Read Lautu Chin Johan 8 Bible Online

Johan 8 - Lautu Chin bible

Johan 8

¹Cuorasala Zingsuv ca Oliv Tluo luo kha a kie.

²Mawdiy chiekari ta Biena-ing luo kha a cakuo pakhaa. Cawsaa hluvpuv ta a vya hmyasue yite Zingsuv ca a tu te a pacuv yi.

³Phungbie saya tie hne Farasi tie ta nungvaathingsuena a tue ningta ama patuv nung kha a vawkhyi yite zaapuv hmielie kha ama padaa.

⁴Zingsuv kyihuo khata, “Saya, hingpa canung hing nungvaathingsuena a tue nguoluo pata patuvpa a cuo.

⁵Moses ta ca hinghaapa canung hing ca alung ta vaasa riypatana a cuo, tapata Phungbie chunglie malie a chang. Nama haw tuokhaama na rue?” ama ta.

⁶Hinghaahingta bie ama hiehriypa ca ama kha ama pachie the riypata ama dyapasya patana a cuo. Zingsuv ca a bung te alyi lie kha a kuvdaw ta caa a cape.

⁷Bie kha ama hiehriy canyi pari nakawta a daa te, “Niema hrawlie suena a tue buo li pata alung ta vaa taa tie ung,” a ta yi.

⁸A bung te alyi lie[13] caa a cape pakhaa.

⁹Capa bie ama thyi tiyta a uvthyicepa taata patha te pakha hnang pakha ta dya ama cakuo diy. Zingsuv dyi a tuo te a thaalie ca cawsaanung ca a daa thluo.

¹⁰A dangta tah a kya daa te, “Canung nung, iema ca khaapalie ma ama aw? Pakha tahmuo sue ca phaw vayi ma?” a ta.

¹¹Canung nung cata, “Abyipa, ahungtahmuo sue na phaw vayi,” a ta. Zingsuv ta, “A cuo kieca, kama zaw sue ca phaw ra'a va ang. Cakuo la suena va tue pakhaa lieciy,” a ta.][14]

¹²Zingsuv ta iema kha chang pakhaa yite “Kama ca chuelyi khena tana i cuo, kama naa ziytuv ahunghmuota zingna chunglie cakuocavaa buo'a vayi, cuorasala ama hringna lie khena kha ama hnyi aa,’ a ta yi.

¹³Farasi tie ta, “Nama ta nama kaw naa ri nakawta na ripa ca khaahmuo cuo vyi,” ama ta.

¹⁴Zingsuv ta, “Kama kaw ca kama ta i ri zaw ta i ripa ca aa hmuopa a cuo, tahematapakieca khaapa taata a vaw ang te ma khaapa luo i vaa aa tapa kha i pachang. Cuorasala niema ca khaapa taata a vaw ang te ma khaapa luo i vaa aa tapa kha pachang va ungciy.

¹⁵Niema ca cawsaa phung tana[15] biechina nama tue; kama ca ahung cunglie hmuo biechina tue va ang.

¹⁶I tue kie zaw ma, i biechina ca aa hmuo aa, tahematapakieca kama seta cuo va ang; naa pathlietuv i Paa hneta ma tuepa tana a cuo.

¹⁷Nama phungbie lieta, ‘pachangkhyituv pahning ama ripa bie ca aa hmuo,’ tapata a cape.

¹⁸Kama kaw ca kama ta ri ang te naa pathlietuv i Paa zaw ta i kaw ca a ri ra,” a ta.

¹⁹Iema ta, “Na Paa ca khaaliema a aw?” ama ta. Zingsuv ta, “Kama cuose, i Paa cuose malie pachang va ungciy. Kama hing na pachang ung la ca i Paa zaw nama pachang aa,” a ta yi.

²⁰Zingsuv ta hingpa bie a ripa hing Biena-ing chung sue pathlanapa thingkaw ama china khuo lie a pacuv ning yi ta a cuo. Ahungtahmuo patuv vayi, tahematapakieca a cuo a tling lilie nakawta a cuo.

