Read Lautu Chin Johan 9 Bible Online

Johan 9 - Lautu Chin bible

Johan 9

¹Zingsuv ca a cakuole nguoluopa khata a mingcue pata zaa puvpapaa kha a hmung.

²A ziytuv tie ta, “Rabbi, ahung suena kawlie ma mingcue pata a za puv? Ama suena kawlie ma, a nung hne a paa suena kawlie ma?” ama ta.

³Zingsuv ta, “Ama suena kawlie zaw cuo vyi, a nung hne paa suena kawlie zaw cuo vyi. Khazing hmang tue khuna aa luona riypatana mingcue pata a za puvpa hing a cuo.

⁴Ningchung a cuo chung hingta naa[16] pathlietuv re ca ma hrie a hu; ahungtahmuo re ama hrie khu lina zuo cuo ca a vaw nguoluo tli.

⁵Chuelyi lie i aw chung hing ca, kama hingna chuelyi khena ta a cuo ang,” a ta yi.

⁶Cahaa cata a ri khu taata, Zingsuv ta a lyi kha a paciy ta pacha te a cyi kha a tue khu taata cawsaapapaa ming lie kha thuv te,

⁷“Cakuo la Siloam Tiy-ang lie kha na hmie vaa siy tie,” a ta. (Siloam tana siyluo ca pathlie tana ta a cuo). Cacuonakaw vaa te a hmie ca vaa siy te a ming ca vuo te a vya kaa.

⁸A ingpaa tie hne sa a hiele tawpa zaa hmung tawpa tie khata, “Hingpapaa hing a tu te sa a hie tawpa kha cuo va ma?” ama ta.

⁹A che ta, “A cuo,” ama ta, a che ta, “Cuo vyi, ama hne aa lupa pakha tana a cuo,” ama ta. Cacuonakawta ama ta, “Kama na a cuo ang,” a ta yi.

¹⁰Cuorasala Iema ta, “Tuokhaatama na hmung pakhaa?” ta yite ama hiehriy.

¹¹Ama ta, “Zingsuv ama tapapaa ta acyi tue te, i ming lie na thuv te, Siloam luo kha vaa la na hmie vaa siy tie, ina ta. Vaa ang te i hmie i siy pahne ta i ming a hmung,” a ta yi.

¹²Iema ta, “Capapaa ca khaapaliema a aw,” ama ta. Ama ta, “Pachang va ang,” a ta yi.

¹³Iema ta a ming zaa cuepapaa kha Farasi tie'a luo ama vaa khyi.

¹⁴Zingsuv ta acyi tue te a ming a patluo sa ning kha Sabbath ning ta a cuo.

¹⁵Cacuonakawta Farasi tie ta cawsaapapaa a ming a hmung pakhaana kaw ca ama hiehriy pakhaa. Ama paa cata, “I ming lie acyi ina thuv, i hmie a siy ang te ata hing i hmung tli,” a ta yi.

¹⁶Farasi chekha tie ta, “Hingpapaa hing Khazing'a taata cuo vyi, tahematapakieca Sabbath kha a uv vyi,” ama ta. Cuorasala, a hrangpa tie ta, “Tuokhaatama a suepa ta hinghaapa kharuehaa hmang hing a tue khu aa?” ama ta ra. Cacuonakawta amaa che.

¹⁷Cacuonakawta mingcuepapaa kha hiehriy pakhaa yite, “Na ming caa pahmung sa pakhaapapaa ca tuokhaatama na rue?” ama ta. Ama ta, “Profet tana a cuo,” a ta.

¹⁸Judah ming ta ama ca a ming za cue te ata hing a hmung khu pakhaa tapa kha zang vayi. Cacuonakawta cawsaapapaa a nung hne a paa kha ku yite,

¹⁹“Ama hing nama saacapaapa, a ming cuepa tana a za puv nama tapa ca a cuo ma? Tuokhaatama a hmung khu pakhaa?” ama ta.

