Read Lautu Chin Lucuotuv 11 Bible Online

Lucuotuv 11 - Lautu Chin bible

Lucuotuv 11

¹Judah pe lie a awpa lucuotuv tie hne zangtuv tie[38] ta Jentail ming na Khazing bie a cuhluo ra yi tapa kha ama thyi.

²Cacuonakawta Piter kha Jerusalem luo a khaw ca vangdaw a tepa zangtuv[39] tie ta caw-yi yite,

³“Khaapanakawma vangdaw te lipa tie a khe yi cate iema hne sa na ning hne yi?” ama ta.

⁴Cakhutaata Piter ta ama kaw kha suokha hnang suokha ta chang yite,

⁵“Joppa lie thlaa i chuo nguoluo ning kha muocuo suokha i hmung. Vuoruo taa khiy ta a kiy kiy paliy a awpa pang kusapa suokha kha i thaa lie ama za pachung.

⁶A ngieta tah i mang pasie ca, phyipaliypa ruosaa hne ingzue sahring, saahruo, aa thiy ta a thiylepa saruopa, hne pavaa zaw kha i hmung yi.

⁷Ueryi suokha zaw kha thyi ang te, ‘Piter, thu la, thie yi la ning tie,’ ina ta.

⁸Cuorasala kama ta, “Abyipa, cuo the'a vyi; a pyalyipa hne a pathe lipa suokha hmuo i pakaa luo a ngie buo vyi,” i ta.

⁹Cuorasala vuoruo taa ueryi a yihningnapa thyi pakhaa ang te, ‘Khazing ta a pathe a tapa kha nama ta a pya ta'a vaciy,’ ina ta.

¹⁰Cahaa cata yi thung a cuo khu taata a bangkhuo ta vuoruo taata amaa zaa da pakhaa.

¹¹Capa cuota liecata Sisaria taata vya pathliepa cawsaa pathung ca ma awnapa ing luo kha ama vya chiy.

¹²Thlaapa ta iema hne si riypa hne iema hne kiema a lala lie pahlyipalena tue li riypata ina chang. Hingpa uvnu pacaruv tie hne hingta si pakhaa pate Kornelias ing luo ca maa ngie.

¹³Ama ta a ing chunglie avuoming pakha zaa daa te, ‘Joppa luo kha cawsaa pathlie yi la Piter ama tapa Simon kha va paku sa yi;

¹⁴nama hne na chungkhue yalya ta khuona nama hmung riypata ama ta thuophaabie kha aca chang'a yi,’ a tapa kha malie a chang.

¹⁵Iema'a lie bie ri hruo i thu pahne a hruothu ningta kiema'a lie a cuopa haakhata iema cunglie kha Thlaapa Pathe a za cung.

¹⁶Cakhupahne Abyipa ta, ‘Johan ca tiy ta tiynawna kha a pi, cuorasala niema ca Thlaapa Pathe tana tiynaw pata nama cuo aa,’ a za tapa kha i kya thyi.’

¹⁷Zingsuv Khrih ma zang nakawta Khazing ta malie a pipa lasaw kha iema zaw a pi ra kie yi ca Khazing kha pakhuo khu riypata kama ca ahung tama i cuo?” a ta.

¹⁸Capa bie ca ama thyi tiyta vielie riypa hnyi li tlipa yi ta, Khazing kha pathuosa yite, “Khazing na Jentail ming zaw hing sue a ngiepachiy pata hring riypa cuophaa a pi ra yi,” ama ta.

¹⁹Steven kawlieta hrisaathieruena ang yite a chepatlaapa tie kha Fonisia, Saipras hne Antiok te khata chiy yite Judah ming'a lie dyi kha thuophaabie ama ri.

²⁰Cuorasala iema hraw lieca Saipras ruo ming hne Sairin ming aw ra yite iema cata Antiok luo kha si yite Abyi Zingsuv kaw Thuophaabie ca Grik ryi a cyipa Judah ming[40]'a lie zaw kha ama phu.

²¹Abyipa cahrana ca iema'a lie aw te cawsaa hluvpuv ta zang yite Abyipa'a luo kha amaa pali.

²²Capa thuohlaa ca Jerusalem Khrihsaabuv ta thyi yite Barnabas kha Antiok luo ca ama pathlie.

²³Antiok luo ca chiy te Khazing vihnyina kha a hmung tiyta a palung tluo hringhruo te iema kha ama palang ta Abyipa'a lie kha zangtluo aa tlasa pata ama aw pari riypa hne amaa pipase pari riypata a pasu yi.

²⁴Ama ca cawsaa phapa, Thlaapa Pathe hne zangna ta a bipa cuote cawsaa hluvpuv kha Abyipa'a luo a chiy yi.

²⁵Cakhutaata Barnabas ca Saul kha huv riypata Tarsas luo kha si te,

²⁶a hmung tiyta Antiok luo a vya chiyle. Kung kha chung bangkhuo Khrihsaabuv hne khata a taw yite cawsaa hluvpuv kha ama pacuv. Hingpa Antiok lie hingna ziytuv tie kha, “Khrihsaa,” tapata ama za u taa.

²⁷Khapa cuo ning kha profet chekha ca Jerusalem taata Antiok luo kha ama si.

²⁸Iema hraw taata pakha, a ming Agabas ama tapapaa kha a daa te chuelyi cung bangkhuo ta khuopuv ta cakuo a tlung aa tapa kha Thlaapa cahrana ta a rilu. (Capa cakuo ca Klaudias siepahruo a cuo ning khana a tlung).

²⁹Ziytuv tie khata iema ama ta khuna cyicuo ta Judah ruo lie a awpa zangtuv tie kha a byana pi riypata khue khuo yite,

³⁰byanapa ca Barnabas hne Saul kuv ta khrihsaa uvthyi tie'a luo kha ama paphya.