Read Lautu Chin Johan 6 Bible Online

Johan 6 - Lautu Chin bible

Johan 6

¹Cakhutaacata Zingsuv ca Tiberias riyliy tapata zaw ama u rapa Galilee riyliy huesuo luo kha a vaa.

²A pasapa tie a patluo sapa yi kharuehaa hmang kha ama hmung nakawta cawsaa hluvpuv ta ama kha ama ziy.

³Zingsuv ca tluocung luo kha kie te a ziytuv tie hneta amaa tu.

⁴Judah ming Lawsena Pyi cuo kha aa ngie tli.

⁵Zingsuv ca hmiehmie pase te cawsaa hluvpuv ama'a luo amaa vawpa kha a hmung tiyta Filip kyihuo kha, “Hingpa cawsaa bangkhuo ning riypa viechuo hing khaapaliema ma calyi aa?” a ta.

⁶Hinghaahingta a hiehriypa hing Filip kha a dyapasya khing nakawta a cuo. Khaapama i tue aa tapa kha ama ta ca a pachang thluo.

⁷Filip ta, “A cawta law ta amaa ky riypata hmuo denarii[9] zahning muo viechuo ta a zu'a vyi,” a ta.

⁸Ziytuv hrangpa pakha, Simon Piter nuta Andru ta,

⁹“Hingpa lie hing barli viechuo tluo pangaa hne ngaa sahning a hnyipa haatiypa pakha a aw, cuorasala cawsaa hing zaa ca a zu the riypa cuo vyi,” a ta.

¹⁰“Zingsuv ta, “Cawsaa kha patu sa tie ung,” a ta yi. Capa hmang lieca aphuv chaasa te cawsaa bangkhuo ca a tu yite thawpangaa tluv ama ta.

¹¹Zingsuv ta viechuo kha la te, palungtluona bie a hluo khu taata, capa lie a tupa tie kha a re yi. Cahaa cata ngaa zaw kha tue te cawsaa bangkhuo ta riybisa pata ama ning.

¹²Ama ning khu taata ziytuv tie kha, “Ama ningbuopa kha pakhaw tie ung, a cawta hmuo a vievuv li riypata,” a ta yi.

¹³Cacuonakaw pakhaw diy yite cawsaa ta ama ningpa barli viechuo tluopangaa taakhata ama ningbuopa beke ta zung hraa hlyihning a bi.

¹⁴Cawsaa ta kharuehaa hmang a tuepa kha ama hmung tiyta, “Chuelyi luo a vaw riypa profet tapa ca ama hrahring hingna a cuo,” ama ta.

¹⁵Zingsuv ta iema kha a vaw'a yite, na patuv'a yite siepahruo cuo riypata hruohra ta ina hripuo'a yi tapa kha a pachang nakawta ama se ta dya zuvpathla te tluocung luo kha a kie.

¹⁶Zuoluo ning aa ngie tiyta ziytuv tie ca riyliy luo kha zuv yite

¹⁷sawkawpalaw kha a khang yite, Kapernaum luo vaa riypata riyliy kha ama va te. Khy a zing tli, Cuorasala Zingsuv ca iema'a luo kha a vaw valie.

¹⁸Thliy aa hruo nakawta riyliy lieca tiylaw a thu.

¹⁹Sawkawpalaw ca me thung me paliy[10] tluv ama va mawpa khata Zingsuv ca riyliy cunglie kha a phyi ta vya cakuo te iema'a luo a vya ngiepa yi kha ama hmung ca ama thlaa a zangsa.

²⁰Zingsuv ta, “Nama thlaa zang kha se, Kama tana i cuo,” a ta yi.

²¹Sawkawpalaw luo kha Zingsuv ca pakie sa yite amaa tingna hmang kha sungkha ta ama va pha.

²²A mawluopa ta riyliy huesuo lie a awpa cawsaazaapuv khata capa lie ca sawkawpalaw suokha dyi aw te, Zingsuv kha capa sawkawpalaw khata ziytuv tie hne si li pata, iema selaw ta ama sipa kha ama hmung.

²³Tiberias taata a vya chiypa sawkawpalaw hrangpa tie kha, Abyipa ta palungtluona bie hluo te cawsaazaapuv viechuo ama ningnapa a thaa lie kha amaa vya pahy.

²⁴Cawsaazaapuv ta Zingsuv hne ziytuv tie ama aw lipa kha ama pachang tiyta, Zingsuv huv riypata sawkawpalaw kha a khang yite Kapernaum khy luo kha ama si.

