Read Lautu Chin Lucuotuv 13 Bible Online

Lucuotuv 13 - Lautu Chin bible

Lucuotuv 13

¹Antiok khrihsaabuv lie kha profet hne pacuvtuv chekha ama aw. Iema ca, Barnabas, Nikar tapata ama kupa Simeon, Sairin khypa Lusias, Herod bierina zung lie abyi a cuopa Minian hne Saul ta ama cuo.

²Sa ning a uv yite Khazing ama biena lie kha Thlaapa Pathe ta, “Barnabas hne Saul hing i changpa yi re kha ama hrie the riypata na sangpa pathlyi ung,” a ta.

³Cakhutaata sa ning a uvna hne thlaachuona ta ama luv cunglie kha ama kuv khang yite ama pathlie.

⁴Barnabas hne Saul ca Thlaapa Pathe pathliepa ama cuopa haata Seleusia khy luo kha si yite capa taacata Saipras luo kha tiypalaw ta ama si.

⁵Salamis luo kha chiy yite Judah ming apungna-ing chunglie kha Khazing bie ama phu. Iema a byatuv riypata Johan kha amaa chiy.

⁶Parala ruochung bangkhuo kha si yite Pafos khy luo te ama chiy ca pacuo a thepa, Judah profetpakhipa, a ming Bar-Zingsuv ama tapa kha amaa taw.

⁷Ama ca ruo-uvtuv Sergius Paulus ama tapa, cawsaa sing ciemuopa, Khazing bie a thyi khing nakawta Barnabas hne Saul a kutuvpapaa a viesaa ta a cuo.

⁸Pacuo a thepa Elimas (Grik ming) ta ruo-uv byipa kha Khazing a zang the li riypata Barnabas hne Paul kha a daakhuo yi.

⁹Cuorasala Paul ama tapa Saul ca Thlaapa Pathe ta bi te, ama kha taapuo pata mang te,

¹⁰“Setaa saacapaa, hmangpha bangkhuo cariepa, hanghiena hne phalina ta a bipa, aa dangpa Abyipa bie kha hanghie pata tue riypa hing taw buo'a va cama?

¹¹Naathlie tie, Abyipa kuv ta nama kha caa du'a te, cuokha chung na ming cue'a te ningkhepa kha hmung khu'a vaciy,” a ta. Sungkha ta myiching hne zingna ta pahlaw te a kuv ta a ca-yale riypa cawsaa kha pathuole te a huv.

¹²Ruo-uv byipa ta hmang a cuopa kha a hmung tiyta Khazing kha a zang, tahematapakieca Abyipa kaw ama pacuvpa khata a kharue a pahaa sa.

¹³Cakhutaata Paul hne a viesaa tie ca Pafos taakhata Pamfilia ruo Perga khy luo kha tiypalaw ta ama si. Cadyiseca Johan ca iema kha thuse yite Jerusalem luo a kaa.

¹⁴Cuorasala iema ca Perga taakhata Pisidia ruo Antiok luo kha ama pha. Sabbath ning kha apungna-ing luo vaa yite amaa tu.

¹⁵Phungbie caa-uv hne profet caa-uv ama ri khu taata apungna-ing uvtuv byipa ta iema kha, “Uvnu zaw pasuna bie nama ri khingpa a aw kieca ri tie ung,” a ta yi.

¹⁶Cacuonakawta Paul ca a daa te a kuv a pazuu khu taata bie ri hruo aa thu: Israel ming[42] hne Khazing abiepa Jentail ming zaw i bie hing naathlie tie ung.

¹⁷Hingpa Israel ming Khazing hingta ma mingchingmingvuo tie kha a tlaw yite Izipt ruo lie khy ama sa ning kha mingphang lepa ta a tue yi. A cahrapa a kuv ta capa ruo taacata a pyakhyi yi.

¹⁸Kung sawliy chung ruochung lie kha a mangsang yi.

¹⁹Kanaan ruo chunglie mingphang phang sariy kha a para khu taayita kung zapaliy sawngaa chung capa ruo ca ru ta a pi yi.

²⁰Cakhutaata bieripatuv kha profet Samuel chuo te ta a pi yi.

²¹Cakhutaata siepahruo kha a hie yite Khazing ta Benjamin mingphang Kish saacapaapa Saul kha pi yite kung sawliy chung siepahruo a cuo.

²²Ama kha phie te David kha siepahruo a pacuo sa. Ama kawlieta Khazing ta a ripa ca: ‘Kama palung naa hmungpa Jesse saacapaa David kha i hmung tli; tue se tapata i khingpa bangkhuo kha ama hingna a tue aa,’ a ta.

²³Hingpapaa ciypathla chung taahingta Khazing ta bie a za kuo tlipa haa yi khata Israel ming ca khuotuv Zingsuv kha a pi yi.

²⁴Zingsuv aa vaw hluo khata, Johan ta Israel ming'a lie kha sue a ngiepachiyna hne aa patuvpa tiy a nawna kaw kha a u khyilu tli.

²⁵Johan ca a re a tlung'a nang caw khata, “Kama hing ahung tapata ma ina rue ungciy? Kama ca nama huo nguoluopapaa khata cuo va ang; cuorasala ama ca kama hnang luo taata a vaw'a te kama ca a phyipakaw riy pathluo riypata hmuota a tla va ang,’ a ta yi.