²⁰A nung hne a paa ta, “Ama hing ma saacapaa a cuopa ma pachang, a ming cuepa ta a za puvpa zaw ma pachang.

²¹Cuorasala tuokhaatama ata hing a hmung pakhaa tapa hne, ahungma a patluo sa tapa kha pachang va puv. Ama hing hiehriy tie ung, uvthyi ra tli te ama ta aca palie'a yi,” ama ta.

²²A nung hne a paa ta cahaa cata ama tapa ca Judah ming kha ama ciy nakawta a cuo; iema ta ahunghmuota Zingsuv hing Messiah[17] tana a cuo tapata i zang a tapa ca apungna-ing taata papyapa cuose tapata naatlana ama za hnyi pacie tlipa a cuo.

²³Cacuonakawta, a nung hne a paa ta, uvthyi ra tli te ama kha hiehriy tie ung,” ama tapa kha a cuo.

²⁴Cacuonakawta a ming zaa cuepapaa ca a yihningnapa ku pakhaa yite, “Khazing kha pathuosa tie! Ama cawsaapapaa hing a suepa a cuopa kha ma pachang,” ama ta.

²⁵Ama ta, “A suepa a cuo hne a cuo li pachang va ang. I pachang tangepa suokha ca: I ming a za cue, ata hing i hmung,” a ta.

²⁶Iema ta, “Tuokhaatama aca tue? Na ming hing tuokhaatama aca patluo sa?” ama ta.

²⁷Ama ta, “Ca chang tli raalaa yi ang te naathlie va ungciy. Khaapanakawma nama thyi khing pakhaa? A ziytuv cuo khing ra kanaa ungciy?” a ta yi.

²⁸Iema ta, esepuo pata “Nama hingna ama a ziytuv ta a cuo ciy, kiema ca Moses a ziytuv tana ma cuo,” ama ta.

²⁹Khazing ta Moses'a lie bie a ripa kha ma pachang; cadyiseca hingpapaa hingca khaapa taatama aa vaw tapa hmuo pachang va puv,” ama ta.

³⁰Cawsaapapaa ta, “Nang-uopa tana a cuo de! Niema ta khaapa taama a vaw tapa nama pachang va, cuorasala ama ta i ming ina patluo sa!

³¹Khazing ta a suepa bie ca naa thlie vyi tapa kha ma pachang; ama abiepa hne ama khingna a ziypa kha a bie naa a thliepa.

³²Mingcue pata a puvpa na pakhakha ta a ming a pahmung sa pakhaa tapa hing chuelyi hruothu baataata thyi buo va puv.

³³Hingpapaa hing Khazing'a taata a zuvpa a cuo li kieca khaahmuo tue khu'a vyi,” a ta.

³⁴Iema ta, “Suena chunglie puv cate suena chunglie a lepa ma pacuv malie a ting ciy?” ta yite apungna-ing chung taata ama papya.

³⁵Zingsuv ta ama papyapa kha a thyi khu taata cawsaapapaa kha a taw te, “Cawsaa Saacapaa[18] hing na zang ma?” a ta.

³⁶Cawsaapapaa ta, “Abyipa, ama ca i zang khu riypata ahungma tapa kha na chang tie,” a ta.

³⁷Zingsuv ta, “Ama ca hmung tli cate, nama hne bie a ri nguoluopa hingna a cuo,” a ta.

³⁸Cawsaapapaa ta, “Abyipa! ica zang ta te aa bie.

³⁹Zingsuv ta, “Hing chuelyi luo i zuv pahing mingcuepa tie ta hmung'a yite a hmungpa tie kha mingcue pata amaa li riypata bie ripa riypatana a cuo,” a ta.

⁴⁰A thaalie a awpa Farasi tie chekha ta a ripa kha thyi yite, “Kiema hing mingcuepa ma cuo ma?” ama ta.

⁴¹Zingsuv ta, “Mingcuepa cuo ungla ca suena hnyi'a va ungciy; cuorasala ma hmung thluo ne nama ta nakaw hingtana nama suena ca aa hmang,” a ta yi.