²¹Zingsuv ta iema ca chang pakhaa yite, “Kama ca i si aa; ina huv'a ungciy, cuorasala nama suena chunglie nama thiy aa. I sina luo kha si ra khu'a va ungciy,” a ta yi.

²²Cakhutaata Judah ming ta, “I sina luo ca vya si ra khu'a va ungciy a tapa ca, kama hne kama tana i thie aa a ta khingnapa a cuo'a ma?” ama ta.

²³Zingsuv ta, “Niema ca a raw luo ming hingta nama cuo, kama ca cungluo taatana i cuo. Niema ca hingpa chuelyi ming hingtana nama cuo, kama ca hingpa chuelyi taahingta cuo va ang.

²⁴Cacuonakawta nama suena liena nama thiy aa ica tapa yi, ‘Kama hing i ripa Ama khatana i cuo,’ tapa kha nama zang li kieca nama suena chunglie na nama thiy aa,” a ta.

²⁵Iema ta, “Ahung tama na cuo,” ama ta. Zingsuv ta, “A hruothu taata ica chang tli yi kha saw

²⁶Niema kaw hing ri riypa a hluvsa i hnyi, sue phaw riypa zaw a hluvsa i hnyi. Cuorasala naa pathlietuv hing zangtluo aa tlapa cuote ama'a taata i thyipa dyi hingna hing chuelyi lie hing i pathyipa a cuo,” a ta yi.

²⁷Paa kaw a changpa yi kha iema ta pachang the vayi.

²⁸Cacuonakawta Zingsuv ta, “Cawsaa Saacapaa hing vieluo lie nama pathlie khutaa kyalya ta ‘Kama ca Ama tana i cuo,’ tapa kha ina pachang'a ungciy; cakhutaata kama ri dyi ta khaahmuo i tue lipa hne i paa ta ina changpa dyi i ripa kha nama pachang aa.

²⁹Naa pathlietuv ca kama'a lie aw te na thuse buo vyi, tahematapakieca ama palung tluona dyi khana i tue pari,” a ta.

³⁰Hingpa a ripa bie a thyipa a hluvpuv ta ama kha ama zang.

³¹Cakhutaa Zingsuv ta ama a zangtuv Judah ming kha, “I pacuvna hing nama ziy kieca niema ca naa ziytuv hmisi nama cuo;

³²biehmisipa ca pachang'a ung cate, capa biehmisipa cata hya aca pazang sa'a yi,” a ta.

³³Iema ta, “Kiema ca Abraham ciypathla cuo pate ahung sii hmuo cuo buo va puv. ‘Hya aca pazang sa'a yi,’ na tapa hing khaapama na ri khing?” ama ta.

³⁴Zingsuv ta iema kha, “Biehmisi tana ica chang yi: Suena a tuepa ahunghmuota suena sii tana a cuo.

³⁵Sii ca chungkhue lie kha cipari ta aw vyi cuorasala saacapaa ca cipari ta a aw.

³⁶Cacuonakaw Saacapaa ta hya aca pazang kie yi ca cawsaa hyazangpa nama cuo hmisi aa.

³⁷Abraham ciypathla nama cuopa ca ica pachang yi. Cuorasala thie inaa nang ungciy, tahematapakieca i bie kha nama chunglie pari va ungciy.

³⁸Kama ta i Paa'a lie i hmungpa kha i phu, niema ca nama paa'a taata nama thyipa kha nama tue riypatana a cuo,” a ta yi.

³⁹Iema ta, “Abraham ca kiema paa tana a cuo,” ama ta. Zingsuv ta, “Abraham saata zaw nama cuo kieca a tuepa haakhata muo nama tue ra'a ta.

⁴⁰Cuorasala Khazing'a taata i thyipa biehmisipa caa changpa yi kha thie inaa nang ungciy. Abraham taca khahaapaapa hmang kha tue vyi!