²⁶“I uv i nu zaw, Abraham chung-khue ciypathla zaw'a nata, a hrangpa Khazing a ciyzaapa zaw, khuona thuophaa ca kiema'a[43] luo pi pata ma cuo tli.

²⁷Tahematapakieca Jerusalem lie a awpa tie hne ama uvthyi tie ta ama kha za pachang lipa yi ta sabbath ning kyry ta ama ripa profet tie bie zaw kha a siyluo thyi khu the vayi. Cadyiseca ama ama thiena thue khata profet bie kha ama patling sa.

²⁸Thie tluo aa tlapa suena a cunglie ama hmung li thluo pata thie riypata Pilat kha ama hie.

²⁹Ama kaw Caapathepa lie aa capepa bangkhuo ama tue diy khu taata, vieluo cung taakhata pachung yite thluo lie ama paby.

³⁰Cuorasala Khazing ta thiyna taata pathu te,

³¹ama hneta Galilee taata Jerusalem te khy a tlawhne tawpa tie'a lie kha ning hluvpuv aa luo. Iema ca cawsaa zaw'a lie kha a pachangkhyituv ta ama cuo.

³²Khazing ta ma mingchingmingvuo tie'a lieta bie a za kuopa yi thuophaabie khana ma ca vya phya yi.

³³Zingsuv kha pathu te kiema a samingsahlaa zaw cunglie hing a patling sa mangtli. Salm hlahningna lieta: Nama ca i saacapaa tana na cuo; Ata ning hing na paa tana i cuo,” tapata a cape.

³⁴Thiyna taata pathu sa tli te, thuvna luo khatiy tahmuo a kaa li tli riypa kaw kha Khazing ta a ripa ca, ‘David'a lieta a pathepa biekuona i za tuepa kha nama ica pi aa,’ a ta.

³⁵Cacuonakawta Salm caa-uv hmang hrang lieta a capepa ca, ‘A pathepa na cawsaapa ca thuvna a taw riypata pahya'a vaciy,’ a ta.

³⁶Tahematapakieca David ca ama chuo chunglie Khazing re kha a za hrie ra. A thiy tiyta[44] a mingching-mingvuo tie'a lie kha paby yite a pangpa ca thluo chunglie kha a thuv.

³⁷Cuorasala Khazing ta thiyna taata a pathupa ca thuvna kha a taw va tli.

³⁸Cacuonakawta, uvnu zaw, Zingsuv thue hing tana sue a ngiethena thuophaapa ca niema'a luo phu pata a cuo, tapa kha pachang tie ung.

³⁹Capa Zingsuv thue catana a zangpa bangkhuo ca Moses phungbie ta hya aca pazang sa khu lipa yi suena taakhata hya nama zang.

⁴⁰Cacuonakawta profet tie ta ama ripa bie kha nama cunglie a tlung li riypata a raaring tie ung:

⁴¹‘Mang tie ung, niema cawsaa pahnyisue a hmuopa tie, Nama kharue haa sala ra tie ung, Tahematapakieca niema chuo lieta i hriepa re hing, malie ta aca chang pachaapa yi tahmuo, nama zang buo hluo li riypatana a cuo,’ tapatana profet tie ta ama ri, a ta.

⁴²Paul hne Barnabas ca ama pyapuole pa khata hmiezaa sabbath ning thueta ama kaw kha ripakhaa riypata ama hry.

⁴³Apungna-ing lie apung ama pachuo taata Judah ming hne Judah biena luo a ngiepa Jentail ming hluvpuv khata Paul hne Barnabas kha ama ziy. Lucuotuv tie ta iema kha bie chang yite Khazing vihnyina chunglie ama aw pari riypata ama pasu.

⁴⁴Hmiezaa sabbath ningpa ca Abyipa[45] bie naathlie riypata a khypuv yalya chaa ta amaa hmya.

⁴⁵Cuorasala Judah ming ta cawsaazaapuv amaa hmyapa kha ama hmung tiyta ihnyi yite Paul ta a ripa kha esena cangta khuosa ta ama i.

⁴⁶Cakhutaata Paul hne Barnabas ca riephasa pata ri yite, “Niema'a lieta Khazing bie ri taa riypa hing a hu hringhruo. Cuorasala niema ta khing lipa ung cata chuozaa hringna hne aa phuv pata namaa rue li nakawta, ata hing ca kiema ca Jentail ming'a luo na maa pali'a tli.

⁴⁷Tahematapakieca Khazing ta bie malie a pipa ca: ‘Niema ca Jentail ming cuota khena cuo riypatana ica pachi tli yi, Cacuonakawta khuona kha chuelyi dena te ta phya tie ung,’” tapatana a cuo.

⁴⁸Capa bie ca Jentail ming ta ama thyi tiyta ama palung tluosa te Abyipa bie kha ama pathuosa. Chuozaa hringna hmung riypata lieriyoupoupa a hluvpuv kha zangtuv ta ama vya cuo.

⁴⁹Khazing bie ca capa ruo bangkhuo cata aa ze.

⁵⁰Cuorasala Judah ming ta Khazing abiepa hne pa-uvsathyi tluo aa tlapa Jentail canung tie hne khychung uvthyi tie kha pasu yite Paul hne Barnabas kha hrisaa yite ama ruo taata ama papya.

⁵¹Cacuonakawta iema cunglie ama palung tling lina paluosana ta ama phyipazaa lie buvcing kha a cakhawsue siy yite Ikonium luo kha ama si.

⁵²Ziytuv tie ca palungtluona hne Thlaapa Pathe ta ama bi.