Read Lautu Chin Johan 5 Bible Online

Johan 5 - Lautu Chin bible

Johan 5

¹Cakhutaata Zingsuv ca Jerusalem lie Judah biena luo pyi suokha aw te a vaa.

²Jerusalem khy, tuv thlake ama tapa kielie Hebru ryi ta Beth-zatha[7] ama tapa tiy-ang suokha aw te a kie lieta thluodaa suopangaa a aw.

³Capa thluodaa chunglie ca, mingcuepa, a phyi cabiepa, a pakyapa tapata a tluo lipa a hluvsa ama laa patlaw.

⁴(A cuocuo ta Abyipa avuoming kha za cung te tiy kha a za catlu taw. Cahaa cata tiy aa catlu pahne tiy chung luo aa thaw taapa ca ama pasana taata ama tluo. Caacuonakawta a pasapa tie ca tiy a catlu riypa kha ama huo.)[8]

⁵Capa lieca kung sawthung kung cari a pasa tlipa capaa pakha a aw.

⁶Zingsuv ta capa lie a zie nguoluopa kha hmung te kha cuo kungnung a pasa tlipa kha a pachang nakawta, “Na tluo khing ma?” a ta.

⁷A pasapapaa cata, “Abyipa, tiy a vya catlupa hne tiyliy chung luo naa naw riypa hnyi va laa ang te cung naase ang i ta pahne ta a hrangpa pakhakha ta i naa naw chuv lawmaw yi,” a ta.

⁸Zingsuv ta, “Thu la na pangphaa kha a la la cakuo tie,” a ta.

⁹Cawsaapapaa ca sungkha ta tluo te a pangphaa kha la te a cakuo. Capa ning ca Sabbath ning ta a cuo.

¹⁰Cacuonakawta Judah uvthyi tie ta tluona a hmungpapaa ca, “Ata ning hing Sabbath ning ta cuote na pangphaa naa puvlepa hing ma phung na a thlu,” ama ta.

¹¹Ama ta, “Naa patluo sa papaa na na pangphaa kha a la lah cakuo tie, naa ta,” a ta.

¹²Iema ta, “Na pangphaa kha a la lah cakuo tie caa tapa ca ahungma?” ama ta.

¹³Cuorasala tluona a hmungpapaa ta pachang vyi, tahematapakieca capa lieca cawsaazaapuv kha aw yite Zingsuv ca dya a zuvpathla tli.

¹⁴Cakhutaata Zingsuv ta khapapaa kha Biena-ing lie hmung te, “Mang tie, patluo sapa na cuo tli hing; na cunglie a ruv viepa a tlung li riypata suena tue vie khatie lie ciy,” a ta.

¹⁵Cawsaapapaa ca pya te Judah ming kyihuo khata a patluo sa papaa ca Zingsuv ta a cuopa kha a va chang yi.

¹⁶Sabbath ning ta cahaapa hmang a tue nakawta Judah ming ta Zingsuv ca a du hruo ama pathaa.

¹⁷Zingsuv ta, “I Paa ca ata te hingta re a hrie nguoluo kalie, cacuonakawta kama zaw i hrie ra,” a ta yi.

¹⁸Sabbath ning a parapa dyi cuo li pata Khazing kha i Paa tana a cuo a ta nakawta Khazing hne tana aa pakhing ta yite, Judah uvthyi tie ca ama thie riypa khata luo ama huv hryly.

¹⁹Cacuonakawta Zingsuv ta iema kha, “Biehmisi tana ica chang yi: Saacapaa hing ama ta tah khaahmuo tue khu vyi; a paa ta a tuepa a hmungpa dyi khana a tue. Paa ta a tuepa haa khatana Saacapaa ta a tue ra.

²⁰Paa ta Saacapaa ca due te a tuepa bangkhuo kha a pahmung sa. Nama nang a uo sa riypata hingpa laa hing ta tue riypa a le viepa kha a pahmung sa kalie aa.

²¹Paa ta a thiypa pathu sa te hringna a pipa haata Saacapaa zaw ta a khingpa kha hringna a pi ra yi.

²²Paa ta ahung hing hmuo bie ripa vayi, cuorasala Saacapaa kha bie ripa khuna naw a pi.

²³Cacuonakawta Paa a pa-uvsathyipa bangkhuo ta Saacapaa kha ama pa-uvsathyi ra aa. Ahunghmuo cuose Saacapaa a pa-uvsathyi lipa ca a pathlietuv Paa a pa-uvsathyi lipa tana a cuo.

