Read Lautu Chin Johan 7 Bible Online

Johan 7 - Lautu Chin bible

Johan 7

¹Cakhutaata Zingsuv ca Galilee pe chung kha a tlaw. Judah uvthyi tie ta ama kha ama thie khing nakawta Judea pe ca tlaw khing vyi.

²Judah ming Thluodaa Pyi kha aa ngie tli.

³Cacuonakawta a nuta zaw ta Zingsuv ca, “Na hmang tuepa hing caa ziytuv tie ta ama hmung riypata hingpa taahingta pya la Judea pe luo si tie.

⁴Cawsaa ta na pachang yi se tapa a khingpa taca hmang kha a paruvta tah tue vayi. Hingpa hmang hing na tuepa a cuo kieca chuelyi hing a pahmung sa thluo tie!” ama ta.

⁵(A uvnu zaw tahmuo ama kha zang vayi.)

⁶Zingsuv ta, “I cuo tling valie. Niema cuota ca cuo bangkhuo hing nama cuota na a cuo thluo.

⁷Niema ca chuelyi hingta ca hue khu vayi, cuorasala kama ca ina hue, tahematapakieca a hmang tuepa a pha li nakaw kha i ri pari nakawta a cuo.

⁸Niema kha pyi luo ca cakuo tie ung. Kama ca cakuo'a va ang, i cuo tling valie,”

⁹ta yite Galilee lie kha a aw thluo.

¹⁰A nuta zaw pyi luo ama cakuo khu taata Zingsuv zaw a cakuo ra; cadyiseca a luohuo ta cuo li pata a paruv ta tah a cakuo ra pata a cuo.

¹¹Pyi chunglie ca Judah uvthyi tie ta huv yite, “Khaapaliema a aw'a e?” tapata ama hiehriy.

¹²Cawsaazaapuv ta a kaw kha ri yite amaa cie. Chekha ta, “Ama ca cawsaa phapa tana a cuo,” ta yite chekha ta, “Cuo vyi, cawsaa a sikhyichiepa tana a cuo,” ama ta.

¹³Cuorasala Judah ming kha ama ciy nakawta ahungtahmuo a luohuo ta a kaw ri vayi.

¹⁴Capa pyi khingkhuo hraw taakhata Zingsuv ca Biena-ing chung luo kha va kie te pacuv hruo a thu.

¹⁵Judah ming ca ama kharue haasa te, “Caa hmuo a caw buo li pata tuokhaama hing tluv nanaa hingta a the khu,” ama ta.

¹⁶Zingsuv ta, “I ca pacuvpa yi hing kama'a taata cuo vyi, naa pathlietuv'a taata na a cuo.

¹⁷Khazing khingna tue a khingpa bangkhuo taca i pacuvna hing Khazing'a taata ma a cuo kama khingna ta i pacuvpa ma tapa kha ama pachang aa.

¹⁸Ama khingna haata dyi bie a ripa ca ama rungnaana dyi a huvpa cuote cuorasala ama a pathliepa huota rungnaana a huvpa ca aa dangpa ta a cuo, a chunglie hanghiena aw vyi.

¹⁹Moses ta phungbie ca pi vayi ma? Cuorasala ahungtahmuo ziy va ungciy. Khaapanakawma ina thie khing ungciy?” a ta yi.

²⁰Cawsaazaapuv khata, “Khuevuo na na hnyi! Ahungma thie acaa nang?” ama ta.

²¹Zingsuv ta, “Kharuehaa hmang suokha tue ang te nama bangkhuo ta nama kharue a haa.

²²Moses ta vangdaw te riypata bie ca pi yite (a pathutuv ca Moses cuo li pata mingpa tie zaw khatana ama cuo) Sabbath ning ta cawsaa kha vangdaw nama te.

²³Moses phungbie para li riypata cawsaa pakha kha Sabbath ning ta vangdaw nama te kieca khaapanakawma Sabbath ning ta cawsaa kha tluotlingsa pata i patluo sa tiyta i cunglie nama hi a haa?

²⁴Le luo cuona dyi mangpa ta bie chi kha ung, biedangpa tuv kha mang ungla bie chi tie ung,” a ta yi.

²⁵Jerusalem khy ming chekha ta, “Thie amaa nangpapaa ca ama hing cuo vama?” amaa ta.

²⁶Mang tie ung! a luohuo ta bie ri te khaahmuo ta hyi tlung vade yi. Messiah[12] tana a cuo tapa kha uvtuv tie ta ama pachang tli nakawta a cuo'a ma?

²⁷Cuorasala hingpapaa hing khaapa taata ma aa vaw tapa kha ma pachang. Cadyiseca Messiah aa vaw thueta ca ahungtahmuo khaapa taata ma aa vaw tapa kha pachang'a vayi,” ama ta.

