi riypata khychung luo ama vaa ningta a cuo.)

⁹Samaria zaanung cata, “Judah ming pakha a cuo pata Samaria canung pakha a cuopa kama'a lie dang riypa tiy inaa hiepa cahing khaapanakawma a ta?” a ta (Judah ming ca Samaria ming hneta hmang a hrawpa ta hmuo khing vayi.)[5]

¹⁰Zingsuv ta, “Khazing ta aca pipa lasaw hing khaapama a cuo tapa hne tiy dang riypa caa hiepapaa hing ahungma tapa hing pachang la ca ama pali hing a hie'a cate hringna tiy kha aca pi aa,” a ta.

¹¹Canung nung ta, “Abyipa, tiyphie ta na hnyi va, takhue ta aa thuvsa hyi. Khaapa taata ma capa hringna tiy ca na la aa?

¹²Hingpa takhue malie a pipa mingpa Jacob laata i le vie tapata ma naa rue? Ama hne a saata zaw hne a sahring zaw bangkhuo ta ama dangpa takhue tana a cuo,” a ta.

¹³Zingsuv ta, “Hingpa tiy a dangpa bangkhuo ca ama tiy a hrie pakhaa aa,

¹⁴cuorasala kama ta i pipa tiy a dangpa ca khatiy tahmuo a tiy hrie pakhaa'a va tli. I pi riypa tiy ca a chunglie kha chuozaa hringna a pipa acaatiy ta aa li aa,” a ta.

¹⁵Canung nung ta, “Abyipa, I tiy a hrie li tli riypa hne, hingpa luo zaw hing tiy the riypata i vaw li tli riypata capa tiy ca na pi tie!” a ta.

¹⁶Zingsuv ta, “Cakuo la naa vaapa kha va ku la a vaw pakhaa tie,” a ta.

¹⁷Canung nung ta, “Navaa hnyi va ang,” tapata a palie. Zingsuv ta, “Navaa hnyi va ang na tapa hing a hmuo.

¹⁸Capaa papangaa a hlaw tli yi cate ata lie naa hlawpapaa zaw hing naa vaapa hmisi ta cuo vyi. Na ripa hing aa hmuo,” a ta.

¹⁹Canung nung ta, “Abyipa, profet ta na cuopa ica pachang.

²⁰Kiema mingchingmingvuo tie taca hingpa tluo lie hing Khazing kha amaa zaa bie, cuorasala niema taca Khazing ca Jerusalem liena abie riypa a cuo nama ta,” a ta.

²¹Zingsuv ta, “Canung nung, ica changpa hing zang tie, niema ta Paa ca hingpa tluo lie cuose, Jerusalem lie cuose namaa bie lina riypa cuo ca a vaw nguoluo tli.

²²Niema ca nama pachang lipa khana namaa bie, kiema ca ma pachangpa kha maa bie, tahematapakieca khuona ca Judah ming'a taata a vawpa tana a cuo.

²³Khazing abie hmisipa tie ta Paa ca thlaapa hne biehmisipa ta amaa biena cuo kha a vaw nguoluo te a vya tlung tli. Cahaa cata a biepa cana Paa ta a khingpa a cuo.

²⁴Khazing ca Thlaapa ta cuote abiepa tie ta Thlaapa hne biehmisipa ta amaa bie riypatana a cuo,” a ta.

²⁵Canung nung ta, “Messiah ca a vaw nguoluo tapa kha i pachang. Ama aa vaw thueta hmangting bangkhuo kha a pathyi diy aa,” a ta.

²⁶Zingsuv ta, “Nama hne bie a ri nguoluopa kama hing ama ca tana i cuo,” a ta.

²⁷Capa cuo lieca Zingsuv a ziytuv tie ca vya chiy yite canung nung hne bie amaa rue nguoluopa kha ama hmung tiyta ama nang a uosa. Cuorasala ahungtahmuo, “Khaama naa hu?” ta lipa yi ta, “Khaapanakawma hingpa nung hing bie na rihne?” ta ra vayi.

²⁸Cakhutaata canungnung ca a tiybi kha thusesiy te, khychung luo kha kaa te cawsaa zaw kyihuo khata,

²⁹“I tue buopa hmang bangkhuo naa chang khu diy papaa hing vya mang tie ung. Ama hing Messiah[6] ta cuo'a vama?” a ta yi.

³⁰Cacuonakaw khychung taa cata pya yite Zingsuv'a luo ca ama vaa.

³¹Capa cuo ning ca ziytuv tie ta Zingsuv kha, “Rabbi, sa ning tie,” ama ta.