²⁵Cawsaa ta Zingsuv kha riyliy huesuo lie ama va hmung tiyta, “Rabbi, khatiy tiy tama hingpa luo hing naa vaw?” ama ta.

²⁶Zingsuv ta, “Biehmisi tana ica chang yi: ina huvpa ung cahing kharuehaa hmang i tuepa nama hmung nakawta cuo li pata viechuo nama khing zi nama ning nakawtana a cuo.

²⁷A ra thepa sa cuota re hrie kha ung; cuorasala Cawsaa Saacapaa ta aca pi riypa yi chuozaa ta a hmangpa hringna sa cuota re kha hrie tie ung. Tahematapakieca Paa Khazing ta ama cunglie kha a palung tlingnapa caakhe kha a khe tli.

²⁸Cakhutaata iema ta, “Khazing ta malie aa khing khyipa re hrie riypata khaapama ma tue aa?” ama ta.

²⁹Zingsuv ta, “Khazing khingpa re ca ama ta a pathliepapaa zang khana a cuo,” a ta yi.

³⁰Iema ta, “Hmung'a pate maca zang riypata khaapa pamangsana ma na tue aa? Khaapama na tue aa?

³¹Caapathepa ta, ‘Vuoruo taata ning riypa viechuo kha a pi yi,’ a tapa haata, ma mingchingmingvuo tie ca ruochung lie mannaa kha ama za ning,” ama ta.

³²Zingsuv ta, “Biehmisi tana ica chang yi: Vuoruo taata viechuo caa pipa yi ca Moses ta cuo vyi, vuoruo viechuo hmisipa caa pipa yi ca i Paa tana a cuo.

³³Tahematapakieca Khazing pipa viechuo ca vuoruo taata zaa cungpa hing cuote chuelyi kha hringna a pi,” a ta yi.

³⁴Iema ta, “Abyipa, capa viechuo ca malie pi pari tie,” ama ta.

³⁵Zingsuv ta, “Kama ca hringna viechuo tana i cuo. Kama'a luo a vawpa ca ahunghmuota a nang diy buo li'a pata Kama naa zangpa ca ahunghmuota a tiy hrie buo'a va tli.

³⁶Cuorasala ica chang yi, a hmung ca na hmung raalaa ung cate na zang va ungciy.

³⁷I Paa ta ina pipa bangkhuo ca kama'a luo a vaw'a yite kama'a luo a vawpa bangkhuo ca pakaa'a vayi ang,

³⁸tahematapakieca vuoruo taata i za cung tiy hingta kama khingpa tue riypata cuo li pata naa pathlietuvpa khingna tue riypatana a cuo.

³⁹Naa pathlietuvpapaa khingna ca: ina pipa bangkhuo kha pakha hmuo pavie li pata ningchuonapa ning khiy ama palang ta hringna luo pathu riypatana a cuo.

⁴⁰I Paa khingna hmisi ca Saacapaa kha hmung te a zangpa bangkhuo ta chuozaa hringna ama hmung riypa hingna a cuo. Cacuonakaw, kama ta ningchuonapa ningta khiy hringna luo i pathu pakhaa'a yi,” a ta.

⁴¹“Kama hing vuoruo taata zaa cungpa viechuo tana i cuo,” a ta nakawta Judah ming ca a maa cie.

⁴²“Hingpapaa hing Josef saacapaapa Zingsuv kha cuo vama? A nung hne a paa kha ma pachang yi. Khaapanakawma vuoruo taana i za cung a ta the?” ama ta.

⁴³Zingsuv ta, “Namaa cie phuvluvpa ca duo tie ung.

⁴⁴Naa pathlietuv i Paa na kama'a luo a vya chiy yi ta li pata ca ahunghmuota kama'a luo a vaw khu'a vayi; cahaa cata kama'a luo a vawpa ca ningchuonapa ningta khiy hringna luo i pathu pakhaa yi,” a ta.

⁴⁵Profet tie ta, Iema ca Khazing na a pacuv'a yi,’ tapata ama cape kha. Ahunghmuota i Paa ueryi kha thyi te ama'a taata a cuvpa bangkhuo ca kama'a luo kha amaa vaw.

⁴⁶Khazing'a taata zaa cungpa pakha ri li pata ahunghmuota Khazing hmung buo vayi, ama dyina Paa kha a hmung buo.

⁴⁷Biehmisi tana ica chang yi: a zangpa ca chuozaa hringna a hnyi.

