Read Lautu Chin Lucuotuv 1 Bible Online

Lucuotuv 1 - Lautu Chin bible

Lucuotuv 1

¹Duepa Theofilas, I caa-uv a suokhanapa lie kha Zingsuv ta aa tlawpa lucuotuv tie kha Thlaapa Pathe cahrana ta a pacuv khu taayita,

²re hrie hruo aa thu baataata vuoruo luo a kiena te ta a pacuvnapa hne a rehriena kaw kha i cape.

³A thiy khu taata ning sawliy chung iema'a lie kha yi hluvpuv a luo te a hring pakhaa tapa kha i khu li riypata yi hluvpuv a paluo sa khu taata Khazing pena kaw kha a ri.

⁴Iema'a lie a aw[1] ning khata iema kha, Jerusalem pya se li pata Paa biekuona kha ama huo riypata bie a pi yi. Ama ta, “Kama'a taata nama thyipa bie ca hinghaahingtana a cuo;

⁵Johan ca tiy tana tiynawna aca pi yi, cuorasala niema ca ata ning taahingta a ru li pata Thlaapa Pathe ta tiynawpa nama cuo aa,” a ta yi.

⁶Cacuonakaw Zingsuv hne lucuotuv tie ca amaa hmya pakhaw tiyta, “Abyipa, ata hing Israel ming'a luo pena na pi pakhaa na cuo ta a cuo ma? tapata ama hiehriy.

⁷Zingsuv ta, “I Paa ta ama ri ta a tuepa ning hne cuo kha niema nama pachang a hu vyi.

⁸Cuorasala Thlaapa Pathe nama cung luo aa zuv tiyta cahrana hmung'a ung cate, Jerusalem khypuv, Judea, Samaria hne chuelyi dena te ta i pachangkhyituv nama cuo aa,” a ta yi.

⁹Capa bie a ri khu pahne ama ming hmung pata lathawpa cuote amyi ta vya pakhuo te hmung khu va tli yi.

¹⁰Cahaa cata a kielepa kha avuo luo angchiy yite ama mang nguoluo pata caw ruopa a tuepa avuoming pahning amaa thaa lie sungkha ta amaa vya daa.

¹¹Iema ta, “Galilee cawsaa zaw, khaapama namaa daa luota vuoruo luo ca nama mang nguoluo? Niema'a taata vuoruo luo lathawpa Zingsuv ca nama hmungpa dadang haakhata aa vaw pakhaa aa,” a ta yi.

¹²Cakhutaata lucuotuv tie ca Jerusalem taata kilometer suokha dyi aa hlapa, Oliv tluo taata Jerusalem luo kha ama vya kaa.

¹³Khypuv chung luo ama vya pha tiyta ama aw tawnapa a cung khuo luo kha amaa ngie. Piter, hne Johan, Jeim hne Andru, Filip hne Thomas, Bartholomew hne Matthai, Alfeas saacapaapa Jeim, Phangcuokhyituv Simon hne Jeim saacapaapa Judas ta ama cuo.

¹⁴Ama bangkhuo ta thlaa chuo riypata a taana ata tah a taw yite capa lieca canung tie, Zingsuv nung Mary hne Zingsuv nuta zaw kha ama aw ra.

¹⁵Capa ning ca zangtuv tie[2] (ama bangkhuo ta zakha pakiy hraw) hrawlie kha Piter a daa te,

¹⁶“Uvta nuta zaw,[3] Zingsuv a patuvpa tie luochiytuv ta a cuopa Judas kaw hne a patuv pata David hmuo pata Thlaapa Pathe ta a za rilupa Caapathepa bie ca a tling riypa a cuo.

¹⁷Ama ca hing Khazing re lie hing hrievu pipa a cuo nakawta kiema hrawlie pasuvpuo pata a cuo.

¹⁸(Ama ta hmangpha lipa a tuena taata a hmungpa tuokaa khata lu suokha calyi te; capa lu lieca a bungkali pata tla te a riy a ke nakawta a chungriy bangkhuo ta a pya diy.

¹⁹Capa kaw ca Jerusalem lie a awpa bangkhuo ta pachang yite iema ryi ta capa lu ca Akeldama ta yite, a siyluo ca, ‘Thiyse Lu,’ tana ta a cuo.)

²⁰‘Salm caa-uv chunglie ta, A ing ca hri sala; a chunglie a aw riypa caking yi se’; Cakhutaa, ‘A re kha cawsaa hrangpa ta a thle se,’ tapata aa cape.

²¹Cacuonakawta Johan tiynawna taata ima Byipaapa Zingsuv kiema'a taata lapa a cuona te, kiema'a lie a ngie te pya te a aw chung bangkhuo,

²²kiema'a lie a aw rapa pakha ca kiema hneta Zingsuv thupakhaana pachangkhyituv a cuo ra hrahring na a hu,” a ta.

²³Cacuonakawta, cawsaa pahning Barsabbas ama tapa Josef, Justas zaw ama tapuopa hne Matthias ming kha ama chiykhyi.

²⁴Thlaa chuo yite, “Abyipa, nama ca cawsaa pathiypalung bangkhuo na pachang.

²⁵Judas ta a cu riypa hmang luo a sisepa, hingpa Khazing re hrie riypa hne lucuotuv cuo riypa hing iema pahning lie hingta ahungma naa tlaw tapa kha za paluo sa tie,” ama ta.

²⁶Cakhutaata vyisung amaa da ca Matthias ta a hmung nakawta ama ca lucuotuv hlyikha lie kha pasuvpuo pata a cuo.