²⁸Zingsuv ta Biena-ing chunglie a pacuv nguoluo pata khuopuv ta khi te, “Niema ta kama kha na pachang ung cate khaapa taata ma i vaw tapa zaw kha nama pachang. Kama ri ta a vaw va ang. Cuorasala naa pathlietuv hing zangtluo a tla hrahringpa a cuo. Niema ca pachang va ungciy,

²⁹cuorasala kama ca i pachang, tahematapakieca ama ta na pathlie te ama'a taata a vawpa i cuo,” a ta yi.

³⁰Catiyta iema ta patuv amaa ting, cuorasala ahungtahmuo patuv vayi, tahematapakieca a cuo kha tling valie.

³¹Cawsaazaapuv chung taata a hluvpuv ta zang yite, “Messiah aa vaw thueta hingpapaa a tuepa laa hing ta kharuehaa hmang a hluv vie a tue'a ma?” ama ta.

³²Cawsaazaapuv ta cahaa cata a paruvta tah a kaw ama ri pakha Farasi tie ta ama thyi tiyta, tluobyilepa tie hneta Zingsuv patuv riypata biena-ing a huopa paliy tie kha ama pathlie.

³³Zingsuv ta, “Niema'a lie cuo pachangta chung aw'a ang te naa pathlietuvpa'a luo i si aa.

³⁴Ina huv'a ungciy, cuorasala na hmung'a va ungciy, i awna luo zaw kha a vaw khu'a va ungciy,” a ta.

³⁵Judah ming ca pakha hne pakha kha, “Ima hmung khu li riypata khaapa luo ma vaa a ting? A chepatlaapa Grik ming'a luo si pata va pacuv a ting kanaa?

³⁶Na huv'a ung cate na hmung'a va ungciy, i awna luo zaw a vaw khu'a va ungciy,” a tapa a ri khingpa hing khaapatama a cuo aa? amaa ta.

³⁷Pyi chuoningpa hne a biepuvcepa ning ningta kha Zingsuv ca a daa te, khuopuv ta khi te, “A tiy a hriepa ahunghmuo kama'a luo a vaw ungla

³⁸vya dang se. Caapathepa ta a ripa haata, ‘Kama naa zangpa bangkhuo ca a palung chung taata hringna tiy kha cavaa haata a lang aa,’” a ta

³⁹Zingsuv ta hinghaahingta a ri tiyta, ama a zangtuv zaw ta ama hmung riypa Thlaapa kaw kha a ripa a cuo. Capa cuo ning ca Thlaapa kha pipa ta cuo valie yi, tahematapakieca Zingsuv kha rungnaana hne pathupa cuo valie.

⁴⁰A ripa kha ama thyi tiyta Cawsaazaapuv chung taa chekha ta, “Hingpapaa hing Profet ta a cuo hrahring,” ama ta.

⁴¹Chekha ta, “Messiah tana a cuo,” ama ta. Cuorasala chekha ta, “Messiah ca Galilee taata aa vaw riypa cuo vyi!

⁴²Caapathepa ta Messiah ca David ciypathla cuo'a te David awna khy Bethlehem taata na a cuo aa, a ta pakha,” ama ta.

⁴³Cacuonakawta cawsaazaapuv ca Zingsuv kawlie amaa che.

⁴⁴Chekha ta ama patuv khing, cuorasala ahungtahmuo patuv hmisi vayi.

⁴⁵Biena-ing a huopa paliy tie ama vya kaa tiyta tluobyilepa tie hne Farasi tie ta, “Khaapanakawma nama patuv va?” ama ta.

⁴⁶Paliy tie ta, “Ahungtahmuo hingpapaa haahingta bie ri buo vayi,” ama ta.

⁴⁷Farasi tie ta, “Aca dung ra tli yi ing.

⁴⁸Ma uvthyi tie hne Farasi tie pakha chuo ta ama zangpa nama pachang ma?

⁴⁹Cuorasala hingpa cawsaazaapuv, Moses phungbie a pachang lipa tie hing ca Khazing chiesapa tana ama cuo! ama ta.

⁵⁰Iema hrawlie pakha ta cuote, a hluo ta Zingsuv'a luo a vawbuopa paa, Nikodemu ama ta papaa ta iema kha,

⁵¹“Ma phungbie taca, ahunghmuota a tuepa pachang riypata a bie naathliepa taa hluo taca biechina tue vyi cuo vama?” a ta yi.

⁵²Iema ta, “Nama zaw Galilee taata cuo ra kanaa ciy? Caapathepa kha va ri la, Galilee taata profet pakha hmuo pya buo vyi tapa kha na hmung aa,” ama ta. [

⁵³Cakhutaata cawsaa bangkhuo ca ama ing luo kha ama kaa diy.