⁴¹Niema ca nama paa ta a tuepa khana nama tue,” a ta yi. “Iema ta, “Kiema ca riesaa ta cuo va puv; paa pakha hnyi pate Khazing ama hrahring ta a cuo,” ama ta.

⁴²Zingsuv ta iema kha, “Khazing ca nama Paa a cuo kieca, kama hing ina due'a ungciy, tahematapakieca kama ca Khazing'a taata a vaw ang te ama lie hing i aw. Kama ri ta a vaw va ang, ama na naa pathlie.

⁴³Khaapanakawma i ripa hing nama pachang the va? I bie kha nama cuhluo li nakawna a cuo.

⁴⁴Niema ca nama paa, Setaa taata cuo ung cate nama paa khingna tue riypa kha namaa tlaw. A hruothu taata ama ca lie a nawpa cuote biehmisipa kha a daakhyi buo vyi, tahematapakieca a chunglie kha biehmisipa aw vyi. Hang te bie a ri tiyta a puvkhyipa hringzya haakhata a ri, tahematapakieca ama ca a hanghiepa hne hanghiena paa ta a cuo.

⁴⁵Cuorasala kama ca biehmisipa kha ica chang nakaw yi ta na zang va ungciy.

⁴⁶Ahung hingma i suena naa hmung khu ungciy? Biehmisipa ica chang kie yi ca, khaapanakawma ina zang va ungciy?

⁴⁷Khazing'a taata a cuopa tie ca Khazing bie kha naa ama thlie. Khazing bie naa nama thlie khing lipa hing ca Khazing'a taata nama cuo li nakawna a cuo,” a ta yi.

⁴⁸Judah ming ta, “Nama ca Samaria ming cuo cate khuevuo na caa hryi maca tapa hing maa hmuo cuo vama?” ama ta.

⁴⁹Zingsuv ta, “Khuevuo hnyi va ang, kama ta i Paa kha i pa-uvsathyi, cuorasala niema ta kama kha i na nutaa ungciy.

⁵⁰Kama ca kama rungnaana kha a huvpa cuo va ang. Cuorasala naa huvpatuv pakha aw te ama ca bie a rituv ta a cuo.

⁵¹Biehmisi tana ica chang yi: i bie a ziypa ahunghmuota thiy'a vyi,” a ta yi.

⁵²Judah ming ta, “Ata hing ca khuevuo na caa hryi hrahring tapa kha maca pachang! Abraham ca za thiy te profet tie zaw ama za thiy diy, cuorasala nama ta ca, ‘na bie a ziypa ca khatiy tahmuo thiy'a vayi,’ na ta.

⁵³A thiy tlipa mingpa Abraham laata i le vie naa ta ma? Profet tie zaw ama thiy diy tli. Ahung tama naa ri?” ama ta.

⁵⁴Zingsuv ta, “Kama hne kama kha rungnaana i pi kieca capa rungnaana ca khaahmuo cuo'a vyi. Kama rungnaana naa pituv ca i Paa cuote nama pachang li raalaa pata ima Khazing nama tapa khatana a cuo.

⁵⁵Cuorasala kama ca i pachang. Pachang va ang ne i ta kieca, niema haata a hangpa tana i cuo aa.

⁵⁶Nama mingpa Abraham ca kama ningcuo hmung riypa kha zaa ngietie vyi; hmung hmisi te a palung a tluo hringhruo,’ a ta yi.

⁵⁷Judah ming cata, “Kung sawngaa hmuo na tling lilie pata tuokhaatama Abraham ca na hmung khu?” ama ta.

⁵⁸Zingsuv ta, “Biehmisi tana ica chang yi: Abraham hluo ta i aw tli,” a ta yi.

⁵⁹Alung kha a haa yite vaa amaa nang, cuorasala Zingsuv ca a nu te Biena-ing taakhata dya a zuvpathla.