Read Lautu Chin Lucuotuv 10 Bible Online

Lucuotuv 10 - Lautu Chin bible

Lucuotuv 10

¹Sisaria khy lieta Kornelias ama tapapaa pakha za aw te, “Italy Rieka Buv,” ama tapa Rom rieka tie zaa uvtuv riebyi ta a cuo.

²Ama ca a ingchungkhue tie yalya hneta biena luota a pakangpahaasapa hne Khazing a ciyzaapa, siypasa tie kha pahyasa pata pi yite Khazing'a luo thlaa a chuo pari pata a cuo.

³Ningkha, zuoluo caw siymaluo pathung hraw ta muocuo hmung te, capa chunglie ca avuoming pakha a vya ngie te, “Kornelias,” tapata a u pakha siephele khata a hmung.

⁴Avuoming ca a ciysapuo pata mangpasie te, “Khaapama, Abyipa,” a ta. Avuoming ta, “Na thlaachuona hne siypasa na pipa ca vuoruo luo kha kie te Khazing ta maw vyi.

⁵Ata hingta Joppa luo kha Piter ama tapa Simon va ku riypata cawsaa pathlie la,

⁶ama ca riyliy kielie a awpa, savang re a hriepa Simon ing lie khana a tlung,” a ta.

⁷Ama'a lie bie a ripa avuoming ama cakuo pahneta sii pahning hne, biena luota a pakangpahaasapa ama a mangchiytuv rieka pakha kha u yite,

⁸hmang a cuopa bangkhuo kha a chang khu taayita joppa luo kha a pathlie yi.

⁹A mawluopa zuoluo caw, vaa kupa tie khypuv luo ama va pha'a nang caw khata Piter ca ingthlue luo kha thlaa chuo riypata a kie.

¹⁰Piter ca a nang diy te sa a ning khing; sa ama tue nguoluopa khata muocuo a hmung.

¹¹Vuoruo a pahaw te pang haata a tapa hmang suokha, a kiy kiy paliy ta alyi luo ama za pathlapa kha a hmung.

¹²A chunglie ca phyipaliypa saruopa a phangphang, alyi lie aa thiylepa saruopa a phangphang hne pavaa a phangphang ta ama aw.

¹³Ueryi suokha ta, “Thu tie, Piter, thie yi la ning tie,” a ta.

¹⁴Cuorasala Piter ta, “Ning'a va ang Abyipa, a pyalyipa hne a pathe lipa hmang ca khaahmuo ning buo va ang,” a ta.

¹⁵Ueryi ta a yihningnapa za chang pakhaa te, “Khazing ta a pathe pata a sapa ca nama ta a pyalyipa ne ta khu vaciy,” a ta.

¹⁶Cahaa cata yi thung a cuo khu taata capa hmang ca sungkha ta vuoruo luo ama lathaw pakhaa.

¹⁷Piter ca i hmungpa muocuo hing a siyluo khaapatama a cuo aa tapata a kharue a haasa ningta Kornelias ta a pathliepa cawsaa tie kha tlangkhy ama vya chiy. Simon ing kha hiehriy yite thlake a thaa lie amaa daa nguoluo.

¹⁸Vya u yite, “Piter ama tapa Simon kha hingpa lie hing a aw maw? ama ta.

¹⁹Piter ca muocuo a hmungpa kaw a pacuo nguoluo ning kha, Thlaapa ta, “Simon, cawsaa pathung[36] na caa huv nguoluo yi,

²⁰Thu la cung tie, a paluolue li pata ziy tie yi, kama ta i vya pathliepa tana ama cuo,” a ta.

²¹Cacuonakaw Piter ca cawsaa tie'a luo kha cung te, “Kama hingna nama huv nguoluopapaa ta a cuo ang; nama'a vaw hnuochuopa khaapatama a cuo?” a ta yi.

²²Iema ta, “Riebyipa Kornelias ta malie a pathliepa tana ma cuo. Ama ca a dangsapa hne Khazing a ciyzaapa ta cuote, Judah ming bangkhuo ta ama pa-uvsathyipa ta a cuo. Na bie ripa thyi riypata Khazing avuoming pakha ta a ing luo naa vaw riypata ama kha bie a chang patana a cuo,” ama ta.

²³Cacuonakawta Piter ta iema kha ku yite ing aa patlung sa yi. A mawluopa ta a pachie te iema hneta a si; Joppa taata zangtuv[37] chekha zaw ama si ra.

²⁴A hezuoningpa ta Sisaria ama pha. Kornelias ca a tieriy hne a viesaa zaw kha ku yite ama kha ama za mangkhuo nguoluo.

²⁵Peter ing luo a chiy pahne Kornelias ta a hladaw te a phyi thabaw lie vaa bu te aa bie.