²⁴Biehmisi tana ica chang yi: i bie thyi te naa pathlietuv a zangpa ca chuozaa hringna a hnyi. Bieripana ang'a vyi; cuorasala thiyna taata hringna luo a caluo tli.

²⁵Biehmisi tana ica chang yi: Athiypa tie ta Khazing Saacapaa ueryi thyi'a yite, a thyipa bangkhuo ta hringna ama hmungna cuo kha a vaw'a te ata zaw hing a vya tlung nguoluo tli.

²⁶Paa ta ama hrahring chunglie hringna a hnyipa haata Saacapaa zaw hing ama hrahring chunglie hringna hnyi riypata naw a pi.

²⁷Cakhutaa ta ama ca Cawsaa Saacapaa a cuo nakawta bieripana naw kha a pi.

²⁸Hingpa kawlie hing nama nang uo kha se; a thiypa bangkhuo ta a ueryi kha thyi'a yite ama thluo taata ama kya thuna cuo ca a vaw nguoluo tli;

²⁹hmangpha a tuepa tie ca hringna luo thupakhaa'a yite; hmangpha lipa a tuepa tie ca suebie ripana luo ama thupakhaa aa,” a ta.

³⁰Kama se ta khaapahmuo tue khu va ang. I thyipa haa dyi tana bie i ripa yi; cacuonakawta i bieripana ca aa dang, tahematapakieca kama khingna haata tue lipa angta naa pathlietuv khingna haata i tue nakawta a cuo.

³¹Kama ta kama kaw kha i ri kieca i ripa ca a hmuo'a vyi.

³²Cuorasala kama cuopa ta i kaw naa rituv pakha aw te kama kaw a ripa kha a hmuo tapata i pachang.

³³Niema ta Johan'a luo kha biephyatuv pathlie ung cate biehmisipa kha a ri.

³⁴Khahaapa pachangkhyituv cawsaa i hu nakawta cuo vyi; khuona nama hmung thena riypata i ripa tana a cuo.

³⁵Johan ca ie te a khepa myi-ing haatana a cuo; cuo pachangta chung kha a khena lie a nuopa nama khing.

³⁶Cuorasala kama ca Johan laata a le viepa tehtekhuo riypa na i hnyi. I Paa ta palang riypata ina pipa re hingta kama cuota tehte khuo te i Paa ta pathliepa i cuopa kha a paluo sa.

³⁷Cakhutaata naa pathlietuv i Paa hrahring ta kama cuopa ta tehte a khuo. A ueryi thyi buo va ungciy, a hmingsuo zaw hmung buo va ungciy,

³⁸cakhutaata a bie ripa zaw nama palung chunglie pari va ungciy, tahematapakieca a pathliepa hing nama zang li nakawta a cuo.

³⁹Niema ta Caapathepa chunglie nama huv, tahematapakieca capa chunglie ca chuozaa hringna kha ma hmung thlu'a mang tapata nama rue. Hingpa Caapathepa hing kama kaw a ripa tana a cuo!

⁴⁰Cuorasala hringna hmung riypata kama'a luo kha a vaw khing hyi va ungciy.

⁴¹“Cawsaapa'a taata rungnaana kha cuhluo va ang.

⁴²Nama chunglie Khazing duena nama hnyi lipa kha ica pachang yi.

⁴³I Paa nawhnyina hneta i zuv raalaa pata na cuhluo va ungciy; cuorasala cawsaa pakhakha ama nawhnyina hneta a vaw kieca nama za cuhluo hyi tlung aa.

⁴⁴Niema ca pakha hne pakha cung taata rungnaana kha a cuhluo ung cate Khazing'a taata rungnaana kha nama huv li kieca tuokhaatama kama ca ina zang khu'a ungciy?

⁴⁵Kama hing i Paa hmielie sue malie a phawtuv tana a cuo aa tapata na rue kha ung. A cunglie a nguopuona nama hnyipa Moses hingna sue caa phawtuv riypa yita a cuo.

⁴⁶Moses hing nama zang kieca kama zaw hing ina zang raa ungciy, tahematapakieca ama ca kama kaw kha muo a cape ta.

⁴⁷Cuorasala a capepa kha nama zang li kieca i ripa ca tuokhaatama nama zang the aa?” a ta yi.