Read Lautu Chin Lucuotuv 14 Bible Online

Lucuotuv 14 - Lautu Chin bible

Lucuotuv 14

¹Cahaa ngiethie cata Paul hne Barnabas ca Ikonium khy Judah ming apungna-ing luo kha vaa yite ama ri tawpa haakhata khuopuv ta ama ri ca Judah ming hne Grik ming hluvpuv kha zangtuv ta ama vya cuo.

²Cuorasala a zang lipa Judah ming ta Jentail ming kha pasu yite zangtuv tie kha ama padu sa.

³Cacuonakawta lucuotuv tie ca capa lieca cuo syipuv aw yite Abyipa bie kha riephasa pata ama ri. Abyipa ta ama ripa thuophaabie pacusana ta pahmungsana hne kharuehaa hmang tue khuna kha a pi yi.

⁴Cuorasala capa khypuv lie a awpa tie ca a che yite, Judah ming kuo luo phuvkha, lucuotuv tie kuo luo phuvkha ta ama aw.

⁵Cakhutaata Jentail ming hne Judah ming ta iema uvtuv tie hne khata lucuotuv tie kha tuechie riypa hne alung ta vaa riypata ama raw.

⁶Lucuotuv tie ta capa kaw ca ama pachang tiyta Likaonia ruo khypuv ta a cuopa tie Listra khy, Derbe khy hne a cahriy khyta luo kha amaa ruo.

⁷Capa lieca thuophaabie phu kha ama pazue.

⁸Aa puvkhyipa ta a phyi a cabie nakawta luo a cakuo buo lipapaa pakha ca Listra khy lie kha aw te,

⁹Paul ta a ripa bie kha naa a thlie. Paul ta tluo khuna riypa zangna na a hnyi tapa kha a hmung tiyta ama kha taapuo pata mang te,

¹⁰ue a suopuv ta, “Na phyi ta a dangta tah a daa tie,” a ta. Cawsaapapaa ca a kya daa te luo a cakuo.

¹¹Paul ta a tuepa kha cawsaazaapuv ta ama hmung tiyta, Likaonian ryi ta khuopuv ta khi yite, “khazing tie na cawsaa hmingsuo ta a zaa cung yi,” ama ta.

¹²Barnabas kha Zeus khazing tana a cuo ta yite Paul kha bie a rituv a cuo nakaw ta Hermes khazing tana a cuo ama ta.

¹³Khy khungthing ta lie a biena-ing a awpa Zeus khazing tluobyipa ta cuetungpa hne paapaapa pachiy kha khy hukaa luo vya cyi te cawsaazaapuv hne khata iema kha hriykhungrina ta abie amaa nang.

¹⁴Lucuotuv Barnabas hne Paul ta capa kaw ca ama thyi tiyta ama caw kha thlaa yite, cawsaazaapuv hraw luo a ruo yite,

¹⁵“Viesaa zaw,[46] khaapa hmang ma tue namaa nang? Kiema zaw niema haata cawsaa cakhawpa tana ma cuo. Thuophaabie kha ca vya phya yi pate hingpa thlahnena a hnyi lipa hmang taahingta alyi hne avuo hne riyliy hne a chunglie a awpa bangkhuo a satuvpa a hringpa Khazing'a luo namaa pali riypata caa changtuv tana ma cuo.

¹⁶Hluoning ca Khazing ta mingphang bangkhuo kha ama khingpa luo ziy riypata luo a pa-aw yi.

¹⁷Cuorasala a tuepa hmangphapa ta ama a awpa kha a paluo sa pari: avuo taata khy pasaa sa te ama'a na a cuo ta kung a pavyi sa, sa ca pi yite nama palung aca patluo yi,” ta yite khuosa ta ama u.

¹⁸Hing tluv bie ama ri patahmuo hriykhungrina ta abie amaa nangpa kha ama thlu khu sungsiyta khiy tana a cuo.

¹⁹Cuorasala Antiok taa hne Ikonium taata Judah ming kha a vaw yite cawsaazaapuv kha iema kuo luo a daa riypata ama ripasa khu. Cakhutaata Paul kha alung ta vaa yite a thiy tli tapata ama rue nakawta khyle luo kha amaa dale.

²⁰Cuorasala ziytuv tie ta ama cadung nguoluo ning kha Paul ca kya thu te khychung luo kha a vaa pakhaa. A mawluopa ta Barnabas hneta Derbe luo ama si.

²¹Paul hne Barnabas ca capa khy lieca thuophaabie kha chang yite ziytuv a hluvsa ama hmung. Cakhutaacata Listra, Ikonium hne Antiok luo kha ama vya kaa.

²²Ziytuv tie kha zangna aa hmuopa chunglie a cusa pata ama aw riypata pasu yite, “Khazing pena chung luo a ngie riypata ca ruvnaana a hluvsa ma ang riypatana a cuo,” tapata thaazuo ama pi.

²³Khrihsaabuv bangkhuo lie kha khrihsaa uvthyi tie ama chi khu taata ama zangpa Khazing'a luo kha sa uvna hne thlaachuona ta ama pi.

²⁴Cakhutaata Pisidia ruo kha cahrawpaa yite Pamfilia ruo luo ama si.

²⁵Perga lieta thuophaabie ama ri khu taata Attalia luo ama sibung.

²⁶Capa hmang taacata Antiok luo kha tiypalaw ta ama kaa. Antiok khy ca atalawlie ama palangpa ama re hrie riypa hingta Khazing duena chung luo ama za pinapa hmang khatana a cuo.

²⁷Capa khy luo ama chiy pahne ta zangtuv tie kha pahmya yite Khazing ta iema hmuo pata a hriepa bangkhuo hne tuokhaatama Khazing ta Jentail ming cuota zangna chiypakaa a pahawpa ra yi tapa kaw kha ama chang.

²⁸Capa lieca zangtuv tie hne cuo syipuv ama aw pakhaw.