³²Cuorasala ama ta, “Niema ta a kaw nama pachang lipa ning riypa sa na i hnyi,” a ta yi.

³³Cacuonakawta ziytuv tie ca pakha hne pakha kha, “Pakhakha ta sa a vya pi pata a cuo biephung'a ma?” amaa ta.

³⁴Zingsuv ta iema kha, “I sa ca naa pathlietuv khingna tue hne rehrie ina changpa palang hing tana a cuo,” a ta yi.

³⁵Niema ta, “Ata taata thlapaliy khu pahne sa hrie tiy a ta aa,” nama ta cuo vama? Cuorasala ica chang yi: nama cahriy kha suo ungla; sa ca hming te khatluv tama hrie aa de tapa kha mang tie ung!

³⁶Sa a hriepapaa ca a hrie muo kha pipa cuote chuozaa hringna cuota sa kha a papung nguoluo, cacuonakawta a ciy a cyituv hne sa a hrietuv kha suvkha ta ama palung a tluo pakhaw aa.

³⁷‘Pakha ta ciy cyi te pakha ta sa a hrie,’ tapa bie ca ama lie hingna aa hmuo.

³⁸Nama thlu lipa lu lie sa hrie riypatana ica pathlie yi; malie ta thlu yite niema ta ama thlu cienapa lie kha nama hrie,” a ta yi.

³⁹Canung nung ta, “I za tue buopa bangkhuo tana ina chang diy,” tapata tehte a khuo nakawta Samaria ming a hluvpuv ta ama zang.

⁴⁰Cacuonakawta Samaria ming ca Zingsuv'a luo amaa vaw tiyta, iema'a lie a pahy riypata paakie yite, ning hning a pahy siy.

⁴¹Zingsuv bie ripa kha thyi yite cawsaa a hluv hryly ta ama zang.

⁴²Canung nung kyihuo khata, “Ata hing ca nama na ri nakawta cuo li pata kiema hrahring ta a bie ripa kha thyi pate ma zang; ama ca chuelyi Khuotuv a cuo hrahring tapa kha ma pachang,” ama ta.

⁴³Ning hning khu taata, Zingsuv ca Galilee ruo luo kha a si.

⁴⁴(Tahema-tapakieca Zingsuv hrahring ta, “Profet ca a puvna ruo lieca pa-uvsathyina hmung vyi,” a ta.)

⁴⁵Galilee luo a chiy tiyta, Galilee ming ta ama kha ama daw, tahematapakieca Jerusalem Lawsena Pyi luo kha vaa ra yite pyi chunglie ta a tuepa bangkhuo kha ama hmung nakawta a cuo.

⁴⁶Cakhutaata Zingsuv ca tiy kha mingsuv tiy ta a za pacuo sa napa Galilee pe Kaanaa khy luo kha a si pakhaa. Capa lieca cuzaa byi pakha aw te a saacapaapa ca Kapernaum khy lie kha a pasa.

⁴⁷Zingsuv na Judea ruo taata Galilee luo a vaw tapa kha a thyi tiyta, ama'a luo kha vaa te, Kapernaum khy luo kha vaa pata vuotaa a thiy'a nangpa a saacapaa kha patluo sa riypata paa a kie.

⁴⁸Zingsuv ta, “Pamangsana kharuehaa hmang nama hmung li kieca zang'a va ungciy,” a ta yi.

⁴⁹Cuzaa byipa cata, “Abyipa, i saata a thiy hluo hingta a vaw tie,” a ta.

⁵⁰Zingsuv ta, “Cakuo tie, na saacapaa ca a hring aa,” a ta. Capapaa cata Zingsuv bie kha zang te a cakuo.

⁵¹A kaa luo, luopuv lie kha a sii tie ta vya daw yite, “Na saacapaa ca a tluo tli,” ama ta.

⁵²Ama ta, “Khaapa cuo taakhata ma a saacapaa ca a tluo vie? tapata a hiehriy tiy yi ta, iema ta, “Azuochaning ningchung, siymaluo pakha lie khana a ngelingpa a cakaa,” ama ta.

⁵³Capa cuo ca Zingsuv ta, ‘Na saacapaa ca a tluo aa,” a za tapa cuo ta a cuopa kha a paa ca a kya thyi pakhaa. Cacuonakawta ama hne a ingchungkhue tie bangkhuo ta ama zang.

⁵⁴Hingpa hing Zingsuv ta Judea ruo taata Galilee ruo luo aa vaw khu taata a tuepa kharuehaa hmang a suohningnapa ta a cuo.