⁴⁸Kama ca hringna viechuo tana i cuo.

⁴⁹Nama mingchingmingvuo tie ta ruochung lie mannaa kha ama ning raalaa pata ama thiy ngiethie.

⁵⁰Cuorasala vuoruo taata a zuvpa viechuo a ningpa bangkhuo ca thiy'a vayi.

⁵¹Vuoruo taata zaa cungpa hringna viechuo ca kama hing tana i cuo. Hingpa viechuo a ningpa bangkhuo ca chuozaa ta ama hring aa. Chuelyi ming ta hringna ama hmung riypata i pi riypa viechuo ca i saa hingtana a cuo,” a ta yi.

⁵²Judah ming ca iema hne iema kha a i yite, “Tuokhaatama hingpapaa hingta a saa ca ce riypata malie a pi the aa,” ama ta.

⁵³Zingsuv ta iema kha, “Biehmisi tana ica chang yi: Cawsaapa Saacapaa a saa kha ce li pata a thiyse zaw nama dang li kieca nama chunglie hringna hnyi'a va ungciy.

⁵⁴I saa a cepa hne i thiy a dangpa bangkhuo ca chuozaa hringna hnyi'a yite ningchuonapa ningta khiy hringna luo i pathu pakhaa'a yi.

⁵⁵I saa ca sa hmisipa ta cuote i thiyse ca dang riypa hmisi ta a cuo.

⁵⁶I saa kha ce te i thiy a dangpa ca kama chunglie hring yite kama zaw iema chunglie i hring ra.

⁵⁷A hringpa i Paa ta na pathlie te ama thueta kama i hring pahaata i saa a cepa bangkhuo ca kama thueta ama hring aa.

⁵⁸Vuoruo taata a zuvpa viechuo ca hingpa hing tana a cuo; nama mingchingmingvuo tie ta za ning yite ama thiypa haakhata cuo vyi, cuorasala hingpa viechuo a ningpa ca chuozaa ta ama hring aa,” a ta yi.

⁵⁹Hingpa bie ca Kapernaum khy apungna-ing lie a pacuv ning yi ta a ripa tana a cuo.

⁶⁰Ama a ziypa hluvpuv ta capa bie ca ama thyi tiyta, “Hingpa pacuvna ca a ruv ciemuo, ahungma a cuhluo khu aa?” ama ta.

⁶¹Cuorasala, hingpa kawlieta a ziytuv tie amaa ciepa kha Zingsuv ta pachang te, iema kha, “Hingpa bie ta nama palung aca para yi ma?

⁶²Cawsaa Saacapaa hing a hluo ta a za awna luo a kaapakhaapa kha hmung biephung ungla tuokhaatama nama aw aa?

⁶³Hringna malie a pipa ca Thlaapa tana a cuo; saapa hing ca khaahmuo thlahne vyi. Niema'a lie i ripa bie hing thlaapa hne hringna bie ta a cuo.

⁶⁴Cuorasala niema hrawlie chekha taca zang va ungciy,” a ta. Zingsuv ta a hruothu taata ahungma naa zang li riypa tapa hne ahung ma naa lyi riypa tapa kha a pachang pacie diy.

⁶⁵Zingsuv ta pazue te, “Hingpa nakaw hing muo i Paa ta luo a sapa li kie yi ca ahunghmuota kama'a luo a vaw khu'a vayi ica tapa yi kha a cuo ta,” a ta yi.

⁶⁶Capa nakaw cata Zingsuv a ziytuv a hluvpuv ca kaa yite ama kha ziy va tli yi.

⁶⁷Cacuonakawta Zingsuv ta ziytuv hlyihning tie kha, “Niema haw nama cakuo ra'a ma?” a ta yi.

⁶⁸Simon Piter ta, “Abyipa, ahung'a luoma ma cakuo aa? Chuozaa hringna a pituv bie a hnyipa ca nama ca tamuo na cuo ta!”

⁶⁹Nama ca A pathepa Khazing[11] na cuopa kha zang pate ma pachang tli,” a ta.

⁷⁰Zingsuv ta, “Kama na niema hlyihning tie hing caa tlaw yi ang cuo vama? Cuorasala niema chung taata pakha ca setaa tana nama cuo!” a ta yi.

⁷¹Hlyihning chunglie pakha ta a cuo raalaa pata ama a lyituv riypa Simon Iskariot saacapaapa Judas khana a ri khingpa ta a cuo.