²⁶Piter ta ama kha pathu te, “A daa tie, Kama zaw cawsaa tana i cuo ra,” a ta.

²⁷Bie a ripuo pata ing chung luo kha a ngie ca cawsaa hluvpuv amaa tupa kha hmung yite,

²⁸“Judah ming pakha ca Jentail ming a viesaa riypa hne parie riypa hing phungbie ta a thlu tapa ca niema hrahring ta nama pachang; cuorasala ahungkhahmuo a pyalyipa hne a pathe lipa ta i hmung li riypata Khazing ta ina pahmung sa mangtli.

²⁹Cacuonakawta ina vya paku sa tiy ung cata i li pata i vya ziy yi. Khaapanakawma ina vya paku sa ungciy tapa kha ata hing na chang tie ung,” a ta yi.

³⁰Kornelias ta, “Ma hnang luo ata tiy siymaluo pathung hingta, i ing chunglie thlaa i chuo nguoluo pata sungkhapuv ta pang ruopa a buvpa cawsaa pakha i hmielie a vya daa te,

³¹‘Kornelias, Khazing ta na thlaachuona kha thyi te siypasa na byanapa zaw maw vyi.

³²Cacuonakawta Joppa luo kha cawsaa pathlie la Piter ama tapa Simon kha va paku sa tie yi; ama ca riyliy kielie a awpa, savang re a hriepa Simon ing lie khana a aw aa,’ ina ta.

³³Cacuonakawta nama ca a catli pata ca vya paku sa yi ang te, nama zaw ngie na chi cate naa vaw. Cacuonakawta ata hing kiema bangkhuo ca Khazing hmielie aw pate, Khazing ta ri riypata aca changpa bangkhuo naathlie riypata ma cuo tli,” tapata a palie.

³⁴Cakhutaata Piter ta thukhyi yite, “Khazing ta cawsaa pahlyipale vyi tapa kha i pachang,

³⁵cuorasala khaapa mingphang ta a cuo zaw ama kha ciyzaa te aa dangpa hmang a tuepa bangkhuo ca Khazing ta a cuhluo yi.

³⁶Cawsaa bangkhuo Abyipa ta a cuopa Zingsuv Khrih'a taata diena ca Khazing ta Israel ming'a luo a pi yi tapa kha nama pachang.

³⁷Johan ta tiynawna kaw a ri khu taata Galilee taata pathu pata Judah pe bangkhuo capa thuohlaa aa zepa kha nama pachang.

³⁸Khazing ta a aw puo nakawta tuokhaatama Nazareth khypa Zingsuv kha Thlaapa Pathe hne cahrana bya te, tuokhaapa hmang phapa kha tue tema setaa tuechiena rawlie a awpa bangkhuo kha a patluo sa yi tapa zaw nama pachang.

³⁹Kiema ca Judah ruo chunglie hne Jerusalem lieta a tuepa bangkhuo kha a hmungtuv hne pachangtuv tana ma cuo. Ama kha vieluo cunglie pathlie yite ama thie.

⁴⁰Cuorasala Khazing ta ningthung khu taata thiyna chung taa pathu pakhaa te

⁴¹cawsaa bangkhuo'a lie cuo li pata Khazing ta pachangkhyituv ta aa tlawpa kiema'a lie kha aa luo. Thiyna taata a thupakhaa khu taata ama hne ma ning ma dang pakhaw.

⁴²Ama ta, cawsaa zaw kha thuophaabie chang riypa hne ama ca Khazing ta a hringpa hne a thiypa tie bie a rituv riypata a chipa kha pachangkhyituv cuo riypata malie a chang.

⁴³Ama a zangpa bangkhuo a ming ta sue a ngiethena hmung riypa kaw kha profet bangkhuo ta ama za ri, a ta kha,” a ta yi.

⁴⁴Piter ta capa bie a ri nguoluo ning ca bie a thyipa bangkhuo cunglie kha Thlaapa Pathe a za cung.

⁴⁵Thlaapa Pathe lasaw ca Jentail ming cunglie zaw kha bya pata cuote, iema ta thyiliparyi kha cyi yite Khazing ama pathuosapa kha ama hmung tiyta,

⁴⁶Piter hneta a vaw rapa vangdaw a tepa zangtuv tie ca ama nang dyi a uo. Cakhutaata Piter ta,

⁴⁷“Ahungma kiema haata Thlaapa Pathe a hmung rapa hingpa cawsaa zaw hing tiy ta tiynawna ang riypa kha a thlu khu'a yi?” a ta.

⁴⁸Cacuonakaw ta Zingsuv Khrih ming ta tiynawna pi riypata bie a pi yi. Cakhutaata Piter ca ning syi vie malie aw khyi caw thi la ta yite ama thlu.